Joás otlamandaroj ne Judá
12
Ijkuak Jehú kuikaya chikomej xipan ika tlamandaroua ne Israel, Joás opeu tlamandaroua ne Juda, niman otlamandaroj ne Jerusalén 40 xipan. Inanaj itoka katka Sibia, niman katka de on ueyikalpan Beerseba. 2 On tlen okichiu Joás kuajli katka ixpan toTEKO, pampa Joiada, on tiopixki okiyekan. 3 Pero xokinkixtijkej on tiopanmej pipitikej kampa kimauistiliayaj idolos inkuapan tepetsitsimej, niman kampa on chanejkej sanken* ontlauentlaliayaj niman kitlatiayaj kopajli.4 Se tonajli, Joás okinmijlij on tiopixkej:
—Xsentlalikan nochi on tomin yejuan kuajkij ken uentli ipan iueyitiopan toTEKO. Xsentlalikan on impuesto yejuan cada tlakatl noneki kitlaxtlauas, niman nochi on uentli yejuan kuajkij san kixtiaj ipan iminyojlo, ipan iueyitiopan toTEKO. 5 Ika on tomin yejuan cada tiopixki kiselis para in tekitl, ma kitekitiltikan para kuektlaliskej nochi tlen noneki ipan on ueyitiopan.
6 Pero yopanoka 23 xipan ika Joás tlamandarouaya niman on tiopixkej sanken xitlaj kuektlaliayaj de on ueyitiopan. 7 Kemaj Joás on rey okinots on tiopixki Joiada niman on oksekimej tiopixkej, niman okintlajtoltij:
—¿Tline nemejuamej sanken* xnenkuektlaliaj on ueyitiopan? Desde aman xok nenkiseliskej tomin de on chanejkej, niman on yejuan nenkipiyaj, ika onkaj nenkitemakaskej para ma kuektlalikan on ueyitiopan.
8 On tiopixkej onokalaktijkej para xok kiseliskej tomin de on tlakamej, niman para xkuektlaliskej on ueyitiopan. 9 Kemaj on tiopixki Joiada okikuik sen caja, okoyonij ipan ikuatsaka niman okitlalij tlayakapan inakastlan on tlaixpan*, kampaka kalakoua ipan iueyitiopan toTEKO. Niman on tiopixkej yejuan tlajpiyayaj ikalakiyan on ueyitiopan ompa kitlaliayaj nochi on tomin yejuan on tlakamej kiktiyaj ipan iueyitiopan toTEKO. 10 Ijkuak kitayaj ika on caja ye kipiyaya miyek tomin, ajsiya on itlajkuilojkau on rey niman on ueyi tlayekanki tiopixki niman kipouayaj on tomin yejuan kinextiayaj ipan iueyitiopan toTEKO. Kemaj kitlaliayaj ipan xikipiltin. 11 Niman ijkuak yokitlajkuiloltlalijkej kech onkatka, kinmakayaj on yejuan kiyekanayaj on tekitl ipan on ueyitiopan para ma kintlaxtlauilikan on kojxinkej niman on tlachijchijkej ipan iueyitiopan toTEKO, 12 on tepanchijkej niman texinkej. Niman no ika on tomin okojkej kojtli* niman temej de cantera, para ika okuektlalikej on ueyitiopan niman para okitlaxtlajkej okseki tlajtlamach* ipan on tekitl. 13 Pero on tomin yejuan kitemakayaj ipan iueyitiopan toTEKO, xkitekitiltiayaj para kinchijchiuayaj copas ikan plata, tazas uejueyimej, tepostlakitskiltin, tlapitsaltin noso okseki tlajtlamach* de plata noso de oro. 14 Yej nochi kiminmakayaj on tekitkej yejuan kuektlaliayaj iueyitiopan toTEKO. 15 On tlakamej yejuan kiyekanayaj on tekitl, xitlaj kintlajtoltiayaj akinnomej niman kech kintlaxtlauiliayaj on tekitkej, pampa yejuamej kuajli kitekitiltiayaj on tomin. 16 On tomin de on uentli ipampa tlajtlakojli niman on uentli ipampa on tlajtlakojli de culpa, xkiktiyaj ipan ueyitiopan, pampa on katka para on tiopixkej.
17 Ipan on tonaltin, Hazael yejuan rey de Siria oyaj okuijsokito on ueyi kalpan Gat, niman okinoyaxkatij*. Niman kemaj oyaj para konuijsokis Jerusalén. 18 Pero Joás, rey de Judá, okikuik nochi on tlajtlamach* tlatiochitin yejuan okitiochijkatlalijkaj ipan on ueyitiopan on reyes Josafat, Joram niman Ocozías, yejuan achtoj otlamandarojkej ipan on país de Judá. No okinkuik on yejuan sano yejua okitiochijkatlalijka, niman más teuan nochi on oro yejuan okinextijkej yetikatka ipan on tesoros de on ueyitiopan niman ipan on palacio. Niman nochi in tlajtlamach san sekan okititlanijli Hazael on rey de Siria, niman kemaj yejua xok okuijsok Jerusalén.
19 Nochi on okseki tlajtlamach* yejuan okichiu Joás, tlajkuilolnestikaj ipan on amamoxtli* kampa tlajkuilolnestikaj iminnemilis on reyes de Judá. 20 Sano itlapeliuikauan san sekan onosentlalijkej niman okimiktijkej ipan on kajli ne Milo yejuan onkaj ipan on ojtli yejuan temoua hasta Silá. 21 Ijkon tej, Josacar, ikoneu Simeat, niman Jozabad, ikoneu Somer, yejuan itlapeliuikauan katkaj Joás sanoyej okojkokojkej, niman omik. Niman ijkuak omik, okitôkakej ipan on ueyikalpan yejuan itoka Iueyikalpan David. Sakin Amasías, ikoneu Joás, otlamandaroj.