On reyes yejuan okintlan Moisés
12
In yejuamej on reyes yejuan on israelitas okintlankej kampaka ikisayan tonaltsintli de on río Jordán ijkuak Moisés nemiya, niman on uejueyitlalpanmej yejuan okinnoyaxkatijkej desde on río Arnón, hasta on tepetl Hermón iuan nochi on región kampaka ikisayan tonaltsintli de on ixtlauatl Jordán:2 Sehón rey katka de on amorreos yejuan chantiyaj Hesbón. Ireino ompeuaya desde Aroer itenko on río Arnón, niman desde itlajkotian on ixtlauatl hasta on río Jaboc, kampa peuaya iminueyitlalpan on amonitas. (In kijtosneki uajnochiua kanaj tlakojtipan de Galaad.) 3 No iyaxka* katka on rey Sehón kampaka ikisayan tonaltsintli, ipan on ixtlauatl yejuan onkaj nisiu on río Jordán. In peua desde ipan on laguna itoka Cineret, niman ontlami hasta kampa onkaj on Mar Muerto kampaka onkaj on kalpan Bet-jesimot. Niman kampaka sur, ontlami hasta itsintlan on tepetl Pisga.
4 Og rey katka de on ueyitlalpan Basán. Yejua semej katka de on sa ika nochi uejueyitlakamej refaitas refaitas yejuan chantiyaj Astarot niman Edrei. 5 Ireino Og katka desde on tepetl Hermón niman Salca, niman desde nochi on región de Basán, hasta itempan Gesur niman itempan Maaca, niman on tlajko tlajli Galaad hasta itlal Sehón irey Hesbón.
6 Moisés itekitkau toTEKO, niman on israelitas okintlankej in reyes, niman Moisés okinmakak in ueyitlalpanmej itribu* Rubén, Gad, niman on tlajko tribu* de Manasés.
On reyes yejuan okintlan Josué
7 In yejuamej on reyes yejuan Josué niman on israelitas okintlankej, ipan on región de on río Jordán kampaka ikalakiyan tonaltsintli. (In tlajli peua Baal-gad ipan on ixtlauatl Líbano niman ipan on tepetl Halac, yejuan tlejkoua hasta on tepetl Seir.) Josué okixexeloj intlaluan on reyes niman okinmakak on tribus de on israelitas para okiselijkej ken herencia. 8 Okinmakak on región yejuan tepeyoj, on ixtlauatl yejuan nokaua kampaka ikalakiyan tonaltsintli, on ixtlauatl yejuan nokaua nisiu on río Jordán, on tlaixtin, on xalpatlajkan niman on tlajli Néguev. In tlaltin iminyaxka katka on heteos, amorreos, cananeos, ferezeos, heveos niman jebuseos.
9 On reyes yejuan Josué niman on israelitas okintlankej, yejuamej in katkaj:
on irey Jericó, irey on ueyikalpan Hai yejuan onkatka nisiu Betel,
10 irey Jerusalén, irey Hebrón,
11 irey Jarmut, irey Laquis,
12 irey Eglón, irey Gezer,
13 irey Debir, irey Geder,
14 irey Horma, irey Arad,
15 irey Libna, irey Adulam,
16 irey Maceda, irey Betel,
17 irey Tapúa, irey Hefer,
18 irey Afec, irey Sarón,
19 irey Madón, irey Hazor,
20 irey Simron-merón, irey Acsaf,
21 irey Taanac, irey Meguido,
22 irey Cedes, irey Jocneán (irey on tepemej Carmelo),
23 irey Dor (irey de on tlajli Dor),
irey Goim (irey de on tlajli Gilgal),
24 niman irey Tirsa.
Nochimej on reyes katkaj 31 yejuan Josué niman on israelitas okintlankej.