Iminojui on kuajkualtin niman on xkuajkualtin
37
Maka xmotenmati inpampa on xkuajkualtin tlakamej,nion maka xkinnexikolita on yejuan kichiuaj tlen xkuajli,
2 pampa amanaman uakiskej ken itlaj sakatl.
Pijpiliniskej ken itlaj xojtli.
3 Xtlali moyojlo itech toTEKO, niman xchiua tlen kuajli.
Xmochanti ipan ontlajli,
niman nochipa xmouika iuan toTEKO.
4 Xtlajsojtla toTEKO
niman yejua mitsmakas on tlen tikneki tipiyas.
5 Monemilis xtlali ipan imauan toTEKO;
itech xtlalia moyojlo, niman yejua uajlas para mitspaleuis.
6 ToTEKO kichiuas de on ken kuajli timouika,
ma pannesi ken tlastajlotl niman on tlen melajki tikchiua,
kichiuas para ma petlani ken tonaltsintli ijkuak tlakaualispan.
7 Maka itlaj xkijto ixpan toTEKO,
yej xtlamacha ikan yolseuilistli hasta ijkuak yejua mitspaleuis.
Maka xmotenmati tla on xompayejyeuamej kichiuaj tlen xkuajli
ken yejuamej kinekij.
8 Maka xkuajkualani, xkaua on tlauejli,
pampa tla san tikuajkualani,
nochi tlen tikchiuas xok kuajli kisas.
9 On yejuan xompayejyeuamej kinkixtiskej ipan on imintlal.
Pero on yejuan kitlaliaj inyojlo itech toTEKO,
kinoyaxkatiskej in tlajli.
10 San xuejkajtika on xompayejyeuamej popoliuiskej.
Maski tikintejtemos, xok tikinnextis.
11 Pero on yejuan yolyemankej itech toTEKO,
kiseliskej on kuajli tlajli.
Niman sanoyej pakanemiskej ikan yolseuilistli
pampa xitlaj* kimpajsolos.
12 Sen xompayejyeua kinemilia
kenijki kichiuilis tlen xkuajli on tlakatl yolmelajki,
niman sanoyej kitlaueltlajtlata.
13 Pero toTEKO san ika uetska
pampa kimatstikaj ika xuejkajtika kiselis icastigo.
14 On xompayejyeuamej kixikopinaj iminespada
niman kitiliniaj iminarco, para kinuijsokiskej
yejuan mayankej niman xitlaj* kipiyaj,
para kinmiktiskej yejuan kuajli nouikaj.
15 Pero sano ika iminespada kinmiktiskej,
niman iminarco tepojpostekiskej.
16 On tlen achijtsin kipiya on yolmelajki tlakatl,
más kuajli xken nochi on ricojyotl
yejuan kipiyaj miyekej tlakamej xomapayejyeuamej,
17 pampa toTEKO kinkixtilis imimpoder on tlakamej
yejuan xompayejyeuamej.
Pero kinmanauis on tlakamej yejuan kuajli nouikaj.
18 ToTEKO kincuidaroua yejuan melajki nouikaj,
niman imiherencia nochipa kipiyaskej.
19 Ijkuak xtlatlakis niman onyas mayantli, xtlajyouiyaskej,
pampa yejuamej kipiyaskej tlen kikuaskej.
20 Pero on xompayejyeuamej mikiskej.
Itlauelikniuan toTEKO tlatlaskej ken xojtli yejuan uaki
niman popoliuiskej ken poktli.
21 On xompayejyeuamej tlakamej kinotlaneuiyaj itlaj
niman xokaman kitlaxtlauaj,
pero on yejuan kuajkualtin tlakamej tepaleuiyaj ika on tlen kipiyaj.
22 On yejuan tlatiochijtin de toTEKO, kiseliskej herencia de in tlajli,
pero on yejuan kintlauelia toTEKO nochimej popoliuiskej.
23 ToTEKO kiyekana sen kuajli tlakatl ipan kuajli ojtli,
niman kimanauiya on yejuan kipaktia toTEKO.
24 Maski nokxitechakuanis,
xuetsis pampa toTEKO kimayantiu.
25 Nejua oniaj nitelpokatl, niman aman ye niueuentsin.
Pero xkaman onikitak sen yolmelajki tlakatl nemi ipan mayantli,
nion xkaman onikintak notlayejyeuiyaja ikoneuan.
26 Yejua nochipa teiknelia niman itlaj tetlanejtia.
Ikoneuan nochiuaj sen tlatiochiualistli
para yejua niman oksekimej
27 Xtlalkaui nochi tlen xkuajli niman xchiua nochi tlen kuajli.
Niman ijkon tejua niman mouejkakoneuan nochipa kipiyaskej
on ueyitlalpan kampa Dios omechmakak,
28 pampa toTEKO kitlajsojtla* on yejuan yolmelajki
niman xkaman kintlalkauiya
on yejuan melauak kitlaliaj iminyojlo itech.
Yejua kimanauiya on yolmelajki para nochipa,
pero on yejuan xompayejyeuamej kimpopolos iminuan iminkoneuan.
29 On yolmelajkej tlakamej kinmakaskej on kuajli tlajli,
para ipan chantiskej nochipa.
30 On yolmelajki tlakatl tlajtoua ikan tlamatkilistli,
niman kijtoua tlen melajki.
31 Kikti ipan iyojlo on itemachtil iDios,
niman ijkon xkaman uetsis ipan tlajtlakojli.
32 On xompayejyeua nochipa kipijpixtinemi on yolmelajki tlakatl para kimiktis.
33 Pero toTEKO xkauilis ma uetsi ipan imauan,
nion xkitekauilis ma kitlajtlakolmakakan
ijkuak kiteixpauiskej ixpan on tekiuaj.
34 Xtlali moyojlo itech toTEKO niman xtlakamati,
niman yejua mitsueyiteneuas
niman mitsmakas in tlajli ken herencia.
Niman no tikitas ken popoliuiskej on xkuajkualtin tlakamej.
35 Onikitak sen tlakatl yejuan sanoyej xompayejyeua.
Yejua oueyixtiaj niman oteyakapanauij
ken itlaj cedro yejuan sanoyej mayeualtik.
36 Pero nimantsin opopoliu, niman xok kanaj ones.
Oniktejtemoj niman xok oniknextij.
37 Pero xkita on tlakatl yejuan yolchipauak niman yolmelajki.
Nochi kuajli kisas para in tlakatl yejuan kitlajsojtla yoltlalilistli.
38 Pero nochimej on tlajtlakolejkej kimpopoloskej,
niman iminuejkakoneuan on xompayejyeuamej popoliuiskej.
39 ToTEKO yejua kinmakixtia on yolmelajkej tlakamej.
Yejua kinmanauiya ijkuak tlajyouiyaj.
40 ToTEKO kimpaleuiya ma cholojteuakan.
Kinmejkuania intech on xompayejyeuamej,
niman kinmanauiya,
pampa yejua itech kitejtemouaj manauilistli.