Yɛ́nee fáan dí Ɛnza mán?
20
Ló nɔ la,
Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn,
óni kɛ sanmankanmɛɛ ó fɔ i yɛ.
Faanlɛɛɲansebhaa olu kúnndii ólu ní sɛliya kaamɔɔn ólu ní cɛba ólu táa Ɛnza nzaala,
2 kɛ a manɲaankɛ kó:
«A fɔ án ɲɛn,
íi kó míinnu kɛ́la sébhaaya mínnɛɛn lé bháaka lɔ?
Yɛ́ɛtii o sébhaaya ó dí í mán?»
3 Ɛnza ŋé i yawi kó:
«Né yáa álee mánɲaankɛ láfaɲan kée nán.
Aa né yawi.
4 Yɛ́ɛtii Yaya Bátizelikɛbhaa bhyáashaa kɛ́nan mɔɔn ólu bátize,
Ala bháa,
bháa mɔɔn ólu?»
5 O kɛ mínngɛ íi táa ɲɔ́ɔn yé,
kɛ i miliya ólu yáa ɲɔ́ɔnnan,
ii bhyɛ́ a lɔ kɛ fɔ kó:
«Ní án ngɛ́ fɔ ngó Ala lée a bhyáashaa,
a yáa án mánɲaankɛ kó:
Mínnɛɛn lé kósɔn á mán lá Yaya la.
6 Ní án ngɛ́ fɔ kó mɔɔn ólu,
mɔɔn ólu yáa án bwó káwa la,
kɛ mansɔɔ i bɛ́ lánin ŋé a lá kó Yaya tɛ́ɛ céla le lé.»
7 Íi Ɛnza yawi kó i mán lɔ́.
8 Ɛnza ŋé i yawi kó:
«Ní ó lée,
míin fáan dí né mán kɛ kó míinnu kɛ́,
né táa o sébhaaya ó fɔ a yɛ.»
Saanan míin lá sɛɛnkɛbhaayoo ŋó mán
9 O kwɔ́,
Ɛnza ŋé saanan míin ná yaman ó yɛ,
a kó:
«Cɛ lɔ́ lée lɛ́zɛnnvyɛ kɛ,
tó kɛ ó kɛ́ɛfa bháalakɛdhye ŋólu mán,
kɛ táa táamanja nán.
10 Lɛ́zɛn mɔ́ wáati óo sé mínngɛ,
áa a yɛ bháalakɛdhye ŋó kée myáashaa lɛ́zɛnmaalakɛbhaa ólu mán ké ii a tá nin ŋó di.
Wáa lɛ́zɛnmaalakɛbhaa ólu o myáan,
kɛ a gbasi,
kɛ a bhóolɔkoo ŋó bhyaa kɛ́ táa.
11 Lɛ́zɛnnvyɛtii ó bháalakɛdhye ngbɛ́ɛ ce i man.
Ii ó gbási kɛ a nɛɛn kɛ a bhóolɔkoo ŋó bhyaa kɛ́ táa.
12 Lɛ́zɛnnvyɛtii ó bháalakɛdhye nzawaɲɔɔn ce i man,
íi ó gbási kɛ́ a manndiin,
kɛ́ a gbɛ́.
13 Oo kɛ́ mínngɛ lɛ́zɛnnvyɛtii ó fɔ kó:
‹Né káa mínnɛɛn le kɛ́?
A kó o:
Né dhyénjɛ mín ŋan dí né yɛ gbútuukɛ,
né yáa o bhyáashaa i man,
kɛ dhyáa,
i yáa ó bhóɲan.›
14 Wáa lɛ́zɛnmaalakɛbhaa ólu sɛɛntii ó dhyénjɛ ó yé mínngɛ,
íi fɔ ɲɔ́ɔnɲɛn kó:
‹A cɛ́n ó tábhaa ó lée nín,
án ní a fáa ké cɛ́n ó á kɛ́ án ndá lé.›
15 Ii a myáan kɛ́ bhɔ́ ni ale sɛɛn ó kɔ́ɔnnɔn kɛ́ a fáa.»
Ɛnza ŋé fɔ kó:
«Lɛ́zɛnnvyɛtii ó káa mínnɛɛn lé kɛ́ i la sá?
16 A yáa nan,
kɛ lɛ́zɛnmaalakɛbhaa ŋólu fáa,
tó kɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán!»
