Yekteneualistli niman tlaxtlauijli* itech toTEKO
33
¡Xkueyiteneuakan toTEKO nemejuamej yolchipajkej!¡On yejuan yolchipajkej sanoyej kualtsin nokuikatiaj.
2 ¡Xmakakan tlaxtlauijli toTEKO ikan kuikamej;
xtlatsotsonakan ikan arpas niman salterios!
3 ¡Xkuikatlalikan toTEKO ikan sen yenkuik kuikatl!
¡Sanoyej kualtsin xtlatsotsonakan
niman xtsajtsikan ikan pakilistli para xkueyiteneuakan!
4 Itlajtol toTEKO, yejua melauak,
nochi on tlen yejua okichijchiu,
ompa tikitaj
ika nochipa kichiua on tlen kiprometeroua.
5 ToTEKO kitlajsojtla on tlen melauak niman melajki;
¡Itetlajsojtlalis
yejuan xkaman tlamis kitemiltia nochi in tlaltikpaktli!
6 ToTEKO san ika itlajtol okinchijchiu on cielos,
niman san ika ijyo okichijchiu nochi kech sitlalin onkaj.
7 Yejua kisentlalia niman kejeua on atl de on uejkatlan mar.
8 ¡Ma kitlakaitakan toTEKO,
nochimej yejuan nemij ipan in tlaltikpaktli!
¡Nochi tlaltikpaktlakatl ma kitlakaita!
9 Ijkon xchiuakan pampa yejua,
san ika itlajtol okichijchiu nochi tlen onkaj.
San otlanauatij ma onya nochi, niman ijki onochiu.
10 ToTEKO kinteltia on naciones
para maka ma kichiuakan on tlen xkuajli kinemiliaj kichiuaskej.
11 Pero nochiuas nochi on tlen toTEKO yokitlalij para kichiuas,
niman xkaman yakaj kipatlas.
12 ¡Sanoyej tlatiochijtli on nación yejuan
kita toTEKO ken yejua iDios!
ToTEKO, yokitlapejpenij on nación
para yejua iyaxka yes.
13 ToTEKO uajtlachixtikaj desde ne iluikak,
niman kinmitstikaj nochimej on tlaltikpaktlakamej.
14 Desde ne kampa yejua chanti,
kinualitstikaj nochimej
yejuan nemij ipan in tlaltikpaktli.
15 Yejua okintlalilij inyojlo,
niman yejua kitstikaj nochi tlinon kichiuaj.
16 Xakaj rey nomanauiya
pampa kipiya miyek isoldados,
nion on yejuan xmojkej nomanauiyaj
pampa sanoyej kojtikej.
17 On caballos xuelij yakaj kimanauiyaj;
maski sanoyej kojtikej xuelij temanauiyaj.
18 Pero toTEKO nochipa kincuidaroua yejuan kitlakaitaj
niman yejuan kitlaliaj inyojlo ipan itetlajsojtlalis yejuan xkaman tlamis.
19 Yejua kinmanauiya para maka mikiskej,
niman kinmanauiya ijkuak onkaj mayantli.
20 Tejuamej tiktlaliaj toyojlo itech toTEKO.
¡Yejua techpaleuiya niman techmanuiya!
21 Toyojlo sanoyej paki itech toTEKO,
tiktlaliaj nochi toyojlo itech iyektokatsin.
22 ¡NoTEKO, ma onya touan motetlajsojtlalis
yejuan xkaman tlami!
Yejua tikchaj motechika.