On gabaonitas tetlakuepiltiaj
21
Ipan on tonaltin ijkuak David katka rey, oonyak mayantli yejuan ouejkau yeyi xipan. Yejua ika David okitlajtoltij toTEKO, niman toTEKO okinankilij: “On mayantli ualeua pampa miyek tlen xkuajli okichiu Saúl niman ifamilia pampa okinmiktijkej on gabaonitas.”2 David okintekuitlan on gabaonitas, niman otlajtoj inmiuan. (On gabaonitas xisraelitas katkaj. Yejuamej katkaj yejuan onokajkej de on amorreos. Ye uejkaui on israelitas okichikaj inmiuan sen pacto* kampa okintlajtolmakakej ikan itokatsin Dios para xkinmiktiskiaj. Pero Saúl, kemaj, okinmiktij sekimej pampa okintlauelitak ika xisraelitas.) 3 David okintlajtoltij on gabaonitas:
—¿Tlinon uelis nikchiuas nemopampa? ¿Kenijki uelis nikuektlalis on tlen xkuajli omechiuilijkej, para nenkintiochiuaskej itlapejpeniluan toTEKO?
4 On gabaonitas okinankilijkej:
—Nion plata noso oro uelis techyoltlalis ipampa Saúl niman ifamilia ika on tlen otechchiuilij. Pero nion xtiknekij ma miki yajkaj tlakatl de Israel.
David okinmijlij:
—Tla ijkon xnechijlikan, tlinon nenkinekij ma nikchiua nemopampa.
5 Niman yejuamej okinankilijkej:
—On tlakatl Saúl kinekiya tlamis techmiktis, niman okinemilij para techpopolos, niman para makasa ma titokauakan ipan inueyitlalpan on israelitas. 6 Yejua ika, aman tiknekij xtechmaka chikome tlakatl yejuan iuejkakoneuan Saúl. Niman tikiminajkopiloskej ixpan toTEKO ne Gabaa iueyikalpan Saúl on yejuan toTEKO okitlapejpenij para rey.
On rey onokalaktij kiminmaktilis, 7 pero Mefi-boset, ikoneu Jonatán, ixuiu Saúl, xokinmakak, ipampa on tlajtolmakalistli ika itokatsin Dios yejuan okichijka iuan Jonatán. 8 Xkaua tej, David okinmajsik on ome ikoneuan Rizpa, ichpoch Aja, yejuan iuan okipixka Saúl. Yejuamej intoka kakta Armoni niman Mefi-boset. Niman no okinmajtsik okse makuijli ikoneuan Merab, ichpoch Saúl, yejuan okipix iuan Adriel, ikoneu Barzilai yejuan kisa itech Mehola. 9 David okinmakak on gabaonitas, niman yejuamej okinajkopilojkej ipan on tepetl ixpan toTEKO. Ijki omikkej san sekan on chikomemej ipan on tonaltin ijkuak peuayaj kipixkaj on cebada.
10 Kemaj Rizpa itlakpasiuau Saúl, ichpoch Aja, onotlakentij ikan tlakentli* tejsontik para okiteititij ika najmana, niman onotekak ipan sen ueyi tetl. Ompa onokau desde ijkuak opeu kipixkaj on cebada, hasta ijkuak oyejkok on xopan. Xkinkauiliaya on totomej para ma nonisiuikan intech on mikatsitsimej ijkuak tlajokaj, nion on yolkej tekuanimej ijkuak tlayoua.
11 Ijkuak okimachistijkej David on tlen okichiu Rizpa, itlakpasiuau Saúl, 12 oyaj niman okinkuito on inomiyouan Saúl niman de ikoneu Jonatán, yejuan kimpiyayaj on chanejkej de Jabes de Galaad. (Yejuamej okichtekaj ipan on plaza de Bet-sán, kampa on filisteos okimpilojkaj on tonajli ijkuak okitlankej Saúl ne Gilboa.) 13 Kemaj David otlanauatij ma kinuajkikan iomiyouan Saúl, de Jonatán, niman inomiyouan on chikomemej tlakamej yejuan okinajkopilojkaj. 14 Kemaj okintôkakej inomiyouan inuan iomiyouan Saúl niman de Jonatán ipan itlalkon Cis, itataj Saúl, nepa Zela, ipan iueyitlalpan Benjamín. Nochi onochiu kenon rey otlanauatij. Niman ijkuak nochi in yonochiu, Dios okinmakak nochi on tlen on israelitas kitlajtlaniliayaj para imimpaís.
Abisai kimanauiya inemilis David
15 On filisteos oksejpa okiskej para kinuijsokiskej on israelitas. Kemaj David iuan isoldados oyajkej okinmixnamikitoj. Ipan on nouijsokilistli, David sanoyej osiau. 16 Niman se tlakatl sanoyej ueyi itoka Isbi-benob kinekiliaya kimiktis. Ilanza yetik katka más de 30 kilos, niman ipan ixijlanmekayo kiktiya se yenkuik espada. 17 Pero Abisai, itelpoch Sarvia, okipaleuito David. Okixnamik niman okimiktij on filisteo. Kemaj nochimej isoldados David okichiualtikej ma notlajtolmaka ikan itokatsin Dios ika xok kisas inmiuan ipan sen nouijsokilistli para maka on israelitas kipoloskej on más ueyi intlayekankau.
Okinuijsokkej on uejueyi tlakamej
18 Sakin ne ipan on kalpan Gob oonyak okse nouisokilistli inmiuan on filisteos. Ijkuakon, Sibecai yejuan oualeu ipan on kalpan Husa, okimiktij Saf. Yejua iuejkakoneu* katka sen sanoyej ueyi tlakatl. 19 Niman ipan okse nouisokilistli yejuan oonyak intechkopa on filisteos no ompa Gob, Elhanán, ikoneu Jair de Belén, okimiktij Goliat yejuan uajleua de on ueyikalpan Gat. Yejua kipiyaya sen lanza yejuan ikojyo ueyak kakta kenon kojtli* yejuan kitekitiltiaj ijkuak kichijchiuaj tela.
20 Ne Gat, oonyak okse nouisokilistli. Ompa nemiya sen tlakatl yejuan sanoyej ueyi niman kipiyaya chikuasen imajpil ipan cada ima, niman chikuasen ikxipil ipan cada ikxi. Nochi on imajpiluan iuan ikxipiluan katkaj 24. Yejua no teuejkakoneu katka intech on uejueyi tlakamej. 21 Pero ijkuak okinuijuikaltij on israelitas, Jonatán ikoneu Simea, ikniu David okimiktij on tlakatl yejuan oteuijuikaltij. 22 In nauimej uejueyi tlakamej iuejkakoneuan kaktaj Refa, yejuan chanej* katka Gat, pero ouetskej imak David niman isoldados.