پرڀُو يسُوع رو جنم
2
اُوئون ڏِنون ۾ اِيئون ھويو ڪہ رُوم مُلڪ رَي مھاراجا قيصر اوگوستُس اَي حُڪم ڏينو ڪہ رُومي راجائي رَي ݾجَي مُلڪون را مِنک آپرا آپرا نون لِکاوَي۔ 2 اَي پيلڪِي آدم شُمارِي ھتِي جڪو سُوريا صُوبَي رَي گوَرنر ڪورنيس رَي ڏِنون ۾ ھوئِي۔ 3 اِيئي رَي ڪري ھر ھيڪ آپرو نون لِکاوڻ رَي ݾارُو آپرَي آپرَي ٻاپ ڏاڏَي رَي شھر گيو۔4 يُوسف، جڪو پِروڻَي زمونَي رَي بادشاھ دائُود رِي پيڙھِي ݾون ھتو، او آپرو نون لِکاوڻ رَي ݾارُو آپرَي گليل صُوبَي رَي ناصرت شھر نَي ڇوڙي يھُوديا صُوبَي رَي بيت لحم شھر ڏيݾا گيو، جيٿ بادشاھ دائُود رو جنم ھويو ھتو۔ 5 اُوئي ڀيڙِي اُوئي رِي مونگيتݪ مريم ڀِي ھتِي، اُوئي ٽيم او اُميد ݾون ھتِي۔ 6 جڏي او بيت لحم شھر ۾ ھتا، تو مريم رَي ٻاݪ ھوئڻ رو ٽيم ھويو۔ 7 مريم نَي موڀِي ڏيڪرو جايو، اُوئي ٻاݪئي نَي ٻَڌڻئي ۾ بيڙھي ھانَ آھورَي ۾ ݾُواݪيو، ڪيونڪہ مُسافرخونَي ۾ اُوئون رَي ݾارُو ڪو ڀِي جگھا ڪونھي ھتِي۔
فريشتون رو ڌراڙون نَي خُوشِي رِي خبر ݾُڻاوڻ
8 اُوئي علائقَي رَي ھيڪَي ميدون ۾ ڪئينڪہ ڌراڙ رات رو آپرَي رڍون رِي رُکاݪِي ڪرتا پڙيا۔ 9 اُوئون ڪڍي پرميشوَر رو ھيڪ فريشتو آئي اُڀو۔ پرميشوَر رو اُجاݪو اُوئون رَي چوڌاري چمڪڻ لاگو ھانَ او تموم گھڻا ٻيئاجڻ لاگا۔ 10 فريشتَي ڪھيو ڪہ، ”ٿي نِي ٻيئاجو، ڪيونڪہ ھُون ٿونَي خُوشِي رِي خبر ݾُڻائُون ھون، جڪَي ݾون ݾجائِي مِنک تموم گھڻا خُوش ھوشَي۔ 11 آج دائُود بادشاھ رَي شھر، بيت لحم ۾ ٿونرَي ݾارُو ھيڪ مُگتي داتا جايو ھَي، جڪو مَسيح ھانَ پرڀُو ھَي۔ 12 اِيئي بات رو ٿونرَي ݾارُو اَي نِشون ھَي ڪہ ٿي ھيڪَي ٻاݪ نَي ٻَڌڻئي ۾ ٻاڌوڙو ھانَ آھورَي ۾ ݾُوتوڙو ڏيکشو۔“
13 اِيئي ݾون پَڇي اوچتو ڌراڙون نَي اُوئي فريشتَي ڀيڙا تموم گھڻا آڪاشِي فريشتا ڏيکيجڻ ۾ آيا، جڪو ايشوَر رِي بڏائي ڪرتا ھانَ اِيئون ڪيتا ڪہ، 14 ”آڪاش ۾ ايشوَر رِي بڏائي ھووَي ھانَ ڌرتي تي اُوئون مِنکون نَي ݾُک ملَي جڪَي ݾون او خُوش ھَي۔“
15 جڏي فريشتا اوٿ ݾون پاڇا آڪاش ڏيݾا گيا، تو ڌراڙ آپت ۾ ڪيوَڻ لاگا ڪہ، ”ھالو تو بيت لحم شھر ڏيݾا ھالون ھانَ اَي بات جڪَي رِي پرميشوَر آپون نَي خبر ڏينِي ھَي، اُوئي نَي جوئون۔“ 16 اِيئي رَي ڪري ڌراڙ ڇيڪا گيا ھانَ اُوئون مريم ھانَ يُوسف نَي ڏيٺا ھانَ ٻاݪ نَي ڀِي آھورَي ۾ ݾُوتوڙو ڏيٺو۔ 17 اُوئون نَي جوئڻ ݾون پَڇي ڌراڙون اِيئي بات نَي مشھُور ڪِي جڪو فريشتَي اُوئون نَي ٻاݪئي رَي بارَي ۾ ݾُڻائِي ھتِي۔ 18 جڏي مِنکون ڌراڙون رَي باتون ݾُڻئَي، تو او تموم گھڻا حيرون ھويا۔ 19 پڻ مريم اِيئون باتون نَي آپرَي من ۾ راکي ھانَ اُوئون تي ݾوچ بيچار ڪرڻ لاگِي۔ 20 جون فريشتَي ڌراڙون نَي ݾُڻايو ھتو، اِيئوج اُوئون ڏيٺو ھانَ ݾُڻيو ھانَ او ايشوَر رِي بڏائي ڪرتا پاڇا بُوئا گيا۔
