Joás otlamandaroj ne Judá
(2 R 12.1-21)
24
Joás kipiyaya chikome xipan ijkuak opeu tlamandaroua, niman otlamandaroj ne Jerusalén 40 xipan. Inanaj katka Sibia yejuan ualeuaya Beerseba. 2 Chika on tiopixki Joiada nemiya, Joás okichiu on tlen kuajli ixpan toTEKO. 3 Joiada okitlapejpenij ome siuatl para isiuauan Joás, niman iminuan okipix ikoneuan tlakamej niman siuamej.4 Ijkuak yopanok se tiempo, Joás okijtoj para kuektlalis iueyitiopan toTEKO. 5 Okinsentlalij on tiopixkej iuan on levitas niman okinmijlij: "Cada xipan xuiyan ipan on ueyikalpanmej de Judá niman xsentlalikan imintomin on israelitas, ika onkaj kitlaxtlaluaskej para uelis tikuektlaliskej iueyitiopan Dios. Amanaman xchiuakan." Pero on levitas xnimantsin okichijkej. 6 Yejua ika, on rey okinots on ueyitlayekanki tiopixki Joiada, niman okijlij:
— ¿Tline xitlaj tikchiua para on levitas imanian ne Judá niman Jerusalén ma kuitij on impuestos yejuan Moisés, itekitkau toTEKO, otlanauatij ma kisentlalikan intech on israelitas para on tabernáculo* kampa onkaj on yekcaja?
7 (Atalía, yejuan xompayejyeua, ikoneuan okalakkaj ipan iueyitiopan Dios, niman nochi yokuilijkaj on tlajtlamach yejuan tlakauijli ipan iueyitiopan toTEKO, niman yej kitekitiltiayaj para kimauistiliaya on dios Baal.) 8 Kemaj on rey otlanauatij ma kichijchiuakan sen caja niman ma kitlalikan kiauak itech ika ikalakiyan on iueyitiopan toTEKO. 9 Sakin okitemachistijkej ipan nochi Judá niman Jerusalén ma kuajkuilikan toTEKO on impuesto yejuan Moisés, itekitkau toTEKO, yotlanauatijka ne Israel ipan on xalpatlajkan. 10 Nochimej on tlayekankej niman nochimej on chanejkej okiktikej ikan paktli on tlanechikojli, niman okitlalijkej ipan on caja hasta okitemiltijkej. 11 Ijkuak on caja temiya, on levitas kiktiyaj intech on itlapeliuikauan on rey. Kemaj itlajkuilojkau on rey niman sen ueyi tekiuaj yejuan on ueyitlayekanki tiopixki kiteneuaya, uajlayaj, niman kipouayaj on tomin. Kemaj, oksejpa ompa kitlaliayaj itech on ueyitiopan. Yejua in kichiuayaj mojmostla, niman ijkon kisentlaliayaj miyek tomin. 12 On rey niman Joiada kinmakayaj on tomin on yejuan kiyekanayaj on tekitl ipan iueyitiopan toTEKO. Niman yejuamej kintlakeuayaj on yejuan kinximaj temej, tablas niman no on yejuan kitekitiyaj bronce niman hierro para kuektlaliayaj on ueyitiopan. 13 On tlakamej yejuan kiyekanayaj on tekitl sanoyej otekitkej, niman on iueyitiopan toTEKO kuajli okajkej ken achtoj tlachijchitlij katka. 14 Ijkuak yotlankej, okiktijkej on tomin yejuan onokau itech on rey niman Joiada. On tomin okitekitiltijkej para okichijchijkej tazas uejueyimej niman okseki tlajtlamach de oro niman de plata yejuan okitekitiltijkej ipan iueyitiopan toTEKO. Nochi tiempo chika Joiada nemiya, kitemakayaj uentli yejuan tlatla ipan iueyitiopan toTEKO.
15 Pero Joiada oueuentsintiak, niman omik ijkuak sanoyej yeueuentsin katka. Ijkuak omik, kipiyaya 130 xipan. 16 Okitôkakej kampa itoka Iueyikalpan David iuan on reyes pampa kuajli otekit para Israel, para Dios niman ipan on ueyitiopan.
17 Sakin ijkuak yomik Joiada, on uejueyitlayekankej de Judá okitatoj on rey Joás para okimakatoj tetlakaitalistli. Niman on rey kuajli okak imintetlakanonotsalis. 18 Niman kemaj okitlalkauijkej on iueyitiopan iminTEKO, niman Dios de inachtojtajuan. Yej opeu kimauistiliaj ixneskayouan on Asera niman oksekimej ídolos. Ipampa imintlajtlakoluan, Dios sanoyej okualan iuan Judá niman Jerusalén. 19 Kemaj Dios okinuajtitlan tiotlajtojkej para kinachtojijliskej ma nokuepakan itech, pero xokinekej okakkej.
20 Iespíritu Dios ouajlaj ipan Zacarías, ikoneu on tiopixki Joiada. Yejua onotelkets inmixpan on chanejkej kampa más tlakpak niman okijtoj: “Ijkin kijtoua Dios ¿'Tline xnenkitlakamatij notlanauatiluan? ¿Tline sano nemejuamej nenkimotejtemouiliaj nemocastigo? ¡Pampa nemejuamej onennechtlalkauijkej, nejua no nemechtlalkauis nemejuamej!’ ”
21 Pero yejuamej okitlajtouilijkej para kimiktiskej Zacarías. On rey okiminnauatij ma kimiktikan niman okitemojmotlakej ipan ikiauak on iueyitiopan toTEKO. 22 On rey Joás okelkau itetlajsojtlalis Joida yejuan achtoj iuan kipiyaya. Niman okimktij Zacarías ikoneu Joida, yejuan ijkuak ye miktikaj okijtoj: "toTEKO ma kita yejua in, niman ma mitscastigaro.”
23 Ijkuak yopanok se xipan, isoldados on sirios okalakkej ne Judá niman Jerusalén. Niman kemaj okinmiktijkej nochimej on tlayekankej de on nación. Okinoyaxkatikej nochi on tlen pajtioj niman okititlanilijkej on rey de Damasco. 24 Maski isoldados on sirios xmiyekej katkaj, toTEKO okauilij ma kintlanikan on isoldados Judá yejuan sanoyej miyekej katkaj, pampa on chanejkej Judá yokitlalkauijkaj iminTEKO, Dios de iminachtojtajuan. Yejua ika, Joás ijkin okiselij on castigo.
25 Ijkuak on sirios oyajkej, okajtejkej Joás sanoyej tlakokojli. Niman itlapaleuijkauan okitlajtouilijkej kimiktiskej, niman okimiktijkej ipan itlapech ipampa imikilis ikoneu on tiopixki Joiada. Sakin okitôkakej kampa itoka Iueyikalpan David, pero xokitôkakej kampa kintôkayaj on reyes. 26 On yejuan okimiktikej Joás katka Zabad ikoneu Simeat on amonita niman Jozaba ikoneu Simrit on moabita.
27 Nochi on tlajtlamach yejuan impan onochiu ikoneuan Joás, on tiotlajtoltin okijtojkaj itechkopa, niman ken okuektlalij iueyitiopan toTEKO Dios, nochi tlajkuilolnestikaj ipan on amamoxtli de on reyes. Kemaj Amasias, ikoneu Joás, kej yejua okalak rey.