Ii táala Ɛnza né Lomɛn ŋólu tá faanman ó kɛ́ɛnnan
15
Sɔɔ jónan ó mán,
faanlɛɛɲansebhaa olu kúnndii ólu ɲɔ́ɔn ɲé kɛ́ ní cɛba ólu ní sɛliya kaamɔɔn ólu ní kítitɛɛbhaa o tɔ́ ó bɛ́ le.
Ii wɛɛ Ɛnza nzilila mínngɛ,
ii táa ale kɛ táa a lo Lomɛn ŋolu tá faanman ŋó bhóo mín ndɔ́ɔ kó Pilati.
Maki 15.1-32
2 Pilati é a mánɲaankɛ kó:
«Íle lée Yawudhyaa ólu yɛ́ mansacɛ o le a?»
Ɛnza ŋé a yawi kó:
«Í lé le wɛ́ɛ o fɔ́ wé.»
3 Faanlɛɛɲansebhaa olu kúnndii ólu kómanyoo nzhɛ́ɛman nvɔ́ Ɛnza man.
4 Pilati é a mánɲaankɛ íkwɔtun kó:
«Í tɛ́ í yawila a?
Ii kómanyoo nzúu súu lála í lá nín,
í tɛ́ o myɛ́nnan ŋan?»
5 Wáa Ɛnza mán la fɔ,
o lée bháa Pilati lɔ kɛ tínmin.
Ɛnza maa Baanabasi
6 Sa ŋóo sa,
Hɔ́lɔɲanli o ɲánlagbɛ lo ŋo tɛ́ɛ sé,
Pilati tɛ́ɛ kasodhye ngée ne lábhyaala.
Yaman ó tɛ́ɛ kasodhye mín ngófɔ.
7 Waa cɛ lɔ́ tɛ́ɛ kasola,
o tɔ́ɔ tɛɛ kó Baanabasi.
Ale ní a taamanɲɔɔn ólu múluti fɔ kɛ mɔɔn lɔ́ fáa.
8 Yaman óo táa Pilati fɛ́ yé,
tó kɛ fɔ a yɛ kó:
«Íi kó mín ngɛla án ɲɛn Hɔ́lɔɲanli ɲánlagbɛ lo ŋo lá sa ŋóo sa o kɛ́ án ɲɛn.»
9 Pilati é i mánɲaankɛ kó:
«Áa fɛ́ ké ní Yawudhyaa olu yɛ́ mansacɛ o lé lábhyaa a?»
10 Kɛ mansɔɔ Pilati tɛ́ɛ lɔ ŋóo ɲánngboya le kósɔn faanlɛɛɲansebhaa olu kúnndii ólu,
Ɛnza no bhóolɔ.
11 Wáa faanlɛɛɲansebhaa olu kúnndii ólu tɛ́ɛ yaman ó lɔ́lonan,
kó ii fɔ kó kɛ́ Baanabasi lé lábhyaa.
12 Pilati é i mánɲaankɛ íkwɔtun kó:
«Tó fɔ́ é kɛ́la mín man kó Yawudhyaa lú yɛ mansacɛ o,
áa fɛ́ ké ní mínnɛɛn lé kɛ́ o la?»
13 Ii gbáa kó:
«A gbáan yíi ó mán!»
14 Pilati é i mánɲaankɛ kó:
«Aa kó yóo mínnɛɛn lé kɛ wɛ́?»
Wáa ii gbáa ko kwáa kɛ kó:
«A gbáan yíi ó mán!»
15 Pilati é yaman o sáo ó kɛ,
aa Baanabasi lábhyaa,
ii Ɛnza gbasi gbɛ́nɲɛn la,
aa Ɛnza no i bhóo kó ii táa a gbáan yíi ó mán.
Swáasi ólu yɛ́ɛbhɔla Ɛnza nɔn
16 Swáasi olu táa Ɛnza né i yɛ faanmannjɛ o yɛ́ lúkɔɔn ó mán,
tó ii swáasi ólu tɔ́ o bɛ́ kíi.
17 Ii tɔɔya ɲánlaywɛ nɔ́ bhyáa a kannan,
kɛ ŋwɛ́ɛn ŋo kɛ́ mansayagɔ ne,
kɛ a bíin a kúnnan.
