Kúnndii ólu dún nɔ́siila Ɛnza man
14
Tee fyáa lé tɛ́wɛɛ tó Yawudhyaa ólu yɛ́ Hɔ́lɔɲanli o ɲánlagbɛ lo ŋo,
óni Búlufuunmɛɛ ó ɲánlagbɛ lo ŋo ɲánman.
Faanlɛɛɲansebhaa olu kúnndii ólu ní sɛliya kaamɔɔn olu tɛ́ɛ ɲánɲiinnan Ɛnza myaanko o mán loo nɔn ké i tɛɛ a fáa.
Maki 14.1-16
2 I tɛ́ɛ fɔ́la o bhóo ó mán kó:
«Án ndɛ́ sé a myáanla ɲánlagbɛ lo míin mán ní o tɛ,
yaman ó yáa ɲáanmin.»
Muso lɔ́ é latikɔlɔ kɛ́la Ɛnza ngúnnɔn
3 Ɛnza ndɛ́ɛ Betani só ó kɔ́ɔnnɔn,
Simɔn kwáantɔ yɛ́ bhó ŋó la.
A tɛɛ lɔ́min kɛ́ tabɛli o ka wáati mínnɔn,
muso lɔ́ é lo ni bháanin ngúugbɛɛ nɔ le min nálaanin ndɛ́ɛ káwa kúugbɛɛ nan.
A fanin ndɛ́ɛ latikɔlɔ sɔɔn gbɛ́ɛ ne la.
Aa káwa ó cé tó kɛ latikɔlɔ ó bwɔ́ Ɛnza ngúnnɔn.
4 Mɔɔn mínnu tɛ́ɛ yénɔn,
o lɔ́lu díminsa.
I tɛ́ɛ ɲɔɔn ɲáankɛla kó:
«Aa latikɔlɔ kúugbɛɛ nzúu míin lɔ́nɔɔnla mínnɛɛn lé kósɔn nín?
5 Mɔɔn tɛ́ɛ sé ale latikɔlɔ ó felela wɛ́ɛgbannan ngɛnmɛn sáwa la tó kɛ o wɛ́ɛ o dí bhóokoo ŋólu mán.»
I tɛɛ lákɔɔkoman lu kɛ́la muso ó mán.
6 Wáa Ɛnza ŋé fɔ kó:
«Áa muso ó tó a súu la!
Áa a kánnankwaanyala mínnɛɛn lé la?
A wɛɛ kóbhɛɛ lé kɛ́ ɲɛ́n nín.
7 Kɛ mansɔɔ Ále ní bhóokoo ŋólu yáa kɛ́ kéene yánun wáati o bɛ́ lɔ.
Kóbhɛɛ kɛ́ kɛ́ dhyáa a yɛ́ i yɛ sán mínnɔn,
a yáa o kɛ́ i yɛ.
Wáa né ní Ále táa kɛ́ kéene yánun wáati o bɛ́ lɔ.
8 Mín nze é kɛ́ a yɛ,
a wɛɛ o kɛ.
A wɛɛ múun latikɔlɔ la,
kɛ nvásisoo ó lɔ́bhyɛ kábulu o yɛ.
9 Tó ní fɔ a yɛ́ tinɲan in né ngó,
sanmankanmɛɛ ó káa í láse dínɲan ywáa óo ywáa lɔ,
muso ó kɛ́ko míin ɲáan fɔ́ o ywáa ó bɛ́ lɔ tó a ko é bhyáa mɔɔn olu yáakii la.»
Zudasi é Ɛnza yanvala
10 Ɛnza ɲɛn kaamɔɔndhye ndá ni fyáa ó kée mín ndɔ́ɔ tɛ́ɛ kó Zudasi Sikaliyɔti oo táa faanlɛɛɲansebhaa olu kúnndii ólu fɛ́ yé,
ké á Ɛnza no i bhóo.
