Ixompayejyeualis sen tlakatl niman itetlajsojtlalis Dios
36
On tlajtlakojli kiyolmatoka sen tlakatl para ma kichiua on tlen xkuajli.
Kinemilia ika xnoneki kimakajsis Dios.
2 Pampa yejua sanoyej noueyimati,
xueli kita ika sanoyej xompayejyeua.
3 Yejua tlauijuikaltia niman tlakajkayaua.
Yokipoloj itlamachilis,
niman xok kipiya tlamatkilistli
nion kichiua on tlen kuajli.
4 Ijkuak tlayoua ipan itlapech
kinejnemilia on tlen xkuajli kichiuas.
Sanoyej yonoyoltechikau ipan on xkuajli ojtli.
Yejua ika, xkajkauas on tlen xkuajli.
5 Pero motetlajsojtlalis yejuan xkaman tlamis, noTEKO,
kitemiltia nochi on cielo;
on kuajli moyojlo ajsi hasta ipan moxtli.
6 On moyolmelajkilis sanoyej ueyixtikaj
kenon uejueyimej tepemej;
on omelajkilis ueyixtikaj kenon ueyi mar
yejuan sanoyej uejkatlan.
Tejua noTEKO, tikincuidaroua on tlaltikpaktlakamej
niman on yolkej.
7 ¡Ay noDios, sanoyej ueyi kitosneki motetlajsojtlalis*
yejuan xkaman tlamis!
Tikmanauiya nochi tlakatl
ijkon ken sen tototl kinmanauiya ikoneuan tlatsintlan de imastlakapaluan.
8 Kuajli ixuij, ika on sanoyej miyek tlakuajli yejuan onkaj mochan,
niman tejua tikinmatliltia ipan on río yejuan moyaxka*
kampa onkaj uelik atl,
9 pampa mopan kisa nochi nemilistli,
niman ika motlauil titechtlauiluiya.
10 Xkinmaka nochipa motetlajsojtlalis*
yejuan xkaman tlamis,
on tlakamej yejuan mitsixmatij,
niman xchiua tlen melajki impampa on yejuan kuajli iminyojlo.
11 Maka xnechtekauili nopan ma chojcholokan on yejuan noueyimatij,
nion maka ma nechmajmapeuakan on xompayejyeuamej.
12 ¡Xkitakan kenijki uetsij on xkuajkualtin tlakamej!
¡Uetsij para xokaman uelis nokuiteuaskej!