On ueyitlalpan yejuan okimakakej itribu* Judá
15
On ueyitlalpan yejuan okinmakakej ikan suertes on clanes de itribu* Judá, ajsitoya hasta kampa iuan nonamiki on tlajli Edom, niman kampaka sur ajsitoya hasta ipan on xalpatlajkan itoka Sin. 2 Ompaka on intlalnamikilis peuaya itech iyakapitsko on Mar Muerto kampaka sur, 3 niman yaya achi más kampaka sur ipan on itlaixko Acrabim, niman kipanauiyaya on xalpatlajkan Zin hasta kampaka sur de Cades-barnea niman hasta Hezrón. Kemaj on tlalnamikilistli tlejkoua hasta Adar niman tlayeualoua hasta Carca. 4 Niman kemaj ajsitoya hasta Asmón para onkisaya ipan on río de Egipto. Okitokak on río hasta ontlamiya ipan on mar Mediterraneo. In yejua katka itlalnamikiyan kampaka sur.5 Kampaka ikisayan tonaltsintli, on tlalnamikilistli katka itenko on Mar Muerto, niman ajsiya hasta kampa on río Jordán kalaki ipan on Mar Muerto. Kampaka norte, on tlalnamikilistli onpeu itech on Mar Muerto. 6 Niman on tlalnamikilistli tlejkouaya hasta Bet-hogla niman panouaya kampaka norte de Bet-arabá, niman de ompa yau kampa onkaj on tetl ueyi yejuan iyaxka* Bohán, ikoneu Rubén. 7 De ompa on tlalnamikilistli tlejkouaya ipan on ixtlauatl Acor hasta on ueyikalpan Debir. Ompa nokuepaya para norte hasta ajsiya ne Gilgal imelajkan on itlapilkayan Adumín yejuan nokaua kampaka sur itech on ayajtok. De ompa, itlalnamikilis on ueyi tlalpan panouaya itech on amejli En-semes niman yaya hasta on amejli En-rogel. 8 Kemaj panouaya ipan on ixtlauatl Ben-hinom yejuan nokaua kampaka sur de on itlapilkayan Jebús yejuan aman itoka Jerusalén. De ompa itlamiyan on ueyitlalpan tlejkouaya hasta ikuapan on tepetl yejuan onkaj kampaka ikalakiyan tonaltsintli de on ixtlauatl Hinom, niman kampaka lado norte itlalnamikiyan de on ixtlauatl Refaim. 9 Desde ikuapan on tepetl, on tlalnamikilistli yaya hasta on kampa meya on atl de Neftoa, niman kemaj yaya hasta on uejueyikalpanmej ipan on tepetl Efrón. Kemaj panouaya kampa itoka Baala yejuan no itoka Quiriat-jearim. 10 Kemaj de on ueyikalpan Baala, itlalnamikiyan on ueyitlalpan kiyeualouaya niman yaya para kampaka ikalakiyan tonaltsintli hasta ipan on tepetl Seir, niman panouaya ipan on tlajtlapilkayan Jearim, no itoka Quesalón niman nokaua kampaka norte. Niman kemaj temouaya hasta Bet-semes, niman kemaj panouaya hasta on kalpan itoka Timna. 11 Niman itlalnamikiyan on ueyitlalpan yaya norte ika de itlajtlapilkayan Ecrón, niman tlayeualouaya para Sicrón. Niman kemaj panouaya ipan on tepetl Baala, niman onkisaya hasta Jabneel para ontlamiya itech on Mar Mediterraneo. 12 Sa ika nochi, on ueyitlalpan kampaka ikalakiyan tonaltsintli nonamikiya iuan on Mar Mediterraneo.
In yejua itlalnamikiyan katka on ueyitlalpan yejuan okimakakej itribu* Judá niman okinxexelouilijkej iclanes*.
Caleb okinoyaxkatij* Hebrón niman Debir
(Jue. 1.10-15)
13 Josué okimakak Caleb, itelpoch Jefone, se parte de on ueyitlalpan de itribu* Judá ken toTEKO okinauatij. Okimakak on ueyikalpan Quiriat-arba yejuan no itoka Hebrón. Hebrón sen ueyikalpan yejuan ueyixtikatka de on iuejkakoneuan on ueyitlakatl Anac. 14 Caleb okinkixtij Hebrón on yeyimej iuejkakoneuan Anac yejuan imintoka Sesai, Ahimán niman Talmai inuan nochimej iminclanes, niman okinoyaxkatij* on kalpan. 15 Kemaj Caleb okis ompa niman okinuijsokito on yejuan chantiyaj ipan on ueyikalpan Debir yejuan achtoj itoka katka Quiriat-sefer. 16 Niman Caleb okijtoj: “On yejuan kuijsokis niman kinoyaxkatis* Quiriat-sefer, nejua nikmakas nochpoch Acsa para isiuau yes.”
17 Niman on ueyikalpan okitlan Otoniel, isobrino Caleb, yejuan itelpoch Senaz. Niman Caleb okimakak Acsa on ichpoch para iuan ma nonamikti. 18 Ipan on tonajli ijkuak Otoniel ononamiktij iuan Acsa, Otoniel okijlij Acsa ma kitlajtlanili itataj sen tlajli. Acsa oyaj para okinotsato itataj, niman ijkuak otemok ipan ipoloko*, Caleb okitlajtoltij:
—¿Tlinon tikneki?
