36
اِيئي رَي ڪري بضلي ايل، اھلياب ھانَ ݾجائِي ڪاريگر، جڪون نَي پرميشوَر ڏاھپ ھانَ ݾمجھ ڏينِي ھَي، او پويتر تنٻُو رَي ݾجَي ڪوم نَي پرميشوَر رَي اُوئي حُڪم تي پُورو ڪرَي۔“ 2 اِيئي تي مُوسيٰ بضلي ايل، اھلياب ھانَ ݾجائِي ڪاريگر اَڻايا، جڪون نَي پرميشوَر ڏاھپ ھانَ ݾمجھ ڏينِي ھتِي، يعني او جڪو خُوشِي ݾون ڪوم ڪرڻ رَي ݾارُو تيار ھتا۔ 3 جڪو دون اِسرائيلي پويتر تنٻُو ٺاوڻ رَي ݾارُو لي آيا ھتا، او سيمون ڪاريگرون مُوسيٰ ݾون ليئو۔ پَڇي ڀِي مِنک آپرِي خُوشِي ݾون ھروز ݾاڪݪي توڻي مُوسيٰ ڪڍي دون لي آوتا۔ 4 پَڇي او ݾجائِي ڪاريگر، جڪو پويتر تنٻُو ٺاوڻ رو ڪوم ڪرتا پڙيا، او مُوسيٰ ڪڍي آيا 5 ھانَ اُوئي نَي ڪيوَڻ لاگا ڪہ، ”جڪو ڪوم پُورو ڪرڻ رَي ݾارُو پرميشوَر حُڪم ڏينو ھَي، اِسرائيلي اُوئي رَي ݾارُو ضرُورت ݾون وڌيڪ سيمون لي آوَي پڙيا۔“6 اِيئي تي مُوسيٰ حُڪم ڏينو ڪہ، ”پويتر تنٻُو ۾ اَي ايلون ڪرو ڪہ ھمَي ڪو ڀِي آڏمي جون لُگائِي پويتر تنٻُو رَي ݾارُو ٻيجو دون نِي لي آوَي۔“ اَي ݾُڻڻ ݾون پَڇي مِنک ٻيجو دون ڪونھي لي آيا۔ 7 ڪيونڪہ جڪو سيمون اُوئون نَي مِليو ھتو، او ݾجَي ڪوم نَي تيار ڪرڻ رَي ݾارُو نِي رُگو پُورو ھتو، پڻ تموم گھڻو ھتو۔
پويتر تنٻُو ٺاوڻ
8 پَڇي ڪوم ڪرڻ آݪَي ݾُٺَي ڪاريگرون پويتر تنٻُو نَي تيار ڪيئو۔ اُوئون قيمتي ليلم رو گاڀو، آسموني، بيڱڻائي ھانَ راتَي ڏورون را ڏَݾ پڙدا ٺاھيا۔ پَڇي اُوئون پڙدون تي ڪروبيون را ڦوٽُو ڀرت ڀريا۔ 9 ھر ھيڪ پڙدَي رِي لونٻائي ٻارھَي ميٽر ھانَ ويڪرائِي ٻي ميٽر ھتِي۔ ݾجائِي پڙدا ھيڪِي ماپ را ھتا۔ 10 اُوئون پونچ پڙدا لونٻائي ۾ ھيڪَي ٻيجَي ڀيڙا گنڍيا ھانَ باقي پونچ پڙدا ڀِي ݾاگي نمُونَي ھيڪَي ٻيجَي ڀيڙا گنڍيا۔ 11 پَڇي اُوئون لونٻائي آݪَي پاݾَي پڙدا مِلاوڻ رَي ݾارُو اُوئي موٽَي پڙدَي رَي ڪِنارَي تي آسموني رنگ رَي ڏورون ݾون گُڙکا ٺاھيا۔ اِيئي نمُونَي ٻيجَي پڙدَي رَي ڪِنارَي تي ڀِي اِيئوج ڪيئو۔ 