Ocozías otlamandaroj ne Judá
(2 R 8.25-29)
22
On chanejkej de Jerusalén okitenejkej rey, Ocozías on yejuan más konetl ikoneu Joram. Ijkon okichikej pampa on yejuan tlachtekkej yejuan san sekan iuan on árabes okalakkej ipan on campamentoj, okinmiktijkej nochimej on yejuan yakatstiuij ikoneuan Joram. Yejua ika, Ocozías ikoneu Joram yejuan katka rey de Judá, opeu tlamandaroua ken rey. 2 Ocozías kipiyaya 22 xipan ijkuak opeu tlamandaroua ken rey, niman rey katka se xipan ne Jerusalén. Inanaj itoka katka Atalía, niman iauejla katka Omri. 3 Niman Ocozías no ijki onouikak ken Acab niman ifamilia, pampa inanaj kijliaya ma kichiua tlen xkuajli, 4 Yejua okichiu tlen xkuajli ixpan toTEKO ijkon ken ifamilia Acab kichiuaya pampa sakin ijkuak yomik itataj, ifamilia Acab okitlachikauilij para ma kichiua on tlen xkuajli.5 Pampa kichiuaya tlen kijliayaj, Ocozías onosentlalij iuan Joram, ikoneu Acab rey de Israel, para kuijsokiskej Hazael, on rey de Siria itech on ueyikalpan Ramot yejuan onkaj ipan iueyitlalpan Galaad. Pero on sirios okokojkej Joram, 6 niman yejua onokuep Jezreel para nopajtis pampa okikojkokej ne Ramot ipan on nouijsokilistli iuan Hazael, rey de Siria. Kemaj, ika Joram tlakokojli katka, Ocozías oyaj ne Jezreel okitato.
Jehú okimiktij Ocozías
(2 R 9.27-29)
7 Dios yokitlalijka para mikis Ocozías ijkuak kontas Joram. Ijkuak kemach oajsik, Ocozías ouajkis iuan Joram para okinamikikoj Jehú, ikoneu Nimsi. Pero Dios yokitlapejpenijka Jehú para ma kimikti nochi ifamilia Acab. 8 Ijkuak Jehú kichijtikatka tlen Dios okinauatij itechkopa ifamilia Acab, okinnamik on tlayekankej de Judá niman on yejuan ken kinta Ocozías yejuan kitekichiuiliayaj. Ijkuakon yejua okinmiktij. 9 Otlanauatij no ma kitejtemotij Ocozías, yejuan yoniyanka ne Samaria. Niman ijkuak okinextikej, okajsikej, okuikilijkej Jehú niman okimiktijkej. Pero okitôkakej, pampa yejua katka ikoneu Josafat, yejuan okitlakaitak toTEKO ikan nochi iyojlo. Ijkin xok onokau nion se ifamilia Ocozías yejuan ueliskia kalakis rey.
Atalía kinoyaxkatia on trono
(2 R 11.1-21)
10 Ijkuak Atalía, inanaj Ocozías, okimat ika yomik Ocozías, on ikoneu, otlanauatij ma kinmiktikan nochimej ikoneuan on rey Ocozías. 11 Pero Josaba, ichpoch on rey Joram, okixeloj Joás, ikoneu Ocozías, de on oksekimej ikoneuan on rey yejuan ye kinmiktikatkaj, niman okiyan de Atalía. Okiyan ipan sen kalijtik kampa kochiloyan, iuan on siuatl yejuan kipilanaya. Ijkon tej, xokimiktijkej pampa Josaba, (ichpoch on rey Joram, ikniu Ocozías niman isiuau on tiopixki Joiada) ijkon okiyan. 12 Niman Joás niyantikatka iuan on siuamej ipan iueyitiopan toTEKO para chiuasen xipan. Chika ijkuakon, Atalía otlamandaroj ken rey ipan on país.