David okimpou on israelitas
24
ToTEKO oksejpa okualan intech on israelitas, niman okichiu para David ma kichiua sen poualistli ipan on tlajli de Israel niman Judá. 2 Ijkin tej, David okinauatij Joab, niman on intlayekankau on soldados, yejuan iuan yaya:—Xuiya ipan nochi on tribus* de Israel desde Dan hasta Beerseba niman xchiua sen poualistli para nikmatis keskimej nemij yejuan uelis yaskej ipan nouisokilistli.
3 Pero Joab okinankilij David:
—ToTEKO, yejuan moDios noueyi rey, ma kinmiyekili nochimej on israelitas okse 100 más xken aman nemij, niman tejua noueyi rey ma mitsmaka nemilistli para tikitas. Pero, ¿Tline tikneki noueyi rey tikchiuas sen poualistli?
4 Pero itlanauatil on rey más onokojtilij xken Joab niman intlayekankau on soldados. Yejua ika, yejuamej okiskej itech on rey para okichiuatoj on poualistli intech nochimej on israelitas. 5 Okipanokej on río Jordán, niman onoseuijkej inakastlan on ueyikalpan Aroer yejuan onkaj itlajkotian on ixtlauatl, ipan iueyitlalpan Gad nisiu on kalpan Jazer. 6 Kemaj oyajkej Galaad niman Cades ipan imintlal on hititas. Kemaj oajsikej Dan. Kemaj ne Dan, okiskej para oyajkej Sidón 7 Kemaj oyajkej kampaka tlatsintlan hasta on ueyikalpan Tiro yejuan kipiya uejkapan tepantli iyeuelkan. Niman kemaj nochiuiyan oyajkej ipan on inuejueyikalpanuan on heveos niman cananeos hasta oajsikej tlatsintlan iueyitlalpan ika Judá, ipan on ueyikalpan Beerseba. 8 Ijkuak okajxitijkej chiknaui metstli niman sempoajli tonajli, niman otlan kinejnemij nochi on país, oajsikej ne Jerusalén. 9 Joab okimachistij on rey David keski tlakatl nemi ipan iueyitlalpan Israel. Ipan on iueyitlalpan Israel, katkaj 800 mil tlakamej yejuan uelis yaskej ontlauijsokiskej, niman ipan iueyitlalpan Judá nemiya 500 mil.
10 Pero David okimat ika okipix tlajtlakojli pampa okichiu on poualistli. Kemaj onoyolkuitij itech toTEKO, niman okijlij:
—Yonikchiu sen ueyi tlajtlakojli ipampa in poualistli yejuan onikchiu. Pero nimitstlajtlanilia noTEKO, xnechtlapojpoluili notlajtlakol, nejua nimotekitkau, pampa oninochiu ken yakaj yejuan xtlamachilisyej.
11 Niman uajmostla, ijkuak onokuiteu David, toTEKO okinots on tiotlajtoketl Gad yejuan tekitiya para David, niman ijkin okijlij: 12 "Xuiya, xkitati David. Xkijliti ma kitlapejpenij katlejua, de in yeyi castigo kineki ma nikchiua.” 13 Gad oyaj okitato David, niman okitlajtoltij:
—¿Katlejua tiknekis? ¿Tikneki ma onya mayantli chikome xipan ipan nochi in país, noso tikneki ticholojtinemis yeyi metstli ijkuak motlauelikniuan kinekiskej mitsmiktiskej, noso tikneki ma uajla sen ueyi kokolistli yeyi tonajli ipan mopaís? Amantsin xnemili, niman xnechijli tlinon nikijlis on yejuan onechajtitlan.
14 Niman David okinankilij:
—Ouijtika tlinon niktlapejpenis. Pero nikita más kuajli ma tiuetsikan imak toTEKO, pampa iteiknelilis* sanoyej ueyi, niman yej maka tiuetsiskej inmak on tlakamej.
15 Kemaj toTEKO okuajtitlan sen kokolistli sanoyej temojtij ipan nochi ipaís Israel desde on kualkan hasta on tonajli ijkuak toTEKO okijtoj ika tlamis. Niman desde Dan hasta Beerseba omikej 70 mil tlakamej niman siuamej. 16 Niman ijkuak on ángel yejuan toTEKO okuajtitlan ye kipopoloskia Jerusalén, toTEKO okiyolkokoj ika mikiyaj on israelitas niman ijkin okinauatij on ángel yejuan kimiktiaya nochi tlakatl: “¡Ma ijki, makasa xchiua!”
Ijkuakon on iángel toTEKO nemiya itech on mijlaj kampa Arauna on jebuseo kajaniaya itrigo. 17 Ijkuak David okitak iángel toTEKO yejuan temiktiaya, onotlatlautij itech toTEKO:
—Nejua onitlajtlakoj. Nejua nikpiya on tlajtlakojli. Pero yejuamej in xkipiyaj tlajtlakojli. Nejua nimitstlajtlanilia para mocastigo ma uetsi nopan niman ipan nofamilia.
David okichijchiu sen tlaixpan*
18 Ipan on tonajli Gad oyaj okitato David, niman okijlij: “Xchijchiua sen tlaixpan* para toTEKO ipan imijlaj Arauna kampa kajaniaya itrigo.” 19 Kemaj David oyaj okichiuato ken Gad okijlij, ijkon ken okinauatij toTEKO. 20 Arauna uejka ontlachixtikatka, niman okitak ika on rey niman itlakeualuan yayaj itechika. Kemaj Arauna okinnamikito niman onopachoj ixpan on rey. 21 Niman okijlij:
—¿Tline otiuajlaj noueyi rey otinechtlajpaloko nejua nimotekitkau?
David okinankilij:
—Nikneki nimitskouilis motlal kampa tikteinia trigo para ompa nikchijchiuas itlaixpan* toTEKO para ma tlami on kokolistli yejuan kimiktia nochi tlakatl.
22 Niman Arauna okinankilij:
—Noueyi rey, xkui on tlen tikita kuajli, niman xtemaka on uentli yejuan tlatla. Nikan nemij toros para on uentli, niman on kojtli* yejuan tlateinia, niman on yugos uelis inka tikintlatis para on uentli. 23 Nochi on san nimitsmaka tejua noueyi rey.
Niman no okijlij:
—Noueyi rey, ma moTEKO Dios kiseli mouen ikan pakalistli.
24 Pero on rey okinankilij:
—Nimitstlajsojkamachilia, pero ika onkaj nimitskouilis kech ika pajtio, pampa nejua xnikmakas noTEKO Dios uentli yejuan tlatla, tla xitlaj* niktlaxtlaua.
Ijki tej, David okou on tlajli niman on toros ika 50 plata tomin. 25 Niman ompa okichijchiu itlaixpan* toTEKO, niman okitemakak uentli yejuan tlatla niman okseki miyek uentli de yoltlalijli. Ijki tej, toTEKO okak on tlen okitlajtlanilijkej ipampa on país, niman on ueyi kokolistli onejkuanij de Israel.