12 پنجاھ گُڙکا ھيڪَي پڙدَي رَي ڪِنارَي تي ھانَ پنجاھ ٻيجَي پڙدَي رَي ڪِنارَي تي ٺاھيا۔ ٻيئون پڙدون را گُڙکا ھيڪَي ٻيجَي رَي اومھا ݾومھا ٺاھيا۔ 13 پَڇي اُوئون ݾونَي را پنجاھ ڪُنڊا ٺاھيا۔ اُوئون نَي پڙدون رَي گُڙکون ۾ لگائي ھانَ پَڇي ھيڪَي ٻيجَي ڀيڙا گنڍي ڇوڙيا۔ اِيئي نمُونَي ٻيئي پڙدا مِلائي ھيڪ موٽو پويتر تنٻُو ٺھيو۔
پويتر تنٻُو را پڙدا ھانَ ترپال ٺاوڻ
14 پَڇي اُوئون پويتر تنٻُو نَي ڍڪڻ رَي ݾارُو ٻڪريون رَي باݪون را اِگيارَي پڙدا ٺاھيا۔ 15 ھر ھيڪ پڙدَي رِي لونٻائي پوڻا چئوڏَي ميٽر ھانَ ويڪرائِي اندازن ٻي ميٽر ھتِي ھانَ او اِگيارَي پڙدا ھيڪِي ماپ را ھتا۔ 16 پَڇي اُوئون پونچ پڙدا ويڪرائِي ۾ ھيڪَي ٻيجَي ڀيڙا مِلايا ھانَ باقي ڇَي پڙدا ڀِي اُوئيج نمُونَي ھيڪَي ٻيجَي ڀيڙا مِلايا۔ 17 پنجاھ گُڙکا ھيڪَي موٽَي پڙدَي رَي ڪِنارَي تي ٺاھيا ھانَ پنجاھ ٻيجَي موٽَي پڙدَي رَي ڪِنارَي تي ٺاھيا۔ ݾجائِي گُڙکا ھيڪَي ٻيجَي رَي اومھا ݾومھا ھتا۔ 18 پَڇي اُوئون پيتل را پنجاھ ڪُنڊا ٺاھيا ھانَ اَي پڙدون رَي گُڙکون ۾ لگائي ھيڪَي ٻيجَي ڀيڙا مِلايا ڪہ پويتر تنٻُو ٺَئي جاوَي۔ 19 پَڇي اُوئون پويتر تنٻُو نَي ڍڪڻ رَي ݾارُو گھيٽون رَي راتَي رنگيوڙَي کالون ݾون ھيڪ ترپال ٺاھيو ھانَ ݾاگي نمُونَي لُڌڙون رَي کالون ݾون ھيڪ ٻيجو ترپال ٺاھيو۔
پويتر تنٻُو را فريم ٺاوڻ
20 پَڇي اُوئون پويتر تنٻُو رَي ݾارُو ٻَٻڙ رِي لڪڙِي را فريم ٺائي اُڀا ڪيئا۔ 21 ھر ھيڪ فريم رِي لونٻائي پنڌرَي ڦُٽ ھانَ ويڪرائِي ݾَوا ٻي ڦُٽ ھتِي۔ 22 اُوئون ھر ھيڪ فريم ۾ ٻي ٻي چُوڙون ٺائَي ھانَ پويتر تنٻُو را ݾجائِي فريم ݾاگي نمُونَي را ٺاھيا۔ 23 پَڇي پويتر تنٻُو رَي ڏکڻ رَي ݾارُو بيݾ فريم ٺاھيا۔ 24 اِيئون بيݾ فريمون ھيٺا چوندِي را چاليھ پاگا ٺاھيا، يعني ھر ھيڪ فريم ھيٺا ٻيئون چُوڙون رَي ݾارُو ٻي ٻي پاگا ٺاھيا۔ 25 پويتر تنٻُو رَي ٻيجَي پاݾَي، يعني اُتر ڏيݾا بيݾ فريم ٺاھيا۔ 