18 Ii a lákɔɔbhɔ kó:
«Yawudhyaa olu yɛ́ mansacɛ o,
án ni í fola.»
19 I tɛ́ɛ a gbasila kaakaa ó lá a kúnnɔn,
kɛ í láji bwɔ́ a ka,
kɛ í kúnmɛɛn nɔ́kɛɛ a kɔɔ óyoo ii a bwóɲanla.
20 Ii wɛɛ yɛ́ɛbhɔla a lɔ mínngɛ,
ii a yɛ tɔɔya ywɛ́ ŋo bhɔ́ a kannan,
kɛ ale gbú yɛ faani o bhyáa a kannan.
Ii bhɔ́ ale kɛ́ɛnman,
kɛ táa a gbáan yíi ó mán.
Ii Ɛnza ngbáannan yíi ó mán
21 I taatɔ óle,
swáasi ólu cɛ lɔ́ yé bhɔ́la sɛ́ɛn mán tó kɛ fáan lá o ka kó aa Ɛnza gbáanɲii ó tá.
A tɔ́ɔ tɛɛ kó Simɔn,
Silɛninnga lé tɛ́ɛ ale.
Alɛsandi ní Lufu fácɛ le.
22 Ii táa Ɛnza né ywáa lɔ́lɔ,
o tɔ́ɔ kó Gɔligota.
O kɔ́ɔ o tɔ́ɔ kó:
«Kunngɔɔngoo ywáa.»
23 Ii sé mínngɛ yénɔn,
ii bhwɛ́ɛ lɔ́ ɲáanmin lɛ́zɛnnji o lɔ kɛ́ o dí Ɛnza man,
wáa a mán kɛ́ o fɛ́.
24 Swáasi olu a gbáan yíi ó mán tó kɛ gbámantɛɛ a yɛ faani olu ka,
tó bɛ́ a ta fa ndá.
25 Ii a gbáan yíi ó mán siinndee ó lé la.
26 Ii a fáa kún mínnan o sɛ́wɛnin ndɛ́ɛ yíifɛɛn nɔ ka kó:
«Yawudhyaa ólu yɛ́ mansacɛ ó.»
27 Kɛ ii bénganikɛbhaa fyáa gbáan yíi ó mán a tɔ́ɔfɛ,
kée ndɛ́ɛ a bhóobhɛɛkɔɔ,
kée ndɛ́ɛ a bhóonwaan ngɔɔ.
28 [O bhóo ó mán,
mín nzɛwɛnin ndɛ́ɛ Ala saaninkan o lɔ,
óo i lafa:
«I wɛɛ a yacesii kóyoongɛbhaa o lɔ́ le.»]
29 Tínminmaa olu tɛ́ɛ í kún lámaanla nɛɛnnin bhóoman Ɛnza ndá fa nvɛ́ kɛ táa fɔ lé a man kó:
«Ɲɔ́ɔn ngo íle lée fɔ kó íi sé kɛ Ala bhatobhomba ó cé kɛ́wɛɛ kɛ a lɔko kwáa kɛ́ tee sáwa mán lé?
30 Í ló ŋan í yɛ́ɛ bwási kɛ í yíi kɛ bhɔ́ i gbáanɲii ó mán nín né!»
31 Faanlɛɛɲansebhaa olu kúnndii ólu ní sɛliya kaamɔɔn ólu tɛ́ɛ yɛ́ɛbhɔla a lɔ́ kɛ fɔ ɲɔ́ɔnɲɛn kó:
«A wɛɛ mɔɔn olu bwási,
wáa a tɛ sháa a yɛ́ɛ bwásila!»
32 I tɛɛ fɔ́la íkwɔtun kó:
«Kó Kílisi ó,
Izalayɛli mansacɛ o!
Í yíi kwáalenin kɛ bhɔ́ í gbáanɲii ó mán,
án ɲán kɛ́ lɔ o lɔ,
án ɲáan lá í lá.»
Mɔɔn mínnu gbáannin ndɛ́ɛ yíi ó mán Ɛnza ndɔ́ɔfɛ,
olu tɛ́ɛ a nɛɛnnan ikwɔ.
