23
Ijkuak yopanok chikome xipan, on tiopixki Joiada okintekuitlan yejuamej in soldadostlayekankej: Azarías ikoneu Jeroam, Ismael ikoneu Johanán, Azarías ikoneu Obed, Maasías ikoneu Adaía niman Elisafat ikoneu Zicri, niman okichiu sen pacto iminuan. 2 Yejuamej oyajkej ipan nochi Judá, niman okinsentlalijkej on levitas ipan nochi on uejueyikalpanmej de Judá niman on tlayekankej ipan on familias de Israel, niman nochimej oyajkej Jerusalén. 3 Ompa nochimej on yejuan onosentlalijkej okichijkej sen pacto iuan Joás on rey ipan iueyitiopan Dios. Joiada okinmijlij: “¡Nikan nenkipiyaj nemejuamej ikoneu on rey Ocozías! Ika onkaj yejua yes rey, ken okiprometeroj toTEKO ika intech iuejkakoneuan David kisaskej reyes. 4 In yejua nenkichiuaskej nemejuamej: se yexkantipan nemejuamej tiopixkej niman levitas yejuan nentekitij ipan on tonajli sábado, nentlajpiyaskej ipan itsakuijlouan on yektiopan; 5 okse yexkantipan nemiskej ipan on palacio, niman on okse yexkantipan nemiskej ipan on ueyitsakuijlotl itoka Cimientos. Chika ijkuakon, nochimej on oksekimej tlakamej nemiskej ipan on ome ikiauak on ueyitiopan. 6 Pero maka yakaj ma kalaki ipan on ueyitiopan, yej san on tiopixkej niman levitas yejuan tekitiskej. San yejuamej uelis kalakiskej, pampa nemij tlatiochijtin. Pero on oksekimej tlakamej ika onkaj kitlakamatiskej itlanauatiluan toTEKO niman nokauaskej kiauak." 7 On levitas kiyeualojtiaskej on rey, cada se ika itepos ipan ima, niman yejuan kinekis kalakis ipan on ueyitiopan mikis. Yaskej iuan on rey san kanon kampa yejua yas.”
8 On levitas niman on chanejkej ne Judá okichijkej nochi tlen on tiopixki Joiada okinnauatij. Cada tlayekanki okinyekan on tlakamej yejuan okintocaroj, san kenon yejuan kalakiyaj para tlajpiyaskej ipan on tonajli sábado niman on yejuan kisayaj, pampa on tiopixki Joiada xokinkauilij ma uiyan on yejuan kisayaj, ipan imintekiu. 9 Kemaj Joiada okinmakak on ueyitlayekankej on lanzas niman escudos* uejueyimej niman pipitikej yejuan iyaxkauan katkaj David, niman yejuan onkatkaj ipan iueyitiopan Dios. 10 Kemaj okintlalij ipan itsakuijlou nochimej on tlakamej, desde kampaka tlayekmakopa hasta kampaka tlaopochmakopa ipan on ueyitiopan, niman iyeualkan on tlaixpan, cada se ika ilanza ipan ima para kimanauiyayaj on rey. 11 Kemaj Joiada niman ikoneuan okuajkixtijkej ikoneu on rey Ocozías, niman okitlaliltijkej on corona niman okimakakej se amamoxtli kampa nestiaya ileyes Dios, niman sakin ijkuak yokuatêkijkej ikan aceite, okitenejkej rey. Kemaj nochimej otsajtsikej: "¡Ma ueyixtia torey!"
12 Ijkuak Atalía okak intsajtsilis on tlakamej yejuan notlajtlalouayaj niman kiueyiteneuayaj on rey, oyaj ipan iueyitiopan toTEKO, kampa nemiyaj nochimej. 13 Ompa okitak on rey, ijkaya kampa notelketsayaj on reyes ijkuak kemach kinteneuayaj reyes itech on pilar, ipan ikalakiyanj on ueyitiopan. Itech nemiyaj on ueyitlayekankej niman on tlatsotsonkej. Niman nochimej on tlakamej sanoyej pakiyaj, niman kimpitsayaj tlapitsaltin, niman nokuikatiayaj, ikan tlatsotsonaltin, niman nemiyaj on yejuan kiyekanayaj on kuikamej de yektenualistli. Kemaj Atalía okitsayantiaj itlaken niman otlaueltsajtsik:
—¡Yonechkuilij notekiuajyo! ¡Yonechkuilij notekiuajyo!
14 On tiopixki Joiada okinnauatij on soldadostlayekankej, niman ijkin okinmijlij:
—¡Xkixtikan intlakojtian on yejuan tekpantokej, niman xmiktikan san akinon yejuan kinekis kimanauis!
Ika on tiopixki yotlanauatijka maka ma kimiktikan Atalía ipan iueyitiopan toTEKO, 15 okajsikej niman okixtijkej ipan on tsakuijlotl kampa kalakij caballos ipan on palacio, niman ompa okimiktijkej.
16 Kemaj Joiada okichiu sen pacto iuan nochi tlakatl niman iuan on rey, ika yejuamej yeskej itlapejpeniluan toTEKO. 17 Kemaj oyajkej nochimej ipan itiopan Baal, okitlajkalkej, okinxoxotonijkej itlaixpanuan niman iídolos. Niman Matán, itiopixkau Baal, okimiktijkej ixpan on tlaixpanmej. 18 Kemaj Joiada okintlalij on tiopixkej niman on levitas ken tlajpixkej ipan on tekitl ipan iueyitiopan toTEKO. Yejuamej kichiuaskej imintekiu ken otlanauatijka David. Yejuamej tlauentlaliaya ika on uentli yejuan nochi tlatla, ijkon ken tlajkuilolnestikaj ipan iley Moisés, niman nokuikatiayaj ikan paktli, ken otlanauatijka David. 19 No okintlalij tlajpixkej ipan ikalakiyan iueyitiopan toTEKO, para ijki xakaj yejuan xchipauak ixpan toTEKO uelis kalakis. 20 Kemaj okinuikak on soldadostlayekankej, on tlakamej yejuan más uejueyixtokej, on gobernadores de on chanejkej niman nochi tlakatl, niman oyajkej iuan on rey desde ipan iueyitiopan toTEKO hasta ipan on palacio kampa okalakkej ipan on tsakuijlotl yejuan más ueyi. Kemaj okitlalijkej on rey ipan on trono kampa on reyes tlamandarouaj. 21 Niman nochi tlakatl opak, niman xok oonyak tlauejli pampa Atalía okimiktijkej ikan espada, ipan on ueyikalpan.