Gbondo ó bɛ́ yáa bhɔ́ kɛ́ɛnman
12
O wáati ó lɔ,
yamanba tɛ́wɛɛ i ládhyɛ,
fɔ́ i tɛ́ɛ táamankɛla ɲɔ́ɔn nzé nga.
Ɛnza ŋé lámyaan kɛ́ fɔ a yɛ kaamɔɔndhye ŋólu yɛ kó:
«Áa a yáakii tó a yɛ́ɛ lɔ Falizɛn ŋólu yɛ́ lévu o mán ó míin fyaangafoya óle.
2 Fénoonaankɛnin nzí tɛ yé mín ndáa yé.
Gbondo sí tɛ́ yé mín ndáa bhɔ́ kɛ́ɛnman,
3 kɛ mansɔɔ a káa fé ŋóo fé nvɔ́ diwi ó lɔ,
o yáa myɛ́n kɛ́ɛnman.
A káa fé ŋóo fé nvɔ́ ɲɔ́ɔn ndóo lɔ bhó ŋó kɔɔnnɔn,
o kóman ó yáa bhɔ́ bhó ŋó kúnnɔn kɛ́ɛnman.»
Án ngákan kɛ́ sháan Ala ɲɛ́n?
4 «Álee mín núu né twáanva ólu le,
ní fɔ́la a yɛ ngó:
mɔɔn mín núu mɔɔn fási ólu fáala tó í tɛ́ sé kɛ kó gbɛ́ɛ kɛ o kwɔ́,
a kɛ́nan sháan ŋólu ɲɛ́n.
5 A kákan né kɛ sháan mín ɲɛ́n,
né yáa o fɔ a yɛ.
Sé é mín ɲɛn kɛ́ mɔɔn ní ó myáan,
o kwɔ́,
aa sé kɛ́ a ní o láfii yaananman o lɔ,
aa sháan o lé ɲɛ́n.
6 Mɔɔn tɛ́ kɔ́ɔn dhyénin nóo felela pɔpɔlɔ fyáa la a?
O ló mbɛ́ kwɔ́ Ala tɛ́ ɲánla ólu sí kwɔ́.
7 Yáanin a kúnzhe ó yɛ́ɛ o bɛ́ lá nɔn nin née Ala kwɔ́.
Oo lɔ mínngɛ,
a kɛ́nan sháan.
Álee a físaa kɔ́ɔnnin ŋólu le.»
Kɛ́ sɔ́n bháa, bháa kɛ́ í bá
8 «Ní fɔ́la a yɛ́ ngó,
ní mɔɔn mínngɛ i lɔ́ a lá bɛ́ ɲánla kó álee né yɛ́ mɔɔn le lé,
mɔɔn Dhyénjɛ ó yáa i lɔ a lá Ala yɛ́ malɛɛka ólu ɲánla kó ó tíi ó a tá le lé.
9 Wáa ní mɔɔn mínngɛ í bá né lɔ mɔɔn ólu ɲánla,
né yáa mbá o tíi ó lɔ Ala yɛ́ malɛɛka ólu ɲánla.
10 Mɔɔn óo mɔɔn kɛ́ kóman yóo nvɔ́ mɔɔn Dhyénjɛ o mán,
yafa é sé kɛ́la o tíi ó mán;
wáa ní mɔɔn óo mɔɔn kɛ́ kóman yóo nvɔ́ Ní Sɛnnɛnyanin ŋó mán,
yafa táa kɛ́ o tíi ó mán tún.
11 Ní i kɛ á myáan kɛ táa ni ale sɛ́ɛbho ŋólu kɔɔnnɔn,
wáman kítitɛɛbhaa ólu fɛ́ yé,
wáman faanman ŋólu fé yé,
a káa mín nvɔ́ kɛ jó sɔɔ,
a kɛ́nan hánmin o lá.
12 Kɛ mansɔɔ a káa kóman nvɔ́ Ní Sɛnnɛnyanin ŋó yáa ó ló a lálɔ o ywáanin ngée ŋó lɔ.»
Nanfootii nánloman ŋó yɛ́ saanan ó
13 Cɛ lɔ é fɔ Ɛnza ɲɛ yaman ó cɛ́man kó:
«Kaamɔɔn,
a fɔ ngɔ́ɔcɛ yɛ kó aa án nvá cɛ́n ó lɔ́taa.»
14 Wáa Ɛnza ŋé a yawi kó:
«Cɛ,
yɛ́ɛtii né síi kɛ né kɛ́ a yɛ́ kítitɛɛbhaa óle?
Wáman kɛ́ né kɛ́ a yɛ́ cɛ́n lɔ́taamaa óle?»
