On xompayejyeua xitlaj ika kipaleuiya iueyimatilis
52
Tejua, yejuan timoteneua tiueyixtikaj:¿Tline sanoyej timoueyimati ikan on moxompayejyeualis?
¡Tejua xtiktlakaita Dios yejuan nochipa tetlajsojtlaj!
2 Tejua san ika timokaua tikchiua tlen xkuajli, pampa sanoyej titlakajkayaua. On monenepil tekokoj tlen kijtoua, no ijki ken tekokoj teteki sen cuchillo.
3 Más tikuelita tikchiua tlen xkuajli xken on tlen kuajli,
más tikuelita on tlakajkayaualistli xken on tlen melauak.
4 Tejua tlakajkayajketl,
tikuelita tlamach tikijtouilia se para sanoyej ma najmana.
5 Pero Dios mitspopolos para yeika;
yejua mitskixtis ipan mochan,
niman mitskixtilis monemilis.
6 Ijkuak on yejuan kitlakamatij Dios ijkon kitaskej,
nomojtiskej.
pero moka uetskaskej niman ijkin kijtoskej:
7 "Xkitakan ken ipan nochiua
yejuan xkitlalia iyojlo itech Dios,
yejuan yej kitlalia iyojlo ipan iriquezas,
niman xkineki kajkauas ixompayejyeualis."
8 Pero nejua ninemi ken sen olivojkojtli
yejuan xoxojki,
yejuan onkaj ipan iueyitiopan Dios.
¡Nejua nochipa niktlalis noyojlo ipan itetlajsojtlalis Dios
yejuan xkaman tlamis!
9 NoDios, nochipa nimitsmakas tlaxtlauijli
ipampa nochi on tlen yotikchiu.
Nochipa motech niktlalis noyojlo inmixpan on yolchipajkej,
pampa tejua sanoyej kuajli moyojlo.