Jehú otlan okinmiktij ifamilia Acab
10
Acab kipiyaya 70 ikoneuan ne Samaria. Ijkon tej, Jehú okijkuiloj amatlajkuiloltin para on tlapaleuijkej ipan on ueyikalpan, on uejueyitlayekankej niman on temachtijkej de ikoneuan Acab, kampa kinmijliaya: 2 "Nemejuamej nemotech onokau icaballos nemorey niman icarretas de guerra, niman iteposuan, niman on ueyikalpan kuajli yeualtsakutokej ikan tlakpak tepantli. No ijki nemejuamej nenkimpiyaj ikoneuan nemoteko Joram. Yejua ika, ijkuak in amatlajkuilojli ajsis nemotech, 3 nimantsin xtlapejpenikan on yejuan más kuajli niman kojtik de on ikoneuan nemoteko. Kemaj, xtlalikan ipan itrono itataj niman xkinmanauikan nochipa iuejkakoneuan nemorey."4 Yejua in sanoyej okinmojtij, niman okinolijkej: “Tla omemej reyes Joram niman Ocozías xouelkej okixnamikkej yejua, ¿Kenijki tikixnamikiskej tejuamej?”
5 Kemaj on más ueyi tlayekanki ipan on palacio, on gobernador ipan on ueyikalpan, on uejueyixtokej tlayekankej niman on temachtijkej okititlankej in tlajtojli para Jehú: “Tejuamej tinemij mouan para tlinon tejua tiknekis. Xtechijli niman tikchiuaskej nochi on tlen titechnauatis. Tejuamej xakaj tikteneuaskej rey. Xchiua tlen tejua tikita más kuajli.”
6 Jehú okintlajkuiluij ika okpa. Okinmijlij: “Tla nemejuamej nouan nennemij niman nenkinekij nenkichiuaskej tlen nejua nemechnauatis, xkinkechtsontekikan niman xkinkuikan imintsontekon ikoneuan nemoteko, niman mostla mayanin xuajlakan xnechitakij nikan Jezreel."
On 70 ikoneuan on rey yejuan tlakamej, nemiyaj iminuan on uejueyixtokej tlakamej de on ueyikalpan yejuan okinmiskaltijkej. 7 Ijkon tej, ijkuak yejuamej okiselijkej on amatlajkuilojli, okinmajsikej nochimej on 70 tlakamej niman okinmiktijkej. Kemaj okintlalijkej imintsontekon ipan keski canastas niman okintitlankej ne Jezreel. 8 Ijkuak on tlajtojketl oajsik, okijlij Jehú:
—Yokinuajkikej imintsontekon ikoneuan on rey.
Jehú otlanauatij:
—Xkintlalikan okantipan ipan ikalakiyan on ueyikalpan. Ompa xkinkaua hasta mostla.
9 Uajmostla okis Jehú. Ompa onotelkets niman okinmijlij nochimej yejuan ompa nemiyaj:
—Nemejuamej xnenkipiyaj tlajtlakojli. Nejua oniktlajtouilij noteko, niman onikmiktij. Pero, ¿akinon okinmiktij nochimej yejuamej in? 10 Xmatikan kuajli ika nochi on tlen toTEKO okijtoj ipan nochiuas ifamilia Acab, ika onkaj nochiuas. ToTEKO sano yejua yokichiu on tlen okitemachistij itechkopa Elías, itekitkau.
11 Niman Jehú okinmiktij ne Jezreel nochimej on yejuan nokauayaj de ifamilia Acab. Niman no okinmiktij nochimej on itlapeliuikauan niman on yejuan sanoyej itlajsojkaikniuan, niman itiopixkauan. Xakaj okau yoltikaj.
12 Sakin oyaj Samaria, niman ipan on ojtli oajsik Bet-equed de on Pastores, 13 kampa okiminnextij yejuan ken kitaj Ocozías, rey de Judá. Jehú okintlajtoltij:
—¿Akinomej nemejuamej?
Yejuamej okinankilijkej:
—Tejuamej ken tikitaj Ocozías, niman otiuajlajkej otikintlajpalokoj inkoneuan on rey Acab niman on reina Jezabel.
14 Kemaj Jehú okinnauatij on yejuan kuajtokatiayaj:
—Xkinmajsikan yoltokej.
On yejuan kuajtokayaj Jehú, okinmajsikej yoltokej, niman okinkechtsontekkej nisiu on tlaltekontli de Bet-equed de on Pastores. On tlakamej katkaj 42, niman xokajkej nion se de yejuamej yoltikaj.
15 Ijkuak Jehú oyaj de ompa okinamik Jonadab, ikoneu Recab, yejuan oyajka para okitato. Jehú okitlajpaloj niman okijlij:
—¿Tikpiya kuajli moyojlo notechkopa ijkon ken nejua nikpiya motechkopa? ¿Tikneki timouikas nouan?
Jonadab okinankilij:
—Kemaj ijki.
Jehú okijtoj:
—Tla ijkon, xnechmaka moma.
—Xuajla nouan niman tikitas kenijki niktlajsojtla* toTEKO.
