On tlajli yejuan poliuiya kinoyaxkatiskej on israelitas
13
Ijkuak Josué sanoyej ye ueuentsin katka, toTEKO okijlij: "Tejua ye tiueuentsin, niman sanken* poliui ueyi tlajli para nenmoyaxkatiskej. 2 Poliui para nenkimoyaxkatiskej nochi iminueyitlalpanuan on filisteos niman on gesureos. 3 On tlaltin yauij desde on río Sihor, kampaka ikisayan tonaltsintli de Egipto hasta kampa itlamiyan on tlajli Ecrón kampaka norte. Nochi on ueyitlalpan inyaxka on cananeos. Ompa nemij on makuiltimej tlayekankej filisteos. On tlayekankej katkaj de: Gaza, Asdod, Ascalón, Gat niman Ecrón. No opoliuito on tlajli intech on aveos 4 yejuan kampaka sur, nochi imintlal on cananeos desde on uejueyikalpanmej de on sidonios, hasta Afec kampa iminuan notlalnamikij on amorreos. 5 No ijki opoliuito imintlal on giblitas, niman nochi on tlajli Líbano kampaka ikisayan tonaltsintli. On tlajli peua desde kampa kuitiaj Baal-gad tlatsintlan de on tepetl Hermón, niman yau hasta kampaka peua Hamat. 6 "Nejua nikintotokas on sidonios inmixpan on israelitas niman nochimej on yejuan chantij ipan on tepeyoj desde Líbano hasta Misrefotmaim. Xkinxexelouili in tlajli yejuamej on israelitas ijkon ken nejua yonimitsnauatij. 7 Xkinxexelouili in tlajli on chiknaui tribus niman on itlajko tribu* Manasés.”
Moisés okixeloj on tlajli ne kampaka ikisayan tonaltsintli de on río Jordán.
8 On itribu* Rubén, niman Gad, niman on okse itlajko tribu* Manasés, okiselijkej imintlal ijkuak Moisés itekitkau toTEKO okinmakak ne kampaka ikisayan tonaltsintli de on río Jordán. 9 Okinmakakej on región yejuan yau desde on kalpan Aroer itenko on río Arnón, niman on ueyikalpan yejuan onkaj itlajkotian on ixtlauatl Arnón, niman nochi on ueyi ixtlauatl de Medeba, hasta on kalpan Dibón. 10 Niman no inuan okinmakakej nochi on uejueyikalpanmej iyaxkauan* Sehón rey de on amorreos yejuan chantiya ipan on ueyikalpan Hesbón, hasta kampa iuan notlalnamikiyaj on amonitas. 11 No inuan okinmakakej on tlajli Galaad, niman inueyitlalpan on gesureos, niman inueyitlalpan on maacateos, iuan on tepetl Hermón, niman nochi on tlajli de Basán yejuan ontlantok hasta Salca, 12 niman nochi on tlajli yejuan iyaxka* katka Og, on rey de Basán, yejuan tlamandarouaya ipan on ueyikalpan Astarot niman Edrei. Yejua sa ikanochi katka de on refaitas. Moisés okintlan on tlakamej niman okintotokak de ompa. 13 Pero on gesureos niman on maacateos xokintotokakej de ompa, yej sanken* ochantikej intsajlan on israelitas hasta aman.
14 Moisés xokimakak tlajli itribu* Leví pampa yejuamej kiseliaj se parte de on uentli yejuan seki tlatla, de nochi on uentin yejuan on israelitas kimakaj toTEKO, ijkon ken toTEKO otlanauatij.
