Ɛnza ŋé min nvɔla Ala dɛ́li kó ó lɔ
11
Ló nɔ lá,
Ɛnza ndɛ́ɛ Ala dɛ́lila ywáa lɔ́lɔ.
Aa wɛ́ɛ sán mín nɔ́n,
a yɛ́ kaamɔɔndhye ŋó kée ŋé a mánɲaankɛ kó:
«Mantii ó,
án ngala Ala dɛ́li ó la óo Yaya é a yɛ kaamɔɔndhye ŋólu kala ɲán mín mán.»
2 Ɛnza ŋé fɔ i yɛ kó:
«Ní a kɛ kɛ́ Ala dɛ́lila sán mínnɔn,
áa fɔ kó:
‹Án Nvá,
i tɔ́ɔ ó wáa sɛ́nnɛnya.
I yɛ mansaya ó wáa nan.
3 Án ɲɛ́n ló ŋóo ló lɔ́min ó dí án mán.
4 Án ɲɛ́n yúumu ólu yafa án mán,
kɛ mansɔɔ án ni yafala an ɲáacɛtabhaa ólu mán.
I kɛ́nan tó ké lɔ́swaannin o wáa sé án mán.› »
5 Ɛnza ŋé fɔ i yɛ íkwɔ kó:
«Ní ale lɔ kɛ i wíi kɛ́ táa a tɛ́ɛcɛ ó fɛ́ yé lúutaaman kɛ́ fɔ a yɛ kó:
‹Ndwáanva,
ɲan né mán ní búluguun nzawa le,
6 kɛ mansɔɔ né tɛ́ɛcɛ lɔ wɛ́ɛ bhɔ́ só kɛ́nan nvɛ́,
sunman ndɛ́ móo kɛ́ di a mán,›
7 ní a táamanɲɔɔn ó kɛ tó bhó ŋó kɔɔnnɔn kɛ́ a yawi kó:
‹Í kɛ́nan ndɔ́lɔ,
lá ó wɛ́ɛ wɛɛ sɔɔla,
né ní dhyé ŋólu wɛ́ɛ án ná,
né tɛ́ sé kɛ ŋwíi kɛ́ búlu di í mán,›
8 ní fɔ́la a yɛ́ ngó yáanin a mán í wíi kɛ́ búlu ó dí a mán twáanvaya ó kósɔn,
ní a kɛ a ɲángban a yáa í wíi kɛ́ a manko é fé ŋóo fé nan,
a yáa ó bɛ́ di a mán.»
9 «O ɲán ó mán ni fɔ́la a yɛ ngó aa kófɔli kɛ,
i yáa di a mán,
ni a kɛ ɲíinnin kɛ,
a yáa a sɔɔ.
Ni a kɛ lá o mangbasi,
i yáa í láka a yɛ.
10 Kɛ mansɔɔ ní mɔɔn óo mɔɔn kɛ kófɔli kɛ o tíi ó yáa a sɔɔ kɛ,
ní mɔɔn mínngɛ ɲíinnin kɛ́,
o tíi ó yáa sɔɔlikɛ,
ní mɔɔn mínngɛ lá o mangbasi,
i yáa lá o laka o tíi ó yɛ.
11 Dhyénva mínnɛɛn lée sɔ́nnan kɛ san ó di a dhyé ŋó mán,
kɛ́ɛ ké a wɛ́ɛ yɔ́ɔ le kófɔ a yɛ?
12 Wáman dhyénva mínnɛɛn lée sɔ́nnan kɛ wéende ó di a dhyé ŋó mán,
kɛ́ɛ ké dhyé ŋó wɛ́ɛ shishɛkii lé kófɔ a yɛ́?
13 Álee mínnu a yóo,
ní álee lu é sɔ́nnan kɛ fémɛɛ ólu di a dhyé ŋólu mán,
a Fá mín ŋé sángboo ó lɔ,
o táa Ní Sɛnnɛnyanin ŋó di a dɛ́libhaa ólu mán an?»
Ɛnza ŋé a kɔɔfɔbhaa ólu yawila
14 Ló nɔ la,
Ɛnza ndɛ́ɛ lámansayoo nɔ́ gbɛ́nan mín ndɛ́ɛ cɛ ó kɛ́la bhóbho le.