Ijkon tej, okuikak ipan icarreta. 17 Niman ijkuak okalakkej Samaria, Jehú okinmiktij nochimej on iuejkakoneuan Acab yejuan sanken* nemiyaj. Nochimej otlan kimpopoloua, ijkon ken toTEKO okimachistijka Elías.
Jehú okimpopoloj on yejuan okimauistilijkej Baal
18 Sakin Jehú okinsentlalij nochimej on chanejkej ipan on ueyikalpan, niman okinmijlij:
—Acab okimauistilij achijtsin Baal, pero nejua más sanoyej nikmauistilis. 19 Yejua ika tej, xkiminnotsakan nochimej on itiotlajtojkauan Baal, on yejuan kimauistiliaj niman on itiopixkauan. Nion maka yakaj poliuis, pampa nikuenchiuas sen ueyi uentli para niktlakaitas Baal, niman tla yakaj xuajlas ijkuak nitlauenchiuas, mikis.
Pero Jehú ijkon okijtoj para kinkajkayauilis on yejuan kimauistiliayaj Baal para ijkon uelis kinmiktis. 20 Yejua ika, otlanauatij ma kinmijlikan kichiuiliskej Baal sen ueyi iluitl niman ijki onochiu. 21 Kemaj okintitlan tlajtojkamej ipan nochi Israel, niman nochimej on yejuan kimauistiliaj Baal oajsikej ipan on tiopan. Nion se de yejuamej opoliuito. Ijkon tej, itiopan Baal oten hasta tlajtlatenko. 22 Kemaj Jehú okijlij on yejuan itekiu katka cuidaroua on ueueyakkej tiopixkatlakentin yejuan yejtokej, ma kinkixti nochi on ueueyakkej tlakentin yejuan para iluitl niman ma kinmaka nochimej on yejuan kimauistiliaj Baal. Niman on tekitketl ijki okichiu. 23 Kemaj Jehú niman Jonadab okalakkej ipan itiopan Baal, niman Jehú okinmijlij on yejuan kimauistiliaj Baal:
—Xchiuakan kanika para maka ma nemi nemotsajlan se yejuan kimauistilia iTEKO Jacob, yej san on yejuan kimauistiliaj Baal.
24 On yejuan kimauistiliaj Baal okalakkej ipan on tiopan para okimakakej sesekneka uentin niman yejuan tlatla. Chika ijkuakon, Jehú okinkau 80 tlakamej kiauak, niman okinmijlij:
—¡Xkinmiktikan nochimej in tlakamej! Yejuan kauilis ma cholo se de on tlakamej yejuan yonemechinmaktilij, kitlaxtlauas ika inemilis.
25 Niman ijkuak Jehú yotlan kitemaka on uentli yejuan tlatla, okinnauatij on tlachixkej niman uejueyitekituajkej:
—¡Xkalakikan niman xkinmiktikan nochimej! ¡Maka ma cholo nion se!
On tlakamej yejuan iuan nemiyaj Jehú, okinmiktijkej ikan espada, niman kemaj okiminkixtijkej iminmikatsitsiuan de ompa. Sakin okalakkej ipan itlaixpan on itiopan on Baal, 26 niman okinkixtijkej on ixneskayomej yejuan on tlakamej kinmauistiliayaj niman okintlatijkej. 27 No okixoxotonijkej on tlaixpan* niman itiopan Baal, niman okajkej nochi ken noxixaloyan, yejuan sanken* onkaj hasta aman.
28 Ijki Jehú okipopoloj ne Israel on mauistilistli yejuan kimakayaj Baal. 29 Pero Jehú xokintlalkauij on tlajtlakoltin yejuan Jeroboam I, ikoneu Nabat, okichiu para ma tlajtlakokan on israelitas, yej sanken* kinmauistiliaya on becerros de oro yejuan onkatkaj ne Dan niman Betel.
30 ToTEKO okijlij Jehú: “Nixpan yotikchiu tlen kuajli niman nikita ika on tlen otikchiu melajki. Pampa yotikchiu iuan ifamilia Acab nochi tlen nejua oniknek, mouejkakoneuan tlamandaroskej itech Israel hasta ika naupa teixuiuan*.”
31 Pero Jehú xokichiu kanika para kitlakamatis nochipa iley toTEKO, on Dios de Israel, pampa xokintlalkauij on tlajtlakoltin yejuan Jeroboam I ika okichiu para ma tlajtlakokan on israelitas.
32 Ipan on tonaltin, toTEKO opeu seki kinkuilia imintlal on israelitas. Hazael, rey de Siria, opeu kinkuilia on imintlal on israelitas 33 desde kampaka ikisayan tonaltsintli de on río Jordán, ipan nochi on ueyitlalpan de on tribus Galaad, Gad, Rubén niman Manasés. Niman no okinuijsok desde on kalpan Aroer, yejuan onkaj nisiu on ayajtok Arnón, hasta Galaad niman Basán.
34 Nochi on okseki tlajtlamach* yejuan okichiu Jehú tlajkuilolnestikaj ipan on amamoxtli* kampa tlajkuilolnestikaj iminnemilis on reyes de Israel. 35 Ijkuak omik, okitôkakej iuan iuejkatajuan ne Samaria, niman kemaj okalak rey Joacaz yejuan ikoneu. 36 Jehú otlamandaroj ken rey de Israel 28 xipan ne Samaria.