Mɔɔn ólu ó kóman ó myɛ́n mínngɛ,
íi fɔ kó:
«Ala án ngísila o mán!»
17 Ɛnza ŋé i mánfɛɛ kɛ fɔ kó:
«Mín nzɛ́wɛnin ŋé Kitabu ó kɔ́ɔnnɔn,
o kɔɔ ó mínnɛɛn le?
A kó:
‹Bhónɔbhaa ólu wɛ́ɛ í bá tɛfɛ mínnɔn,
o lé wɛ́ɛ kɛ́ tɛfɛ kúugbɛɛ ŋó le.›
18 Mɔɔn óo mɔɔn kɛ í bé o tɛfɛ ó ka,
o tíi ó kóo ó yáa í lɔ́kɛɛngɛɛ;
ni ó tɛfɛ ó kɛ bé mɔɔn min ngá,
o tíi ó yáa í lɛ́ɛbhɔ.»
19 O wáati ó yɛ́ɛ lɔ,
Sɛliya kaamɔɔn ólu ni faanlɛɛɲansebhaa olu kúnndii ólu tɛ́ɛfɛ kɛ́ Ɛnza myáan,
kɛ mansɔɔ i tɛ́wɛɛ bhɔ́ a ɲan le óo Ɛnza ndɛ́ɛ saanan ó la lá ile léelu mán.
Wáa i tɛ́ɛ sháannan yaman o ɲɛn.
A láanin ŋé kɛ́ nísɔɔn ó sála a?
20 Oo kɛ mínngɛ,
íi lámyaan kɛ́ Ɛnza nákɔɔsi.
O lɔ,
íi mɔɔn lɔ́lu bhyáashaa kɛ táa Ɛnza nákɔɔsi kán ŋó mán,
í tɛ́ɛ i yɛ́ɛ kɛ́la mɔɔnteenin nú le,
ké ii a myáan a gbú lákan ŋó mán.
Ké ii sɔ́ɔbu lɔ sɔ́ɔ kɛ́ a ló Mansacɛ ó bhóo,
óni faanman ŋólu bhóo.
21 O mɔɔn ólu táa Ɛnza manɲaankɛ kó:
«Kaamɔɔn,
án ni a lɔ́ ŋóo i yɛ kóman ólu ní i yɛ kaa ŋólu téenin ɲé,
í ló ndɛ́ mɔɔn bhɔ́la mɔɔn lɔ,
Íi Ala sháa o le yáala an nán tinɲan le ka.
22 Á láanin ɲé kɛ nísɔɔn ó sála mansacɛ Sezali yɛ bháa bháanin a laanin ndɛ́?»
23 Wáa Ɛnza ŋé bhɔ́ i yɛ naanfiiya ó ɲánle,
aa fɔ í yɛ kó:
24 «Áa wɛ́ɛgbannan ngée yáa né la.»
A kó:
«Yɛ́ɛtii yáa ní tɔ́ɔ é wɛ́ɛ míin mán?»
I kó mansacɛ Sezali.
25 Ó lɔ,
Ɛnza ŋé fɔ i yɛ kó:
«Fé mín ɲé mansacɛ Sezali tá le,
áa o dí mansacɛ ó mán;
mín ɲé Ala tá ó le,
áa o dí Ala mán.»
26 I man sé kɛ Ɛnza myáan a yɛ́ɛ lákan ŋó mán yaman ó ɲánkɔɔ,
wáa a yɛ yawili ó bháa i lɔ,
i mán kóman sɔɔ kɛ́ a yawi.
Sadusi lɔ́luu Ɛnza mánɲaankɛla su ólu kúun ŋó mán
27 Sadusi ólu tɛ́ɛ fɔ́la kó su ólu táa kúun.
I lɔ́luu i mángbaa Ɛnza nan kɛ a mánɲaankɛ kó:
28 «Kaamɔɔn,
Musa é mín nvɔ́ án ɲɛn kó:
Ní cɛ lɔ kɛ́ muso tá,
kɛ sayakɛ ké a mán dhyé nzɔ́ɔ muso ó la,
a lɔ́ɔcɛ kákan kɛ́ muso o fúu kɛ́ kɛ dhyé nzɔ́ɔ a lá á bhádhye ŋó yɛ.
29 O ɲan ó mán,
bhádhyemannjɛ wóonvyaa lé tɛ́ɛ yé.
Jónan óo muso fúu kɛ,
wáa aa sayakɛ,
a mán dhyé nzɔ́ɔ muso o la.