Lámansayoo ŋó bhɔ́ cɛ ó fɛ mínngɛ,
bhóbhocɛ oo a lamyaan kɛ kóman,
tó yaman ó káwakoya.
15 Wáa mɔɔn lɔ́luu fɔ kó:
«Lámansayoo ŋólu kunndii Bɛlizebuli le bháaka lɔ,
aa lámansayoo ŋólu gbɛ́nan.»
16 Lɔ́lu,
a lɔ́swaan ndɔ́ɔ lɔ,
Íi fɔ a yɛ kó aa tɔɔmansii kée ngɛ́ i ɲánla,
kɛ bhɔ́ sángboo ó lɔ.
17 Ɛnza ndɛ́ɛ i miliya ólu lɔ́;
aa fɔ i yɛ kó:
«Yamaan mín mɔɔn lúu ɲɔ́ɔn ngɛlɛla,
o yamaan óo céla lé.
I yɛ bhó ŋólu yáa bémbe ɲɔ́ɔnnga.
18 Ní Sɔtaannan kɛ́ a yɛ́ɛ lɔ́taa,
a yɛ yamaan ó káa sé si sɔ́ɔla díi lé?
Kɛ mansɔɔ aa fɔ́la kó Bɛlizebuli le bháaka lɔ ko née lámansayoo ŋólu gbɛnan.
19 Ní née Lámansayoo ŋólu gbɛnan Bɛlizebuli le bháaka lɔ,
o wáati ó lɔ,
a dhyénjɛ ólu i gbɛnan yɛ́ɛtii bháaka lɔ?
O lé kósɔn ólu yáa kɛ a yɛ kítitɛɛbhaa ólu lé.
20 Wáa ní née Lámansayoo ŋólu gbɛnan Ala yɛ sébhaaya óle bháaka lɔ,
óo a yáala kó Ala yɛ́ Mansaya ó wɛ́ɛ sé a mán.»
21 «Ní mɔɔn faangbii o lɔ́bhyɛnin ngɛ́ kɛ a yɛ bhó ŋó kunnansiila ni malamafe né,
a yɛ bhónanfe ŋólu bɛ́ɛ sutaa lɔ́.
22 Wáa ní lɔ gbɛ́ɛ fáan kɛ́ gbíiya ale ta o le,
o kɛ sé ale la,
o faangbii o yáa a yɛ malamafe ŋó bɛ́ bwási a lá,
a yée lánin ndɛ́ɛ mínnga.
A yáa o bhóofe ŋólu bɛ́ cɛ kɛ́ ó dí mɔɔn gbɛ́ɛlu mán.
23 Mɔɔn mín ndɛ́ né ɲíin né,
óo né yúu lé le.
Óni mɔɔn mín ndɛ́ ládhyɛli kɛ́la nín né le,
o tíi ó ɲɛ́nɲɛnli lé kɛ́la.»
Lámansayoo ŋó kwɔ́sɛɛ kó o
24 «Ní Lámansayoo ŋó kɛ́ bhɔ́ mɔɔn lɔ́ fɛ,
aa táa i yáala wúla o kɔɔnnɔn,
kɛ́ lɔ́nwɛɛnlikɛlaa ɲíin yé.
Ní a mán o ywáa sɔ́ɔ,
aa fɔ kó:
‹Ní bhɔ́ bhó mín ngɔɔnnɔn,
ngáa ngwɔ́sɛɛ yénɔn.›
25 Ní a kɛ́ i kwɔ́sɛɛ,
kɛ táa yé ko bhó ŋó mancɛnin ŋé mɔɔn tɛ a lá.
26 O lɔ aa táa Lámansayoo wóonvyaa gbɛ́ɛ ɲíin mínnu a yóo ale lé.
Ii nan o tíi ó fɛ kɛ́ i síi,
O tíi ó tɛ́ɛ ɲán mín mán jónan o yáa yóoɲan kɛ́ tínmin ó ka.»
Yɛ́ɛ yeemanfanin ɲé?
27 Ɛnza ŋé ó kóman ólu fɔ kɛ́ wɛ́ɛ mínngɛ,
muso lɔ é i kannan bhɔ́ yaman ó cɛ́man kɛ́ fɔ a yɛ kó:
«Muso míin í wóo kɛ́ sín ndí i man,
o yeemanfanin ɲé.»