11 Ii o kóman ó myɛ́n mínngɛ,
oo dhyáa i yɛ,
ii láheli ta a yɛ kó i káa wɛ́ɛ dí a man.
Zudasi tɛɛ ɲánɲiinnan Ɛnza no bhóo lɔ́ ó man.
Ɛnza ni a yɛ kaamɔɔndhye ŋolu Hɔ́lɔɲanli o ɲánlagbɛ sunman ŋo lɔ́ɔnan
12 Búlufuunmɛɛ ó ɲánlagbɛa o tée jónan ó,
mɔɔn ólu tɛ́ɛ saayii ó kɛ́la faanlɛɛ lé tee mín man,
Ɛnza ɲɛn kaamɔɔndhye ŋolu a mánɲaankɛ kó:
«Íi fɛ́ ké án ndáa Hɔ́lɔɲanli o ɲánlagbɛ ó gbá ó kɛ́ ywáa mínnɛɛn lé lɔ?»
13 Aa a yɛ kaamɔɔndhye ŋo fyáa bhyáashaa kɛ fɔ i yɛ kó:
«Áa táa só ó kɔ́ɔnnɔn,
a yáa bhyɛ cɛ lɔ́ le ké jílaa fanin jí lá é a kúun mán.
Áa í bhyáa a kwɔka.
14 Ní a kɛ táa lo bhó mínnan,
áa fɔ o lútii ó yɛ́ kó:
‹Kaamɔɔn ó kó a yɛ́tiiyabho ŋoo mín?
Ale ní a yɛ kaamɔɔndhye ŋolu káa Hɔ́lɔɲanli o lɔ́min ó kɛ́ bhó mínnan.›
15 A káa bhóngɔɔnnɔnba lɔ́ lé yáa a lá,
sangaso ó lá sa mán wé.
Fé ŋó bɛ́ é a kɔɔnnɔn.
A káa gbá ó kɛ́ án ɲɛn yénɔn le.»
16 Kaamɔɔndhye ŋolu bhɔ́ kɛ táa só ó kɔ́ɔnnɔn kɛ táa kó ó bɛ́ sɔɔ óyoo aa fɔ i yɛ ɲán mín man.
Ii Hɔ́lɔɲanli o ɲánlagbɛ ó gbá ó kɛ.
17 Ywáa óo sé mínngɛ,
Ɛnza ni a yɛ kaamɔɔndhye ndá ni fyáa ólu nan lo.
Maki 14.17-31
18 Í tɛ́ɛ lɔ́min kɛ́ ó lá wáati mínnɔn,
Ɛnza ŋé fɔ kó:
«Tó ní fɔ a yɛ́ tinɲan in né ngó,
Ále mín núu lɔ́min kɛla ni né nín,
a kée ngéenan yáa ɲánva.»
19 Kaamɔɔndhye ŋolu bɛ́ í ɲánlasii o kóman ó kósɔn,
i bɛ́ɛ a mánɲaankɛ kée ngée ndá kó:
«Né kó tɛ lɛ,
bháa díi?»
20 Ɛnza ŋé i yawi kó:
«A mɔɔn tá ni fyáa ó lé kée ngáa kɛ.
Né ní mɔɔn mín ngáa í bhóo ló sunmannve ŋó lɔ́ kéene,
o tíi ó lé káa ɲánva.
21 Mɔɔn Dhyénjɛ ó yáa sayakɛ óyoo a sɛwɛnin ŋé a ta fa nvɛ́ tɛ́nmɛn.
Wáa mɔɔn mín ngwɛɛn ngáa mɔɔn Dhyénjɛ ó yánva wé,
kunnangboya é o tíi ó yɛ!
Yáanin o tíi o wóobhaa yɛ́ɛ tɛ́ mán a bhyáa fwɛ́ɛn ka,
o tɛ́ɛ físaa a mán!»
