Dios yejua sen juez yejuan kichiua tlen melajki
50
ToTEKO yejuan Dios más ueyixtikaj xken on dioses, yotlajtoj.
Yokinnots on yejuan nemij nochiuiyan ipan in tlaltikpaktli,
desde ikisayan tonaltsintli, hasta kampa ikalakiyan.
2 Iueyilis Dios ken tlauijli uajtlauiljtikaj
desde Sión, ipan on sanoyej kualtsin ueyikalpan Jerusalén.
3 ToDios ye uajlau, pero yejua xuajnontitiu.
Yej, uajkakistitiu
pampa iyakapan uajlau sen tlitl
yejuan nochi kitlatia ikan chikauak kakistilistli,
niman iyeualkan uajlau sen chikauak ajakakiautli.
4 Desde ne tlakpak Dios kinnotsa on ángeles
yejuan nemij ne iluikak, niman on tlakamej
yejuan chantij ipan in tlaltikpaktli,
ken testigos para ma imixpanti
ken kinyolkuitis itlapejpeniluan.
5 Yejua kijtoua:“Xkinsentlalikan on
yejuan nochipa kitlaliaj iminyol notech,
on yejuan onechmakakej uentli
para okichijkej pacto* nouan.”
6 Niman on yejuan chantij ipan iluikak kijtouaj
ika Dios yejua sen teyolkuitijketl
yejuan kichiua nochi tlen melajki.
7 Kemaj Dios okijto:
“Xnechkakikan notlapejpeniluan israelitas.
Nejua nemechtlajtlakolmakas ken kitocaroua.
¡Nejua niDios! ¡Nejua ninemoDios!
8 Xnemechajua ipampa on uentin
yejuan nennechuentlaliliaj
niman on uentin de yolkej
yejuan nochi tlatla,
yejuan nochipa nennechmakaj.
9 Pero xnimitstlajtlanilia xnechinmaka on chivos
niman on becerros yejuan kisaj itech moyolkauan,
10 pampa nochimej on tepeyolkej
yejuan nemij ipan on kojyoj
niman on miles yolkamej
yejuan nemij ipan on tepemej,
nochi nejua noyaxkauan.
11 Nochimej on totomej
yejuan patlantinemij ipan on tepemej,
niman nochimej on yolkej
yejuan nemij neka ipan campo,
nochi nejua noyaxkauan.
12 Tla nejua napismikiskia,
xnemechtlajtlaniliskia xnechtlakualtikan,
pampa nochi in tlaltikpaktli nejua noyaxka,
niman nochi on tlen onkaj ipan.
13 ¿Tlen nejua nikua uakaxnakatl,
noso nikoni inyesyo chivos?
14 Yej, nikneki xnechmakakan nejua
yejuan más niueyixtikaj Dios
tlajsojkamachilistli ken sen uentli
niman no xchiuakan nochi on promesas
yejuan nenkichiuaj nouan.
15 Xnechnotsakan ijkuak itlaj mechpajsolos,
niman nejua nemechmanauis,
niman nemejuamej nennechueyiliskej.”
16 Pero on yejuan xompayejyeuamej,
Dios ijkin kimijlia:
“Maka xteneuakan noleyes
noso maka xteneuakan ika nenkitlakamatij nopacto*,
17 pampa xnenkinekij ma nemechmelajkatlali,
niman xipan nenkitaj notlajtoltsin.
18 On tlachteketl nenkipakaseliaj niman nenkitlajpalouaj.
Nemouikaj iuan on yejuan auilnemi.
19 Ikan nemokamak nenkijtouaj xkuajli tlajtojli.
Niman ikan nemokamak nentlakajkayauaj.
20 Nenkuijuikaltiaj nemokniu.
Ikoneu nemonanaj nenkitlajtolketsteuiliaj.
21 Maski nochi in yonenkichijkej, yonenkichijkej,
nejua xitlaj* onemechijlij.
Yejua ika, onenkinemilijkej ika nejua no niijki ken nemejuamej.
Pero yekos tonajli, nemechixkomakas,
niman nemechyolkuitis de nochi tlinon onenkichijkej.
22 Kuajli xkajsikamatikan yejua in nemejuamej
yejuan nenkelkauaj Dios,
le nemechmiktis niman xnemis akin mechmanauis.
23 Yejuan nechmaka tlajsojkamachilistli ken sen uentli,
nechtlakaita.
Nejua nikmakixtis on yejuan xkitlalkauiya noojui.”