Itekiuajyo on rey Salomón
Azarías, itelpoch Sadoc, ueyi tiopixki katka.
3 Elihoref niman Ahías, itelpochuan Sisa, tlajkuilojkej katkaj.
Josafat, itelpoch Ahilud iamamoxtlajkuilojkau katka on rey.
4 Benaías, itelpoch on tlakatl Joiada,
tlayekanketl katka intech on soldados.
Sadoc niman Abiatar tiopixkej katkaj.
5 Azarías, itelpoch Natán, tlayekanki katka intech on gobernadores.
Zabud, itelpoch on tiopixki Natán,
itetlakanonotskau katka on rey.
6 Ahisar tekitlayekanketl katka ipan on palacio.
Niman Adoniram, itelpoch Abda, kinyekanaya on tlakamej
yejuan Salomón okinchiualtij otekitkej maski xkintlaxtlauiliaya.
7 Salomón no kipiyaya majtlaktli uan ome gobernadores ipan nochi Israel. Yejuamej imintekiu katka kisentlaliskej nochi tlajtlamach* niman tlakuajli para on rey niman ifamilia. Ipan se xipan, cada se ika onkaj kisentlaliaya on tlajtlamach* para kitekitiltiayaj se metstli. 8 Imintoka on majtlaktl uan ome gobernadores katka:
Ben-Hur kichiuaya itekiu ken gobernador ipan itepeyoj Efraín.
9 Ben-Decar kichiuaya itekiu ken gobernador impan on uejueykalpanmej
Macaz, Saalbim, Bet-semes, Elón niman Bet-hanán.
10 Ben-Hesed kichiuaya itekiu ken gobernador impan on uejueyikalpanmej
Arubot, Soco niman ipan nochi iueyitlalpan Hefer.
11 Ben-Abinadab kichiuaya itekiu ken gobernador ipan nochi on región de Dor.
(Isiuau katka Tafat, ichpoch Salomón.)
12 Baana, itelpoch Ahilud, kichiuaya itekiu ken gobernador ipan on uejueyikalpanmej
Taanac niman Meguido, niman no ipan nochi iueyitlalpan Bet-seán.
(On ueyitlalpan onkaj nisiu on kalpan Saretán, más tlatsintlan ikalpan Jezreel,
desde on ueyikalpan Bet-seán hasta on ueyikalpan Abel-mehola, más neka de on ueyikalpan Jocmeam.)
13 Ben-Geber kichiuaya itekiu ken gobernador ipan on ueyikalpan Ramot de Galaad.
Niman yejua tlamandarouaya ipan on kalpantsitsimej de Galaad
yejuan iyaxkauan* katka iueyifamilia Jair, iuejkakoneu* Manasés.
No okichiu itekiu ipan iueyitlalpan Argob, yejuan nokauaya ipan iueyitlalpan Basán,
kampa onkatkaj 60 uejueyikalpanmej yejuan yeualtsakutikatkaj ikan tepanchinantli
yejuan kipiyayaj uejueyi tsakuijlomej yejuan kintsakuayaj ikan tepostin de bronce.
14 Ahinadab itelpoch Ido, kichiuaya itekiu ken gobernador ne Mahanaim.
15 Ahimaas kichiuaya itekiu ken gobernador ipan iueyitlalpan Neftalí.
(Yejua ononamiktij iuan Basemat, yejuan okse ichpoch Salomón.)
16 Baana, ikoneu Husai, kichiuaya itekiu ken gobernador
ipan iueyitlalpan Aser niman on kalpan Alot.
17 Josafat itelpoch on tlakatl Parúa,
kichiuaya itekiu ken gobernador ipan iueyitlalpan Isacar.
18 Simei itelpoch on tlakatl Ela,
kichiuaya itekiu ken gobernador ipan iueytlalpan Benjamín.
19 Geber, itelpoch Uri, kichiuaya itekiu ken gobernador ipan iueyitlalpan Gad.
(Ompa Sehón achtoj nemiya iminrey on amorreos,
niman no kampa Og, rey katka ipan on ueyitlalpan Basán.)
