Josué okitlan on rey Jabín iuan oksekimej reyes
11
Ijkuak Jabín irey on ueyikalpan Hazor okimat nochi tlen onochiu, okintitlan tlajtojkamej para ma nosentlalikan on rey Jobad de Madón niman iminuan on reyes de Simrón niman de Acsaf. 2 Niman no okintitlan tlajtojkamej intech nochimej on reyes de on región kampa tepeyoj yejuan nokaua ika norte, on yejuan nemiyaj ipan on ixtlauatl Jordán yejuan nokaua kampaka sur ne itech on laguna Cineret, niman on yejuan nemij nisiu on ueyikalpan Dor yejuan nokaua kampaka ikalakiyan tonaltsintli. 3 No okinnotskej on cananeos yejuan nemiyaj kampaka ikisayan tonaltsintli de on río Jordán, niman on yejuan nemiyaj kampaka ikalakiyan tonaltsintli de on río Jordán. Niman no okinnotskej on amorreos, heteos, ferezeos, jebuseos yejuan chantiyaj kampa tepeyoj, niman on heveos yejuan chantiyaj ipan on tepetl Hermón ipan on región de Mizpa.4 Nochimej in reyes okiskej iuan iminsoldados niman carretas de guerra, niman sanoyej miyek caballos. Sanoyej miyekej katkaj on soldados hasta xakaj ueliya kimpoua, pampa nesiyaj ken on xajli itenko mar. 5 Nochimej yejuamej onosentlalijkej niman onotlatlalijkej nisiu itech on ayajtok yejuan itoka Meróm, para kinuijsokiskej on israelitas.
6 Pero toTEKO okijlij Josué: "Maka xkinmakasi, pampa mostla mayanin nikchiuas nochimej ma mikikan nemixpan, niman nemejuamej nenkinkotstlaluayotekiskej imincaballos niman nenkintlatiskej imincarretas de guerra."
7 Kemaj Josué iuan nochimej isoldados oajsikej san ichtaka itech on ayajtok itoka Meróm niman okinuijsokkej on intlauelikniuan. 8 Niman toTEKO okichiu para on israelitas ma tetlanikan. Okinuijsokkej, niman okintojtokakej hasta on ueyikalpan Sidón niman Misrefot-maim. Niman kampaka ikisayan tonaltsintli okintojtokakej hasta ipan on ixtlauatl de Mizpa. Niman nion se xonokau yoltikaj. 9 Josué okichiu ken toTEKO okinauatij niman okinkotstlaluayotejtek imincaballos niman okintlatij imincarretas de guerra.
10 Sakin, Josué iuan isoldados onokuepkej niman okinoyaxkatijkej on ueyikalpan Hazor, niman okimiktijkej irey. On ueyikalpan Hazor más ueyixtikatka xken on oksekimej ueyikalpanmej. 11 Niman no okinmimiktijkej nochimej on yejuan ompa chantiyaj. Nochi otlan kixoxotoniaj, niman okitlatijkej on ueyikalpan. 12 Niman no ijki okinchiuilijkej on oksekimej uejueyikalpanmej yejuan yonosentlalijkaj para kinuijsokiskiaj. Okinnoyaxkatijkej on uejueyikalpanmej niman okinmijmiktijkej iminreyes. Okichijkej nochi ijkon ken okinauatij Moisés, itekitkau toTEKO. 13 Pero on israelitas xokitlatijkej nion se on ueyikalpan yejuan onokej ipan tepeolojli, yejuan okitlatijkej Hazor. 14 Otlan kinmiktiaj ikan espada nochimej on yejuan ompan chantiyaj ipan on uejueyikalpanmej niman okinoyaxkatijkej iminyolkauan niman tlajtlamach* yejuan kipiyayaj. Nion se tlakatl xonomanauij.
Josué okichiu tlen Moisés okinauatij
15 ToTEKO okimakak Moisés itlanauatiluan, niman Moisés okimakak Josué, niman Josué nochi okitlakamat. Xitlaj okixkau. 16 Josué okinoyaxkatij* in keski región: On región kampa tepeyoj, on región itoka Néguev, nochi itlal Gosén, nochi on tlalmankan niman ixtlauatl yejuan onkaj itech on río Jordán, niman nochi on tepeyoj niman itlalmankan Israel. 17 In región opeu ipan on tepetl Halac yejuan tlejkoua para Seir, niman ajsi hasta Baal-gad, ipan on iixtlauayo Líbano yejuan nokaua itsintlan on tepetl Hermón. Josué okinmajsik niman okinmiktij nochimej on reyes de on región. 18 Ijkuak youejkau iminuan nouijsoki. 19 San on heveos yejuan chatiyaj ipan on kalpan Gabaón okichijkej sen pacto* iminuan on israelitas. Nochimej on oksekimej okinmiktijkej. 20 Sano toTEKO okiminyoltechikau imintlauelikniuan para ma kimixnamikikan on israelitas. Ijkon okichiu para on israelitas ma tlamikan ma kinmiktikan nochimej. Niman ijkon on israelitas oteixnamikkej niman xokimiknelijkej on intlauelikniuan, ijkon ken toTEKO okinauatij Moisés.
21 No ijki ipan on tonaltin, Josué otlan kinoyaxkatia niman kinxoxotonia on uejueyikalpanmej de on uejueyi tlakamej imintoka anaquitas yejuan chantiyaj ipan on tepemej. Okinxoxotonij on uejueyikalpanmej Hebrón, Debir, Anab niman on uejueyikalpanmej ipan nochimej on tepemej de Judá niman de Israel. Josué okinmiktij nochi on anaquitas niman okinxoxotonij iminuejueyikalpanuan. 22 Xonokau nion se iuejkakoneu* on ueyitlakatl Anac ipan inueyitlalpan on israelitas. San, keskimej onokajkej ipan on tlajli Gaza, Gat niman Asdod.
23 Ijkon tej, Josué okinoyaxkatij* nochi on tlajli ken toTEKO okinauatij Moisés. Kemaj Josué okinxelouilij on tribus* de israel para okiselijkej ken herencia. Ijkuak ijkon yopanok ipan on región, xok oonyak nouijsokilistli.