Okixelojkej on tlajli ne kampaka ikalakiyan tonaltsintli de on río Jordán
14
In yejuamej on uejueyitlalpanmej de Canaán yejuan on israelitas okiselijkej ken iminherencia. Nochi onochiu ken okinauatijkej on tiopixki Eleazar niman Josué ikoneu Nun, inmiuan on tlayekankej ipan iclanes on intribus israelitas. 2 On uejueyi tlalpanmej okinxelouilijkej on chiknaui uan tlajko tribus ikan suertes, ijkon ken toTEKO okinauatijka Moisés ma kichiua. 3 Más achtoj, Moisés yokimakaka tlaltin itribu* Rubén, niman itribu* Gad, niman itlajko tribu* Manasés ne okse ilado on río Jordán. Pero on levitas xitlaj* tlajli okinmakakaj. 4 Iuejkakoneuan José ome tribus katkaj yejuan kisayaj itech Manasés niman itech Efraín, pero on levitas xokinmakakej tlaltin. Yej san okinmakakej uejueyikalpanmej iuan intlakauyan yejuan onkaj inyeualkan para kimpiyaskej iminyolkauan. 5 On israelitas okixelojkej on tlajli ijkon ken toTEKO okinauatij Moisés.Caleb okiselij iueyitlalpan
6 Se tonajli sekimej iuejkakoneuan Judá oyajkej ne Gilgal para otlajtotoj iuan Josué. Niman Caleb, on Cenezeo yejuan itelpoch Jefone, okijlij Josué: "Xkelnamiki on tlen toTEKO okijlij Moisés itekitkau ne Cades-barnea, de tejua niman nejua. 7 Nejua nikayotl katka 40 xipan ijkuak Moisés itekitkau toTEKO onechtitlan desde Cades-barnea para ma niichtakatlajtlachati ipan on región, niman ijkuak oniuajnokuepato, onikijtoj tlen melauak. 8 On oksekimej yejuan oyajkej nouan, okinmomojtikej on israelitas. Pero nejua onikneltokak toTEKO Dios ika nochi noyojlo, ika yejua techpaleuiskia para tiktoyaxkatiskiaj on tlajli. 9 Kemaj Moisés onechmelajkaijlij: 'On tlajli yejuan ipan otinejnen, nochipa moyaxka* yes niman no iminyaxka yes mouejkakoneuan, pampa otikneltokak noTEKO Dios ikan nochi moyojlo.' 10 Yopanok 45 xipan desde ijkuak toTEKO okijlij Moisés yejua in. Ijkuakon on israelitas sanken* kistinemiyaj ipan on xalpatlajkan. Niman ijkon ken onechprometerouilij, hasta aman sanken* nechmaka nemilistli. Aman ye nikpiya 85 xipan, 11 niman sanken* nichikajtikaj ken ijkuak Moisés onechtitlanka ma niichtakatlajtlachati ipan on tlajli, niman hasta aman sanken* niueli ninejnemi niman nitlauijsoki ken ijkuakon katka. 12 Yejua ika, aman nimitstlajtlanilia, xnechmaka on tepeyoj yejuan toTEKO onechprometerouilij. Tejua tikmatstikaj ika ijkuak otitlajtlachatoj ipan on tlajli, otimitsijlikej ika ompa otikitakej chantij iuejkakoneuan Anac, niman ika kipiyaj uejueyikalpantin, yejuan kuajli yeualtsakutokej. Pero tla Dios kinekis nechpaleuis, nikinkixtis de ompa ken yejua yokijtoj.”
13 Kemaj Josué okitiochiu Caleb, niman okimakak on kalpan Hebrón ken se herencia para yejua iuan iuejkakoneuan. 14 Ijkon tej, Caleb on cenezeo yejuan ikoneu Jefone niman iuejkakoneuan iminyaxka Hebrón hasta aman, pampa Caleb ika nochi iyojlo okineltokak toTEKO Dios. 15 Achtoj, Hebrón itoka katka Quiriat-arba pampa Arba yejua más ueyixtikatka tlakatl intech on iuejkakoneuan on ueyitlakatl Anac.
Kemaj xok oonyak nouijsokilistin ipan on región.