Ii táa ni Ɛnza né Pilati fɛ́ yé
23
Oo kɛ́ mínngɛ,
yaman ó bɛ́ɛ í wíi kɛ́ táa ni Ɛnza né Pilati fɛ yé.
2 Ii a lámyaan kɛ́ Ɛnza yáayii,
kɛ fɔ kó:
«Án ŋwɛ́ɛn yé kó cɛ míin ŋé án ɲɛ́n yamaanlɔ mɔɔn ólu kúnnɔn cáannan kɛ i lamuluti.
Kɛ i lába nísɔɔn sala ó mán mansacɛ Sezali yɛ.
A kó kó ale lée Kílisi ó lé,
kó álee mansa le lé.»
3 Pilati é a mánɲaankɛ kó:
«Ile lée Yawudhyaa ólu yɛ mansacɛ o le a?»
Ɛnza ŋé a yawi kó:
«Ile le wɛ́ɛ o fɔ.»
4 Pilati é fɔ faanlɛɛɲansebhaa olu kúnndii ólu ní yaman ó yɛ kó:
«Né mán kún ɲé cɛ míin nan mín ŋé sé kɛ́la a hálaki kún né.»
5 Wáa í tɛ́ɛ fɔ́la kɛ mangbɛya kó:
«Aa yaman ó lámulutila ní a yɛ káa ŋó le Zude mala ó ywáa bɛ́ lɔ,
kɛ lámyaan Galile,
fɔ kɛ́nan sé ya.»
I wɛɛ táa ni Ɛnza né Elɔdi fɛ́ yé
6 Pilati é myɛ́n mínngɛ kó aa bhɔ́la Galile,
áa i manɲaankɛ kó:
«Cɛ míin ŋé Galileka le lé a?»
7 Aa myɛ́n mínngɛ kó Ɛnza ŋé mansacɛ Elɔdi yɛ fáan le kɔ́ɔ,
aa fɔ i yɛ kó íi táa ni ale Elɔdi fɛ yé,
kɛ mansɔɔ Elɔdi tɛ́ɛ Yeluzalɛmu o ló ŋó lá.
8 Elɔdi é Ɛnza ɲé mínngɛ,
oo dhyáa a yɛ koyoongɛ.
Kabiini wáatija,
a tɛ́ɛfɛ kɛ Ɛnza ɲé,
kɛ mansɔɔ a tɛ́ wɛ́ɛ Ɛnza ngó myɛ́n.
A tɛ́ɛ fɛ ké Ɛnza ŋán káwananngo lɔ kɛ́ ale ɲánla.
9 Elɔdi é Ɛnza manɲaankɛ kó shɛ́ɛman nan,
wáa Ɛnza mán a yawi.
10 Faanlɛɛɲansebhaa olu kúnndii ólu ni sɛliya kaamɔɔn ólu tɛ́ɛ yé.
I tɛ́ɛ kóman yóo nvɔla a mán kɛ a yánva.
11 Elɔdi ni a yɛ swaasi ólu tɛ́ɛ yɛ́ɛbhɔla Ɛnza nɔ́n,
áa mansaya faani cɛ́ɛ nɔ bhyáa a kannan kɛ yɛ́ɛbhɔ a lɔ,
kɛ tó álakwɔsɛɛ Pilati mán.
12 Pilati ní Elɔdi bhyɛnin ndɛ́ tɛ́ a lɔ,
wáa ii kɛ́ twáanva ɲɔ́ɔnman ne o ló ŋó la.
Ɛnza nváa kó ó wɛ́ɛ i la tɛ́ɛ
13 Pilati é faanlɛɛɲansebhaa olu kúnndii ólu,
ní Yawudhyaa ólu yɛ ɲɛ́nmɔɔn ólu ní yaman ó kíi.
14 Aa fɔ i yɛ kó:
«A wɛ́ɛ nan ní cɛ míin né kó aa mɔɔn ólu lɔ́su la.
Wáa,
né wɛ́ɛ a manɲaankɛ a bɛ́ ɲanla,
né mán kóman sɔ́ɔ a lá míin kɛ a yáayii kun né kɛ a fáa.
15 Elɔdi mán yáayii kun nzɔ́ɔ a lá,
kɛ mansɔɔ a wɛ́ɛ a lá kwɔ́sɛɛ né mán.
O lɔ,
né mán cɛ míin nváa kun ɲé.
16 O lɔ,
né yáa a gbasi gbɛ́nɲɛn lá.
O kwɔ́,
kɛ a lábhyaa.»
17 [Sá ŋóo sá,
Yawudhyaa ólu yɛ́ Hɔ́lɔɲanli ó ɲánlagbɛ ó lɔ,
Pilati tɛ́ɛ kasodhye ngée nábhyaala.]
18 Yaman ó bɛ́ɛ gbáa kɛ fɔ kó:
«Cɛ míin nváa,
íi Baanabasi bhyáa.»
19 Kɛ mansɔɔ Baanabasi tɛ́ wɛ́ɛ bhyáa kasola mulutili ó kósɔn só ó kɔ́ɔnnɔn.
Óni mɔɔn fáa o kósɔn.