30 Fyáaɲɔn ó o muso ó tá,
31 a sawaɲɔn óo a tá.
O ɲan ó mán,
dhyénjɛ wóonvyaa ó bɛ́ é sayakɛ,
i sí mán dhyé nzɔ́ɔ muso ó la.
32 Ó kwɔ,
muso óo sayakɛ.
33 Su ólu kúun nó ŋó kɛ́ sé,
muso ó káa kɛ́ yɛ́ɛtii tá le?
Kɛ mansɔɔ dhyénjɛ wóonvyaa ó bɛ́ é a fúu kɛ.»
34 Ɛnza ŋé i yawi kó:
«Dínɲan míin ngɔɔnnɔn,
cɛ óni muso ó fúu kɛla.
35 Wáa Ala wɛ́ɛ kítitɛɛ mɔɔn mínnu ka kɛ i yacesii mɔɔnteenin nu lé dínɲan kwáa o lɔ,
ní ólu kɛ kúun kɛ bhɔ́ saya ó lɔ,
cɛ ó táa muso fúu kɛ́,
muso ó ló ndáa sii cɛ la;
36 Ólu táa sayakɛ bhée,
kɛ mansɔɔ ólu káa kɛ́ lé óo malɛɛka ólu.
Ala káa i yacesii a dhyé néelu le,
kɛ mansɔɔ i yáa kúun kɛ bhɔ́ saya ó lɔ.
37 Ní su ólu kɛ kúun.
Céla Musa gbú é a yáa kɛ tá ó tó yíitunin ŋó la.
Aa Mantii ó kíi kó Bulaaman yɛ Ala o,
óni Shaaka yɛ Ala o,
óni Yangubha yɛ Ala o.
38 O kɔ́ɔ ó tɔ́ɔ kó Ala tɛ́ su ólu yɛ Ala óle,
wáa ɲáanman ŋólu yɛ Ala lée a le,
kɛ mansɔɔ Ala fɛ yé mɔɔn ólu bɛ́ɛ ɲáanman ne lé.»
39 Sɛliya kaamɔɔn lɔ́luu fɔ Ɛnza ɲɛn kó:
«Kaamɔɔn,
í wɛ́ɛ kóman cɛ́ɛne.»
40 Kɛ tá ó mán,
i mán Ɛnza manɲaankɛ bhée.
Kílisi ní Laula
41 Ɛnza ŋé i manɲaankɛ kó:
«Án ni sé kɛ fɔ ɲán mínnɛɛn lé mán kó Kílisi óo Laula bhɔ́nzɔ ne lé?
42 Laula gbú é fɔ Zabulu ó kitabu ó kɔɔnnɔn kó:
Mantii Ala é fɔ ɲɛn Mantii o yɛ kó:
Í síi móobhɛɛ kɔɔ,
43 fɔ́ né a í yúu ólu myaan kɛ i bhyáa í sé ngɔɔ.
44 O ɲán o mán,
ni Laula é Kísibhaa ó kíila kó Mantii ó,
Kísibhaa óo sé kɛ́la Laula Bhɔ́nzɔ né díi?»
Ɛnza ŋé í sɛɛmansɔɔla a yɛ kaamɔɔndhye ŋólu yɛ
45 Kɛ yaman ó tó Ɛnza nɔ́myɛnnan áa fɔ a yɛ kaamɔɔndhye ŋólu yɛ kó:
46 «Áa a yɛ́ɛkɔɔsi sɛliya kaamɔɔn ólu mán,
deekeba ló ŋó lé a dí i yɛ kɛ í yáala,
íi fɛ ké mɔɔn tɔ ólu a kɛ́ i fola yamanywaa ólu lɔ,
óni sɛ́ɛbho ŋó kɔ́ɔnnɔn,
ɲɛ́nnzhaafɛ síilaa ó lée lu a dí i yɛ,
sɛ́ɛbho ŋólu ní lɔ́minkɛlaa ólu lɔ.
47 Muso mínnu cɛ wɛ́ɛ sayakɛ,
íi ólu bhóofe ŋó bɛ́ myaanla i la;
ii sɛ́ɛ kannanja ólu kɛ́la ké mɔɔn ólu a i lásaa.
O le kósɔn,
i tá kíti o yáa gbɛ́ya kɛ tínmin mɔɔn tɔ́ ólu tá ó ka!»