Jehú okuatêkijkej ikan aceite para rey de Israel
9
On tiotlajtojketl Eliseo okonnots semej on telpokatiotlajtojkej, niman okijlij:—Xnemi listo para tikisas. Xkui sen aceitejtekomatl niman xuiya ne Ramot ipan iueyitlalpan Galaad. 2 Ijkuak tajsis ompa, xuiya xtejtemoti Jehú, yejuan ikoneu Josafat, niman ixuiu Nimsi. Xkalaki kampa yejua nemi, xxelo niman xkuika ipan sen kalijtik kampa xakaj nemi. 3 Kemaj xkui on aceitejtekomatl, niman xkuatêki Jehú ikan aceite para rey de Israel. Niman kemaj ijkin tikijtos: "Ijkin kijtoua toTEKO: 'Nejua nimitsteneua ken rey de Israel.’ " Kemaj nimantsin xtlapo on tsakuijlotl niman xcholo. Maka kanaj timoteltis.
4 On telpokatiotlajtojketl oyaj ne Ramot ipan iueyitlalpan Galaad, 5 niman ijkuak ompa oajsik, okiminnextijtajsik san sekan yonosentlalijkej on soldadostlayekankej. Kemaj okijtoj:
—Nikpiya tlinon nikijlis se soldadojtlayekanki.
Jehú okinankilij:
—¿Akinon de nochimej tejuamej?
On tiotlajtojketl okinankilij:
—Tejua noueyisoldadojtlayekankau.
6 Kemaj Jehú nimantsin onotelkets niman on omemej okalakej ipan on kajli. Kemaj on tiotlajtojketl okitekilij aceite ipan itsontekon, niman okijlij:
—ToTEKO, Dios de Israel, kijtoua: "Nejua nimitsteneua ken rey para on chanejkej de Israel. 7 Tejua tikinmiktis nochimej iuejkakoneuan moteko Acab. Ijkon nikintlakuepiltis pampa Jezabel okinmiktij notiotlajtojkauan niman de nochimej notekitkauan. 8 Nochi ifamilia Acab popoliuis. Nikinmiktis nochimej ipan ifamilia yejuan tlakamej yejuan nemij ne Israel niman nion se xnokauas yoltikaj. 9 Nikchiuas iminuan ifamilia Acab no ijki ken onikchiu iminuan ifamilia Jeroboam I, yejuan ikoneu Nabat, niman iminuan iuejkakoneuan Baasa, yejuan ikoneu Ahías. 10 Niman itlalnakayo Jezabel kikuaskej chichimej ipan on campo ne Jezreel, niman xakaj kitôkas."
Ijkuak ijkin yokijtoj, on tiotlajtojketl okitlapoj on tsakuijlotl niman ocholojteu. 11 Niman ijkuak Jehú oyaj onosentlalito iminuan on oksekimej soldadostlayekankej, yejuamej okitlajtoltijkej:
—¿Tlinon onochiu? ¿Tline ouajlaj omitsitako on loco?
Jehú okijtoj: —Nemejuamej tej, nenkixmatij, niman no nenkimatij ika kamanian kijtoua tontojyotl.
12 Yejuamej okinankilijkej:
—Ka, xtikixmatij. Maka xtechkajkayaua. ¡Xtechtlajtlajtouili nochi!
Kemaj Jehú okinnankilij:
—In yejua onechijlij: "Ijkin kijtoua toTEKO: 'Nejua nimitsteneua ken rey de Israel'."
13 Nimantsin cada se de yejuamej okonkuik icapa niman okisou ipan escalones kampa ijkaya Jehú. Kemaj okipitskej on ikuakuau borrego niman otsajtsikej: “¡Jehú yejua rey!”
Jehú okimiktij Joram rey de Israel
14 Jehú, yejuan ikoneu Josafat, niman ixuiu Nimsi, okitlajtouilij kimiktis Joram. (Joram nemiya iminuan nochimej isoldados on israelitas para kimanauiyayaj Ramot ipan iueyitlalpan Galaad pampa Hazael, rey de Siria kuijsokiya. 15 Pero yejua onokuep ne Jezreel para onopajtito pampa okokojkej on sirios ipan on nouijsokilistli iuan Hazael.) Kemaj Jehú okinmijlij on yejuan iuan yayaj, ika tla melauak kinekiyaj yejua ma iminrey, maka ma kauilikan yakaj ma kisa ipan on ueyikalpan para maka kontemachistis ne Jezreel. 16 Kemaj otlejkok ipan icarreta de guerra niman oyaj ne Jezreel, kampa Joram nemiya ipan tlapechtli. Ocozías rey de Judá no yoyaka okitato Joram. 17 Ijkuak on tlachixki yejuan nemiya ipan on torre de Jezreel okitak nonisiuiyaj Jehú iuan isoldados, otetsajtsilij:
—¡Uajlauij tlakamej!
Kemaj Joram otlanauatij:
—Xtitlanikan sen tlajtojketl ipan caballo ma kinnamikiti, para ma kintlajtolti tla uajlauij san kuajlotika.