Dhyáaɲɔɔnya súnman ŋo
22 I tɛɛ lɔ́min o kɛ́la mínngɛ,
Ɛnza ŋé búlu ó tá,
kɛ Ala bálika bhɔ́,
kɛ a lɔ́tɛɛtɛɛ,
kɛ a di í mán,
tó kɛ fɔ i yɛ kó:
«Áa a tá,
nvásisoo ó lée wé.»
23 O kwɔ,
aa wɛɛ kɛ lɛ́zɛnnjifyɛ lɔ tá tó kɛ Ala bálika bhɔ́ kɛ o lɛ́zɛnnji o di í man.
I bɛ́ é o lɔ́ mín.
24 Aa fɔ i yɛ ó lé lɔ kó:
«Ɲee ó lée wé,
Ala yɛ dhyáaɲɔɔnya ó láheli o tɔɔmansii ó.
Mín ŋé bwɔ́ mɔɔn shɛ́ɛman ngósɔn.»
25 O kwɔ,
aa fɔ i yɛ kó:
«Tó ní fɔ a yɛ́ tinɲan in né ngó,
ndáa lɛ́zɛnnji min bhée fɔ́ ngɛ́ kɛ́ lɛ́zɛnnji kwáa minnan Ala yɛ́ Mansaya ó lɔ.»
Ɛnza ŋé fɔ́la kó Piyɛli yáa fɔ ale mán kó a mán a lɔ
26 Ii wɛɛ Ala tándo lɔ́ ŋolu lá lá mínngɛ,
ii bhɔ́ kɛ táa Olivyetii ó mánshaa fɛ́.
27 Ɛnza ŋé fɔ a yɛ kaamɔɔndhye ŋolu yɛ kó:
«A bɛ́ yáa í kwɔ́kɛ nán,
kɛ mansɔɔ a sɛwɛnin ŋé kó:
Ɲáan saamangbɛngbɛmaa o fáa,
tó saa ólu ɲɛ́nɲɛn.
28 Wáa ngɛ́ kúun kɛ bhɔ́ sú ólu cɛ́man,
ɲáan bhyáa a ɲɛ́n sɔ́ kɛ táa Galile lánga ŋo lɔ.»
29 Piyɛli é fɔ a yɛ́ kó:
«Yáanin mɔɔn tɔ́ ólu kɛ́ í kwɔ́kɛ í la,
né táa ngwɔ́kɛ í lá.»
30 Ɛnza ŋé a yawi kó:
«Tó ní fɔ í yɛ́ tinɲan in né ngó,
bí sú míin ɲɛ́ɛ lɔ,
sánnin lónan ŋó a kóman ko fyáa kɛ́,
íle yáa fɔ síɲan sawa kó í mán nɔ́.»
31 Wáa Piyɛli é í lámangbɛya kó:
«Yáanin ngɛ́ saya kɛ́ í fɛ́,
wáa ndáa fɔ ngó mán í lɔ́ fɛ́sɛfɛsɛ.»
Kaamɔɔndhye ŋo tɔ́ ólu bɛ́ tɛɛ fɔ́la o ɲán kée ŋó lé mán.
Ɛnza ŋé í sɛ́ɛla Zesemane
32 Ii sé ywáa lɔ́lɔ,
o tɔ́ɔ kó Zesemane.
Ɛnza ŋé fɔ a yɛ kaamɔɔndhye ŋolu yɛ kó:
«Áa í síi ya,
ngɛ́ɛ tɛ́ɛ nzɛ́ɛ.»
Maki 14.32-52
33 Aa Piyɛli,
Zaki ní Yaya lú tá kɛ i bhyáa a fó nan.
Ɛnza ndɛ́wɛɛ bhyá sháan ne,
óni kɛ a ní ó tɔ́lɔ.
34 Aa fɔ i yɛ kó:
«Né ní o wɛ́ɛ tɔ́lɔ koyoongɛ fɔ́ kɛ kɛ́ óo ngáa sayakɛ a bhóo.
Áa tó yánun;
áa tó í ɲánla.
