On tlakamej yonochijkej xompayejyeuamej
(Sal 14.1-7)
53
On tlakamej yejuan tontos kijtouaj kitl: "Xnejli nemi Dios."
Nochimej yonokuepkej xkuajkualtin tlakamej.
Yejuamej kichiuaj tlen sanoyej xkuajli.
¡Xok nemi nion se yejuan kichiua tlen kuajli!
2 Desde ne iluikak,
toTEKO kinualitstikaj on tlaltikpaktlakamej
para kitas tla yakaj nemi yejuan tlamatki,
tla yakaj kitejtemoua Dios.
3 Pero yej, nochi tlakatl yokajsik xkuajli ojtli;
nochimej yonokuepkej xompayejyeuamej.
¡Xok yakaj nemi yejuan kichiua tlen kuajli!
¡Nion se tlakatl xnemi yejuan kichiua tlen kuajli!
4 On xompayejyeuamej xitlaj* kajsikamatij;
yejuamej kuelitaj kinmiktiaj notlapejpeniluan
ken tla kikuaskiaj pan.
¡Yejuamej xkaman noueyikatsajtsiliaj itech toTEKO!
5 Yejuamej, maski xonkaj tlinon kimakajsiskej,
sanoyej kuekuetlakaskej,
pampa Dios kinchajchayaua inomiyouan on nemotlauelikniuan.
Nopinajtiskej, pampa Dios xkiminneki.
6 ¡Ma Dios kichiua, ma ualeua ne Jerusalén
akinon kinmanauis on israelitas!
Ijkuak toTEKO kinuajkuepas itlapejeniluan
yejuan okinuikakej ipan okse país,
sanoyej pakiskej on iuejkakoneuan Jacob.
Nochimej on israelitas sanoyej pakiskej.