ٻاݪ رو نون يسُوع راکڻ
21 آٺوين ڏِن اُوئون ٻاݪئي رو کَتنو ڪرايو ھانَ اُوئي رو نون يسُوع راکيو۔ (يسُوع رو مطلب ھَي ”پرميشوَر بچاوَي ھَي۔“) اَي اوج نون ھَي جڪو فريشتَي مريم نَي اُميد ھوئڻ ݾون پيل ݾُڻايو ھتو۔
پرڀُو يسُوع نَي ايشوَر رَي گھر ۾ لي جاوڻ
22 جڏي مُوسيٰ رِي شريعت تي مريم را ݾُوئَي را ڏِن پُورا ھويا، تو پَڇي يُوسف ھانَ مريم آپرَي ڏيڪرَي نَي آپ ڀيڙو يروشلم شھر ۾ لي گيا ڪہ اُوئي نَي ايشوَر رَي گھر ۾ پرميشوَر رَي نون رو ڪرَي، 23 ڪيونڪہ پرميشوَر رِي شريعت ۾ لِکيوڙو ھَي ڪہ،
”ھر ھيڪ موڀِي ڏيڪرو پرميشوَر رَي ݾارُو پويتر ھوشَي۔“
24 اِيئي رَي ڪري او ڀِي آيا ڪہ او گيرون رو ھيڪ جوڙو جون ڪٻُوترون رَي ٻيئون ٻچيون رو چڙھائو چاڙھَي جون پرميشوَر رِي شريعت ۾ لِکيوڙو ھتو۔
25 يروشلم شھر ۾ شمعُون نون رو ھيڪ مِنک ھتو، جڪو نيڪ ھانَ ڌرمي ھتو ھانَ ايشوَر رو پويتر آتما اُوئي ڀيڙو ھتو۔ او اِنتظار ۾ ھتو ڪہ مَسيح آشَي ھانَ اِسرائيلي قوم نَي ڏُکون ݾون بچاشَي۔ 26 پويتر آتما شمعُون نَي ڪھيو ھتو ڪہ، ”تُو اُترِي توڻي ڪونھي مرَي، جترِي توڻي تُو پرميشوَر رَي مَسيح نَي نِي ڏيکَي۔“ 27 شمعُون پويتر آتما رَي ڪيوَڻ تي ايشوَر رَي گھر ۾ آيو۔ جڏي مريم ھانَ يُوسف، شريعت پُورِي ڪرڻ رَي ݾارُو آپرَي ڏيڪرَي يسُوع نَي ايشوَر رَي گھر ۾ لي آيا، 28 تو شمعُون ٻاݪئي نَي آپرَي کوڙَي ۾ ليئو ھانَ ايشوَر رو شُڪر ڪيئو ھانَ ڪھيو ڪہ،
29 ”اي مھارا مالڪ، ھمَي ھُون جڪو ٿارو شيواداري ھون،
آپرَي ڪيوَڻ تي دايا ڪري آپ ڪڍي اَڻا رو۔
30 ڪيونڪہ مھَي آپرَي اونکيون ݾون
ٿارِي اَي مُگتي ڏيٺِي رِي،
31 جڪَي نَي ٿَي ݾجون قومون رَي ݾارُو تيار ڪيئو ھَي۔
32 ڪہ او ٻيجَي قومون رَي ݾارُو
ݾچائي نَي ظاھر ڪرڻ آݪو اُجاݪو ھووَي
ھانَ ٿارِي چُونڊيوڙِي اِسرائيلي قوم رَي ݾارُو بڏائو ھووَي۔“
33 يسُوع را ماتا پِتا آپرَي ٻاݪئي رَي بارَي ۾ شمعُون رَي اِيئون باتون تي حيرون ھتا۔ 34 پَڇي شمعُون اُوئون نَي برڪت ڏينِي ھانَ ٻاݪئي رِي ما مريم نَي ڪھيو ڪہ، ”اَي ٻاݪيو اِسرائيلي قوم رَي تموم گھڻَي مِنکون رَي ݾارُو ھيڪ خاص نِشون ھوشَي ھانَ تموم گھڻا مِنک اِيئي رَي خلاف ھوشَي۔ اِيئي رَي ڪري جڪو مِنک اِيئي رَي خلاف ھوشَي، او مِٽي جاشَي، پڻ جڪو اِيئي ݾون خُوش ھوشَي، او آباد ھوشَي۔ 35 اِيئي نمُونَي نِي رُگو مِنکون رَي من رَي باتون پڌرَي ھوشَي، پڻ ٿنَي اِترو تو ڏُک ھوشَي ڪہ جھڙِي ٿارِي دِل ڪاڍي ڇوڙي ھووَي۔“
