Matiyu 24

Ɛnza ŋé Ala bhatobhomba céko ó lásela

Ɛnza ŋé bhɔ́ Ala bhatobhomba ó lá, a taatɔ óle, a yɛ kaamɔɔndhye ŋolu í mángbaa a lá kɛ fɔ a yɛ kó: «Íi Ala bhatobhomba míin nɔ́ í sɛ́wɛla lɛ!» 2 Aa i yawi kó: «A ló ɲán é o bɛ́ lá nin, wáa tó ní fɔ a yɛ́ tinɲan in ne ngó, o káwa ó sí táa tó a siilaa o lɔ́ ya. Bhó ŋó yáa wéyaa féfe.»

Tɔ́lɔya ólu lámyaan ó

Maki 13.3-13; Luka 21.7-19

3 Ɛnza ŋé táa í síi Olivyetii ó ka mínngɛ. A yɛ kaamɔɔndhye ŋolu í mángbaa a lá kɛ a manɲaankɛ í kéenan tá kó: «Kaamɔɔn, íi kó mín nvɔ sɛ́n wé, o káa kɛ́ wáati mínnɛɛn lé lɔ? Í tá kwɔsɛɛsan óni dínɲan ó lábhanzan o tɔɔmansii o káa kɛ́ mínnɛɛn ní mínnɛɛn lu le?» 4 Ɛnza ŋé i yawi kó: «Áa í yáakii tó a yɛ́ɛ lɔ, a kɛ́nan tó ké mɔɔn lɔ́ a a láfii 5 Kɛ mansɔɔ mɔɔn shɛ́ɛman ɲáan nan nín ndɔ́ɔ óle kɛ́ fɔ kó: Né lée Kílisi o le. I yáa mɔɔn shɛ́ɛman náfii o bhóo ó mán. 6 A yáa kɛ́ɛkɛkan nu myɛ́n, óni kɛɛko lu mánngan, o sí kɛ́nan a mánshaan: Fɔ́ olu a kɛ́ lé, wáa o táa kɛ́ dínɲan labha ŋo sénin ne. 7 Síya lɔ yáa í wíi síya gbɛ́ɛlu kanman, yamaanlɔ yáa í wíi yamaan gbɛ́ɛlu kanman. Kɔ́ɔn yáa kɛ́ ywáa shɛ́ɛman nɔn, lúukolo ó yáa yáayaa ywáa shɛ́ɛman nɔn. 8 O kó ó bɛ́ yáa kɛ́ tɔ́lɔya ólu lámyaan o le óyoo muso tínndɔ ó ó tɔ́lɔya myáanla tɛ́nmɛn ne.

9 Mɔɔn ólu yáa a ló bhóolɔ, i yáa a fáa. A yáa gbóya yamaanlɔ mɔɔn ólu yɛ né tɔ́ɔ ó kósɔn. 10 Lánanya o yáa bhɔ́ mɔɔn shɛ́ɛman móo, i yáa bhɔ ɲɔ́ɔn ngwɔ́kɔɔ, i yáa gbéya ɲɔ́ɔnɲɛn. 11 Céla kóo ngóo nzhɛ́ɛman ɲáan yé, i yáa mɔɔn gbɔ́gbɔ láfii. 12 Kóyoongɛ ó yáa fáan sɔ́ɔ, tó dhyáaɲɔɔnya óo lɔ́ɔya mɔɔn gbɔ́gbɔ yóso lɔ. 13 Wáa mɔɔn mín ngɛ í lɔ́ja kɛ táa sé a la ŋó mán, o yáa kísi. 14 Sanmankanmɛɛ mín nvɔnin ŋé Ala yɛ́ Mansaya ó tá fa nvɛ́ nín, o sanmankanmɛɛ ó yáa í láse dínɲan ó ywáa bɛ́ lɔ, kɛ kɛ́ sɛ́ɛya lé síya ólu bɛ́ yɛ, tó dínɲan é tó í lábhanan.»

