Kɔ́ɔlamandhyaa mín ŋé bháalakɛdhyeɲoo ŋólu ka
12
Ɛnza ŋé saanan lá i yɛ ó lé lɔ kɛ fɔ kó:
«Cɛ lɔ́ lée lɛ́zɛn no,
kɛ yɔ́sɔ kɛ́ a man.
Aa fáajaan lɔ́ bhɔ́,
kɛ o kɛ́ lɛ́zɛn ŋó jíbhɔlaa o le,
tó kɛ gbáta lɔ́ lɔ́ sɛɛnkunnansiibhaa olu yɛ.
Aa sɛ́ɛn ó kɛ́ɛfa ó lé lɔ bháalakɛdhye ŋolu mán,
tó kɛ táa táamanla.
Maki 12.1-17
2 Lɛ́zɛn mɔ́ wáati oo sé mínngɛ,
aa a yɛ bháalakɛdhye ŋo kée myáashaa lɛ́zɛnmaalakɛbhaa olu mán ké ii a ta nin ŋó di.
3 Wáa lɛ́zɛnmaalakɛbhaa olu o myáan,
kɛ a gbasi,
kɛ a bhóolɔkoo ŋó lákwɔsɛɛ.
4 Lɛ́zɛnnvyɛtii oo bháalakɛdhye ngbɛ́ɛ bhyáashaa íkwɔ.
Ii o gbási a kúnnɔn,
kɛ a nɛɛn.
5 Lɛ́zɛnnvyɛtii oo bháalakɛdhye ngbɛ́ɛ bhyáashaa íkwɔ,
kɛ ii o fáa.
Ii o kɛ bháalakɛdhye nzhɛ́ɛman nán cé.
Ii lɔ́lu gbási tó kɛ lɔ́lu fáa.
6 Mɔɔn kée mín ndɛ́ wɛɛ tó lɛ́zɛnnvyɛtii ó bhóo o lé tɛ́ɛ a dhyénjɛ óle mín ŋan dí a yɛ.
Aa o kɛ́ céladhye nábha ŋo lé i man,
a tɛɛ fɔ́la kó i yáa nyénjɛ ó bhɛ́ɛsii.
7 Wáa lɛ́zɛnmaalakɛbhaa olu fɔ ɲɔɔnɲɛn kó:
‹Cɛ́ntabhaa ó lée nín,
áa nan án ní a fáa ké cɛ́n o á tó án móo.›
8 Ii cɛ o dhyénjɛ ó myáan ó lé lɔ,
kɛ a fáa,
kɛ a sú ó láfii lɛ́zɛnnvyɛ o kwɔ́ka.
9 O bhóo ó mán,
lɛ́zɛnnvyɛtii o kaa kɛ́ o lɔ díi?
A yáa nan,
kɛ lɛ́zɛn ŋo bháalakɛdhye ŋólu fáa,
tó kɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán!
10 A mán tínminnaa míin ngála kitabu o lɔ bha ŋan?
Mín ŋé fɔ́la kó:
Bhónɔbhaa olu tɛ́wɛɛ í bá tɛfɛ mínnɔn
o lé wɛ́ɛ kɛ́ tɛfɛ kúugbɛɛ ŋo le.
11 Oo fáanan Mantii ó lé la.
Oo kóba lé lé án née bhóo.
12 Yawudhyaa ólu kúnndii ólu tɛ́ɛ ɲánɲiinnan Ɛnza myaanko ó mán,
í tɛ́wɛɛ bhɔ́ ɲan le óo Ɛnza ndɛ́ɛ saanan o lala ile lée lu man.
Wáa i tɛ́ɛ sháannan yaman o ɲɛn.
Oo kɛ́ mínngɛ,
ii a tó yénɔn kɛ́ táa.»