36 اوٿ حنا نون رِي ھيڪ لُگائِي ھتِي جڪو نبيوڻِي ھتِي۔ او فنوايل رِي ڏيڪرِي ھانَ آشر قبيلَي ݾون ھتِي۔ او تموم گھڻِي بُوڍِي ھتِي۔ اُوئي رو ڌڻِي اُوئي رَي بيئان رَي ݾاتون ݾالون ݾون پَڇي مري گيو ھتو۔ 37 ھمَي حنا چوراݾِي ݾال رِي رونڏٻير ھتِي۔ او ڏِن رات روزا راکي پراٿنا ھانَ ڀگتي ڪرتِي ھانَ ڪڏي ڀِي ايشوَر رَي گھر ݾون ٻاھر ڪونھي نڪرتِي۔ 38 اُوئي ٽيم حنا ڀِي اوٿ آئِي ھانَ ايشوَر رِي بڏائي ڪرڻ لاگِي ھانَ اُوئي ٻاݪئي رَي بارَي ۾ اُوئون ݾجون مِنکون نَي ݾُڻاوڻ لاگِي جڪو يروشلم شھر ھانَ آپرِي قوم رِي آزادي رَي اِنتظار ۾ ھتا۔
ناصرت شھر ڏيݾا پاڇا آوڻ
39 يسُوع را ماتا پِتا، پرميشوَر رِي شريعت پُورِي ڪري گليل صُوبَي ۾ آپرَي شھر ناصرت ۾ پاڇا آيا۔ 40 يسُوع ڏِنو ڏِن بڌتو ھانَ موٽو ھوتو گيو ھانَ او ݾمجھ ݾون ڀرپُور ھوتو گيو، ڪيونڪہ ايشوَر رِي ڪِرپا اُوئي تي ھتِي۔
ٻارھَي ݾالون رو پرڀُو يسُوع ايشوَر رَي گھر ۾
41 يسُوع را ماتا پِتا ھر ݾال يروشلم شھر ۾ فَسح رو پَرٻ ڪرڻ جاوتا۔ 42 جڏي يسُوع ٻارھون ݾالون رو ھويو، تو او آپرِي ڌرمي ريت تي آپرَي ماتا پِتا ڀيڙو پَرٻ ڪرڻ رَي ݾارُو يروشلم گيو۔ 43 جڏي فَسح پَرٻ را ڏِن پُورا ھويا، تو او گھر ڏيݾا پاڇا آوڻ لاگا، پڻ يسُوع يروشلم شھر ۾ رئي گيو ھانَ اُوئي رَي ماتا پِتا نَي خبر ڪونھي پڙِي۔ 44 او اَي ݾوچي ݾجو ڏِن پينڏو ڪرتا رھيا ڪہ، ”يسُوع مھون ڀيڙو جٿَي ۾ ھَي۔“ جڏي اُوئون ڏيٺو ڪہ يسُوع تو مھون ڀيڙو ھائِي ڪونھي، تو پَڇي او يسُوع نَي عزيزون ھانَ ݾجَي مِنکون ۾ جوئڻ لاگا۔ 45 جڏي اُوئون نَي يسُوع ڪونھي لاڌو، تو او اُوئي نَي جوئڻ رَي ݾارُو پاڇا يروشلم شھر گيا۔
46 تيجَي ڏِن، يسُوع اُوئون نَي ايشوَر رَي گھر ۾ مِليو۔ او يھُوديون رَي ڌرمي گُروئون ڀيڙو ٻيٺوڙو ھتو ھانَ اُوئون رَي باتون ݾُڻي اُوئون ݾون سوال جواب پُوڇتو پڙيو۔ 47 جڏي مِنکون اُوئي رَي باتون ݾُڻئَي، تو او اُوئي رِي ݾمجھ ھانَ بݪتيون تي حيرون ھويا۔ 48 يسُوع نَي اوٿ جوئي اُوئي را ماتا پِتا حيرون ھويا ھانَ اُوئي رِي ما ڪھيو ڪہ، ”ڏيڪرا، ٿَي مھون ݾون اِيئون ڪيئون ڪيئو؟ ھُون ھانَ ٿارو بابو پريشون ھوئي ٿنَي جوتا پڙيا۔“ 49 پڻ يسُوع اُوئون نَي ڪھيو ڪہ، ”ٿي مھنَي ڪيئون جوتا پڙيا؟ ڪِي ٿونَي خبر ڪونھي ھتِي ڪہ مھنَي آپرَي پِتا رَي گھر ۾ ھوئڻ کپَي؟“ 50 پڻ يسُوع رِي اَي بات اُوئون رِي ݾمجھ ۾ ڪونھي آئِي۔