15 O kwɔ́,
Ɛnza ŋé fɔ yaman ó yɛ́ kó:
«Áa a yɛ́ɛ kɔ́ɔsi,
áa a yɛ́ɛ myaan nanfoo ko ó dhyaaɲɛnkoyoo ŋó mán,
kɛ mansɔɔ yáanin ní nanfoo ó kɛ́ sháaya mɔɔn bhóo ɲán óo ɲán mán,
o tɛ́ sé kɛ́la ké aa ɲaanmanɲan ó sɔ́ɔ.»
16 O lɔ,
áa saanan lɔ fɔ i yɛ kó:
«Nanfootii lɔ tɛ́ɛ yé,
a yɛ́ sɛɛn ó ɲan gbútuukɛ.
17 Aa fɔ a yɛ́ɛ kɔɔnnɔn kó:
‹Né yɛ́ sunman ŋó bhyáalaa tɛ́ móo.
Né káa kɛ́ díi?›
18 Aa fɔ kó:
‹Né káa min ngɛ́,
ní o lɔ́.
Ngáa ɲɛ́n mɔɔnnin ŋólu cé,
kɛ́ belebeleba ólu lɔ.
Né yáa ɲɛ́n béle óni móofe ŋólu bɛ́ ládhyɛ ólu kɔɔnnɔn.
19 O kwɔ́ né yáa fɔ ngɔɔnnɔn ngó:
Ndwáanva,
sá dáman míin nɔ́n i wɛ́ɛ bhóofe nzhɛ́ɛman nzɔ́ɔ.
I lɔ́nwɛɛn sísan,
kɛ lɔ́min kɛ́,
kɛ minin kɛ́,
i nisɔdhyaa i yɛ ɲaanmanɲan o lɔ.›
20 Wáa Ala é fɔ a yɛ kó:
‹I nánloman ŋó,
bí sú míin ɲɛ́ɛ lɔ,
ɲáan ɲɛ́n kɛɛfaman ó myáan i la.
I wɛ́ɛ nanfoo mín nadhyɛ i yɛ́ɛ yɛ,
o káa kɛ yɛ́ɛtii tá le?› »
21 Ɛnza ŋé fɔ kó:
«Mɔɔn mínngɛ nanfoo ládhyɛ a gbú yɛ kɛ́ Ala tó yé,
o tíi ó kɛ́la céne.»
Án ni lá Ala la kɛ án yée síi a la
22 O kwɔ́,
Ɛnza ŋé fɔ a yɛ́ kaamɔɔndhye ŋólu yɛ́ kó:
«O kósɔn,
ní fɔ́la a yɛ ngó:
A kɛ́nan hánmin a yɛ dínɲanlɔtɛɛ ó la,
kó a káa mínnɛɛn lé lɔ́ɔ?
A kɛ́nan hánmin a fásisoo ó tá sháa o fɛ́,
kó a káa mínnɛɛn ló?
23 Kɛ mansɔɔ a ní ó kúu a gbɛ́ɛ ní lɔ́min fé ŋó le,
fási ó kúu a gbɛ́ɛ ní faani óle.
24 Aa bwɔ́ ŋólu yace myaan kɛ́ a mánfɛɛ.
I tɛ́ sɛɛn kɛ́la,
i tɛ́ sunman ndɛ́ɛla.
Mɔɔnnin ndɛ́ í bhóo.
Wáa Ala é í bhálola.
Álee mán nvísaa kɛ́ tínmin kɔ́ɔn ŋólu ka ŋán?
25 Álee lɔ,
yɛ́ɛtii é sé kɛ́ tee kée nvala a sí ó ka hánmin ŋó kósɔn?
26 Sísan,
o mín ŋé kofitiinin né,
ní álee tɛ́ sé kɛ ó kɛ́,
mínnɛɛn la aa hánminan kó tɔ ólu la?
27 Aa bínnvee ólu cɛ́ɲan séɲan o mánfɛɛ.
I tɛ́ bháala kɛ́la,
i tɛ́ fwáani kɛ́la.
Née fɔ́la a yɛ ngó mansacɛ Swɛmannan ní a yɛ faanmanɲan ó bɛ́ lɔ,
a mán fáani sɔ́ɔ mín njɛ́ɲan é bínnvee ólu bhɔ́.
28 Bín míin sɛɛn ó mán,
ní tá yáa ó ɲɛɛn síin,
ni Ala é i hákiitola o lɔ cé,
a táa i hákiito álee lɔ́ kɛ tínmin olu ka ŋán?
Yeenda ŋólu!