Mantii Ɛnza ngó tɔ́lɔya ó yáa í lánantinmin

Maki 13.14-23; Luka 21.20-24

15 Ɛnza ŋé fɔ kó: «Céla Daniyɛli é sɛ́wɛ kó fé nzúu yóo hálamutɔ lɔ́ síi Ala bhatobhomba ó la kɛ o ywáa ó bhɔ́ sɛ́nnɛnya bhóoman. Mɔɔn mín ngɛ o ywáa ó kála, o tíi o yáa bhɔ́ o kó ó ɲánle. A kɛ́ o kó ó yé kɛ́la, 16 ále mɔɔn óo mɔɔn kɛ́ kɛ́ Zude mala ó lɔ, áa bwée kɛ táa a lóonaanbhɔ tii ólu mán. 17 Mɔɔn mín ngɛ kɛ́ a yɛ bhó ŋó kúnnɔn, o tíi o kɛ́nan í yíi bhó ŋo kɔ́ɔnnɔn kɛ a bhóofe ŋolu tá. 18 Mɔɔn mín no ngɛ́ kɛ́ sɛɛn mán, o tíi o kɛ́nan í kwɔ́sɛɛ lúman táamanlataafaani tá tɔ́ɔ lɔ. 19 Bɔɔn yáa kɛ́ muso kɔ́ɔnman ŋólu ní dhyémbatii olu ta lé o lo ŋó la! 20 Áa Ala dɛ́li ké a bwéesan o kɛ́nan bhyɛ nɛ́nnɛnbakowaati o man wáman lɔnwɛɛnlilo ŋo man. 21 Tɔ́lɔya o yáa bwóɲan gbúnigbukɛ. Kɛ myáan dínɲan lámyaan ó mán, kɛ́nan sii bí la, a sí tɛ́man kɛ́ bhá, a lo nzí táa kɛ́ bhée. 22 Ní Mantii ó tɛ́man o wáati o kánnansunɲan, mɔɔn sí tɛ́ táa bwási. A káa o wáati o kánnansunɲan a yɛ mɔɔn lɔ́tɔnmɔnnin ŋó léelu kósɔn. 23 Ní mɔɔn lɔ́ kɛ́ fɔ a yɛ́ o sán olu lɔ kó: ‹Kílisi óo ya!›, wáman kó ‹aa yeenɔn!› A kɛ́nan lá o tíi o la. 24 Kílisi kóo ngóo ni céla kóo ngóo nzhɛ́ɛman ɲáan í wíi, i yáa tɔ́ɔmansiibaba ní káwananngo bá bá lú kɛ mɔɔnlafii tɔ́ɔ lɔ, háanin Ala yɛ mɔɔn lɔ́tɔnmɔnnin ŋólu, i yáa olu láfii o ɲánɲiin. 25 Ŋwɛ́ɛn a tóo lasowi o bɛ́ la!

26 Ni lɔ́lu kɛ́ fɔ a yɛ́ kó: ‹Kísibhaa oo dhyɛ́ o lɔ́!› A kɛ́nan táa yé. Ni i lo ngɛ́ fɔ a yɛ́ kó: ‹Aa ywáa lóonaankɛnin nɔ́ lɔ́ yée nɔn!› A kɛ́nan lá i la. 27 Tinɲan sá ŋó í bhóo lábhɔ kɔ́ɔ ŋóni teebe ŋo lɔ tɛ́nmɛn ne, mɔɔn Dhyénjɛ o káa nan o ɲán o lé mán. 28 Ní fénzu é ywáa mínnɔn, lwaa ólu í ladhyɛnan o ywáa o le lɔ́.»

Mɔɔn mín ŋé mɔɔn Dhyénjɛ óle o kwɔ́sɛɛɲan o

Maki 13.24-27; Luka 21.25-28

29 O tɔ́lɔya wáati ólu kɛ́ bhɔ́ í lá tɛ́nmɛn,

tee ó yáa í mánfin,

káa ó ló ndáa gbɛ́ bhée,

lóodhye ŋólu yáa bhɔ́ sáman kɛ bé,

óni sébhaaya mín núu sá ŋó lɔ olu yáa maanmaan.

30 «O kɛ́ kɛ́ o lɔ, mɔɔn Dhyénjɛ ó, tɔɔmansii mín ŋé o nánko fɔ́la, o kó ó yáa yé sángboo o lɔ, tó síya súu súu é lúukolo ó ka, olu yáa kásikɛ. I bɛ́ yáa Mɔɔn Dhyénjɛ ó nántɔ ó yé káwa ólu ka ni sébhaayaba óni nɔ́lɔyaba ó le. 31 Búufyɛkanmba ó yáa bhɔ́, tó mɔɔn mín ŋé mɔɔn Dhyénjɛ ó le, oo a yɛ malɛɛka olu bhyáashaa dínɲan nɔ́ɔn náannin ó fá ŋó bɛ́ kɔɔ kɛ myáan sángboo kún míin mán kɛ́ táa sé kún dɔ́ ó mán kɛ́ a yɛ mɔɔn lɔ́tɔmɔnnin ŋólu ládhyɛ.»

