Finɲanmuso lɔ́ é a bhóo tá ó bɛ́ bhyáa késu ó kɔ́ɔnnɔn
21
Kɛ Ɛnza ndó Ala bhatobhomba ó kɔ́ɔnnɔn,
aa i ɲán láwii kɛ nanfootii ólu yé sɔɔtabhɔ ó bhyáala Ala bhatobhomba ó késu ó kɔ́ɔnnɔn.
2 Aa finɲanmuso dɛ́sɛbhaatɔ lɔ yé wɛ́ɛgbannan nvyáa bhyáala késu o kɔ́ɔnnɔn.
3 Ɛnza ŋé fɔ o lé lɔ kó:
«Tinɲan in ne,
ní fɔ́la a yɛ ngó finɲanmuso dɛ́sɛbhaatɔ míin ŋwɛ́ɛn wɛ́ɛ mín myáa késu ó kɔ́ɔnnɔn,
ó a sháa a bɛ́ tá le,
4 kɛ mansɔɔ ílee lu fítiinin né bhɔ́ i yɛ nanfoo ó la kɛ ó bhyáa késu ó kɔ́ɔnnɔn,
wáa ale ní a yɛ faanndanɲan ó bɛ́,
mín ndɛ́ɛ a bhóo kɛ kɛ́ lɔ́min sɔ́ɔn le,
a wɛ́ɛ óle bɛ́ bhyáa késu ó kɔ́ɔnnɔn.»
Ɛnza ŋé Ala bhatobhomba céko ó fɔ́la
5 Mɔɔn lɔ́lu tɛ́ɛ kóman lá kó Ala bhatobhomba ó cáaɲiin,
kó aa lɔ́ ni káwa cɛ́ɛ ne le,
a mánsiinin ɲé ní fémɛɛ léelu lá,
mɔɔn ólu mín ndí Ala mán.
Ɛnza ŋé fɔ i yɛ kó:
6 A ɲán é bhó mínnan nín;
«Ló nɔ́ yáa sé,
bhó ŋó bɛ́ yáa cé,
káwa ó sí táa tó ɲɔ́ɔn ngá.»
Dínɲan lábha ŋwáati ó sɛ́ɛya ó
7 Ii Ɛnza mánɲaankɛ kó:
«Kaamɔɔn,
o kó ólu káa kɛ́ wáati mínnɛɛn lé lɔ?
O tɔɔmansii ó káa kɛ́ mínnɛɛn le kɛ yáa kó a wáati ó wɛ́ɛ sé?»
8 Ɛnza ŋé i yawi kó:
«Áa a yɛ́ɛkɔɔsi,
a kɛ́nan tó mɔɔn lɔ a a láfii.
Kɛ mansɔɔ Mɔɔn shɛ́ɛman ɲáan nan nín né tɔ́ɔ óle,
kɛ fɔ kó:
Ile lée Kísibhaa óle,
kó dínɲan labha ŋwáati ó wɛ́ɛ sé.
A kɛ́nan bhyáa olu íkwɔ.
9 Ní a kɛ kɛ́ɛkɛkan ŋólu myɛ́n,
óni fíɲaanli kó ólu mánngan myɛ́n wáati mínnɔn,
a kɛ́nan sháan.
Kɛ mansɔɔ dhyaalagboya lée fɔ o kó ólu a kɛ́,
wáa o sí tɛ́ dínɲan labha ŋo le.»
10 O kwɔ́,
aa fɔ i yɛ kó:
«Síya lɔ yáa í wíi síya gbɛ́ɛ kanman,
yamaanlɔ yáa í wíi yamaan gbɛ́ɛ kanman.
11 Lúukolo yáayaa ó yáa kɛ ywáa shɛ́ɛman nɔn.
Fwɛ́ɛnyangalo ó,
óni kɔ́ɔn ó.
Óni yeetɛɛko ólu,
óni tɔɔmansii lɔ́lu yáa kɛ sángboo ó lɔ.
12 Wáa sannin o kó ólu bɛ́ a kɛ,
i yáa a myáan kɛ́ a gbási,
i yáa a tɔ́lɔ.
I yáa á ló sɛ́ɛbho ŋó kunndii ólu bhóo,
i yáa a bhyáa kaso la.
I yáa táa ní ále mansacɛ ólu ɲánkɔɔ,
óni yámaantii ólu ɲánkɔɔ né tɔ́ɔ ó kósɔn.
13 O yáa kɛ́ sɔ́ɔbu le,
ké an ní ale sɛ́ɛya ládi.
14 Aa lɔ́ ko a mánngan kɛ kóman lɔ lɔ́bhyɛ,
á káa kóman mín nvɔ́ í ɲánkɔɔ kɛ a yɛ́ɛ dhyɛman,
15 kɛ mansɔɔ,
né gbú le káa kóman ó ló a lálɔ,
kɛ hákiitiiya dí a mán,
o sɔ́ɔbu la a yúu ólu sí táa sé kɛ kóman ní ale,
wáman kɛ a sɔ́sɔ.
16 A wóobhaa ólu yáa a ló bhóolɔ,
óni a bhádhye ŋólu,
mínnu mángbaanin ŋé a lá,
óni a twáanva ólu,
ólu yáa a shɛ́ɛman nó a yúu ólu bhóo kɛ́ a lɔ́lu fáa.
