پويتر ڏِن رَي ݾارُو حُڪم
35
پَڇي مُوسيٰ اِسرائيلي قوم رَي ݾجَي مِنکون نَي ڀيڙا ڪري ڪھيو ڪہ، ”جڪو باتون منڻ رو حُڪم پرميشوَر ٿونَي ڏينو ھَي، او اَي ھَي، 2 ٿي ڇَي ڏِن آپرو ڪوم ڪريا، پڻ ݾاتوون ڏِن ٿونرَي ݾارُو پويتر ڏِن ھوشَي، ڪيونڪہ اَي پرميشوَر رو پويتر ڏِن آروم رَي ݾارُو ھَي۔ جي ڪُڻ اِيئي ڏِن تي آپرو ڪوم ڪرشَي، تو او ماريو جاشَي۔ 3 ٿي پويتر ڏِن رو آپرَي گھرون ۾ ڪيٿ ڀِي باݾڏي نِي ٻاݪيا۔“پويتر تنٻُو رَي ݾارُو دون
4 پَڇي مُوسيٰ اِسرائيلي قوم رَي ݾجَي مِنکون نَي ڪھيو ڪہ، ”جڪِي بات رو حُڪم پرميشوَر ڏينو ھَي، او اَي ھَي۔ 5 ٿي آپرِي ملڪيت ۾ پرميشوَر رَي ݾارُو دون لي آيا ڪرو۔ جڪو ڪئين ٿون ڪڍي ھَي اُوئي ۾ آپرِي خُوشِي ݾون پرميشوَر رَي ݾارُو لي آئو جھڙَي نمُونَي، ݾونو، چوندِي ھانَ پيتل، 6 آسموني، بيڱڻائي، راتا گاڀا، قيمتي ليلم، ٻڪريون را باݪ، 7 گھيٽون رِي راتِي رنگيوڙِي کال، لُڌڙون رِي کال، ٻَٻڙ رِي لڪڙِي، 8 ڏِيئون رو تيل، پويتر تيل ٺاوڻ رَي ݾارُو ھانَ ڌُوپ رَي ݾارُو ݾُرا مسالا، 9 واسڪوٽِي، سينَي بند رَي ݾارُو سُليموني پٿر ھانَ ھيرا موتي۔“
پويتر تنٻُو رَي ݾارُو سيمون رو حُڪم
10 پَڇي مُوسيٰ ڪھيو ڪہ، ”ٿون ۾ جڪو ݾُٺا ڪاريگر ھَي، او آئي او شيون ٺاوَي جڪَي رو حُڪم پرميشوَر ڏينو ھَي۔ 11 جھڙَي نمُونَي پويتر تنٻُو، اُوئي رو سيمون يعني اُوئي نَي ڍڪڻ رَي ݾارُو کال رو ترپال، اُوئي رَي درَي، فريم، ڏنڊا، اُوئي را ٿونڀا ھانَ پاگا، 12 وچن رِي ݾنڏُوڪ، اُوئي را ڏنڊا، ڍڪ ھانَ بِچ آݪو پڙدو، 13 ٽيبل ھانَ اُوئي نَي کڻڻ رَي ݾارُو ڏنڊا، اُوئي رو ݾجو سيمون ھانَ ايشوَر رَي نون ڪيئوڙَي ٻاٽَي، 14 اُجاݪَي رَي ݾارُو ڏِيئا راکڻ آݪِي شئي ھانَ اُوئي را ٺيڪر، ڏِيئون رو تيل، 15 ڌُوپ رِي جگھا ھانَ اُوئي نَي کڻڻ رَي ݾارُو ڏنڊا، پويتر ڪرڻ رو تيل، ڌُوپ ڪرڻ رَي ݾارُو مسالا، پويتر تنٻُو رَي در رو پڙدو، 16 ٻاݪڻ آݪَي ٻَليدون رِي جگھا، اُوئي رَي ݾارُو پيتل رِي جاݪِي، اُوئي نَي کڻڻ رَي ݾارُو ڏنڊا ھانَ اُوئي را ݾجائِي ٺيڪر، ھودِي ھانَ اُوئي رِي ڪُرسِي، 17 اوڱڻَي را پڙدا، ٿونڀا، اُوئون را پاگا ھانَ در رو پڙدو، 18 پويتر تنٻُو ھانَ اوڱڻَي رَي ڪناتون رَي کُونٽَي ھانَ اُوئي رَي ڏورَي۔ 19 او ڀرت ڀريوڙا پويتر گاڀا، جڪو ھارُون ھانَ اُوئي را ڏيڪرا پويتر تنٻُو ۾ پُوجاري رو ڪوم ڪرتَي بِݪا پيرشَي۔“
مِنکون رو پرميشوَر رَي ݾارُو دون ڏيوَڻ