26 پَڇي اُوئون رَي ݾارُو ڀِي چوندِي را چاليھ پاگا ٺاھيا، يعني ھر ھيڪ فريم رَي ھيٺا ٻي ٻي پاگا ٺاھيا۔ 27 پويتر تنٻُو رَي لاري، يعني اُوگوڻَي پاݾَي رَي ݾارُو ڇَي فريم ٺاھيا 28 ھانَ ٻي فريم پويتر تنٻُو رَي لارلَي پاݾَي رَي ٻيئون کُوڻون رَي ݾارُو ٺاھيا۔ 29 اَي ھيٺا ݾون مِلايوڙا ھتا ھانَ اِيئي نمُونَي ماٿلَي کُوڻَي توڻي ھيڪَي ڪڙَي ۾ مِلايا۔ اَي ٻيئي فريم ٻيئون کُوڻون رَي ݾارُو ٺاھيا۔ 30 اِيئي نمُونَي پويتر تنٻُو رَي لارلَي پاݾَي رَي ݾارُو آٺ فريم ٺاھيا ھانَ اُوئون رَي ݾارُو چوندِي را ݾوڙَي پاگا، يعني ھر ھيڪ فريم رَي ھيٺا ٻي ٻي پاگا ٺاھيا۔
31 پَڇي پويتر تنٻُو رَي اُتر ھانَ ڏکڻ ڏيݾا ٻَٻڙ رِي لڪڙِي را پونچ پونچ موٽا ڏنڊا ٺاھيا۔ 32 پويتر تنٻُو رَي لارلَي پاݾَي، يعني آٿوڻَي ڏيݾا فريمون رَي ݾارُو پونچ موٽا ڏنڊا ٺاھيا۔ 33 پَڇي تينون پاݾون رَي بِچ آݪَي ڏنڊَي رَي ھيڪَي پاݾَي نَي ٻيجَي پاݾَي رَي فريم ݾون مِلايو۔ 34 پَڇي اُوئون فريمون تي ݾونو چاڙھيو ھانَ ڏنڊا لگاوڻ رَي ݾارُو ݾونَي را ڪُنڊا ٺاھيا ھانَ اُوئون ماٿَي ݾونو چاڙھيو۔
پويتر تنٻُو رَي ݾارُو پڙدو ٺاوڻ
35 پَڇي اُوئون قيمتي ليلم رو ھيڪ پڙدو ٺاھيو، جڪَي را ڏورا آسموني، بيڱڻائي ھانَ راتا ھتا ھانَ اُوئي تي ݾُٺَي ڪاريگرون ڪروبيون را ڦوٽُو ڀرت ڀريو۔ 36 اُوئي پڙدَي نَي ٻَٻڙ رَي ٺاھيوڙَي ڏنڊون رَي چارون ٿونڀون تي ٽونگيو، جڪَي تي ݾونو چاڙھيوڙو ھتو۔ اُوئي را ڪُنڊا ݾونَي را ھتا ھانَ اُوئي رَي ݾارُو چوندِي را چار پاگا گھڙي ٺاھيا۔ 37 پَڇي اُوئون پويتر تنٻُو رَي در رَي ݾارُو قيمتي ليلم رو ھيڪ پڙدو ٺاھيو، جڪَي تي آسموني، بيڱڻائي ھانَ راتَي ڏورون ݾون ڀرت ڀريوڙو ھتو۔ 38 پَڇي اُوئي پڙدَي رَي ݾارُو ٻَٻڙ رِي لڪڙِي را پونچ ٿونڀا ھانَ ݾونَي را ڪُنڊا ٺاھيا ھانَ اُوئي ٿونڀون رَي ڇيڙَي ھانَ پٽيون تي ݾونو چاڙھيو۔ پَڇي اُوئون رَي ݾارُو پيتل را پونچ پاگا گھڙي ٺاھيا۔