Sen ueyikatsajtsilistli para kitlajtlanij itepaleuil toTEKO
35
Xkinmixnamiki noTEKO, on yejuan nechixnamikij.Tejua xkinuijsoki on yejuan nechuijsokij.
2 Ika moescudo* niman motepos,
xuajla niman xnechmanauiki.
3 Xkajsi molanza
niman ika xkinmixnamikiki on yejuan nechtotokatinemij.
Xnechijli ika tejua tinechmanauis.
4 On yejuan kinekij nechchiuiliskej itlaj tlen xkuajli
ma cholojteuakan ika impinauis.
5 Ma kinuika ajakatl ken ijkuak on polokatl ajkotokoua
ijkuak on ángel yejuan toTEKO kuajtitlani, kintojtoka.
6 Ipan iminojui ma tlayouatia niman ma tlalaua
ijkuak on ángel yejuan toTEKO kuajtitlani, kintojtoka.
7 Xkipiya tline okitlalikej sen matlatl para onechtlatlalilijkej,
niman okichijchijkej sen tlaltekontli para ompa ma niuetsiti.
8 ¡Yejua ika impan ma uetsi sen castigo yejuan xkichixtokej!
¡Sano yejuamej ma xinitij ipan on tlatlalijli kampa onechtlatlalilijkej!
¡Ipan on tlaltekontli yejuan okichijchijkej,
sano yejuamej ompa ma xinitij!
9 Kemaj noalmajtsin sanoyej pakis
ipampa on tlen noTEKO okichiu,
pampa yejua onechmakixtij.
10 Niman ika nochi noyojlo nikijtos:
“¡Xakaj ijki ken tejua noTEKO!
On yejuan xkotijkej,
tikinmanauiya imintech on yejuan más kojtikej.
On yejuan xtlaj kipiyaj niman mayankej,
tikinmanauiya imintech on yejuan kintlaixpachouiliaj.”
11 On xkuajkualtin tlakamej nechtlajtolketsteuiliaj ne ixpan on tekiuaj,
niman nechtlajtoltiaj on tlen xnikmati.
12 On tlen kuajli onikinchiuilij,
onechtlaxtlauilijkej ika on tlen xkuajli.
Niman on sanoyej nechyolkokoua.
13 Pero ijkuak yejuamej kualouayaj nejua ninajmanaya.
Impampa yejuamej, oninotlakentij
ika on ajmankatlakentli* tejsontik,
niman ninosauaya,
niman nojtikopa nochipa nikchijtikatka oración impampa.
14 Nejua ninajmanaya ken tla mikisia nonanaj.
Ninajmanaya ken tla notlajsojkaikniu yeskia,
noso ken tla mikisia nokniu.
15 Pero ijkuak nopan ouajlaj tlajtlamach* tlen xkuajli,
nochimej san sekan onechuejuetskilijkej.
Onechuetskilijkej ken yejuan xchanejkej
niman yejuan xnikinmixmati.
Niman xnoseuiyayaj ika nechmajmailiayaj.
16 Onechuejuetskilijkej ken yakaj yejuan temotij tlajtlachaskia,
niman sanoyej onechtlaueltlajtlatakej.
17 NoTEKO, ¿Hasta kamanon san titlachixtias?
Xmanaui nonemilis pampa xnikpiya okse nemilistli.
Maka nechkuaskej in leones yejuan nanalkatinemij.
18 Ijkuak ijkon tikchiuas,
nimitsmakas tlaxtlauijli imixpan
kampa motlapejpeniluan nosentlaliaj.
Nimitsyekteneuas kampa sanoyej tojlan.
19 Maka noka ma uetskakan notlauelikniuan
ijkuak nechtlanij.
Maka hasta ma ixuetskakan ikan pakilistli
on yejuan sanoyej nechtlauelitaj,
maski xkipiyayaj tline nechtlauelitaskej.
20 Yejuamej xkitejtemouaj yolseuilistli.
Yej kitejtemouaj kenijki kinteixpanuiskej
on yejuan san kuajlotika nemij ipan in país.
21 Sanoyej chikauak nechtsajtsiliaj, niman kijtouaj:
“¡Ikan tixtolouan otikitakej on tlen otikchiu!”
22 NoTEKO, tejua tikmati nochi in tlajtlamach*.
!Xnechnankili!
¡Maka xnechtlalkaui!
23 ¡Xtlacha, xmokuiteua
niman xnechmanaui noDios niman noTEKO!
Xchiua nopampa tlen melajki.
Nopan xtlajto.
24 Xnechyolkuiti noTEKO niman noDios,
niman xkijto ika xnikpiya tlajtlakojli
pampa tiyolmelajki.
Niman makasa noka ma uetskakan.
25 Maka ijkin ma kijtokan,
nion ma kinemilikan:
“¡Ijkin tiknekiyaj tikitaskej!
¡Yotlan tikixpolouaj!”
26 Ka, maka ijkon kijtoskej.
Yej yejuamej ma nopijpinajtikan niman ma nopopolokan
on yejuan noka uetskaj
pampa nitlajyouiya.
Niman yejuamej sanoyej ma pinauakan
yejuan kinemiliaj más ueyixtokej xken nejua.
27 Pero ma pakikan niman ma tsajtsikan ikan paktli
yejuan kinekij nechitaskej nitlamanauijli.
Ma kijtokan nochipa:
“¡ToTEKO sanoyej ueyixtikaj!
Yejua sanoyej paki
ijkuak kita kuajli nemi itekitkau.”
28 Ijkuak ijkon nochiuas,
ika nokamak nikijtos nochi tlen melajki tikchiua,
niman nimitsyekteneuas nochi on tonajli.