Pilati é sɔnnan Ɛnza nváako ó man
19
Pilati é Ɛnza ndí kó íi a gbasi gbɛ́nɲɛn la. 2 Swaasi ólu ŋwɛ́ɛn ŋo kɛ mansayagɔ ne, kɛ o bíin a kúnnan, kɛ́ pepahu ɲánlaywɛ nɔ́ bhyáa a kannan, 3 tó kɛ́ í mangbaa a lá kɛ́ fɔ a yɛ́ kó: «Yawudhyaa ólu yɛ́ mansacɛ ó, án ni í fola!» I tɛ́ɛ a tóo cé céla.4 Pilati é bhɔ́ kɛ́ɛnman íkwɔ kɛ́ fɔ Yawudhyaa ólu yɛ́ kó: «Áa í tóomanlɔ ngáa bhɔ́ ni ale kɛ́ɛnman kɛ mansɔɔ né man cɛ míin nváa kún yé.» 5 Ɛnza ŋé bhɔ́ kɛ́ɛnman mínngɛ, ŋwɛ́ɛn nvúla ó síininndɛ́ɛ a kúnnan, óni pepahu ywɛ́ ŋo tɛ́ɛ a kannan. Pilati é fɔ Yawudhyaa ólu yɛ́ kó: «Cɛ ó lée ni.»
6 Faanlɛɛɲansebhaa olu kúnndii ólu ni í yɛ́ mɔɔn ólu a yé mínngɛ, íi lámyaan kɛ́ gbáa kó: «A gbáan yíi ó mán! A gbáan yíi ó mán!» Pilati é fɔ í yɛ́ kó: «Ále gbú a a myáan kɛ́ a gbáan yíi ó mán, né kwɛ́nnin mán fáa kún nzí yé a lá.»
7 Yawudhyaa ólu fɔ kó: «Sɛ́liya é án bhóo, án ɲɛ́n sɛliya ó lɔ́ an ngákan né kɛ́ á Fáa, kɛ mansɔɔ a wɛ́ɛ a yɛ́ɛ kɛ́ Ala Dhyénjɛ le.» 8 Pilati é ó kóman ó myɛ́n mínngɛ, aa sháan gbútuukɛ. 9 Aa í kwɔ́sɛɛ kɛ́ lo kɛ́ Ɛnza mánɲaankɛ kó: «Ii bhɔ́ mín?» Waa Ɛnza mán a yawi. 10 Pilati é fɔ a yɛ́ kó: «I tɛ́ né yawila a? I mán lɔ kó née sé kɛ́ í lábhyaa a? Wáman kɛ́ í gbáan yíi o man an?» 11 Ɛnza ŋé a yawi kó: «Sé míin i yɛ́ kɛ́ a yáa né lá, i mán ó sɔ́ɔ i yɛ́ɛman, Ala lée o sé o di í mán, ó bhóo ó mán, mɔɔn min ŋé né lo í bhóo, ó tíi o lé wɛ́ɛ yuumuba kɛ kɛ́ tínmin ile ka.»
12 Pilati é o kóman ó myɛ́n mínngɛ, a tɛ́ɛ ɲán ɲíinnan a man kɛ́ Ɛnza nábhyaa, wáa Yawudhyaa ólu tɛ́ɛ gbáanan kó: «Ni i kɛ́ a bhyáa, i tɛ́ Lɔmu mansacɛ ó twáanva lé bhée. Kɛ mansɔɔ mɔɔn míin a yɛ́ɛkɛla mansa lé, o tíi ó i wíila mansacɛ Sezali lé kanman.»
13 Pilati é ó kóman ólu myɛ́n mínngɛ, aa bhɔ́ ni Ɛnza ne kɛ́ɛnman kɛ́ táa á lásii kítitɛɛlaa ó lɔ́, míin lalaa ni káwaguun ŋó lé tó a tɔ́ɔ kó Gabata Ebulukan ŋo lɔ́. 14 O lé tɛ́ɛ Hɔ́lɔɲanli o ɲánlagbɛ ó lábhano ŋó lé. Téegban wáati ó lɔ́, Pilati é fɔ Yawudhyaa ólu yɛ́ kó: «Áa a yɛ́ mansacɛ ó mánfɛɛ.» 15 Wáa íi a yawi kó: «A Fáa! A Fáa! A gbáan yíi ó mán!» Pilati é fɔ í yɛ́ kó: «Ní a yɛ́ mansacɛ ó gbáan yíi ó mán an?» Faanlɛɛɲansebhaa olu kúnndii ólu a yawi kó: Mansacɛ gbɛ́ɛ tɛ́ án móo Sezali kwɔ́. 16 O lɔ Pilati é Ɛnza no í bhóo ko íi táa a gbáan yíi ó mán, ii a myáan kɛ́ táa a gbáan yíi ó mán.