35 Ɛnza ŋé í lɔ́nin manbhɔ tó kɛ í cé ngbáan lúu lɔ kɛ Ala dɛ́li ni fɔ le kó:
Ní aa sé o tɔ́lɔya wáati ó látinminnan a ka.»
36 A tɛ́ɛ fɔ́la kó:
«Nvá ó,
kó ó bɛ́ se é íle lé yɛ,
tɔ́lɔyaba míin cɛ́bhɔ nán.
Óni o ta ó bɛ́,
í kɛ́nan a kɛ né sao óle,
wáa í lé sao ó.»
37 Oo wɛɛ mínngɛ,
aa í kwɔ́sɛɛ a yɛ kaamɔɔndhye nzawa ó mán.
Aa nan i sɔɔ súnnɔɔn lɔ.
Aa fɔ Piyɛli yɛ kó:
«Simɔn,
íi súnnɔɔn le lɔ a!
Yáanin í yɛ́ɛ mán sé lɛ́ɛlɛ kée ngɛla í ɲánla a!
38 Áa tó í ɲánla,
kɛ Ala dɛ́li ké á kɛ́nan lo lɔ́swaannin ó lɔ.
Kóbhɛɛ kɛ́ yóso é Adamandhye ŋó kɔ́ɔnnɔn,
wáa sé tɛ́ a yɛ.»
39 Aa í cɛ́bhɔ i la ko kwáa kɛ,
kɛ táa Ala dɛ́li ni dhyáa ngée ŋolu le.
40 Aa í kwɔ́sɛɛ kaamɔɔndhye ŋolu mán íkwɔtun,
kɛ́nan i sɔɔ súnnɔɔn lɔ.
Kɛ mansɔɔ i bɛ́ ɲánfaa tɛ́wɛɛ gbíiya gbíiya i la.
I tɛman lɔ ŋóyoo i káa kan mín nvɔ Ɛnza ɲɛn.
41 Aa í kwɔ́sɛɛ síɲan sawaɲɔn o kɛ́ mínngɛ,
aa fɔ i yɛ kó:
«Áa súnnɔɔn le lɔ́ bhée kɛ a lɔ́nwɛɛn a?
A wɛɛ kɛ́!
Mɔɔn Dhyénjɛ ó,
o káa ló yuumukɛbhaa olu bhóo wáati mínnɔn,
o wɛ́ɛ sé.
42 Áa í wíi ké án ndáa!
Ɲánvabhaa o lée nánla nín.»
Ɛnza myaanko o
43 O ywáa nín ngée ŋó lɔ,
kɛ́ Ɛnza ndó kóman o la,
a yɛ kaamɔɔndhye ndá ni fyáa ó kée mín ndɔ́ɔ kó Zudasi,
oo í kunnanbhɔ ni yaman lé a kwɔ́ka.
Fá ni gbéle lú tɛ́ɛ yaman o bhóo.
Faanlɛɛɲansebhaa olu kúnndii ólu ní sɛliya kaamɔɔn ólu ní Yawudhyaa cɛba ó léelu tɛ́wɛɛ o mɔɔn ólu bhyáashaa.
44 Ɛnza ɲanvabhaa o tɛ́ káa a tɔɔmansii ɲán mín man,
a tɛ wɛɛ o ɲányaa yamandhye ŋó lá tá kó:
«Ngaa nvínin cɛ mín man wé,
ale lée wé.
Áa ale lé myáan!
Áa í yáakii tó a lɔ cɛ́ɛne ne.»
45 Aa lo ndɛ́nmɛn,
Aa í mánlo Ɛnza nán téeman kɛ fɔ a yɛ kó:
«Ní í fola,
kaamɔɔn ó!»
Aa o fɔ tó kɛ kɛ́ í fínin a man.
46 Oo kɛ́ mínngɛ,
mɔɔn ólu Ɛnza myaan kɛ táa ale.