18 Ijkuak on tlakatl okinamikito Jehú, okijlij:
—On rey onechajtitlan ma nimitstlajtoltiki tla nejuajlauij san kuajlotika.
Jehú okinankilij:
—On tejua xmotekiu. ¡Xmokaua paon nokuitlapan!
Kemaj on tlachixki yejuan nemiya ipan on torre okimachistij on rey:
—On tlajtojketl yoajsik intech yejuamej, pero xnesi tla nokuepa.
19 Kemaj ijkuakon on rey okititlan okse tlajtojketl ipan caballo, yejuan oajsik hasta imintech niman okijtoj:
—On rey onechajtitlan ma nimitstlajtoltiki tla nenuajlauij san kuajlotika.
Jehú okinankilij:
—On tejua xmotekiu. ¡Xmokaua paon nokuitlapan!
20 On tlachixki yejuan nemiya ipan on torre oksejpa okimachistij on rey:
—On okse no yoajsik hasta imintech, pero xnesi tla nokuepa. Niman nesi ken Jehú, on yejuan kuajuika on carreta de guerra pampa sanoyej kuajtlalochtia ken sen loco.
21 Kemaj Joram otlanauatij:
—¡Xsalokan nocarreta de guerra!
Okisalojkej icarreta, niman Joram, rey de Israel, niman Ocozías, rey de Judá, okiskej, cada se ipan icarreta de guerra. Okinamikitoj Jehú. Ononamikej ipan itlal Nabot yejuan ualeua Jezreel. 22 Niman ijkuak Joram okitak Jehú, okitlajtoltij:
—¿Tiuajlau san kuajlotika?
Jehú okijlij:
—¿Tlinon uelis san kuajlotika onyas chika Jezabel, monanaj sanken* kinmauistilia itotajtsitsiuan niman kichiua miyek nauajlotl?
23 Kemaj Joram onokuep niman ocholoj chika kitsajtsiliaya Ocozías:
—¡Yotechtlatlalilijkej! ¡Kinekij techmiktiskej, Ocozías!
24 Kemaj Jehú okanaltij iarco niman okimotlak Joram. On tlaminajli, otlalak itlakapan niman opanok ipan iyoltsin. Joram ouets sanoyej tlakokojli* ipan icarreta niman omik. 25 Kemaj Jehú okinauatij Bidcar, itlapaleuijkau:
—Xkixti itlakayo Joram, niman xkontlajkali ipan itlal Nabot de Jezreel. Ijkon xchiua pampa nikelnamiki ika ijkuak tejua niman nejua tikinuikayaj sa sekan on carretas de guerra de Acab, on itataj, toTEKO okijtoj in tlajtojli itechkopa yejua: 26 "Yaloua nejua moTEKO onikitak ken otikinmiktij Nabot inuan ikoneuan. Yejua ika, nikmelajkaijtoua ika nimitstlakuepiltis ipan itlal Nabot." Ijkon tej, xkikti imikatlalnakayo, niman xkontlajkali ipan itlal Nabot, ijkon ken okijtoj toTEKO.
Jehú okimiktij Ocozías
27 Ijkuak Ocozías, rey de Judá, okitak on tlen nochiuaya, ocholteu niman oyaj ipan on kalpan Bet-hagan. Pero Jehú okitojtokak, niman otlanauatij:
—¡Yejua no xmiktikan!
Sanoyej okojkokojkej ipan icarreta, ne ipan on tlaixtli de Gur, nisiu on kalpan Ibleam, pero yejua ocholoj hasta on ueyikalpan Meguido kampa omik. 28 Sakin itlapaleuijkauan okuikakej ipan sen carreta ne Jerusalén yejuan no itoka Iueyikalpan David, niman okitôkakej ipan imintlalkon ifamilia.
29 Ocozías opeu tlamandaroua ken rey ne Judá ijkuak Joram, ikoneu Acab, kipiyaya majtlaktli uan se xipan ika rey katka.
Jezabel omik
30 Kemaj Jehú oyaj ne Jezreel. Ijkuak okimat Jezabel, okintlileu iyeualkan ixtololojuan niman okinotlalilij sen kualnesyotl ipan itson. Kemaj ontlachix ipan ventana. 31 Niman ijkuak Jehú oajsik ikalakiyan on ueyikalpan, Jezabel okijlij
—¿Kuajli tinemi tejua yejuan timouika ken Zimrí yejuan okimitij irey?
32 Jehú onajkotlachix niman okontak ipan on ventana, niman okijtoj:
—¿Akinon nemi nouan?
Omemej noso yeyimej tlapaleuijkej de on palacio ontlachixkej para okontakej, 33 niman Jehú okinnauatij:
—¡Xkuajtlajkalikan tlatsintlan!
Yejuamej okuatlajkalkej tlatsintlan, niman seki iyesyo otsijtsikuin ipan tepantli niman impan on caballos, yejuan ipan ochojcholojkej Jezabel. 34 Kemaj Jehú oyaj otlakuato niman otlaonito. Más sakin*, Jehú otlanauatij:
— Xtôkakan on xompayejyeua siuatl, pampa ichpoch katka sen rey.