Saanan míin la fígisun ŋo man

Maki 13.28-31; Luka 21.29-33

32 «Áa a yɛ́ɛ sɔ́ hákii lá, saanan míin lá fígisun ŋo man. Ní a kɛ́ yé kó yíi bhóo óo táa í mánnuun ne, ké aa táa í búu kwaa bhɔ́ le, áa lála óyoo sanmanyi^a o wɛ́ɛ gbaa. 33 O ɲán kée ŋó mán, a kɛ́ kɛ́ o kó ólu yéla wáati mínnɔn, aa lɔ ŋóo mɔɔn Dhyénjɛ ó nán wáati o wɛ́ɛ gbaa. Óo aa sháala. 34 Tó ní fɔ a yɛ́ tinɲan in ne ngó, án ɲɛ́n wáati mín mɔɔn ó bɛ́ táa sayakɛ, ké kó míinnu bɛ́ mán kɛ́ bhá. 35 Sángboo óni lúukolo ó yáa tínmin, wáa ɲɛ́n kóman ólu táa tínmin tún.»

Mɔɔn Dhyénjɛ ó nán ó yáa bháa bɛ́ lɔ

Maki 13.32-37; Luka 17.26-30, 34-36

36 «O kó ólu káa kɛ́ ló mínnan, wáman wáati kée mínnɔn, mɔɔn óo mɔɔn mán o lɔ, malɛɛka olu mán lɔ, háanin Dhyénjɛ ó mán o lɔ. Ala mín ŋé Fá óle, o kéembe lé a o lɔ. 37 Kó míin kɛ́ Nuwo yɛ́ tée ó lɔ, o ɲɔ́ɔn ɲáan kɛ́ íkwɔ mɔɔn Dhyénjɛ nan wáati ó lɔ: 38 Tinɲan o wáati o lɔ, ké sámba ó mán nan bhá, mɔɔn ólu tɛ́ɛ lɔ́minkɛla, i lo ndɛ́ɛ í mínnan, i tɛɛ muso fúu kɛ́la óni kɛ i dhyémuso lú ló fúu la. Fɔ kɛ́ táa sé Nuwo lo no ŋó mán kúunmba ó kɔ́ɔnnɔn. 39 I mán sówi fósi mán, fɔ sámba óo bé lo mínnan kɛ mɔɔn bɛ́ látuun. Mɔɔn Dhyénjɛ ó, ó nánlo ŋó káa kɛ́ céne íkwɔ.

40 O ɲán o mán, cɛ fyáa yáa kɛ́ sɛɛn kéeman, kée ɲáan tá kɛ́ tɔ kée ŋó tó yé. 41 Muso fyáa yáa tó koonduu, kée ɲáan tá kɛ́ tɔ kée ŋó tó yé. 42 Oo lɔ mínngɛ, áa tó í ɲánla, kɛ mansɔɔ a mán a yɛ́ Mantii o nánlo ŋo lɔ. 43 Aa lɔ kó ní bhóndii ó tɛ́ɛ kɛ́ so ŋó nánwaati lɔnan, a tɛɛnan tó í ɲánla ké so ŋó kɛ́nan ló a bhóo bhónan. 44 O kósɔn, Álee lɔ́bhyɛnin ŋán kɛ́, kɛ mansɔɔ a tɛ́ í milila wáati mín mán, mɔɔn Dhyénjɛ ó káa nan ó wáati ó lé lɔ.»

Bháalakɛdhye hákiiman ŋóni// bháalakɛdhye ɲóo ŋó

Luka 12.41-48

45 «Bháalakɛdhye ndélenin ŋó hákiiman mínnɛɛn lé yé, ní a kunndii ó wɛ́ɛ a lásii a yɛ́ bháalakɛdhye ndɔ ólu kunnan ké aa i yɛ́ lɔ́min ó di í mán a diwaati lɔ? 46 Yeemanfa yáa kɛ́ o bháalakɛdhye ŋo yɛ ni a kunndii o kɛ́nan a sɔɔ o bháala olu kɛ́la. 47 Tó ní fɔ a yɛ́ tinɲan in ne ngó, a kunndii ó yáa o bháalakɛdhye ŋo lásii a bhóofe ŋo bɛ́ kunnan. 48 Wáa ni a kɛ kɛ́ bháalakɛdhyeɲoo ne, tó aa fɔ́la a yɛ́ɛ kɔ́ɔnnɔn kó: Ngunndii ó táa nan jónan, 49 O lɔ, tó aa a bháalakɛdhyeɲɔɔn tɔ ólu gbasi, kɛ́ tó lɔ́minba kɛ ó la, óni mínninba ó la ní dɔlɔtɔ olu le. 50 O bháalakɛdhye ŋó tɛ́ í milila ló mín man, óni wáati mín mán, a kunndii ó káa nan o ló ŋó lé lá. 51 A yáa o bháalakɛdhye ŋó bhɔ́ yé kɛ́ a tɔ́lɔ fyáangafo ólu tɔ́lɔseɲan ó lá, olu kasi kɛ́la yénɔn ké i dinmisaninmba ó yé.»