Ueyikatsajtsilistli para kitlajtlaniliaj Dios ma kimpaleui
38
NoTEKO, maka xnechajua ijkuak tikualantikaj,nion maka xnechcastigaro ijkuak sanoyej tikualantikaj,
2 pampa motlaminaluan nopan yotlalakkej,
niman mocastigo nopan onkaj.
3 Tikualani ipampa notlajtlakoluan.
Ipampa notlajtlakoluan, nochi notlalnakayo kualo,
niman hasta nochimej noomiyouan nechkokouaj.
4 Notlajtlakoluan sanoyej nopan yoyetiyakej.
In sen tlamamajli yejuan xok niueli nikeua.
5 Ipampa notontojyo niman ika xnitlakakayoj
notsotsouan palanij niman moloniaj.
6 Nochi tonajli ninajmantinemi.
Sa ninotsonakapilojtinemi niman xok nikojtik.
7 Nochi notlalnakayo sanoyej totonia.
Nochi notlalnakayo kualo.
8 Semi nikuejkuechijtikaj, niman xok nikojtik.
Nonekokol ualeua hasta ipan noyojlo.
9 NoTEKO, tejua tikmati nochi tlen nikneki.
Ijkuak ninejeltia pampa xnikpiya on tlen nikneki,
tejua tikmati pampa tejua xueli itlaj nimitsiyanilia.
10 Noyojlo sanoyej tejtekuini.
Nikmati ika xok nikojtik.
Hasta nixtololojuan xok kuajli tlachaj.
11 Notlajsokaikniuan niman nocompañeros,
san uejka nechalitstokej pampa notsotsouan nayotiaj.
Niman hasta on yejuan ken nikinta no san uejka nechalitstokej.
12 On yejuan kinekij nechmiktiskej, nechtlaliliaj tlatlalitin,
niman on yejuan kinekij nechchiuiliskej tlen xkuajli,
kijtouaj nochi tlen xmelauak para ika nechtlajkaliskej.
Nochi tonajli kitejtemouiliaj tlinon xkuajli nechchiuiliskej.
13 Pero nejua ninochiua ken xnikaki ken yakaj nitsatsa,
nion xnitlajtoua ken yejuan nontsin.
14 Nejua ninochiua ken yejuan xtlakaki,
nion yejuan xueli itlaj kijtoua para nomanauis.
15 Nejua, nimitscha tejua noTEKO Dios,
para yej tejua tikinnankilis notlauelikniuan.
16 Nimitstlajtlanilia, maka noka ma uetskakan on notlauelikniuan.
Maka ma kijtokan yonechtlankej,
ijkuak niuetsi.
17 Machisti ken ye niuetstikaj.
Nonekokol xkaman nechkaua nion achijtsin.
18 Ninoyolkuitia de notlajtlakoluan,
pampa sanoyej nechajmanaj.
19 Notlauelikniuan sanoyej miyekej niman kojtikej.
Miyekej nechtlauelitaj maski xitlaj* nikinchiuilia.
20 On tlen kuajli onikchiu,
onechtlaxtlauilijkej ika on tlen xkuajli.
Niman pampa niktejtemoua nikchiuas tlen kuajli,
yejuamej nechtlauelitaj.
21 NoTEKO, maka xnechkaua noselti.
NoDios, maka xnechtlalkaui.
22 NoDios niman notemakixtijkau,
maka xmouejkaua para tinechpaleuis.