On kuikatl yejuan David okijkuiloj
(Salmo 18)
22
David onokuikatij in kuikatl para toTEKO ijkuak toTEKO okimanauij imak Saúl niman de nochimej itlauelikniuan. 2 Ijkin onokuikatij: "Tejua, noTEKO, akin tinechmanauiya,
yejuan itech noniyana,
yejua nechmanauiya ken sen tepostlatsakuilijli,
yejua nechmakixtia ikan ipoder,
yejua nemi más tlakpak, itech noniyana,
yejua on yejuan más ueyi notemanauijkau,
yejua notemakixtijkau.
¡Niman yejua onechmanauij itech
on yejuan nechchiuilisnekiya on tlen xkuajli!
4 Tejua, noTEKO, akin kitocaroua para kueyiliskej.
Ijkuak nimitsnotsa, tinechmanauiya itech notlauelikniuan.
5 "On mikilistli yejuan ken itlaj iakoxonalis on mar, onechyejyeualoj.
Sanoyej onikmakas on iakoxonalis
yejuan kinekiya nechmiktis.
6 On mikilistli onechmamalin ken itlaj mekatl.
Oniuets ipan sen tlatlalijli yejuan ye nechmiktiaya.
7 Ipan on ajmantli oniktsajtsilij noTEKO.
Oniktlajtlanilij noDios ma nechpaleui.
Niman yejua onechkak desde ipan itiopan.
On notlajtol oajsik inakasko.
8 "Kemaj oonyak sen chikauak tlalolinalistli.
Okuiuixkak ipeuyan on cielo.
Otsejtseliu ika itlauel toTEKO.
9 Iyakak kisaya poktli.
Ikamak kisaya sen tlitl yejuan nochi kixoxotonia.
Ikamak kixtiaya tekojli yejuan tlikuitiu.
10 Okitlapoj icortina on cielo, niman ouajtemok.
¡Tlatsintla de ikxiuan onkatka uejueyi moxtli yejuan tliliki*!
11 Otlejkok ipan sen querubín*
yejuan majtlapalej, niman opatlan.
Opatlan ipan imajtlapaluan on ajakatl.
12 Okinokentij miyek tlayouajlotl.
On tliliki* moxtli yejuan sanoyej kipiyaya atl kiyeualojtikatka.
13 Sen kualtsin tlapetlanalistli okis iyakapan.
Otlikiau ikan tekojli yejuan sanken* tlikuitiu.
14 "ToTEKO okichiu para otlakomon desde ne iluikak.
Itlajtoltsin on yejuan Más Ueyixtikaj okakistik.
15 Otlamotlak ikan ilanzas niman itlaminaluan,
niman itlauelikniuan ontlatlaksakej sa kanika.
Ika itlapetlanalis, on itlauelikniuan ocholojtejkej.
16 "Iuejkatlan on mar ouajnes.
Ipeuayan in tlaltikpaktli ouajnes
ijkuak toTEKO okinmajuak itlauelikniuan,
ijkuak chikauak otlalpits impan.
17 Dios onechajmakak ima desde ne tlakpak.
Ikan ima onechkixtij ipan on uejkatlan mar.
18 Onechmanauij de on notlauelikniuan
yejuan más kojtikej xken nejua,
yejuan nechtlauelitayaj
niman más kojtikej katkaj xken nejua.
19 Onechuijsokej ijkuak nikijyouiyaya tlajtlamach* tlen xkuajli.
Pero toTEKO onechpaleuij.
20 Onechkixtij para nechmanauis.
!Onechmanauij pampa nechtlajsojtla*!
21 ToTEKO onechmakak notlaxtlauil,
ken kitocaroua ika kuajli ninouika,
22 pampa nejua kuajli oniktokak iojui noTEKO;
¡Xkaman oniknenek noDios!
23 Nejua nikiminelnamiki nochi itlanauatiluan.
¡Xkaman oninoxeloj de ileyes!
24 Oninouikak kuajli, ixpan.
Yoninoxeloj de on tlen xkuajli.
25 ToTEKO yonechtlaxtlauilij ika on tlin kuajli,
pampa onikchiu on tlen kuajli ixpan.
26 "Tejua noTEKO nochipa tikchiua tlen tikijtoua
itech on yejuan nochipa mitstlakamati.