47 Ɛnza fongamaa o kée ŋé a ta fá ŋó bhɔ́ a foo ŋo lɔ kɛ a láyii faanlɛɛɲansebhaa olu kúnndiiba ó yɛ́ bháalakɛdhye ŋo ka kɛ o tóofaa ó tɛɛ man téeman.
48 Ɛnza ŋé fɔ i yɛ kó:
«Áa nánla ni fá nu ní gbéle lú lé né lé myáan tɔ́ɔ lɔ óyoo kóyoongɛbhaa lɔ a?
49 Ló ŋó bɛ́,
ndɛ́ɛ mɔɔn ólu kalanan a cɛ́man Ala bhatobhomba ó kɔ́ɔnnɔn,
a mán myáan.
Wáa sɛ́wɛli o wɛ́ɛ mín nvɔ,
fɔ́ o a kɛ́ le.»
50 Oo kɛ́ mínngɛ,
a yɛ kaamɔɔndhye ŋolu bɛ́ɛ bwée kɛ í kwɔ́ kɛ́ a lá.
51 Káweenin ngée nɔ é í bhyáa Ɛnza ngwɔ.
Bíifaanin kée ngbóto lé tɛ́ɛ o mán.
Íi o myáan.
52 Wáa oo bwée ni a gbóomankoo ŋó le kɛ bíifaanin o tó yénɔn.
Ii táala Ɛnza né kíti tɛ́ɛlaa o lɔ
53 Mɔɔn ólu táa Ɛnza né faanlɛɛɲansebhaa olu kúnndiiba ó fɛ́ yénɔn.
Faanlɛɛɲansebhaa olu kúnndii olu,
óni cɛba ólu,
óni sɛliya kaamɔɔn ólu bɛ́ɛ ɲɔ́ɔn nadhyɛ yénɔn.
Maki 14.53-72
54 Piyɛli tɛ́ɛ wɛɛ Ɛnza nzúukutaaman kɛ,
fɔ́ kɛ táa lo faanlɛɛɲansebhaa olu kúnndiiba ó yɛ lúkɔɔn o man.
Yénɔn,
aa í síi ni swáasi ólu lé tá o fɛ́ kɛ í bhóo lája.
55 Faanlɛɛɲansebhaa olu kúnndii ólu ní Yawudhyaa olu yɛ́ kítitɛɛmɔɔnba ó bɛ́ tɛ́ɛ fwɔnɲankan nɔn ɲíinan sɛ́ɛya bhóoman ké i tɛɛ o bɛ́ɛ Ɛnza nan,
kó óo kó é kɛ o tɛ́ɛ kɛ́ a faakun né i bhóo,
Wáa i man kan nzɔ́ɔ,
mín ndɛ́ɛ sé kɛ́la Ɛnza nvaakun ne.
56 Sɛ́ɛyaladibhaa shɛ́ɛman ndɛ́ɛ fwɔnɲan le lála a lá,
wáa i kan ŋo tɛ́ tɛ́ kéene.
57 Mɔɔn dáman ŋé í wíi tó kɛ fwɔnɲan lɔ lá Ɛnza nan kó:
58 «Án ní myɛ́n kó a tɛɛ fɔ́la kó mɔɔn ólu wɛ́ɛ Ala bhatobhomba mín nɔ í bhóola,
kó ale káa ó cé kɛ a lɔgbɛɛ lɔ́ tee sáwa kɔ́ɔnnɔn ké mɔɔn bhóo tɛ́ a lɔ.»
59 Yáanin o ywáa ó mán mɔɔn ólu tɛ́ɛ ɲɔɔn mansɔsɔla lé.
60 Faanlɛɛɲansebhaa olu kúnndiiba óo í wíi o lé lɔ́ yaman o cɛ́man tó kɛ Ɛnza mánɲaankɛ kó:
«Kóman súu súu tɛ́ í fɛ́ kɛ mɔɔn míinnu yawi a?»
61 Ɛnza ŋé lumandhye myán a yɛ́ɛ ka,
a mán a yawi.