Ɲaanli mín ŋé nísɔɔnbhɔko ó ka
13 Yawudhyaa olu kúnndii ólu ni Falizɛn ŋo lɔ́lu ni Elɔdi dhyáaɲɛnmɔɔn ó lɔ́lu bhyáashaa Ɛnza man kɛ táa a lɔswaan ni ɲaanli kéene.
14 Ii nan fɔ a yɛ kó:
«Kaamɔɔn,
án ni lɔ ŋóo íi tinɲan le fɔ́la.
Í tɛ́ sháannan í mɔ́ɔnɲɔɔn ó ɲán o ɲɛn,
í ló ndɛ́ lɔ́ bhɔ́la lɔ́lɔ,
Íi Ala sháa o yáala tinɲan le ka.
A fɔ án ɲɛn ní á láanin ɲé kó mɔɔn a nísɔɔn bhɔ́ Mansacɛ Sezali yɛ bháa bháanin a laanin ndɛ́?
Án ngákan kɛ a sala bháa án mánngan kɛ a sala?»
15 Wáa Ɛnza ndɛ́ɛ i yɛ fyaangafoya ó lɔ́,
aa i mánɲaankɛ kó:
«Mínnɛɛn lé kósɔn tó áa nɔ́swaannan?
Áa nan wɛ́ɛgbannan ngée né ɲɛ́n ké ní a yé.»
16 Ii nan wɛ́ɛgbannan ngée ne.
Aa i mánɲaankɛ kó:
«Yɛ́ɛtii yáa ni a tɔ́ɔ é a mán nín?»
Ii a yawi kó:
«Mansacɛ Sezali.»
17 O bhóo o mán,
Ɛnza ŋé fɔ i yɛ kó:
«Fé mín ŋé mansacɛ Sezali tá le,
áa o dí mansacɛ Sezali mán;
tó fé mín ŋé Ala tá le,
áa o dí Ala man.»
A yɛ kóman o yawi seɲan o lée bháa mɔɔn olu bɛ́ lɔ.
Ɲaanli mín ŋé sú ólu kúunngo o ka
18 Mɔɔn lɔ́lu tɛ́ɛ yénɔn kó Sadusi,
mínnu tɛ́ɛ fɔ́la kó sú ólu táa kúun.
Ii í mángbaa Ɛnza nan tó kɛ a mánɲaankɛ kó:
Maki 12.18-44
19 «Kaamɔɔn,
céla Musa é sɛ́wɛ a yɛ Kitabu o lɔ kó:
Ní cɛ mínngɛ muso tá,
kɛ sayakɛ ké a man dhyé nzɔɔ a lá,
o tíi ó bhádhye ŋo kákan né kɛ o muso o tá ké aa dhyé nzɔ́ɔ táabhaa o yɛ.
20 Bhádhyemannjɛ wóonvyaa lé tɛɛ.
A jónan óo muso tá,
wáa a mán dhyé nzɔ́ɔ aa sayakɛ.
21 A fyáaɲɔn oo muso kée ŋó tá.
O mán dhyé nzɔ́ɔ,
óo sayakɛ íkwɔtun.
A sawaɲɔn óo kɛ o ɲán kée ŋó lé mán.
22 O kɛ́ ɲán o le mán cé,
bhádhyemannjɛ wóonvyaa ó bɛ́ sayakɛ,
i lɔ mán dhyé nzɔ́ɔ.
I bɛ́ saya kɛ́nin ŋó kwɔ,
muso óo saya kɛ́ íkwɔ.
23 Sú ólu kúunno ŋo kɛ́ sé wáati mínnɔn,
ké i bɛ́ wɛ́ɛ kúun,
muso ó káa kɛ́ a mínnɛɛn lé tá lé?
Kɛ mansɔɔ aa sii i mɔɔn wóonvyaa ó bɛ́ le kunman kée ngée.»
24 Ɛnza ŋé i yawi kó:
«Miin né kósɔn aa á yɛ́ɛ láfiila,
a mán Kitabu o lɔ,
a ló mán Ala yɛ sébhaaya ó lɔ.
