Joram otlamandaroj ne Judá
21
Josafat omik niman okitôkakej iuan iuejkatajuan ipan on ueyikalpan itoka "Iueyikalpan David", niman okauilij on trono Joram, ikoneu. 2 Ikniuan katkaj: Azarías, Jehiel, Zacarías, Azarías, Micael niman Sefatías. Nochimej yejuamej in katkaj ikoneuan Josafat rey de Israel. 3 Intataj okintlayokolijka plata, oro niman tlajtlamach yejuan patioj. No okinmakaka on uejueyikalpanmej yejuan kuajli yeualtsakutokej ne Judá, pero on país kampa tlamandaruaya okauilij Joram pampa yejua katka iyenkuiyokoneu. 4 Ijkuak Joram, melauak onokau ipan itrono itataj, okinmiktij nochimej ikniuan niman no oksekimej tlayekankej de Israel. 5 Joram kipiyaya 32 xipan ijkuak opeu tlamandaroua, niman ne Jerusalén otlamandaroj chikueyi xipan. 6 Pero Joram onouikak kenon reyes de Israel niman okichiu tlen xkuajli ixpan toTEKO. Joram onouikak ken ifamilia Acab pampa isiuau ichpoch katka Acab. 7 Pero toTEKO xokinek okimpojkej iuejkakoneuan David ipampa on pacto yejuan okichijka iuan David. ToTEKO okiprometerouilijka ika nochipa tlamandaros yakaj de ifamilia David.8 Ijkuak tlamandarouaya Joram, on edomitas xipan okitakej on rey de Judá niman okitenejkej iminrey. 9 Kemaj Joram, iuan on soldadostlayekankej niman nochimej incarretas de guerra okalakkej ne iueyitlalpan Edom. Ijkuak on onochiu, on soldados edomitas okinyejyeualojkej, pero Joram iuan isoldadojtlayekankauan ouel ocholojtekej ipan on tlayoua. 10 Pero on país Edom ouel onoxeloj itech Judá hasta aman. No ipan on tiempo onoxeloj itech Judá on ueyikalpan Libna, pampa Joram yokitlalkauijka toTEKO, Dios de iuejkatajuan. 11 Joram no okinchijchiu on pipitikej tiopamej kampa kinmauistiliaj ídolos ipan on tepetsitsimej de Judá, niman yejua ika on chanejkej de Jerusalén xok okineltokak toTEKO, niman Judá okitlalkau Dios.
12 Niman kemaj Joram okiselij sen amatlajkuilojli de on tiotlajtojketl Elías yejuan kijtouaya: "Ijkin kijtoua toTEKO, Dios de moachtotajtaj David. Tejua xotiktokak on iejemplo de motataj Josafat, nion de moauelo Asa rey de Judá. 13 Yej otikchiu tlen xkuajli ijkon kenon reyes de Israel, niman tejua otikchiu para on chanekej de Judá niman on chanejkej de Jerusalén maka ma kineltokakan Dios, ijkon ken okichiu ifamilia Acab. Niman otikinmiktij mokniuan yejuan más kuajkualtin katkaj xken tejua. 14 Yejua ika, toTEKO kichiuas ma uetsi impan on mochanejkauan, mokoneuan, mosiuauan niman nochi tlen moyaxka, sen temojtij castigo. 15 Niman tejua nimitstitlanilis sen kokolistli mojtik, yejuan mojmostla tlanautias hasta uajkisaskej mokuitlaxkoluan.”
16 Kemaj toTEKO okichiu para on filisteos niman árabes iminnisiuchanejkauan on etíopes ma kitlauelitakan Joram. 17 Yejuamej okuijsojkitoj Judá niman okalakkej ipan on país niman okiktikej nochi on tlajtlamach yejuan patioj tlen okinextijkej ipan on palacio, iuan ikoneuan niman isiuauan Joram. Nion se ikoneu xouel ocholoteu ika nemilistli, pero okajkej Joacaz yejuan más konetl katka de nochimej. 18 Sakin, toTEKO, okitlajyouiltij Joram ika sen kokolistli yejuan xkaman opajtik ipan ikuitlaxkoluan. 19 Mojmostla tlanautiaya. Sakin de on ome xipan, ipampa on kokolistli okis ikuitlaxkol niman omik, ikan temoti nekokojli. Ichanejkauan xokitlikuiltijkej nion se ueyi tlitl para okitlakaitakej ken okinchiuilijkej para inuejkatajuan. 20 Ijkuak Joram opeu tlamandaroua kipiyaya 32 xipan niman otlamandaroj chikueyi xipan ne Jerusalén. Xakaj okitlalij on ajmankatlakentli ipampa, niman okitôkakej ipan on ueyikalpan itoka Iueyikalpan David, pero xokitôkakej kampa toktôkej on reyes.