28 Wáa Ɛnza ŋé a yawi kó:
«Mɔɔn mín ŋé Ala yɛ kóman ó lɔ́myɛnnan,
kɛ́ a lá bháto,
o lé yeemanfanin ɲé.»
Mɔɔn ólu i bánan Ɛnza nɔn
29 Yaman ó tɛ́ɛ sháaya la Ɛnza ndɔ́ɔfɛ mínngɛ,
aa fɔ i yɛ kó:
«Wáati míin mɔɔn ólu mɔɔnyoo néelu le:
Íi tɔɔmansii le ɲíin nán.
Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́.
30 O lɔ Zonasi é kɛ tɔɔmansii lé Ninivuka ólu yɛ́ ɲán mín mán wé,
mɔɔn Dhyénjɛ ó káa kɛ́ tɔɔmansii lé án ɲɛ́n wáati míin mɔɔn ólu yɛ́ o ɲán kée ŋó lé mán.
31 Kítitɛɛlo ó la,
mansamuso míin bhɔ́la kíinmoo fa ŋó fɛ́ o yáa i wíi ní wáati míin mɔɔn ólu lé kɛ kíti bé í ka,
kɛ mansɔɔ álee bhɔ́ fɔ lúukolo ó lá ŋó la kɛ́nan mansacɛ Swɛmannan yɛ hákiitiiya kóman ólu lɔ́myɛn.
Kɛ́ɛ ké,
mɔɔn é yánun mín ŋé Swɛmannan ɲɛ́n.
32 Kítitɛɛlo ó la,
Ninivuka ólu yáa i wíi kɛ kíti bé wáati míin mɔɔn ólu ka,
kɛ mansɔɔ Zonasi é lakawanin mín ngɛ́ Ninivu só ó kɔ́ɔnnɔn,
Ninivuka ólu sɔ́n o mán.
Ii díminsa kɛ fála i yɛ́ kóyoo ŋólu la.
Kɛ́ɛ ké,
mɔɔn é yánun mín ŋé Zonasi ɲɛ́n.»
Fási ó kɛ́ɛnɲan ó
33 «Mɔɔn sí tɛ́ laman ŋó lamaannan kɛ a bhyaa ywáaloonaankɛnin nɔn,
wáman kɛ a bhyaa pála ŋó kɔ́ɔ,
wáa aa síilaa lamannziife né ka ké mɔɔn mínnu kɛ kɛ́ lónan bhó ŋó kɔɔnnɔn,
ólu a yéli kɛ́.
34 Mɔɔn ɲán ó lée a fási ó laman ŋó le.
Ní i ɲán ó káɲin,
í fási ó bɛ́ é kɛ́ɛnɲan o lɔ.
Wáa ní i ɲán ó mánɲin,
í fási ó bɛ́ɛ kɛla diwi lɔ le.
35 O lɔ,
i yɛ́ɛ myaan ké kɛ́ɛnɲan míin í ka o kɛ́nan kɛ diwi le.
36 Ní i fási ó bɛ́ kɛ kɛ́ kɛ́ɛnɲan ó lɔ,
ní diwi súusuu tɛ́ yé,
a yáa tó kɛ́ɛnɲan ó lɔ óyoo laman ŋó kɛ́ɛnɲan o bhɔ́la ɲán mín mán.»
Ɛnza ŋé Falizɛn ŋólu ní Sɛliya kaamɔɔn ólu kɔ́ɔfɔla
37 Ɛnza ŋé wɛ́ɛ a yɛ́ kóman ó la mínngɛ,
Falizɛn nɔ é a kíi kó aa táa lɔ́minkɛ ni ale yɛ lú ó mán.
Aa táa,
aa i síi lɔ́min ó mán.
38 Falizɛn mín ŋé a kíi óo a lákɔɔsi mínngɛ kó Ɛnza mán a bhóo o kwó kɛ́ kéeɲan ní i yɛ laanan óle kɛ́ tó i síila sunman ŋó mán,
oo a káwakoya.
39 Mantii ó fɔ a yɛ kó:
«Álee Falizɛn ŋólu kwɛ́nnin ŋé cé né.