29 A káa fé mín nɔ́ɔ,
wáman a káa fé mín min,
a hákii o kɛ́nan ɲáanmin ólu kósɔn.
30 Alalɔmɛɛ mín núu dínɲan míin nɔn ólu o fé ólu bɛ́ ɲíinnan.
Wáa a Fá ó á a mankoyafe ŋólu lɔ.
31 Áa Ala yɛ́ Mansaya ó ɲíin ŋó tún,
ni ó kɛ kɛ́,
Ala yáa fé ó tɔ ólu di a mán.
32 A kɛ́nan sháan né yɛ saawɛɛfitiinin ŋó,
kɛ mansɔɔ a wɛ́ɛ dhyáa Fá Ala yɛ kɛ́ a yɛ́ Mansaya ó di a mán.
33 Áa a bhóofe ŋólu fele kɛ a wɛ́ɛ ó lɔ́taa faannda ŋólu la.
Nanfoo míin Ala fɛ sángboo ó lɔ,
aa ó ɲíin.
O nanfoo ó táa cáan yé,
só ndɛ́ séla yé,
bháabhaa tɛ́ séla yé.
34 Kɛ mansɔɔ i yɛ́ nanfoo ó ywáa mínnɔn,
i yóso óo o ywáa ó lé lɔ.»
A lɔ́bhyɛnin ŋán tó wáati o bɛ́
35 «Áa i lɔ́bhyɛ,
kɛ í cɛ́sii,
a yɛ́ laman ŋó lamaannin ŋan kɛ́.
36 Aa mánkɔɔnnin kɛ́ óyoo bháalakɛdhye nu,
mín núu i kunndii ó kwɔ́sɛɛ ó mánkɔɔnnan kɛ́ bhɔ́ kwɛ́ɛnyako ywáa o lɔ.
Ní a kɛ́ i kwɔ́sɛɛ wáati óo wáati lɔ kɛ lá ó mángbasi,
ké ii lá ó láka a yɛ́.
37 Ní bháalakɛdhye mínnu kunndii kɛ́nan i sɔ́ɔ a mánkɔɔnnan nisɔdhyaanin lé.
Tinɲan in ne ní fɔ́la a yɛ ngó,
a kunndii ó gbú yáa i cɛ́sii kɛ́ o bháalakɛdhye ŋo yɛ́ lɔ́min o dí a mán.
38 Ní a kunndii o kɛ́ i kwɔ́sɛɛ sú ó cɛ́man,
wáman lónan ngásiwaati ó lɔ kɛ́nan bháalakɛdhye ŋólu sɔɔ a mankɔɔnnan,
o bháalakɛdhye ŋólu yáa i nisɔdhyaa.
39 Aa lɔ kó ní bhóndii ó tɛ́ɛkɛ so ŋó nánwaati ó lɔnan,
a tɛ táa tó yé ké so ŋó á ló a yɛ bhóo ŋó la.
40 Álee lɔ́bhyɛnin ŋán kɛ́,
kɛ mansɔɔ a tɛ́ i milila wáati mín mán,
mɔɔn Dhyénjɛ ó káa nan ó wáati ó lé lɔ.»
Bháalakɛdhyemɛɛ ó yɛ́ɛtii le
41 O wáati ó lɔ,
Piyɛli é Ɛnza mánɲaankɛ kó:
«Mantii ó,
íi saanan míin lála án nee kaamɔɔndhye ŋó lée lú mán bháa,
wáman mɔɔn bɛ́?»
42 Mantii ó a yawi kó:
«Bháalakɛdhye ndéenin hákiiman mínnɛɛn o le,
ní a kunndii o wɛ́ɛ lá a lá kɛ a lásii a yɛ bháalakɛdhye ŋó tɔ ólu kunnan ké aa i yɛ sunman ó dí i mán a di wáati lɔ?
43 Nisɔdhyaa yáa kɛ́ o bháalakɛdhye ŋó yɛ ní a kunndii o kɛ́nan a sɔɔ o bháala o kɛ́la.
44 Tó ní fɔ a yɛ tinɲan in né ngó kunndii ó yáa o bháalakɛdhye ŋó lásii a bhóofe ŋó bɛ́ kunnan.
45 Wáa ní ó bháalakɛdhye ŋó kɛ́ i mili kó:
Ngunndii ó táa i kwɔ́sɛɛ jónan,
tó kɛ kɛ́ a bháalakɛdhyeɲɔɔn cɛ́man ŋólu ní musoman ŋólu gbasi le,
kɛ tó kɛ lɔ́minkɛ,
óni kɛ́ gbɛ min kɛ i ɲan ó lamiin,
46 o bháalakɛdhye ŋó tɛ́ i milila ló mín mán,
óni wáati mín man,
a kunndii ó káa nan o ló ŋó lé la.
