Kuikatlaliltin para toTEKO pampa kuajli iyojlo
34
Nochipa nikyekteneuas noTEKO;nokamak nochipa kiueyilis.
2 Nejua nikteneua noTEKO ipampa nochi on tlen onechchiuilij.
Xkakikan niman xpakikan, tlakamej yolyemankej.
3 Ma tikueyiteneuakan,
niman ma tiktlakaitakan san sekan iueyitokatsin toTEKO.
4 Oninoueyikatsajtsilij itech noTEKO niman yejua onechkak,
niman onechmanauij de nochi nonemojtil.
5 On yejuan kitlaliaj inyojlo itech toTEKO
kisejliaj sanoyej ueyi yolpakilistli,
niman yejuamej xkaman nopijpinajtiskej.
6 Nejua akin niajmankatlakatl oninoueyikatsajtsilij itech noTEKO,
yejua onechkak, niman onechmanauij de nochi nomojkayo.
7 On ángel yejuan toTEKO okuajtitlan nemi nisiu
niman kinmanauiya on yejuan kitlakaitaj,
niman yejua kinmakixtia.
8 Xtlatlatakan toTEKO niman nenkitaskej
ika yejua sanoyej kuajli iyojlo.
Sanoyej paki on tlakatl
yejuan kineltoka ikan nochi iyojlo.
9 Xtlakaitakan toTEKO, nemejuamej
yejuan yolchipajkej itech Dios,
pampa xitlaj* kimpolos on yejuan kitlakaitaj.
10 On ricos uelij nokuepaj mayankej
niman tlajyouiyaj ikan apistli,
pero on yejuan kitejtemouaj toTEKO nochipa kipiyaskej tlen kuajli.
11 Xuajlakan nokoneuan niman xnechkakikan.
Nemechmachtis kenijki nenkitlakaitaskej toTEKO.
12 ¿Tikneki tiuejkauis tinemis?
¿Tikneki tipakis ipan monemilis?
13 Tla ijkon tej, maka xkijto tlen xkuajli,
niman maka kaman xkijto tlen xmelauak.
14 Xtlalkaui nochi on tlen xkuajli,
niman xchiua tlen kuajli.
Xtejtemo yolseuilistli,
niman ipan xmouika ikan nochi moyojloj.
15 ToTEKO kinta niman kincuidaroua on yolmelajkej tlakamej,
niman yejua kinkaki ijkuak noueyikatsajtsiliaj.
16 ToTEKO kintlauelita
on yejuan kichiuaj tlen xkuajli,
niman kimpopoloua ipan in tlaltikpaktli
para makasa ma kinmelnamikikan.
17 ToTEKO kaki on yolyemanki* tlakatl ijkuak noueyikatsajtsilia,
niman kimanauiya de nochi itlajyouilis.
18 ToTEKO nemi nisiu para kinyoltlalia
on yejuan sanoyej noyolkokouaj,
niman kinmakixtia
on yejuan xok kipiyaj tlamachalistli*.
19 Sen yolmelajki tlakatl uelis tlajyouis
ikan miyek pajsolouilistli,
pero toTEKO de nochi kimanauiya.
20 Yejua hasta iomiyouan nochi kicuidarouilia;
nion se xkipostekiliskej.
21 Iminxompayejyeualis on tlakamej, sano yejuamej kinmiktis.
On yejuan kitlauelitaj on yolmelajki tlakatl kiseliskej castigo.
22 Pero toTEKO kinmakixtis iminnemilis itekitkauan.
Xkiseliskej castigo
on yejuan kineltokaj ikan nochi inyojlo.