NoTEKO, xnechikneli niman xnechtlapojpolui
51
Ay Dios, xnechikneli* pampa motetlajsojtlalis* xkaman tlami.
Xpopolo notlajtlakoluan ikan moueyiteiknelilis.
2 Xnechchipaua de nochi on tlen xkuajli onikchiu.
Xnechpopolouili nochi notlajtlakol.
3 Nikmati ika xonimitstlakamat.
Notlajtlakol xueli nikelkaua.
4 Motech yonitlajtlakoj.
San tejua motech yonitlajtlakoj.
Niman mixpan onikchiu tlen xkuajli.
Yejua ika, tejua tikchiua ken kitocaroua
ijkuak tinechyolkuitia niman tinechtlajtlakolmaka.
5 Tej, melauak ijkuak onitlakat, ye nikpiyaya tlajtlakojli.
Desde ijkuak oninochiu ijtik nonanaj, ye nikpiyaya tlajtlakojli.
6 Tej, melauak tejua tiktlajsojtla on yejuan yolmelajki.
Yejua ika, xnechmaka tlamachilistli ipan nonemilis.
7 Nimitstlajtlanilia, xnechchipaua de notlajtlakoluan
kenon tiopixki techipaua ikan ixojyomatsitsiuan on kojtli hisopo,
niman melauak ijki nichipauis.
Xnechpajpaka, niman más niistayas xken on nieve.
8 Xnechtemiti ikan pakilistli niman melauak ma nipaki.
Oksejpa xnechpakti maski yotinechtlajyouiltij.
9 Makasa xkita notlajtlakoluan,
niman xpopolo nochi tlen onikchiu.
10 Ay Dios, xnechmaka noyojlo yejuan chipauak
niman notlamachilis yejuan yenkuik
yejuan nochipa kinekis mitstlakamatis.
11 Maka xnechejkuani mixpan,
nion maka xnechkuili moyekEspíritu.
12 Xnechkauili para oksejpa ma nikmati on pakilistli
yejuan onikpix ijkuak otinechmakixtij.
Niman xnechmaka notlamachilis
yejuan nechpaleuis para nochipa nimitstlakamatis.
13 Kemaj nikinmachtis motlanauatiluan on tlajtlakolejkej,
niman on tlajtlakolejkej noyolpatlaskej niman uajlaskej motech.
14 Ay Dios, notemakixtijkatsin,
xkixti notlajtlakol pampa onitemiktij.
Kemaj ninokuikatis ika tejua tiyolmelajki.
15 NoTEKO, xnechpaleui,
niman kemaj ikan nokamak ninokuikatis on moyekteneualis.
16 Tejua tej, xtikneki on tlajtlamach uentli, qqnion on uentli yejuan nochi tlatla.
Nejua yejua nimitsmakaskia,
pero xtikselia on uentli.
17 Para tejua noTEKO, tla se yolyemanki motechika, on yejua más kuajli uentli mitsmaka.
Tejua noDios, xtikchichiua on tlakatl
yejuan melauak noyolkokoua, niman noyolpatla.
18 Ikan moteiknelilis xkintiochiua
on yejuan chantij ne Sión.
Xchijchiua oksepa on tepanchinantin
yejuan onkaj iyeualkan Jerusalén.
19 Kemaj mitspaktis on yejuan ika tlamanalos ken kinamiki.
On tlajtlamach uentli niman on uentli
yejuan nochi tlatla ipan motlaixpan* mitspaktis,
Niman no kinuentiskej becerros ipan motlaixpan*.