Moisés okimakak itlal itribu* Rubén
15 Moisés okinxelouilij tlaltin on itribu* Rubén, niman okinmakak san ichkich kech ika miyekej katkaj iclanes. 16 Ijkon tej, iminueyitlalpan ompeua desde ipan on ueyikalpan Aroer yejuan onkaj itenko on río Arnón, niman itech on ueyikalpan yejuan onkaj itlajkotian on ixtlauatl, niman nochi on tlajli Medeba, 17 niman ajsitikatka hasta ipan on ueyikalpan Hesbón iuan nochimej on uejueyikalpanmej yejuan onokej ipan on ixtlauatl: Dibón, Bamot-baal, Bet-baal-meón, 18 Jahaza, Cademot, Mefaat, 19 Quiriataim, Sibma niman Zaret-sahar yejuan nokaua ipan sen tepetsintli yejuan onkaj ipan on ixtlauatl, 20 Bet-peor, Bet-jesimot, niman on tlajtlapilkayan yejuan onkaj ipan on tepetl Pisga. 21 In kijtosneki ika itribu* Rubén okimakak nochimej on uejueyikalpanmej yejuan onokej ipan on ixtlauatl, niman nochi kampa iyaxka* katka Sehón, inminrey on amorreos yejuan tlamandarouaya Hesbón. Moisés okitlanka on rey Sehón iminuan imintlayekankauan Madián yejuan kipaleuiyayaj ijkuak tlamandarouaya ipan on ueyitlalpan. Yejuamej intokakatka: Eví, Requem, Zur, Hur niman Reba. 22 On israelitas no okimiktijkej Balaam, on tetlatejtemouilijketl, yejuan ikoneu katka Beor. Niman okinmiktijkej oksekimej miyekej. 23 On ueyitlalpan yejuan okiselij on itribu* Rubén ontlamiya itenko on río Jordán. Okinxexelouilijkej kech ika miyekej iclanes katkaj, niman okimakakej nochi on uejueyikalpanmej iuan inkalpanuan pipitikej yejuan onkatkaj ipan on tlajli.
Moisés okimakak itlal itribu* Gad
24 No ijki Moisés okinxelouilij tlaltin on itribu* Gad. Okinmakak ichkich kech ika miyekej katkaj iclanes. 25 Okimakak on ueyikalpan Jazer, niman nochi on uejueyikalpanmej de Galaad, niman tlajkotipan inueyitlalpan on amonitas yejuan ajsitikaj* hasta on ueyikalpan Aroer, yejuan nokaua ixpan on kalpan Rabá. 26 Niman on región oyaj kampa onkaj on ueyikalpan Hesbón niman ajsi hasta on kalpanmej Ramat-mizpa iuan Betonim, niman desde on ueyikalpan Mahanaim hasta itlamiyan on ueyikalpan Debir. 27 Ipan on ixtlauatl, itribu* Gad okiselij on uejueyikalpanmej Bet-aram, Bet-nimra, Sucot, niman Zafón yejuan nokauaya de nochi on tlen iyaxka* katka Sehón, on rey de Hesbón. Ijkon tej, iueyitlalpan Gad pejtoya desde kampaka ikisayan tonaltsintli de on río Jordán hasta kampaka sur de on laguna Cineret. 28 Nochi in uejueyikalpanmej iuan iminkalpanuan pipitikej, okimakakej itribu* Gad. Okimakakej san ichkich kech ika miyekej katkaj iclanes.
Moisés okimakak itlal on itlajko tribu* Manasés
29 No ijki Moisés okinmakak tlaltin on itlajko tribu* Manasés. Okinmakak san ichkich kech ika miyekej katkaj iclanes.
30 Okinmakakej nochi on tlaltin yejuan achtoj iyaxka* katka Og, on rey de Basán. Okimakakej nochi desde iueyitlalpan Basán hasta ipan on ueyikalpan Mahanaim, niman okipix 60 kalpanmej pipitikej yejuan Jair iyaxka* katka. 31 No ijki okinmakakej tlajkotipan tlajli de Galaad niman on uejueyikalpanmej Astarot niman Edrei yejuan uejueyikalpanmej kampa Og otlamandaroj ne Basán. Nochi in tlaltin okinmakakej tlajkotipan de on iuejkakoneuan Maquir, ikoneu Manasés. Okinmakakej san ichkich kech ika miyekej katkaj iclanes.