On tlakamej xompayejyeuamej
(Sal. 53.1-6)
14
On tlakamej yejuan tontos kijtouaj kitl: "xnejli nemi Dios."
Nochimej yonokuepkej xkuajkualtin tlakamej.
Yejuamej kichiuaj tlen sanoyej xkuajli.
¡Xok nemi nion se yejuan kichiua tlen kuajli!
2 Desde ne iluikak, toTEKO kinualitstikaj on tlaltikpaktlakamej
para kitas tla yakaj nemi yejuan tlamatki,
tla yakaj kitejtemoua Dios.
3 Pero yej, nochi tlakatl yokajsik xkuajli ojtli;
nochimej yonokuepkej xompayejyeuamej.
¡Xok yakaj nemi yejuan kichiua tlen kuajli!
¡Nion se tlakatl xnemi yejuan kichiua tlen kuajli!
4 On xompayejyeuamej xitlaj* kajsikamatij;
yejuamej kuelitaj kinmiktiaj notlapejpeniluan
ken tla kikuaskiaj pan.
¡Yejuamej xkaman noueyikatsajtsiliaj itech toTEKO!
5 Sanoyej nomojtiskej hasta kuekuetlakaskej,
ijkuak kimatiskej ika Dios iminuan nemi on yejuan kitlakamatij.
6 On xompayejyeuamej xkauiliaj on yejuan xitlaj kipiya
ma kichiua on tlen kineki kichiuas,
pero toTEKO kimanauiya on yejuan xitlaj kipiya.
7 ¡Ma Dios kichiua,
ma kisa ne Jerusalén akinon kinmanauis on israelitas!
Ijkuak toTEKO kinuajkuepas itlapejpeniluan
yejuan okinuikakej ipan okse país,
sanoyej pakiskej on iuejkakoneuan Jacob.
Nochimej on israelitas sanoyej pakiskej.