Áa yáafyɛ ólu ní tása ólu kɔ́ɔmanlaa ó lé kwóla kɛ i gbɛ́,
kɛ́ɛ ké béngani óni yóoɲan óle fánin ŋé álee yóso ó lɔ.
40 Nánloman ŋólu!
Mɔɔn mín ŋé a kɔ́ɔmanlaa ó lálaa,
óle mán kɔ́ɔnnɔnlaa ó lálaa ŋán?
41 Aa yóoɲan ó bhɔ́ a yóso ó lɔ,
kɛ faannda ŋólu sɔ́,
a yɛ kó o bɛ́ yáa sɛ́nnɛnya.
42 Álee Falizɛn ŋólu,
bɔɔn é álee tá le,
kɛ mansɔɔ aa i lɔ́jala kɛ nannanye óni nánfe ŋó bɛ́ súu yáa bhɔ́la.
Wáa Ala yɛ téeɲan óni a yɛ dhyáaɲɔɔnya mín nvɔ́,
aa ólu tóla yé.
A kákan kɛ o le kɛ́,
kɛ́ dɔ́ ólu fala o ka.
43 Bɔɔn yáa álee Falizɛn ŋólu sɔɔ,
kɛ mansɔɔ sɛ́ɛbho ŋólu kɔɔnnɔn,
siilaabhɛɛ ó láa dí álee lú yɛ.
Mɔɔn tɔ ólu kɛ kɛ́ a fola bhɛ́ɛsili bhóo mán yaman ywáa ólu lɔ o léelu dhyáa é kɛ́la a lɔ.
44 Bɔɔn yáa álee Falizɛn ŋólu sɔɔ,
kɛ mansɔɔ a wɛ́ɛ kɛ́ óyoo kábulu ólu,
mínnu tɛ́ yéla,
mɔɔn ólu táamanla a ka ké i tɛ́ bhɔ́la a ɲánle.»
45 O lɔ,
sɛliya kaamɔɔn lɔ́ é fɔ Ɛnza ɲɛ́n kó:
«Kaamɔɔn,
ní i wɛ́ɛ kóman cé,
ii wɛ́ɛ ló án née la.»
46 Ɛnza ŋé i yawi kó:
«Bɔɔn yáa álee sɛliya kaamɔɔn ólu sɔɔ,
kɛ mansɔɔ áa lwée ngbíiyanin né siila mɔɔn ólu kunman,
tó a tɛ́ i bhóo túula a la yáanin dɔ́ɔnin ne.
47 Bɔɔn yáa álee sɔɔ!
Kɛ mansɔɔ áa céla ólu yɛ́ kábulu ólu lɔ́la,
kɛ́ɛ ké a fá léelu i fáa.
48 Áa yáa céne kó a fá ólu tɛ́ɛ mín ngɛ́la,
kó o a dí álee lú yɛ,
kɛ mansɔɔ,
íi céla ólu fáa,
tó álee,
áa ólu kábulu ólu lɔ́la.
49 O lé kósɔn Ala yɛ́ hákiitiiya ó fɔ kó:
a yáa céla lú ní céladhye nú cé i mán.
I yáa i lɔ́lu fáa,
kɛ i lɔ́lu tɔ́lɔ.
50 O le kósɔn,
kíti yáa bé bímɔɔn ólu ka céla ólu fáa o kósɔn,
o yée míin bwɔ́ kabiini dínɲan lamyaan wáati ó mán,
51 kɛ tá Abɛli yée bwɔ́ ŋó mán fɔ́ kɛ́nan sé Zakali yée ó mán,
íi mín nváa Ala bhatobhomba ó ywáa sɛ́nnɛnyanin ŋó ní faanlɛɛbhɔlaa ó cɛ.
Tinɲan in ne,
ní fɔ́la a yɛ ngó Ala yáa bímɔɔn ólu manɲaankɛ o bɛ́ mán.»
52 «Álee sɛliya kaamɔɔn ólu,
bɔɔn yáa álee sɔɔ,
kɛ mansɔɔ álee wɛ́ɛ Ala yɛ lɔ́ninya ó lákeli ó tá.
Álee gbúlu tɛ́ ló,
wáa lónɔɔ é mínnu la áa ólu lábanan kɛ ló.»