Ɛnza gbáanngo ó yíi ó man
17 Ɛnza ŋé a gbáanɲii o tá. Ii táa sé ywáa lɔ́lɔ min ndɔ́ɔ kó Kunngɔɔngoo ywáa, íi o kíila Ebulukan ŋó lɔ kó Gɔligota. 18 O ywáa ó lɔ́, íi a gbáan yíi ó mán ní mɔɔn fyáa gbɛ́ɛ le, kée ndɛ́ɛ a bhóobhɛɛkɔɔ, kée ndɛ́ɛ a bhóonwaan ngɔɔ, Ɛnza ndɛ́ɛ i cɛ́man.
19 Pilati é fɔ í yɛ́ ko íi sɛ́wɛli kɛ́ yíifɛɛn nɔ ka kɛ́ ó gbáan Ɛnza gbáanɲii o kúnnɔn sáman, a sɛ́wɛnin ndɛ́ɛ kó: «Ɛnza Nazalɛtika, Yawudhyaa ólu yɛ́ mansacɛ ó.» 20 Yawudhyaa shɛ́ɛman ŋé ó sɛ́wɛ ó kála, kɛ mansɔɔ Ɛnza gbáannin ndɛ́ɛ ywáa min nɔn, ó ywáa ó tɛ́ɛ Yeluzalɛmu tɔ́ɔfɛ le, óni o kóman ó sɛ́wɛnin ndɛ́ɛ Ebulukan ne lɔ́, óni látɛnngan nɔn, óni gɛlɛkikan nɔn. 21 Yawudhyaa olu yɛ́ faanlɛɛɲansebhaa olu kúnndii ólu fɔ Pilati yɛ́ kó a kɛ́nan a sɛ́wɛ kó «Yawudhyaa ólu yɛ́ mansacɛ ó.» Wáa aa sɛ́wɛ kó «Cɛ míin ngó ale lée Yawudhyaa ólu yɛ́ mansacɛ ó lé.» 22 Pilati é fɔ í yɛ́ kó ale wɛ́ɛ wɛ́ɛ min nzɛ́wɛla, kó o wɛ́ɛ wɛ́ɛ ó sɛ́wɛla.
23 Swáasi ólu Ɛnza gbáan kɛ́ wɛ́ɛ wáati min nɔn, íi a yɛ́ Faani ólu lɔ́taa síilaaman náannin lé, í bɛ́ ni í tá fá. O kwɔ́, íi a yɛ́ pepahu ó tá, káanaa tɛ́ tɛ́ á la kɛ tá saman fɔ́ɔ lúuman, 24 swáasi olu fɔ ɲɔ́ɔn ɲɛ́n kó: «Án ngɛ́nan a yɛ́ faani o Fála, án ní tatalikɛ a káa kɛ́ mɔɔn min ndá lé, ó á lɔ́.» Oo kɛ́ ké míin fɔ Ala yɛ́ Kitabu ó lɔ, ó tɛ́ɛ i lafa. A kó:
I wɛ́ɛ né yɛ́ Fáani ólu lɔ́taa ɲɔ́ɔn njɛ,
I wɛ́ɛ tatalikɛ tó kɛ́ né yɛ́ déekeba ó tábhaa ó lɔ́.
Swáasi ólu ó lé kɛ́.
25 Ɛnza wóobhaa, ní a wóobhaa lɔ́ɔmuso, ni Kilopasi muso Mwɛnyamu, ni Mwɛnyamu Magidalaka, olu lɔ́nin ndɛ́ɛ Ɛnza gbáanɲii ó tɔ́ɔfɛ. 26 Ɛnza ŋé a wóobhaa, ni yɛ́ kaamɔɔndhye nɔ́ yé, min ngó tɛ́ɛ dí yɛ́, í tɛ́ɛ ɲɔ́ɔn ndɔ́ɔfɛ. Aa fɔ a wóobhaa yɛ́ kó: «Maan, i dhyé ŋó lée nin.» 27 O kwɔ́, aa fɔ kaamɔɔndhye ŋó yɛ́ kó: «I wóobhaa lée nin.» Kɛ́ta ó wáati ó mán, kaamɔɔndhye ŋóo táa ni a wóobhaa le a fɛ́ yé.
