Maki 13

Ɛnza ŋé Ala bhatobhomba ó céko ó fɔ́la

Matiyu 24.1-2; Luka 21.5-6

Ɛnza ndɛ́ɛ bhɔ́la Ala bhatobhomba ó lá mínngɛ,

a yɛ kaamɔɔndhye ŋo kée ŋé fɔ a yɛ kó:

«Kaamɔɔn,

a mánfɛɛ!

Káwa míin nú ló njáaɲiin,

Ala bhatobhomba míin ŋé lɔ́ í sɛ́wɛla lɛ.»

Maki 13.1-27

2 Ɛnza ŋé fɔ a yɛ kó:

«Í ɲán é bhómba mínnu lá a?

Káwa ó sí táa tó a siilaa lɔ́ ya.

Bhó ŋó yáa wéyaa pépe.»

Tɔ́lɔya ólu lámyaan ó

Matiyu 24.3-14; Luka 21.7-19

3 Ɛnza ŋé táa í síi Olivyetii ó ka mínngɛ,

kɛ í ɲán bhyɛ Ala bhatobhomba ó mán.

Piyɛli,

Zaki,

Yaya óni Andele mínnu tɛ́ɛ a tɔ́ɔfɛ,

olu a mánɲaankɛ í kéenan kó:

4 «Íi kó mín nvɔ sɛ́n ŋwé,

o káa kɛ́ wáati mínnɛɛn lé lɔ?

Dínɲan ó lábhanzan o tɔɔmansii o káa kɛ́ mínnɛɛn ní mínnɛɛn lu le?»

5 Ɛnza ŋé fɔ í yɛ kó:

«Áa í yáakii tó a yɛ́ɛ lɔ ké mɔɔn lɔ́ kɛ́nan a láfii.

6 Mɔɔn shɛ́ɛman ɲáan nan nín ndɔ́ɔ óle,

kɛ́ fɔ kó:

‹Né lée kísibhaa o le!›

I yáa mɔɔn shɛ́ɛman náfii o bhóo ó mán.

7 A kɛ́ kɛ́ɛkɛkan nu myɛ́n,

óni kɛɛko lu mánngan myɛ́n wáati mínnɔn;

O sí kɛ́nan a mánshaan.

Fɔ́ olu a kɛ́ lé,

wáa o táa kɛ́ dínɲan labha ŋo sénin ne.

8 Síya lɔ yáa í wíi síya gbɛ́ɛlu kanman,

yamaanlɔ yáa í wíi yamaan gbɛ́ɛlu kanman.

Lúukolo ó yáa yáayaa ywáa shɛ́ɛman nɔn.

Óni kɔ́ɔn lú yáa kɛ́ ywáa shɛ́ɛman nɔn.

O lé káa kɛ́ tɔ́lɔya ó lámyaan o le,

óyoo muso tínndɔ óo tɔ́lɔya myáanla tɛ́nmɛn.»

9 «Ále kákan né kɛ a yáakii tó a yɛ́ɛ lɔ,

kɛ mansɔɔ mɔɔn ólu yáa á ló kítitɛɛbhaa ólu bhóo.

I yáa a gbási sɛ́ɛbho ŋolu kɔ́ɔnnɔn.

I yáa táa á lé yámaantii ólu ní mansa ólu kɛ́ɛnnan né kósɔn.

O yáa kɛ́ tɔɔmansii lé í yɛ.

10 Fɔ́ sanmankanmɛɛ ó lé a í láse síya ó bɛ́ man ótun.

11 I kɛ a myáan sán mínnɔn kɛ táa á lé yamaan o kítitɛɛlaa ólu lɔ,

a káa mín nvɔ a kɛ́nan hánmin o la.

Kóman mín ngɛ bhyáa a kɔ́ɔnnɔn o wáati o lɔ,

áa o fɔ,

kɛ mansɔɔ a káa dhyáa mínnu fɔ,

olu táa kɛ́ Ále gbúlu fɔ́dhyaa ne.

A Fá Ní sɛnnɛnyanin ŋo lé káa o kóman ólu ló a lálɔ.

12 Bhádhyeman ŋólu yáa kɛ́ ɲɔ́ɔnɲɛn saya ó sɔ́ɔbu le.

Fa ólu yáa o sí kɛ́ i dhyé ŋólu la.

Dhyé ŋólu yáa í ɲányɛɛman í fa ólu mán kɛ i fáa.

13 Bɛ́ yáa a mánbhɔ né tɔ́ɔ ó kósɔn.

Wáa mɔɔn mín ngɛ í lɔ́ja kɛ táa sé a lá ŋó mán,

o yáa kísi.»

Tɔ́lɔyaba mín ngáa mɔɔn ólu sɔ́ɔ

Matiyu 24.15-28; Luka 21.20-24

14 «A kɛ́ fé nzúu yóo hálamutɔ ó síinin ɲé ywáa lɔ́lɔ,

mín ndɛ́ a síilaa le,

mɔɔn óo mɔɔn kɛ́ kɛ́ Zude mala ó lɔ,

áa bwée kɛ táa a lóonaan bhɔ́ tii ólu mán.

15 Mɔɔn mín ngɛ kɛ́ a yɛ bhó ŋó kúnnɔn,

o tíi o kɛ́nan í yíi bhó ngɔ́ɔnnɔn kɛ a bhóofe ŋolu tá.

16 Mɔɔn mín lo ngɛ́ kɛ́ sɛ́ɛn mán,

o tíi o kɛ́nan í kwɔ́sɛɛ lúman táamanlataafaani tá tɔ́ɔ lɔ.