20 Wáa Pilati tɛ́ɛfɛ kɛ Ɛnza nábhyaa,
aa yaman ó manɲaankɛ í kwɔ́.
21 Wáa íi gbáa kó:
«A gbaan yíi ó mán!
A gbáan yíi ó mán!»
22 Pilati é i manɲaankɛ a síɲan sáwaɲɔn ó lɔ kó:
«Aa kóyoo mínnɛɛn lé kɛ wɛ́?
Né mán kun nzɔ́ɔ míin kɛ́ a fáakun ne.
O lɔ,
né yáa fɔ kó íi a gbasi ní gbɛ́nɲɛn lá,
O kwɔ́ kɛ a lábhyaa.»
23 Wáa yaman ó gbáa kó aa Ɛnza gbáan yíi ó mán.
I mánngan ŋóo bwóɲan fɔ kɛ́ fáan sɔ́ɔ.
24 I tɛ́ɛ mín ɲiinnan,
Pilati é fɔ kó a yáa ó kɛ́ i yɛ.
25 Baanabasi mín ndɛ́ɛ kaso ó la múlutili óni mɔɔn fáa ó kósɔn,
aa ó lábhyaa.
Kɛ Ɛnza nó i bhóolɔ ké íi i sao kɛ́ a lá.
Ɛnza ngbaan ngó ó
26 I táatɔ ó lé ní Ɛnza ne,
ii cɛ lɔ́ kunmyɛ a tɛ́ɛ bhɔ́la sɛɛn mán,
a tɔ́ɔ kó Simɔn,
Silɛninnga lée ó le.
Ii Ɛnza gbáanɲii ó lá o kunman,
kó aa bhyaa Ɛnza kwɔ́.
27 Kɛ i táatɔ o tó,
yamanba é bhyaa íkwɔ,
muso shɛ́ɛman ndɛ́ɛ táa íkwɔ,
ólu tɛ́ɛ i sísi ólu mángbasigbasila kɛ i mánkoman kóman la.
28 Ɛnza ŋé í ɲán yɛ́ɛman kɛ fɔ i yɛ kó:
«Yeluzalɛmu muso ólu,
a kɛ́nan kasi né kósɔn.
Aa kasi a gbúlu kósɔn óni a dhyé ŋólu kósɔn,
29 kɛ mansɔɔ ló nɔ́ yáa sé,
mɔɔn ólu yáa fɔ kó:
‹Muso mínnu mán dhyé nzɔ́ɔ,
óni mínnu mán dhyé ŋwóo,
óni mínnu mán sín ndí dhyé mán,
ólu yeemanfanin ɲé.›
30 O sán ó lɔ,
i yáa fɔ tíi ólu yɛ kó:
‹Áa bé án ngá!›
I yáa fɔ tiininngbeya ólu yɛ kó:
‹Áa án mátuun!›
31 Ní í kɛ kɛ́ míin ngɛ́la yíi kɛ́nnɛn ó lá ta ŋó,
yíi yáa ŋó tá ó káa kɛ́ díi?»
32 I tɛ́ɛ táa ni mɔɔn fyáa gbɛ́ɛ le,
kóyoongɛbhaa le tɛ́ɛ ólu le,
ké ii ólu ní Ɛnza nváa ɲɔ́ɔn nvɛ́.
33 Ii ywáa min ngíila kó Kunngɔɔngoo ywáa,
ii sé o ywáa o lɔ mínngɛ.
Ii Ɛnza gbáan yíi ó mán yé,
óni kɛ kóyoongɛbhaa fyáa ólu gbaan yíi mán,
kée ndɛ́ɛ a bhóobhɛɛkɔɔ,
tɔ kée ŋó tɛ́ɛ a bhóonwaan ngɔɔ.
34 Wáa Ɛnza ŋé fɔ kó:
«Nvá,
yafa i mán,
kɛ mansɔɔ íi min ngɛ́la i mán ó lɔ́.»
Swaasi ólu gbámantɛɛ Ɛnza ɲɛ́n faani ólu ka kɛ ólu lɔ́taandaa ɲɔ́ɔnnan.
35 Yaman ó lɔ́nin ndɛ́ɛ yé i tɛ́ɛ mánfɛɛli kɛ.
Yawudhyaa ólu yɛ kunndii ólu tɛ́ɛ yɛ́ɛbhɔla Ɛnza nɔn.
Kɛ fɔ kó:
«Ní ale lée Kílisi óle,
Ala wɛ́ɛ mín lɔ́tɔnmɔn a wɛ́ɛ mɔɔn tɔ́ ólu bwási,
aa a yɛ́ɛ bwási le.»
36 Swaasi ólu tɛ́ɛ yɛ́ɛbhɔla a lɔ.
Ii í mangbaa a lá ko í káa lɛ́zɛnnji kuunnin ŋó dí a mán.
37 Kɛ fɔ a yɛ kó:
«Ní ile lée Yawudhyaa ólu yɛ mansacɛ ó lé,
i yɛ́ɛ bwási.»