Faanlɛɛɲansebhaa olu kúnndiiba óo a mánɲaankɛ íkwɔtun kó:
«Íle lée Kílisi o le a,
án ní Ala mín bhátola o dhyénjɛ a?»
62 Ɛnza ŋé a yawi kó:
«Ɔɔn,
óo né lé le.
A yáa mɔɔn Dhyénjɛ ó síinin ɲé sétii ó bhóobhɛɛkɔɔ.
A ló ɲáan o yáa a yé nánla sángawa ólu cɛ́man.»
63 Faanlɛɛɲansebhaa olu kúnndiiba óo a yɛ́ɛla kannanfaanin o fála mwɛ́nnɛn o mán tó kɛ fɔ kó:
«Án manko é sɛ́ɛya mínnɛɛn le lá bhée!
64 A wɛɛ Ala lɔ́ɔya,
a wɛ́ɛ o myɛ́n nɛ́.
Ále kó án ni mínnɛɛn lé kɛ́ a lá o lɔ?»
I bɛ́ kó o lé lɔ kó a sɔ née a lɔ,
áa á fáa.
65 Oo kɛ́ mínngɛ,
lɔ́lu í láji bwɔ́ Ɛnza nga.
Kɛ fé nzíli a ɲánla,
kɛ táa a gbú gbú le,
tó kɛ fɔ a yɛ ko aa célayakɛ,
kɛ a mánɲaankɛ kó:
«Mɔɔn mín íi gbási o tíi ó tɔ́ɔ fɔ.»
Swáasi olu Ɛnza myaan tó kɛ a tóo cé cé.
Piyɛli kó ale mán Ɛnza nɔ
66 Piyɛli tɛ́ɛ lúkɔɔn ó lúulafa ŋo fɛ́,
faanlɛɛɲansebhaa olu kúnndiiba ó yɛ́ bháalakɛdhye musoman ŋó kée ŋé nan.
67 Oo Piyɛli yé í bhóo lájala tá ó fɛ́.
Aa a mánfɛɛ cɛ́ɛne tó kɛ fɔ a yɛ kó:
«Íle ni Ɛnza Nazalɛtika cɛ o tɛ́ɛ kéene.»
68 Wáa aa í lámangbɛya kɛ fɔ kó:
«Í yɛ́ɛ é dhyáa mínnan nin mán o lɔ,
né tɛ́ bhɔ́la o ɲánle.»
Piyɛli é bhɔ́ o le lɔ kɛ táa lúkɔɔn ó lona o la tó lónan ŋoo kóman.
69 Ale bháalakɛdhye musoman ngée ŋóo Piyɛli yé íkwɔtun,
aa fɔ mɔɔn olu yɛ kó:
«Cɛ míin nín,
ale mɔɔn ó lɔ́ lée wé.»
70 Wáa Piyɛli é í lámangbɛya ko kwáa kɛ.
Wáati dɔ́ɔnin ŋé tínmin mínngɛ,
mɔɔn mínnu tɛ́ɛ yénɔn ólu fɔ Piyɛli yɛ́ íkwɔtun kó:
«Síka tɛ́ lɔ,
íi Ɛnza nvongamaa o lé lɔ́ le,
kɛ mansɔɔ íle,
Galileka lée íle.»
71 Piyɛli é í shɛ́n kɛ fɔ kó:
«Ala a ndáan,
a kan ŋé cɛ mín man nín,
mán o lɔ fɛ́sɛfɛsɛ.»
72 Í kɔ́lɔ,
lónan ŋoo kóman ko fyáaɲɔn o kɛ.
Ɛnza ŋé kóman mín nvɔ Piyɛli yɛ oo bhyáa a kɔɔnnɔn téeman kó:
«Sánnin lónan ŋó a kóman ko síɲan fyáaɲɔn o kɛ,
íle yáa fɔ né mán síɲan sawa kó í mán nɔ́.»
Piyɛli é kasi kɛ́.