Ɛnza ɲɛn sayako o
33 Teelatee ŋwáati o lɔ,
diwiba é lo ywáa ó bɛ́ lɔ́ yamaan o ka fɔ́ kɛ táa se ywáatee ó mán.
Maki 15.33-47
34 Ywáatee ó mán o lɔ,
Ɛnza ŋé gbáa fáan lá kó:
«Eloyi,
Eloyi,
laman sabataanin.»
O kɔ́ɔ o tɔ́ɔ kó:
«Ɲɛ́n Ala o,
ɲɛ́n Ala o,
í wɛ́ɛ í kwɔ́kɛ nán mínnɛɛn lé la?»
35 Mɔɔn mínnu tɛ́ɛ yénɔn,
o lɔ́luu o myɛ́n,
ii fɔ kó:
«Áa í tóomanlɔ,
aa Eli kíila!»
36 Mɔɔn kée ŋé bwée kɛ táa fu ó bhyáa lɛ́zɛnnji kuunnin nɔ́lɔ kɛ o dhyɛ́ kaakaa lɔ la,
kɛ a di Ɛnza man kó aa o min,
tó kɛ fɔ kó:
«Aa tó yé,
án ni a mánfɛɛ ní Eli yáa nan a láyii kɛ a bhɔ́ yíi o man!»
37 Wáa Ɛnza ŋé gbáa fáan lá tó kɛ sayakɛ.
38 Oo kɛ́ mínngɛ,
Ala bhatobhomba ó sácɛ ó fala fyáa le kɛ a lamyaan sáman fɔ́ɔ lúu mán.
39 Lomɛn swáasi kúnndii mín ndɛ́ɛ yénɔn,
oo Ɛnza saya kɛ́ seɲan o yé mínngɛ,
aa fɔ o lé lɔ kó:
«Kɛ fɔ tinɲan in né,
cɛ míin ndɛ́ɛ Ala dhyénjɛ gbú le le!»
40 Muso lɔ́lu tɛ́ɛ kólɔgbɛla ywáa já nɔn.
O muso ólu cɛ́man:
Mwɛnyamu Magidalaka,
Zaki fítiinin ni Zose wóobhaa Mwɛnyamu,
óni Salome.
41 O muso ó léelu tɛ́ɛ Ɛnza ngwɔ́ka Galile yamaan o lɔ,
kɛ a dhyɛman bháala olu mán.
Muso shɛ́ɛman ndɛ́ɛ yénɔn o kwɔ,
olu nan a kwɔka né fɔ́ Yeluzalɛmu.
Ɛnza nzúlongo o
42 Ywáatee ó mán,
o ló ŋó lúsɔgbɛ ó lé tɛ́ɛ lɔnwɛɛnlilo ŋo le.
43 Yusufu Alimateka é nan.
Ale tɛ́ɛ kítitɛɛbhaa olu mɔɔnba ó lé lɔ le.
A tɛ́ɛ Ala yɛ́ Mansaya ó nán wáati o mánkɔɔnnan.
Aa í yóso lágbɛya kɛ táa Ɛnza nvée ó kófɔ Pilati yɛ,
kó o a dyɛn kɛ a lo a bhóo.
44 Ɛnza ɲɛn sayakɛ jónan óo Pilati kɔɔnnɔnfii.
A yɛ swáasi kúnndii mín ndɛ́ɛ bháala la,
aa o kíi o lé lɔ tó kɛ a mánɲaankɛ ní Ɛnza nzayakɛnin ŋwɛ́ɛn myɛ́n.
45 Swáasi kúnndii óo wɛɛ a yawila mínngɛ,
Pilati é í kan mɔ́ fée o ka Yusufu yɛ.
46 Yusufu é féngbɛ sá,
kɛ Ɛnza nvée o láyii yíi o man,
kɛ féngbɛ ó ló a man.
Kábulu mín shɛn fáa o lɔ́ ale gbú yɛ,
aa táa Ɛnza nzútaa o kábulu o lɔ.
Kɛ́wɛɛ kɛ káwagbuba lɔ́ gínninman kɛ kábulu o lá ó látuun ŋo la.
47 Mwɛnyamu Magidalaka ní Zose wóobhaa Mwɛnyamu lu tɛ́ɛ sutaalaa ó mánfɛɛla.