On nemilistli san panoua
39
Yonikijtoj ika kuajli ninouikas,niman xnitlajtlakos ika nonenepil.
Ninokamatsakuas
ijkuak on xkuajkualtin tlakamej nemiskej nixpan.
2 Ijkon tej, ninochiuaya ken yakaj nontsin.
Xitlaj nikijtouaya, nion nikijtouaya itlaj tlen kuajli.
Pero nonekokol más ueyixtiaya.
3 Ipampa noyolpajsolouilis, nikmatiya noyoltsin
ken tlatlaya ipan noyelpan.
Chika niknemiliaya, on tlitl más otlikuik.
Kemaj onitlajtoj chikauak.
4 Ijkin onikijtoj:
“NoTEKO, xnechijli kech ika uejkauis ninemis,
niman kamanon nimikis,
para ijkon nikmatis
ken amanaman panos nonemilis.
5 Otinechmakak sen nemilistli yejuan semi xuejkaui.
Nonemilis xitlaj* kijtojtikaj mixpan.
Nochi tlakatl san panotikisa inemilis, panotikisa ken itlaj ijyotl.
6 Inemilis nochi tlakatl panoua ken sen tlaseuajlotl.
Sanenkaj kimiyekiliaj iminriqueza,
pampa xkimatij akinon itech nokauas ijkuak mikiskej.
7 “Tla ijkon noTEKO, ¿tlinon uelis nikchas?
San tejua motech nitlamacha.
8 Maka xnechkauili ma nitlajtlako más.
Niman maka xkinkauili on yejuan xtlamatkej* noka ma uetskakan.
9 Oninochiu ken yakaj ninontsin.
Nejua xitlaj* onikijtoj
pampa nocastigo tejua tinechmaka.
10 NoTEKO, makasa xnechtlajyouilti más.
Tinechmiktis tla xtinechejkuanilia mocastigo.
11 Ijkuak ticastigaroua sen tlakatl
ipampa itlajtlakol yejua ika tikchikajkanotsa,
tlami tikxoxotonilia on tlen más kitlajsojtla,
ken yakaj kixoxotoniliskia inemilis sen pochauistli.
Nochi tlakatl san panotikisa inemilis ken itlaj ijyotl.
12 “NoTEKO, xkaki nooración.
Xkaki tlinon nechajmana.
Xnechnankili ipan nochokilis.
Ijkin xchiua,
pampa para tejua, nejua ken se yejuan xnichanej,
kenon yejuan san panoua achitsin techan,
no ijki ken nouejkatajuan san opanotikiskej.
13 NoTEKO, Maka xnechita ikan tlauejli,
yej xnechkauili ma nipaki chika xe nimiki.”