25 Tinɲan ní án ngɛ kúun wáati mínnɔn kɛ́ bhɔ́ saya bhóo ó mán,
cɛ lɔ́ táa muso tá,
muso lɔ́ ló ndáa sii cɛla;
I bɛ́ káa kɛ́ lé óo malɛɛka lu,
sángboo o lɔ.
26 Wáa míin nan kɛ́ sú ólu tá kúun ŋó lé,
tínminnaa mín ŋé fɔ́la Céla Musa yɛ́ kitabu o lɔ kó tá é máannan yíitunin ŋó la,
a mán o ywáa ó kála ŋan?
Ala é fɔ́la céla Musa yɛ́ o ywáa ó lɔ kó:
Né lée Bulaaman yɛ Ala o le,
Shaaka yɛ́ Ala o,
óni Yangubha yɛ Ala o.
27 Ní a kɛ kɛ́ a yíiman óyoo sú ólu kúunngo o tɛ́ tinɲan le,
ké a wɛ́ɛ a yɛ́ɛ lafii koyoongɛ.
Ala tɛ́ sú ólu yɛ́ Ala le,
waa ɲáanman ŋólu yɛ́ Ala.»
Tɔ́ nguugbɛɛ ŋó
28 Sɛliya kaamɔɔn lɔ é i kómankan ŋo lɔ́myɛn.
Aa lɔgbɛ mínngɛ óyoo Ɛnza ŋwɛ́ɛn Sadusi olu yawi cɛ́ɛne ne,
aa í mángbaa a lá kɛ a mánɲaankɛ kó:
«Tɔ́ ŋo mínnɛɛn lé kúu a gbɛ́ɛ tɔ́ ŋo bɛ́ le?»
29 Ɛnza ŋé a yawi kó:
«Tɔ́ mín ngúu a gbɛ́ɛ tɔ́ ŋo bɛ́ le o lée nín:
Izalayɛlika ólu áa í tóomanlɔ!
Mantii ó,
án ɲɛn Ala o,
o kée née Mantii óle.
30 Í yɛ Mantii Ala o waa dhyáa í yɛ́ í yóso ó bɛ́ la,
í ní o bɛ́ la,
í míliya ó bɛ́ la,
óni í fáan ó bɛ́ la.
31 A fyáaɲɔn o lée nín:
Í mɔ́ɔnɲɔɔn ó a dhyáa í yɛ́ óyoo íle gbú o a dí í yɛ́ɛ yɛ ɲán mín man.
Tɔ́ ŋo lɔ́ kúu mán ngbɛ́ɛ o fyáa o le.»
32 Sɛliya kaamɔɔn oo fɔ a yɛ kó:
«Cɔ́!
Í ní cé kaamɔɔn,
o wɛ́ɛ bhyɛ cɛ́ɛne ne,
í wɛ́ɛ tinɲan fɔ:
Mantii ó kée née Ala le.
Ala gbɛ́ɛ tɛ́ ale kwɔ.
33 Óni a dhyáa í yɛ́ í yóso ó bɛ́ la,
í miliya ó bɛ́ la,
í fáan o bɛ́ la,
í mɔɔnɲɔɔn ó a dhyáa í yɛ́ óyoo íle gbú o a dí í yɛ́ɛ yɛ ɲán mín man.
O a físaa faanlɛɛ ólu le.»
34 Ɛnza ŋé lɔ ŋóyoo cɛ ó wɛ́ɛ a yawi yáakiimanɲan la,
aa fɔ a yɛ kó:
«Í ywáa mán njá Ala yɛ́ Mansaya ó la.»
Aa o fɔ́ mínngɛ mɔɔn sí lo mán í swáan Ɛnza ɲaankɛ la bhée.