Niman nochipa tikpiya kuajli moyojlo
intech on yejuan kipiyaj kuajli iminyojlo.
27 Tiyolchipauak intech on yejuan yolchipajkej.
Pero tikualani intech on yejuan xkuajli nouikaj.
28 Tejua tikinmakixtia yejuan xnoueyimatij.
Pero on yejuan noueyimatij tikinmixkechia para tikiminiknotlalia.
29 Tejua noTEKO, tinotlauil.
Tejua noDios, titlauiloua ijkuak ninota ipan tlayouajlotl.
30 Ika mopaleuilis, nikinuijsokis notlauelikniuan,
niman niuelis nikpanos on tepantli
de on iminuejueyikalpanuan.
31 "Iojui Dios nochi melajki.
Itlajtolmakalis toTEKO nochipa nochiua.
Dios kinmanauiya ikan itepostlatsakuilil
nochimej akin kineltokaj.
32 ¿Katlejua okse Dios nemi, tla xsan toTEKO?
¿Okse nemi dios akin uelis techmanauis?
33 Ikan ipoder Dios, ninomanauiya.
Yejua kichiua para kuajli ninouika.
34 Yejua nechpaleuiya para ninotlaloua ken itlaj masatl,
niman xninalaua.
Ijkuak ninemi inkuapan on tepemej kampa más tlakpak,
tejua tinechpaleuiya para xniuetsi.
35 Yejua nechtlayejyekoltia,
niman nechueliltia para nitlauijsoki.
Yejua kichiua para nikojtik ipan nomauan
para ueli niktilana noarco tlaminal maski de bronce.
36 "Tinechmaka motepostlatsakuilil
yejuan ika tikmanauiya nonemilis.
Moteiknelilis yonechtiochiu.
37 Otikchiu para kuajli ma nikpiya noojui.
Ijkon nokxiuan xonalajkej.
38 "Onikintotokak notlauelikniuan niman onikinxoxotonij.
Xoninokuep hasta kaman otlan nikinmiktia.
39 ¡Otlan nikinmiktia! ¡Onikinkojkoton!
Xok onokuitejkej. ¡Oxinkej nokxitlan!
40 Tejua otinechmakak poder
para nitlauijsokis ipan on nouisokilistli.
Otikchiu para on notlauelikniuan
ma notlakuantelketsakan nixpan.
41 Otikchiu para notlauelikniuan ma cholojteuakan.
Onikimpopoloj nochimej on yejuan nechtlauelitaj.
42 Tlajtlaniyaj para yakaj ma kimpaleui,
niman xakaj okimpaleuij.
Kinotsayaj toTEKO, niman xokiminnakilij.
43 ¡Onikinchajchayau notlauelikniuan ken itlaj tlalkuechtli!
Onikinchojcholoj kenon sokitl yejuan onkaj ipan ojtli.
44 Otinechmanauij para maka teuan ma ninouijsoki.
Nochipa otinechpix ken tlayekanki ipan on naciones.
Nechtekichiuiliaj tlakamej yejuan xnikinmixmatiya.
45 Ijkuak on yejuan xchanejkej nechkakij, nechtlakamatij.
Tlakamej yejuan xnikan chanejkej nechkuajlinotsaj.
46 Tlakamej yejuan xchanejkej nomojtiaj.
Kisaj kuekuetlakatiu ne kampa oniyanaj.
47 "Ma nemi toTEKO.
Ma kitiochiuakan on yejuan nechmanauiya.
Ma kiueyilikan Dios yejuan nechmakixtia,
niman nechmanauiya.
48 Yejua on Dios akin tetlakuepiltia nopampa.
Okichiu para on naciones ma nikintlani.
49 Yejua nechmanauiya de notlauelikniuan,
de on xkuajkualtin tlakamej
yejuan onoketstejkej para nechuijsokiskej.
¡Tejua noTEKO tinechmakixtia
de on xkuajkualtin tlakamej yejuan sanoyej tlauelejkej!
50 Yejua ika, nimitsueyilia intsajlan on naciones.
Ninokuikatia kuikamej para nikueyilia moTokatsin.
51 Tejua tinechmaka uejueyi tetlanilistin,
nejua akin otinechtlapejpenij para nirey intech on israelitas.
Nochipa tinechmaka tetlajsojtlalistli*, nejua iuan nouejkakoneuan."