17 Bɔɔn yáa kɛ́ muso kɔ́ɔnman ŋólu ní dhyémbatii olu ta lé o lo ŋó la.

18 Áa Ala dɛ́li ké o kó ólu kɛ́nan bhyɛ nɛ́nnɛnbawaati o man.

19 Kɛ mansɔɔ ó lo ŋolu yáa kɛ tɔ́lɔya lomba lu le,

kɛ mansɔɔ kɛ myáan dínɲan lámyaan ó mán Ala bhóo kɛ́nan sii bí la,

o tɔ́lɔya ó yáa bwóɲan,

a si tɛ́man kɛ́ bhá.

A lo nzí táa kɛ́ bhée.

20 Ní Mantii ó tɛ́man o wáati o kánnansunɲan,

mɔɔn sí tɛ́ táa bwási.

Wáa aa o kánnansunɲan a yɛ mɔɔn lɔ́tɔnmɔnnin ŋó léelu kósɔn.»

21 «Ní mɔɔn lɔ́ kɛ́ fɔ a yɛ́ o sán olu lɔ kó:

‹Kílisi óo ya!›,

wáman kó ‹aa yéenɔn!›

A kɛ́nan lá o tíi o la.

22 Kílisi kóo ngóo ni céla kóo ngóo nzhɛ́ɛman ɲáan í wíi;

I yáa tɔɔmansii ní káwananngo lú kɛ́ mɔɔn lafii tɔ́ɔ lɔ;

Háanin Ala yɛ mɔɔn lɔ́tɔnmɔnnin ŋólu,

i yáa olu láfii ɲán ɲíin.

23 Áa a yɛ́ɛ myaan,

kɛ mansɔɔ ŋwɛ́ɛn a tóo lasowi o bɛ́ la.»

Mɔɔn Dhyénjɛ ó nánko o

Matiyu 24.29-31; Luka 21.25-28

24 «Wáa ni o tɔ́lɔya wáati ólu kɛ́ bhɔ́ í lá tɛ́nmɛn,

tee ó yáa í mánfin.

Káa ó ló ndáa gbɛ́ bhée.

25 Lóodhye ŋólu yáa bhɔ́ sáman kɛ bé,

óni sébhaaya mín núu sá ŋó lɔ olu yáa maanmaan.

26 O lɔ,

án ɲáan mɔɔn Dhyénjɛ o nántɔ ó yé káwa ólu ka ni sébhaayaba óni nɔ́lɔyaba óle.

27 A yáa malɛɛka ólu bhyáashaa dínɲan nɔ́ɔn náannin ó bɛ́ la,

kɛ a yɛ mɔɔn lɔ́tɔnmɔnnin ŋólu ládhyɛ,

kɛ a lámyaan dínɲan kún mín ŋé nín,

fɔ́ kɛ táa sé sángboo o la ŋo la.»

Kɔ́ɔlamandhyaa mín ŋé fígisun ŋo ka

Matiyu 24.32-35; Luka 21.29-33

28 «Áa a yɛ́ɛ sɔ́ hákii lá,

saanan míin lá fígisun ŋo tá lákɔɔsi ó fɛ́.

Ní a kɛ́ yé kó a bhóokaa óo táa í mánnuun ne,

ké aa táa í búu bhɔ́ le áa lá a lá óyoo sanmanyi o wɛ́ɛ gbaa.

Maki 13.28-37

29 O ɲán kée ŋó mán a kɛ́ kɛ́ o kó ólu yéla wáati mínnɔn,

aa lɔ ŋóo mɔɔn Dhyénjɛ ó nán wáati o wɛ́ɛ gbaa.

Óo aa sháala.

30 Tó ní fɔ a yɛ́ tinɲan in ne ngó,

án ɲɛ́n wáati míin mɔɔn ó bɛ́ táa sayakɛ,

ké kó míinnu bɛ́ mán kɛ́ bhá.

31 Sángboo óni lúukolo ó yáa tínmin,

wáa ɲɛ́n kóman ólu táa tínmin tún.»

Ala kéembe lé a dínɲan lábha ŋo lɔ

Matiyu 24.36-44

32 «O ko ólu káa kɛ́ ló mínnan,

wáman wáati kée mínnɔn,

mɔɔn óo mɔɔn mán o lɔ,

malɛɛka olu mán lɔ,

háanin Dhyénjɛ ó mán lɔ.

Ala mín ŋé Fá óle,

o kéembe lé a lɔ.

33 Áa a yɛ́ɛ myaan,

áa tó í ɲánla,

kɛ mansɔɔ a mán wáati o sé sán o lɔ.

34 Áa le óyoo cɛ lɔ́ táatɔ lé táamanla,

áa a yɛ bhó ŋó kɛ́ɛfa a yɛ bháalakɛdhye ŋolu mán,

tó kɛ i bɛ́ tá bháala dí i man,

kɛ fɔ bhó ngunnansiibhaa ó yɛ kó aa tó í ɲánla.

35 Oo lɔ mínngɛ,

áa tó í ɲánla,

kɛ mansɔɔ a mán bhóndii o nánlo ŋó lɔ,

a káa nan ywáa lá lé bháa,

sú cɛ́man bháa,

lónan njonan ó kómansan o lɔ bháa wáman sɔɔ mán bháa.

36 Ní a kɛ́nan í kɔ́lɔ tee mín man,

a kɛ́nan nán a sɔ́ɔ súnnɔɔn lɔ.

37 Ní mín nvɔla a yɛ́ nín,

ní o lé fɔ́la bɛ́ yɛ:

Aa tó í ɲánla!»