17 Mɔɔn ólu bɛ́ yáa a yúuya né tɔ́ɔ ó kósɔn.
18 Wáa yáanin a kúnzhe ó kɛ́ɛ kée ndáa túun.
19 Ní a kɛ í lɔ́ja,
a yáa ɲaanmanɲan ó sɔ́ɔ.»
Yeluzalɛmu hálaki ko ó
20 «Ní a kɛ Yeluzalɛmu laminninnin ɲé kɛ́ɛkɛbhaa ólu lá a yúu ólu bhóo wáati mínnɔn,
aa lɔ kó só ó cé wáati ó wɛ́ɛ sé.
21 Mɔɔn mínnu káa kɛ́ Zude mala ó lɔ,
ólu á bwée kɛ táa tii ólu kúnnɔn.
Mínnu kɛ kɛ́ Yeluzalɛmu só ó kɔ́ɔnnɔn,
ólu á bwée kɛ bhɔ́.
Mínnu kɛ kɛ́ sɛɛn mán,
ólu kɛ́nan ló só ó kɔ́ɔnnɔn.
22 Kɛ mansɔɔ o ló ŋó Ala yɛ kítitɛɛlo ŋó lée wé Yeluzalɛmu ka,
ké kóman mínnu wɛ́ɛ sɛ́wɛ kitabu ó kɔ́ɔnnɔn,
ké o á i láfa.
23 O ló ŋó la kunnangboya yáa muso kɔ́ɔnman ŋólu sɔɔ,
óni mínnu sín ndí lá dhyé ŋólu mán,
tɔ́lɔya ó yáa sé yamaan ó mán,
kɛ mansɔɔ Ala yɛ díminsa ó yáa bé yaman ó ka.
24 I yáa lɔ́lu fáa fá ŋó lá,
i yáa a myaan kɛ́ táa ní ale síya gbɛ́ɛ olu yɛ yamaan ó lɔ.
Síya ólu yáa Yeluzalɛmu cé pépe fɔ wáati min ŋwɛ́ɛn dí i mán,
o á í lafa.»
Mɔɔn Dhyénjɛ ó kwɔ́sɛɛko ó
25 «Tɔɔmansii lɔ́lu yáa kɛ́ tee lɔ,
óni káa óni lóodhye ŋólu ka,
óni lúukolo ó ka.
Mɔɔn ólu yáa ó yáa tɛɛ yamaan ó lɔ fɔ́ kɛ i kɔɔnnɔn bhá,
kɔɔji ó mannganba ó kósɔn.
26 Mɔɔn shɛ́ɛman yáa sayakɛ sháanngoyoo ŋó bhóo,
káwako ó miliya ó kósɔn lúukolo ó ka.
Kɛ mansɔɔ sébhaaya míin kɛ́la sá ŋó lɔ ólu yáa mannan mannan.
27 O ɲán o mán,
án ɲáan mɔɔn Dhyénjɛ ó nántɔ ó yé sángawa ó lɔ ní a yɛ sébhaayaba óni a yɛ nɔ́lɔyaba óle.
28 Ni ó kó ólu kɛ́ i lámyaan wáati mínnɔn,
áa í látee kɛ́ a kúnnanwii sáman,
kɛ mansɔɔ a yɛ Hɔ́lɔɲanli wáati ó wɛ́ɛ sé.»
Ɛnza ɲɛn kóman ó táa tínmin fɛ́sɛ fɛ́sɛ
29 O kwɔ,
Ɛnza ŋé saanan lɔ́ la i yɛ kó:
«Aa fígisun ŋó mánfɛɛ,
óni yíi o tɔ ólu bɛ́.
30 Ní a kɛ́ a yé ké aa í búu kwáa bhɔ́la,
aa bhɔ́la a ɲánle kó sanmanyi o wɛ́ɛ gbaa.
31 O ɲán kée ŋó mán,
álee lu,
ní a kɛ kɛ́ o kó ólu yéla kɛ́la wáati mínnɔn,
aa lɔ́ ŋóo Ala yɛ́ Mansaya ó wáati ó lé wɛ́ɛ gbaa.
32 Tó ní fɔ a yɛ tinɲan in né ngó,
án ɲɛn bí wáati míin mɔɔn ólu bɛ́ táa sayakɛ,
fɔ́ kó míinnu bɛ́ a kɛ́ kɛ i lafa.
33 Sángboo óni lúukolo ó yáa tínmin,
wáa né yɛ kóman ólu táa tínmin tún.»
Áa a yɛ́ɛkɔɔsi
34 «Áa a yɛ́ɛkɔɔsi,
a kɛ́nan tó lɔ́minba kɛ ólu la,
óni minin ó la,
óni kɛ tó dínɲan hánminnanngo ólu ɲíin ŋó mán,
ké dínɲan labha nó ŋó kɛ́nan bháa a lɔ,
35 kɛ mansɔɔ nánlo ŋó kaa bháa dínɲan mɔɔn ólu bɛ́ lɔ lé,
óyoo jɔ óo fé ŋó myaanla ɲán min mán.
36 Aa í hákii tó a yɛ́ɛ lɔ,
kɛ́ a tíinnandhyaa Ala dɛ́li ó la wáati bɛ́,
ké áa fáan sɔ́ɔ,
kóyoo mínnu é nánla ké aa sé kɛ bwási ó bɛ́ mán,
ké aa sé kɛ í lɔ mɔɔn Dhyénjɛ ó ɲánkɔɔ.»