38 Ii sɛ́wɛli kɛ Yíifɛɛn nɔ mán kɛ o gbaan Ɛnza ngúnnɔn sáman a sɛwɛnin ndɛ́ɛ o man kó:
«Cɛ míin née Yawudhyaa ólu yɛ mansacɛ óle.»
39 Kóyoongɛbhaa fyáa mínnu gbaan yíi ó mán,
ó kée ndɛ́ɛ a nɛɛnnan kɛ fɔ kó:
«Ile lé tɛ́ Kílisi óle a?
I yɛ́ɛ bwási,
kɛ́ án née bwási!»
40 Wáa kóyoongɛbhaa tɔ́ kée ŋóo kóman dɔ ó mán kɛ fɔ a yɛ kó:
«I tɛ́ sháan Ala ɲɛn ŋán!
41 Án née kwɛ́nnin ngákan ni tɔ́lɔya míin né,
kɛ mansɔɔ án wɛ́ɛ kóyoo ne kɛ,
wáa ale mán kóyoo nzí kɛ.»
42 O kwɔ,
aa fɔ kó:
«Ɛnza,
ní í kɛ́ i síi i yɛ́ Mansaya ó lɔ wáati mínnɔn,
íi i hákii tó né lɔ.»
43 Ɛnza ŋé a yawi kó:
«Tinɲan in né ní fɔ́la i yɛ ngó:
Bí i yáa kɛ ni né lé ɛliyanan ó lɔ.»
Ɛnza nzáyako ó
44 Teelatee ŋwáati ó tɛ́wɛɛ bhyaa sé le,
diwi é ló yamaan ó ywáa bɛ́ lɔ fɔ́ kɛ táa sé ywáatee ó mán.
45 Tée ó tɛ tɛ́ yéla bhée.
Ala bhatobhomba ó sácɛ ó fála fyáa le.
46 Ɛnza ŋé gbáa kɛ fɔ kó:
«Nvá,
né wɛ́ɛ né ní ó ló í bhóo.»
Aa ó fɔ mínngɛ,
aa sayakɛ.
47 Lomɛn ólu yɛ́ swaasi kúnndii óo o kó ólu yé mínngɛ,
aa Ala tando kɛ fɔ kó:
«Kɛ fɔ tinɲan la,
cɛ míin ndɛ́ɛ mɔɔnteenin ne lé.»
48 Yaman mín nádhyɛnin ndɛ́ɛ kɛ o kó ólu mánfɛɛ,
kó mínnu é tínmin ólu o yé mínngɛ,
ólu kwɔ́sɛɛtɔ ó tɛ́ɛ i sísi ó mangbasi la nílafin ŋó bhóo.
49 Ɛnza ndwáanva ólu,
óni muso mínnu tɛ́wɛɛ bhyáa a kwɔ́kɛ bhɔ́ fɔ Galile,
ólu i lɔ kɛ kólɔgbɛ ywáa já nɔ́n.
Ɛnza nzúlongo ó
50 Yawudhyaa ólu yɛ kítitɛɛbhaa ólu lɔ,
cɛ lɔ tɛ́ɛ yé,
a tɔ́ɔ kó Yusufu.
Mɔɔnteenin né tɛ́ɛ o le,
óni mɔɔnbhɛɛ le tɛ́ɛ o le.
51 A mán sɔ́n a táamanɲɔɔn ólu yɛ kó látɛɛnin ŋólu mán.
Óni ii kó mínnu kɛ,
A tɛ́ɛ bhɔ́la Yawudhyaa ólu yɛ só lɔ la mín ndɔ́ɔ kó Alimate.
A tɛ́ɛ Ala yɛ́ Mansaya ó nán o mánkɔɔnnan.
52 Aa táa Pilati saala kɛ Ɛnza nzú ó kófɔ a yɛ.
53 O kwɔ́,
aa Ɛnza nzú ó láyii kɛ a bhɔ́ yíi o mán,
kɛ féngbɛ ló a mán,
kɛ a bhyáa kábulu lɔ kɔ́ɔnnɔn,
o kábulu ó shɛ́nnin ndɛ́ɛ fáa o le lɔ,
i tɛ́ mán mɔɔn sútaa yénɔn bhá.
54 Aa ó kɛ sannin lɔnwɛɛnlilo ŋó síɲanla óle mán.
Lɔnwɛɛnlilo ó tɛ́ɛfɛ kɛ i lámyaan.
55 Muso mínnu tɛ́wɛɛ bhyáa Ɛnza ngwɔ́ kɛ bhɔ́ Galile,
ólu táa ni Yusufu le Ɛnza nzútaalaa ó lɔ.
Ii kábulu ó mánfɛɛ kɛ Ɛnza nzú ó láseɲan ó mánfɛɛ.
56 O kwɔ́,
íi i kwɔ́sɛɛ kɛ táa só ó kɔ́ɔnnɔn.
Ii wúsulan ŋó ní túu swáandhyaanin ŋó lɔ́bhyɛ.
Ii lɔnwɛɛnlilo ŋó bwóɲan óyoo aa fɔ ɲán mín mán Ala yɛ sɛliya ó lɔ.