Salomón nonamiktia iuan ichpoch on rey de Egipto
3
Salomón onotlajtolmakak iuan on rey de Egipto, niman kemaj ononamiktij iuan ichpoch. Niman Salomón okuikak isiuau ne kampa itoka Iueyikalpan David, para chantiya ne hasta kaman otlan kichijchiua ipalacio, iueyitiopan toTEKO, niman on tepanchinantli yejuan ika okiyeualtsaku on ueyikalpan Jerusalén. 2 On israelitas sanken* tlauentlaliayaj inkuatipan tepemej ipan on tiopantsitsimej, pampa hasta ijkuakon xe onkatka iueyitiopan toTEKO.Salomón kitlajtlanilia toTEKO tlamatkilistli
3 Salomón sanoyej kitlasojtlaya toTEKO niman nouikaya ipan on temachtiltin yejuan okitlalij David, itataj, pero yejua no yaya tlakpak ikuatipan tepemej para kinmiktiaya yolkej para uentli niman kitlatiaya kopajli ne ipan on tiopantsitsimej. 4 Ipan on ueyikalpan Gabaón onkatka on más ueyixtikaj tlaixpan* kampa ontlauentlaliayaj ikuatipan tepemejkampa kinmauistiliaj on ídolos. Ipan on tonaltin yopanok, Salomón ompa kiuentlaliaya se mil uentli yejuan nochi tlatla. 5 Se tlayoua ne Gabaón, toTEKO ononextij ipan itemik Salomón niman okijlij: “Xnechtlajtlanili tlen tiknekis, niman nejua nimitsmakas.”
6 Salomón okinankilij: “Tejua sanoyej otiktlajsojtlak* notataj David, motekitkau pampa yejua xkaman omitskau, nochipa okichiu tlen kuajli niman yolmelajki katka motech. Niman hasta aman tikmaka motlajsojtlalis, yejua ika, otikauilij se ikoneu ma notlali ipan itrono, ijkon ken aman yonochiu. 7 Tejua noTEKO Dios otinechtlalij rey para onikpatlak notataj David maski nejua ken nikonetl, niman xitlaj* nikmati. 8 Pero nikan ninemi para nikinyekanas motlapejpeniluan yejuan tejua otikintlapejpenij. In motlapejpeniluan sanoyej miyekej, niman xakaj uelis kimpouas nion xakaj uelis kixitilis keskimej nemij. 9 Nimitstlajtlanilia tej, xnechmaka kajsikamatilistli, para nikmatis kenijki nikinyekanas motlapejpeniluan, niman nikmatis on tlen kuajli niman tlen xkuajli, pampa tlamo, ¿kenijki uelis nikinyekanas in motkapejpeniluan sanoyej miyekej?”
10 ToTEKO opak ika Salomón yejua in okitlajtlanilij, 11 niman okijlij: “Pampa otinechtlajtlanilij tlamatkilistli para tikmatis kenijki titlayekanas, niman xotiktlajtlan moueyinemilis, nion requezas, nion inmikilis motlauelikniuan, 12 nimitsmakas tlinon yotinechtlajtlanilij. Nejua nimitsmaka kajsikamatilistli niman tlamachilistli ken xkaman yakaj okipix nion xkaman yakaj okse kipiyas. 13 Niman no nimitsmakas miyek riquezas niman ueyilistli yejuan nochiuiyan kimatiskej, yejuan tejua xotinechtlajtlanilij. Ipan nochi monemilis, xakaj nemis okse rey ken tejua. 14 Niman tla nochipa tikchiua tlen nejua nikneki niman tiktlakamati noleyes niman notlanauatiluan ken okichiu David, motataj, nimitsmakas sen ueyinemilistli.”
15 Ijkuak Salomón otlachix, okimat ika Dios okinots ipan itemik. Kemaj oyaj Jerusalén niman onotelkets ixpan iyekcaja toTeko yejuan kipiya ipacto, niman okimakak uentin yejuan nochi tlatla niman uentin para yoltlalilistli. Kemaj okichiu sen ueyi iluitl para inuan otlakuaj nochimej itlapaleuijkauan.
Salomón, onochiu sen teyolkuitijketl tlamatki*
16 Ipan on tonaltin, omemej siuaauilnenkej oyajkej okitatoj on rey Salomón. Ijkuak ixpan oyajkej, 17 se on siuatl okijlij:
—¡Ay noueyi rey! In siuatl niman nejua tichantij san sekan ipan sen kajli. Nejua oniktlakatilij nokonetsin niman yejua ompa nouan nemiya. 18 Ijkuak kipiyaya yeyi tonajli ika nejua oniktlakatilij nokonetsin, in siuatl no okitlakatilij ikonetsin. Ipan on kajli san tejuamej tichantij, xakaj okse nemi touan. 19 Pero se tlayoua in siuatl omik ikonetsin pampa ipan onotekak. 20 Kemaj kanaj tlajkoiuan, onokuiteu, chika nejua nikochiya niman okejkuanij nokonetsin notech para okitekak yejua itech, niman notech okitekak ikonetsin yejuan yomik. 21 Niman uejkakualkan ijkuak oninokuiteu para nikchichitisia nokonetsin, onikitak ika yomik. Pero ijkuak kuajli otlanes, onikitak ika on konetsintli xejua nokonetsin.
22 Kemaj on okse siuatl okijtoj:
—Ka, on yejuan yoltikaj nejua nokoneu, niman tejua mokoneu on yejuan yomik.
Pero on achtoj siuatl oksejpa okijtoj:
—Ka, mokoneu on yejuan yomik. On yejuan yoltikaj nejua nokoneu.
Niman ijkin nokamauijsokiyaj ixpan on rey. 23 Kemaj on rey ijkin opeu kinemilia: “Yejua in achtoj siuatl kijtoua ika ikonetsin on yejuan yoltikaj, niman on konetsintli yejuan yomik, ikoneu on okse siuatl. Pero in okse siuatl kijtoua ika on konetsintli yejuan yoltikaj yejua ikoneu niman on yejuan xyoltikaj ikoneu on achtoj siuatl”. 24 Yejua ika on rey otlanauatij:
—¡Xnechajkuilikan sen espada!
—Xtlajkotekikan ika on espada on konetsintli yejuan yoltikaj, niman cada nantli xmakakan tlajkotipan.
26 Pero on yejuan melauak nantli de on konetsintli yejuan yoltikaj, sanoyej onajman ipampa ikonetsin, niman ijkin okiknotlajtlanilij on rey:
—¡Noueyi rey, nimitstlajtlanilia maka xmikti on konetsintli! ¡Más kuajli xmaka in siuatl!
Pero on okse siuatl okijtoj:
—¡Xtlajkotekikan! Ijkon nion nejua notech nokauas, nion yejua itech.
27 Kemaj on rey otlanauatij:
—On konetsintli yejuan yoltikaj, xmakakan on siuatl yejuan kijtoua maka ma kimiktikan, pampa on yejua melauak inanaj.
28 Ijkuak nochimej on israelitas okimatkej kenijki on rey okiseuij on tlauejli, okitlakaitakej pampa okitakej ika Dios okimakak tlamatkilistli para kichiuas tlen melajki.