Mantii ó lée Kísibhaa o le ale lée Laula bhɔ́nzɔ ŋó le
35 O wɛ́ɛnin ŋo kwɔ,
Ɛnza ndɛ́ɛ lakawanin kɛ Ala bhatobhomba ó la.
Aa ɲaanli kɛ kó:
«Ɲán mínnɛɛn lé mán tó sɛliya kaamɔɔn olu fɔ́la Kílisi o mán kó Laula Bhɔ́nzɔ.
36 Kɛ́ɛke Ní Sɛnnɛnyanin ŋó Laula gbú lo a fɔ o lɔ́ ko:
Mantii Ala é fɔ ɲɛ́n Mantii o yɛ kó:
Í síi móobhɛɛ kɔɔ,
fɔ́ ní í yúu olu bhyáa í sé ngɔɔ.
37 Laula gbú yɛ́ɛ é Kísibhaa o kíi kó Mantii ó,
tó óo sé kɛ́la Laula bhɔ́nzɔ né díi í kwɔ́?»
Yamanba tɛ́ɛ a kan ŋó lɔ́myɛnnan ni nisɔdhyaa le.
Áa a yɛ́ɛ myaan sɛliya kaamɔɔn olu mán
38 A yɛ kaa ŋo kɔ́ɔnnɔn aa fɔ kó:
«Áa a yɛ́ɛ myáan sɛliya kaamɔɔn olu mán,
kɛ́ í yaakɛla deekeba ólu lɔ,
mɔɔn kɛ́ kɛ́ í fola bhɛ́ɛsili bhóoman yamanywaa olu lɔ óni,
39 Siilaa bhɛ́ɛ mín núu kála ɲɛ́nnzhaafɛ,
o léelu dhyáa é kála i lɔ sɛ́ɛbho o la óni lɔ́minkɛlaa ólu lɔ,
40 Muso mínnu cɛ wɛ́ɛ sayakɛ,
íi olu bhóofe ŋo bɛ́ myaanla i la;
kéni a ló ŋé sɛ́ɛ kannanja olu kɛ́la ké mɔɔn olu a a lásaa.
Oo lɔ mínngɛ,
í tá kíti o yáa gbɛ́ya mɔɔn tɔ́ ólu tá lé síin!»
Finɲanmuso bhóokoo ŋó yɛ́ yáa ó
41 Wɛ́ɛ o tɛ́ɛ bhyáala késu mín ngɔ́ɔnnɔn Ala bhatobhomba o la,
Ɛnza ŋé í síi mínngɛ,
aa í ɲán bhyɛ o mán,
kɛ mɔɔn ólu yɛ́ wɛ́ɛ bhyáa seɲan o mánfɛɛ.
Nanfootii olu shɛ́ɛman ndɛ́ɛ wɛ́ɛ shɛ́ɛman díla.
42 Finɲanmuso bhóokoo nɔ́ é nan kɛ wɛ́ɛgbannan nvyáa bhyáa.
O tɛ́ tɛ́ tínminnan tánman nvyáa ka.
43 Ɛnza ŋé a yɛ kaamɔɔndhye ŋolu kíi tó kɛ fɔ i yɛ kó:
«Ní tinɲan le fɔ́la a yɛ́ ni ngó,
finɲanmuso bhóokoo míin née wɛ́ɛ shɛ́ɛman myáa wɛ́ɛ bhyáa késu o lɔ kɛ tínmin mɔɔn tɔ́ ó bɛ́ ka.
44 Kɛ mansɔɔ mɔɔn tɔ́ ólu wɛ́ɛ mínnu di,
i manko tɛ́ tɛ́ olu lá bhée i yɛ dínɲanlɔtɛɛ o lɔ.
Wáa finɲanmuso o,
a yɛ bhóokooɲan o lɔ,
mín ndɛ́ɛ a yeeya lé bhálo bhóo o man a yɛ dínɲanlɔtɛɛ ó lɔ,
aa o lé di.»