Atalía niman Joás
11
Ijkuak Atalía, inanaj on rey Ocozías, okimat ika ikoneu yomik okichiu kanika para nochi ifamilia on rey mikiskej pampa yejua kinekiya tlamandaros. 2 Pero Josaba, (ichpoch on rey Joram, ikniu Ocozías) okonan on konetsintli Joás, ikoneu Ocozías para okejkuanij intech on oksekimej ikoneuan on rey yejuan yopejka kinmiktiaj. Yejua okiyan ipan sen kalijtik iuan on siuatl yejuan okiskaltij, niman ijkon Atalía xouel okimiktij. 3 Niman Josaba okiyan Joás chikuasen xipan ipan itiopan toTEKO chika Atalía tlamandarouaya ipan on país.4 Kampa ika chikomej xipan ika Atalía tlamandarouaya, on ueyi tiopixki Joiada otlatitlan ma kinnotsatij on soldadostlayekankej intech 100 soldados , niman on cereteos, niman on tlajpixkej. Kemaj okinchiualtij ma kalakikan ipan itiopan toTEKO, kampa yejua nemiya, niman ompa inuan okichiu sen pacto* ikan tlajtolmakalistli para kichiuaskej on tlin yejua kinmijlis. Niman kemaj okintitij Joás, ikoneu on rey Ocozías. 5 Kemaj okinnauatij: "Nemejuamej yejua in nenkichiuaskej: Se parte de on yeyi grupo de nemejuamej tlajpiyaskej ipan on palacio ipan on tonajli sábado. 6 Okse parte de on yeyi grupo tlajpiyas ipan on kalakiloyan kampaka sur. Niman on okse parte de on yeyi grupo tlapiyas ikuitlapan on kalakiloyan kampaka on soldados chantij. Ijkin nemejuamej uelis nentlapiyaskej ipan on palacio nemopatlatiaskej. 7 Ijkon tej, on okse ome grupo yejuan xok tekiti ijkuak sábado, ontlajpiyaskej ipan iueyitiopan toTEKO, para kimanauiskej Joás, on yenkuik rey. 8 Nemejuamej nemotelketsaskej iyeualkan on rey, niman cada se kimapixtias itepos. Niman san akinon yejuan kinekis kalakis kampa nemi on rey, ika onkaj nenkimiktiskej. Nemejuamej nenyaskej iuan on rey san kanon kampa yejua yas." 9 Cada soldadojtlayekanki okichiu ken Joiada otlamandaroj niman okinuikak isoldados itech on tiopixki Joiada, sanken* on yejuan tlami intekiu ipan sábado niman on yejuan peua tekitij ipan sábado. 10 Kemaj on tiopixki okiminmakak on soldadostlayekankej on lanzas niman on escudos yejuan iyaxka* katka on rey David yejuan onkatka ne ipan on iueyitiopan toTEKO. 11 Se tlatekpantli onotelketskej desde iyekmakopa on ueyitiopan, hasta iopochmakopa on ueyitiopan, niman iyeuelkan on tlaixpan*. Niman ijkon kiyeualojtikatkaj on rey ika imintepos ipan iminma para kimanauiyayaj on rey. 12 Kemaj on tiopixki Joiada okuajuikak Joás, okitlaliltij on korona ipan itsontekon niman okimakak on amamoxtli* yejuan kipiyaya on temachtilistli ken tlamandaros, okikuatêki ikan aceite niman okiteneu rey. Nochimej nomatlaxkalouayaj, niman ijkin tsajtsiyaj: "¡Ma ueyixtia on rey!".
13 Ijkuak on reina Atalía okak ken chikauak tsajtsiyaj on tlakamej niman on soldados, oyaj ipan on iueyitiopan toTEKO kampa nochimej nemiyaj on tojlamej. 14 Ompa Atalía okontak on rey ikatikatka itech on pilar kampa nochipa notelketsaya sen rey ijkuak kemach kiteneuayaj ken rey. Niman iyeuelkan on rey nemiyaj on tlapaleuijkej niman on tlakamej yejuan kimpitsayaj tlapitsaltin. Nochi on tlakamej yejuan ouajlajkej de nochiuiyan ipan on país pakiyaj. Kemaj Atalía ikan miyek itlauel, okitetsayantiaj itekiuajtlaken niman otsajtsik:
—¡Yonechkuilij notekiuajyo! ¡Yonechkuilij notekiuajyo!
15 Kemaj on tiopixki Joiada okinnauatij on soldados tlayekankej:
—Xkixtikan Atalía ipan in ueyitiopan, niman xmiktikan iuan san akinon yejuan kinekis kimanauis, pero maka nenkinmiktiskej ijtik iueyitiopan toTEKO.
16 Ijki tej, on soldados okajsikej Atalía, okuikakej niman okimiktijkej ne kampa kalakij on caballos ipan on palacio.
17 Sakin on tiopixki Joiada okichiu para, on rey niman on chanejkej okichijkej sen pacto iuan toTEKO para ijkon onochijkej tetlapejpeniluan itech toTEKO. Niman no okichijkej sen pacto on chanejkej iuan on rey. 18 Kemaj nochimej on chanejkej oyajkej itech itiopan Baal niman okixoxotonijkej. No ijki, okintetlajtlapankej on ídolos niman tlaixpantin*. Niman Matán, on yejuan itiopixkau Baal, okimiktikej ixpan semej de on itlaixpanuan*. Kemaj, on tiopixki Joiada okintlalij tlajpixkej itech iueyitiopan toTEKO. 19 Joiada okinyekan on soldadostlayekankej intech 100 soldados , on cereteos, on tlajpixkej, on chanejkej, niman okuikakej on rey desde iueyitiopan toTEKO hasta ipan ipalacio on rey. Yejuamej okalakkej ipan on palacio ipan on tsakuijlotl kampa on tlajpixkej kalakij. Kemaj Joás onotlalij ipan itrono niman opeu tlamandaroua. 20 Nochimej on chanejkej kipiyayaj pakilistli niman on ueyikalpan okipix yolseuilistli pampa aman Atalía xok nemiya, pampa okimiktijkej ikan espada nisiu ipalacio on rey. 21 Joás kipiyaya chikome xipan, ijkuak opeu tlamandaro ken rey.