Niman nemiya okse gobernador yejuan kinyekanaya on majtlaktlimej gobernadores ipan nochi on paísa.
Tlamatkilistli niman riquezas de Salomón
20 Ipan on tlajli Judá niman Israel, sanoyej yotojlantika. On tlakamej sanoyej miyekej katkaj ken itlaj xajli yejuan onkaj itenko mar. Sanoyej okipixkej tlakuajli niman tlaonijli, niman no yejuamej sanoyej pakiyaj. 21 Salomón kinmandorouaya nochimej on naciones desde on río Éufrates, hasta on imimpaís on filisteos, niman tlatsintlan hasta kampa itlalnamikiloyan on país de Egipto. Nochimej yejuamej kitlaxtlauiliayaj impuestos, niman okitlakamatkej chika yejua nemiya. 22 On tlakuajli yejuan nonekiya mojmostla para Salomón, ifamilia, niman para on yejuan tekitiyaj ipan ipalacio katka ichkichin: 6 mil 600 litros harina yejuan más kuajli, 3 mil 200 litros harina yejuan xmás kuechtik, 23 majtlaktli toro yejuan okintlakualtijkej para más okintomajkej, sempoajli toro yejuan onoskaltijkej ikan sakatl, niman 100 borregos. No kimakayaj masamej, gacelas, gamos, niman totomej yejuan tojtomajkej. 24 Salomón tlamandorouaya ipan nochi iueyitlalpan on río Éufrates kampaka ikalakiyan tonaltsintli, desde Tifsa hasta on ueyikalpan Gaza kinmandarouaya on reyes de on región. Ipan nochi on ueyitlalpan niman iyeualkan onkatka yolseuilistli. 25 Niman ipan nochi inemilis Salomón, on chanejkej ne Judá niman Israel, desde Dan hasta Beerseba, xakaj okimpajsoloj. Cada se notlaliaya itsintlan iuvasyoj niman ihiguerab. 26 Salomón no kipiyaya 4 mil kaltin para on caballos yejuan kitilanaj carretas de guerro, niman 12 mil soldados yejuan yayaj ipan caballos. 27 On gobernadores yejuan yokintenejkej, kiktiliayaj nochi tlen nonekiya de tlakuajli niman on tlajtlamach* para on rey Salomón, niman para yejuan iuan chantiyaj. Cada metstli okitakej para maka itlaj kimpolos ipan on palacio. 28 Cada gobernador no kititlaniya kampa kijliayaj ma kititlani on cebada niman on paja para incaballos on soldados, niman para on caballos yejuan kintilanaj on carretas de guerra. Cada se kitemakaya ijkuak kitocarouaya.
29 Dios okimakak Salomón tlamatkilistli, niman tlamachilistli, niman sanoyej miyek kajsikamatilistli. Ijkon miyek ken itlaj xajli yejuan onkaj itenko mar. 30 Sanoyej tlamatki* katka Salomón hasta okipanauij imintlamatkilis* on egipcios niman on tlamatkej* yejuan ueleuaj kampaka kisa tonaltsintli. 31 Xnemiya sen tlakatl yejuan más tlamatki* katka ken yejua. Yejua más tlamatki* katka xken Etán, iuejkakoneu* Zera, niman xken Hemán, Calcol niman Darda, itelpochuan Mahol. Niman ipampa itlamatkilis*, Salomón sanoyej okixmatkej ipan nochi naciones de ompaka iyeualkan. 32 Okijkuiloj 3 mil tlamachilistlajtoltin niman okijkuiloj se mil cinco kuikamej. 33 Otlajkuiloj niman otlajtlajtoj kenijki onokej on kojtin, niman on sesekneka xojtli, desde on cedrojkojtli de Líbano hasta on xojtli yejuan kisa ipan tepanchinantli. No otlajtoj de on yolkej, on totomej, on yolkej yejuan noteuilanaj ipan tlajli, niman on michimej. 34 De nochi tlaltikpaktli kampa kakiyaj itlamatkilis* rey Salomón, on reyes kinuajtitlaniyaj intlajtokauan para kuajkakiyaj Salomón.