19 Niman yejua okinankilij:
—Xnechchiuili sen favor. Tejua yotinechmakak tlajli ipan on xalpatlajkan Néguev. Aman no xnechmaka tlajli kampa onokej ameltin.
Yejua ika, Caleb okimakak on ameltin yejuan onkatkaj kampaka tlakpakopa niman yejuan onkatkaj tlatsintlankopa de on ueyikalpan Hebrón.
On ueyikalpanmej yejuan okinmakakej itribu* Judá
20 In yejua on herencia yejuan okiselijkej iuejkakoneuan Judá, yejuan okinoxelouilijkej san ichkich kech ika miyekej inclanes. 21 On uejueyikalpanmej yejuan okinmakakej ipan on región kampaka sur, yejuan yau kampaka iuan nonamiki Edom katka:
Cabseel, Edar, Jagur,
22 Cina, Dimona, Adada,
23 Cedes, Hazor, Itnán,
24 Zif, Telem, Bealot,
25 Hazor-hadata, Queriot, Hezrón yejuan no itoka Hazor,
26 Amam, Sema, Molada,
27 Hazar-gada, Hesmón, Bet-pelet,
28 Hazar-sual, Beerseba, Bizotia,
29 Baala, Iim, Esem,
30 Eltolad, Quesil, Horma,
31 Siclag, Madmana, Sansana,
32 Lebaot, Silhim, Aín niman En-rimón.
Katkaj 29 uejueyikalpanmej iuan ikalpanuan pipitikej.
33 Ipan ixtlauatl okiselijkej in uejueyikalpanmej:
Estaol, Zora, Asena,
34 Zanoa, En-ganim, Tapúa, Enam,
35 Jarmut, Adulam, Soco, Azeca,
36 Saaraim, Aditaim, Gedera niman Gederotaim.
Katkaj 14 uejueyikalpanmej iuan ikalpanuan pipitikej.
37 No onkatkaj in uejueyikalpanmej:
Zenán, Hadasa, Migdal-gad,
38 Dileán, Mizpa, Jocteel,
39 Laquis, Boscat, Eglón,
40 Cabón, Lahmam, Quitlis,
41 Gederot, Bet-dagón, Naama niman Maceda.
Katkaj 16 uejueyikalpanmej iuan ikalpanuan pipitikej.
42 No onkatkaj in uejueyikalpanmej:
Libna, Eter, Asán,
43 Jifta, Asena, Nezib,
44 Keila, Aczib niman Maresa.
Katkaj chiknaui uejueyikalpanmej iuan ikalpanuan pipitikej.
45 On iueyitlalpan Judá no okipix on ueyikalpan Ecrón, on kalpanmej iuan ikalpanuan pipitikej. 46 De itech on ueyikalpan Ecrón on tlajli ontlami hasta itech on Mar Mediterráneo. No okimakakej nochi on ueyitlalpan yejuan onkaj itech on ueyikalpan Asdod, iuan ikalpanuan pipitikej. 47 No okimakakej on ueyikalpan Asdod on kalpanmej iuan ikalpanuan pipitikej. No okimakakej on ueyikalpan Gaza on kalpanmej iuan ikalpanuan pipitikej hasta itech iayajtok Egipto, niman hasta itenko on Mar Mediterráneo.
48 Ipan iueyitlalpan on tepeyoj itribu* Judá okiselijkej in uejueyikalpanmej:
Samir, Jatir, Soco,
49 Dana, Quiriat-sana yejuan no itoka Debir,
50 Anab, Estemoa, Anim,
51 Gosén, Holón niman Gilo.
Katkaj 11 uejueyikalpanmej iuan on kalpanmej pipitikej.
52 Itribu* Judá no okiselijkej in uejueyikalpanmej:
Arab, Duma, Esán,
53 Janum, Bet-tapúa, Afeca,
54 Humta, Quiriat-arba yejuan no itoka Hebrón, niman Sior.
Katkaj chiknaui uejueyikalpanmej iuan inkalpanuan pipitikej.
55 No ijki okimakakej in uejueyikalpanmej:
Maón, Carmel, Zif, Juta,
56 Jezreel, Jocdeam, Zanoa,
57 Caín, Gabaa, niman Timna.
Katkaj majtlaktli uejueyikalpanmej iuan inkalpanuan pipitikej.
58 No ijki okinselij in uejueyikalpanmej:
de Halhul, Bet-sur, Gedor,
59 Maarat, Bet-anot niman Eltecón.
Katkaj chikuasen kalpanmej iuan inkalpanuan pipitikej.
60 No ijki okinselij in uejueyikalpanmej:
Quiriat-baal yejuan no itoka Quiriat-jearim,
niman Rabá iuan inkalpanuan pipitikej.
61 Ipan on xalpatlajkan okiselijkej in uejueyikalpanmej:
Bet-arabá, Midín, Secaca,
62 Nibsán, on yejuan itoka ueyi Istakalpan
niman En-gadi.
Katkaj chikuasen uejueyikalpanmej iuan inkalpanuan pipitikej.
63 On iuejkakoneuan Judá xouel okinkixtijkej ne Jerusalén on jebuseos yejuan ompa chantiyaj. Yejua ika tej, hasta aman on jebuseos sanken* chantij ompa iminuan iuejkakoneuan Judá.