Ɛnza nzaya ó
28 O bɛ́ kɛnin ŋó kwɔ́, Ɛnza ndɛ́ɛ lɔ ŋóo kó o bɛ́ wɛ́ɛ í lafa, óni ké míin fɔ Ala yɛ́ Kitabu ó lɔ, o wáa kɛ́, aa fɔ kó: «Jíminnɔɔ é nan.» 29 Láa lɔ́ tɛ́ɛ yé, min Fánin ndɛ́ɛ lɛ́zɛnnji kuunnin ŋó lá. Lɔ é fu tá kɛ ó bhyáa lɛ́zɛnnji kuunnin ŋó lɔ, kɛ́ a sili izɔpua bhóolɔ mán, kɛ ó láyɛɛ kɛ́ a mangbaa Ɛnza na ó lá. 30 Ɛnza ŋé lɛ́zɛnnji kuunnin ŋó lɔmanfɛɛ mínngɛ, aa fɔ kó: «Kó ó bɛ́ wɛ́ɛ í lafa.» O kwɔ́, aa í kún mánbiin lúuman, tó á Ní o bhɔ.
Swási lɔ́ é Ɛnza nzɔ́ɔla a kɔ́ɔkɔɔ
31 Oo kɛ́ Hɔ́lɔɲanli fɛ́ti o ɲánsiilo ŋo lé lá, Yawudhyaa ólu tɛ́ɛ sháannan kó mɔɔn mínnu gbáannin ŋé, ko ólu su ó kɛ́nan tó gbáanɲii ó man kɛ́ sé lɔnwɛɛnlilo ŋó man, o lɔnwɛɛnlilo ŋo tɛ́ɛ lomba lé le kɛ tínmin ndɔ olu ka. O lɔ, íi táa Pilati dɛ́li, kó aa sháa di í mán kɛ́ mɔɔn miin nu sé ólu lɔ́kɛɛngɛɛ kɛ í su ó láyii kɛ́ bhɔ́ yé. 32 Swáasi ólu nan kóyoongɛmaakée mínnu gbáannin ndɛ́ɛ yíi o man á tɔ́ɔfɛ o kée nzé ólu kɛɛ, kɛ́ kée ndɔ ó ta ó kɛɛ. 33 Íi sé Ɛnza mán mínngɛ íi a yé óo a wɛ́ɛ sayakɛ kɛ́ bhá, o lɔ́, i man ale se ŋólu kɛɛ bhée. 34 Wáa swásicɛ kée ŋé a kɔ́ɔkɔɔlaa ó sɔ́ɔ tanman o lá, yée óni jí ó lée wée kɛ bhɔ́.
35 Mɔɔn míin o yé ó lée o sɛ́ɛya ládila, óni a yɛ́ sɛ́ɛyaman óo tinɲan lé lé. A lánin yé a lá, kó aa min nvɔla, kó oo tinɲan lé lé, ké ále a sé kɛ́ la a lá. 36 O kó ólu bɛ́ɛ kɛ́, ké míin fɔ Ala yɛ́ Kitabu ó lɔ, ó tɛ́ɛ i lafa. Aa fɔ kó: «A kóoguun ŋo sí mánfaa kɛɛ.» 37 Aa fɔ Ala yɛ́ Kitabu ó lɔ kó: Ii min nzɔ́ɔ, í yáa ó mánfɛɛ.
Ɛnza nzúlongo ó
38 O kó ólu bɛ́ɛ kɛ́ kɛ́ wɛ́ɛ wáati min nɔn, Yusufu min ndɛ́ɛ bhɔ́la Alimate, ó tɛ́ɛ Ɛnza ɲɛn kaamɔɔndhye ne loo nɔn, kɛ mansɔɔ a tɛ́ɛ sháannan Yawudhyaa ólu ɲɛ́n. Oo táa Ɛnza nvée ó kófɔ Pilati yɛ́, Pilati é sháa di a man, aa nan Ɛnza nzú ó láyii kɛ́ bhɔ́ yíi ó man. 39 Nikodɛmu míin táa Ɛnza nzaala ló nɔ sú lɔ́, óo nan látikɔlɔ swaan dhyáanin ne min ɲaanminnin ndɛ́ɛ ni miili ni alowɛsib le, min ndɛ́ɛ séla kilo bísawa lɔ́. 40 Yusufu ni Nikodɛmu é Ɛnza nzú ó tá kɛ Fáani gbɛ́ o míninminin a man óni kɛ latikɔlɔ ɲáanminnin ŋo bwɔ́ a ka, kɛ́ kéeɲan ni Yawudhyaa ólu yɛ́ sú lóɲan óle. 41 Ɛnza gbáannin ndɛ́ɛ yíi o man ywáa min nɔn, yíitu lɔ́ tɛ́ɛ yé. Kábulu kwáa lɔ́ tɛ́ɛ ó kɔ́ɔnnɔn, mɔɔn si tɛ́man sútaa ó kɔ́ɔnnɔn bhá. 42 Íi Ɛnza nzú lo ó kábulu ó lé kɔ́ɔnnɔn, kɛ mansɔɔ Yawudhyaa ólu tɛ́ɛ lɔnwɛɛnlilo ŋó lɔ́bhyɛnan, óni kábulu ó ywáa tɛ́ɛ sún.