20 اَي ݾُڻي اِسرائيلي مُوسيٰ ݾون بُوئا گيا۔ 21 اُوئون ۾ جڪون دِل ݾون دون ڏيوَڻ رو ݾوچو، او پويتر تنٻُو رَي ڪوم رَي ݾارُو، اُوئي رَي سيمون رَي ݾارُو ھانَ پُوجاريون رَي گاڀون رَي ݾارُو، دون لي آيا۔ 22 پرميشوَر نَي دون ڏيوَڻ رَي ݾارُو آڏمي ھانَ لُگائَي آپرِي خُوشِي ݾون ݾونَي را گيڻا لي آيا يعني ھار، باݪڪَي، ڪنگڻ، بينٽَي ھانَ ݾونَي را ٻيجا گيڻا۔ 23 جڪَي ڪڍي آسموني، بيڱڻائي، راتا ڏورا، قيمتي ليلم رو گاڀو ھانَ ٻڪريون را باݪ، گھيٽون رَي راتَي رنگيوڙَي کالون ھانَ لُڌڙون رَي کالون ھتَي، او لي آيا۔ 24 اِيئي ݾون ٽاݪ جڪَي چوندِي جون پيتل رو دون ڏيوَڻ رَي ݾارُو ڪيئو، او ڀِي پرميشوَر رَي ݾارُو لي آيا۔ جڪَي ڪڍي ٻَٻڙ رِي لڪڙِي ھتِي، او ڀِي لي آيا۔ 25 جڪو لُگائَي ڏورا ٺاوڻ رَي ڪاريگر ھتَي، او آسموني، بيڱڻائي ھانَ راتا ڏورا ٺائي لي آئَي 26 ھانَ جترَي لُگائَي ٻڪريون رَي باݪون ݾون ڏورا ٺاوڻ رَي ڪاريگر ھتَي، او آپرِي خُوشِي ݾون باݪون را ڏورا ٺائي لي آئَي۔ 27 جڪو ݾردار ھتا، او واسڪوٽِي ھانَ سينَي بند رَي ݾارُو سُليموني پٿر ھانَ ھيرا موتي لي آيا۔ 28 اِيئي ݾون ٽاݪ او ڏِيئون رو تيل، پويتر ڪرڻ آݪو تيل ٺاوڻ رَي ݾارُو ھانَ ڌُوپ ڪرڻ رَي ݾارُو ݾُرا مسالا لي آيا۔ 29 اِيئي نمُونَي اِسرائيلي قوم را ݾجائِي آڏمي ھانَ لُگائَي آپرِي خُوشِي ݾون پرميشوَر رَي ݾارُو دون لي آيا ڪہ او ڪوم ھوئي ݾگھَي، جڪَي رو پرميشوَر مُوسيٰ نَي حُڪم ڏينو ھتو۔
پويتر تنٻُو ٺاوڻ آݪا ڪاريگر
30 پَڇي مُوسيٰ اِسرائيلي قوم نَي ڪھيو ڪہ، ”ڌھيون ڏي ݾُڻو۔ پرميشوَر يھُودا رَي قبيلَي ݾون اُورِي رَي ڏيڪرَي ھانَ حُور رَي پوترَي بضلي ايل نَي چُونڊيو ھَي 31 ھانَ اُوئي نَي پويتر آتما ݾون ڏاھپ، ݾمجھ، عِلم ھانَ ھر نمُونَي رِي ڪاريگرِي ڏينِي ھَي 32 ڪہ او ݾونَي، چوندِي ھانَ پيتل رَي شيون نَي ڪاريگرِي ݾون ٺائي ݾگھَي 33 ھانَ ھيرا موتي لگاوڻ رَي ݾارُو گھڙَي ھانَ لڪڙِي رو ڪوم ݾُٺِي ڪاريگرِي ݾون ڪرَي۔ 34 پرميشوَر، بضلي ايل ھانَ دان رَي قبيلَي ݾون اخيسمڪ رَي ڏيڪرَي اھلياب نَي چُونڊيو ھَي ڪہ او ٻيجون نَي ڀِي ھر نمُونَي رو ھُنر ݾيکاوَي۔ 35 اُوئون ٻيئون نَي ھر نمُونَي رِي ڪاريگرِي رو ھُنر ڏينو ڪہ او اُوئون شيون نَي ٺائي ݾگھَي، يعني لڪڙِي رو ڪوم، ڀرت رو ڪوم جڪو آسموني، بيڱڻائي ھانَ راتَي ڏورون ݾون ھانَ قيمتي ليلم رَي گاڀَي تي ڪيئو جاشَي ھانَ گاڀا ٺاوڻ رو ڪوم، يعني ھر نمُونَي رَي ھُنر رو ڪوم ڪري نُوئو سيمون ٺائي ݾگھَي۔