A yáa o bháalakɛdhye ŋó bhɔ́ yé kɛ a tɔ́lɔ mɔɔn téemɛɛ ólu sí le.
47 Bháalakɛdhye mín ŋán a kunndii ó sao o lɔ́,
ní a mán í lɔ́ja kɛ o kɛ́,
a kunndii o yáa a gbasi koyoongɛ.
48 Wáa bháalakɛdhye mín mán a kunndii ó sao o lɔ́,
ní a kɛ kó kolo nɔ kɛ mín ŋé a gbasili kun ne,
o bháalakɛdhye ŋó kunndii o yáa a gbasi dɔ́ɔnin.
Kɛ mansɔɔ,
shɛ́ɛman ŋwɛ́ɛn kɛ́ɛfa mɔɔn mín mán,
shɛ́ɛman ɲáan ɲíin o tíi ó fɛ́.
Shɛ́ɛman ŋwɛ́ɛn kɛ́ɛfa mín mán,
shɛ́ɛman ɲáan i mánɲaankɛ o tíi ó lá.»
Mɔɔn ólu yáa í wíi ɲɔ́ɔn nganman
49 «Née nan tá le kɛ lúukolo o ka.
Ndɛ́ɛ fɛ ké o tá o lámaannin ndɛ́ɛ kɛ.
50 Wáa tɔ́lɔyaba míin mankɔɔnnan,
ngɔ́lɔtɔnin ɲé kɛ tínmin ó bátizeli ó lɔ.
51 Aa álee kɔ́ɔnnɔn kó né nánin ɲé ni hɛ́lɛ le lé lúukolo ó ka ŋán?
Ɔn-ɔn!
Ní fɔ́la a yɛ ngó,
née nan le kɛ bhyɛmɛɛya le ló mɔɔn ólu cɛ.
52 Óo lɔ́ mínngɛ,
kɛ tá kwáa le nin man,
ní mɔɔn lóo kɛ kɛ́ bhó mín ngɔ́ɔnnɔn,
ólu yáa í lɔ́taa.
Mɔɔn sawa yáa í wíi mɔɔn fyáa o kanman.
Mɔɔn fyáa yáa í wíi mɔɔn sawa ó kanman.
53 Fá ó yáa í wíi a dhyénjɛ o kanman,
dhyénjɛ o yáa í wíi a fá o kanman.
Wóobhaa o yáa í wíi a dhyémuso o kanman,
dhyémuso o yáa í wíi a wóobhaa o kanman.
Manmuso o yáa í wíi a maanmuso o kanman,
maanmuso o yáa í wíi a manmuso o kanman.»
Kɛ tɔɔmansii ólu kɔ́ɔ o lɔ́
54 Ɛnza ŋé fɔ yaman o yɛ íkwɔ kó:
«Ní a kɛ́ sánvin ŋó wiitɔ o yé kɔ́ɔ ŋó lɔ,
áa a fɔ́la ko sá né káa nan.
Tó aa kɛ cé.
55 Ní fwɛ́ɛn o kɛ bhyáa kɛ bhɔ́ kíinmoo fán ŋó fɛ,
áa fɔ́la kó táa ó yáa gbaan.
Tó aa kɛ cé.
56 Álee fyáangafo ólu!
Áa sé kɛ lúukolo óni sángboo o mánfɛɛ kɛ bhɔ́ wáati o ɲánle.
Mínnɛɛn le kósɔn ko mínnuu kɛ́la a cɛ́man wáati míin nɔn,
a tɛ́ bhɔ́la ólu ɲánle?»
Bhyɛ ŋó ɲíin ní i kɛ́ɛkɛɲɔɔn o le
57 «Mínnɛɛn le kósɔn kó mínnu téenin ɲé,
a tɛ́ o yace myáanla a yɛ́ɛ fɛ kɛ o kɛ?
58 Ní kó kɛ kɛ́ íle ní mɔɔn lɔ cɛ́,
ni o tíi o fɛ kɛ táa ní íle faanman nzó,
i lɔ́ja kɛ íle ní ale cɛ́ o bhyɛ ké a mán sé faanman ŋólu fɛ́ yénɔn bhá,
ké a kɛ́nan táa í ló faanman ŋólu bhóo,
ké ólu kɛ́nan i ló swáasi ólu bhóo,
ké swáasi ólu kɛ́nan í bhyaa kaso o lá.
59 Ní fɔ́la i yɛ ngó i táa bhɔ́ kaso o la ní i mán i yɛ yúu o bɛ́ sala.»