پويتر تنٻُو ٺاوڻ رو حُڪم
26
پَڇي پرميشوَر مُوسيٰ نَي ڪھيو ڪہ، ”تُو پويتر تنٻُو رَي ݾارُو ڏَݾ پڙدا ٺائي۔ اَي پڙدا قيمتي ليلم رَي گاڀَي، آسموني، بيڱڻائي ھانَ راتَي ڏورون ݾون ٺاھيوڙَي گاڀون را ھووَي ھانَ اُوئون ماٿَي ݾُٺَي ڪاريگر ݾون ڪروبيون را ڦوٽُو ڀرت ڀرائي۔ 2 ھر ھيڪ پڙدَي رِي لونٻائي ٻارھَي ميٽر ھانَ ويڪرائِي ٻي ميٽر ھووَي ھانَ اَي ݾجائِي پڙدا ھيڪِي ماپ را ھووَي۔ 3 پَڇي پونچ پڙدا ويڪرائِي ۾ ھيڪَي ٻيجَي ݾون مِلايا جاوَي ھانَ باقي پونچ پڙدا ڀِي ݾاگي نمُونَي ھيڪَي ٻيجَي ݾون جوڙيا جاوَي۔ 4 لونٻَي پاݾَي پڙدون نَي گنڍڻ رَي ݾارُو ڪِناريون تي آسموني رنگ رَي ڏورون ݾون گُڙکا ٺائي۔ 5 پنجاھ گُڙکا ھيڪَي پڙدَي ۾ ھانَ پنجاھ ٻيجَي پڙدَي رَي ڪِنارَي تي ٺائي جڪو اُوئون نَي آپت ۾ مِلاوَي۔ ݾجائِي گُڙکا ھيڪَي ٻيجَي رَي اومھا ݾومھا ھووَي۔ 6 پَڇي ݾونَي را پنجاھ ڪُنڊا ٺائي ھانَ اَي ڪُنڊا پڙدون رَي گُڙکون ۾ لگائي، پَڇي پڙدا ھيڪَي ٻيجَي ݾون مِلائي۔ پَڇي او پويتر تنٻُو ھيڪ ھوئي جاشَي۔“پويتر تنٻُو را پڙدا ھانَ ترپال ٺاوڻ رو حُڪم
7 پَڇي پرميشوَر مُوسيٰ نَي ڪھيو ڪہ، ”تُو پويتر تنٻُو نَي ماٿَي ݾون ڍڪڻ رَي ݾارُو ٻڪريون رَي باݪون را اِگيارَي پڙدا ٺائي۔ 8 ھر ھيڪ پڙدَي رِي لونٻائي پوڻا چئوڏَي ميٽر ھانَ ويڪر ٻي ميٽر ھووَي ھانَ او اِگيارَي پڙدا ھيڪِي ماپ را ھووَي۔ 9 تُو پونچ پڙدا ويڪرائِي ۾ ھيڪَي ٻيجَي ڀيڙا مِلائي ھانَ باقي ڇَي پڙدا ڀِي ويڪرائِي ۾ ھيڪَي ٻيجَي ڀيڙا مِلائي ھانَ ڇھون پڙدو تنٻُو رَي ݾومھو ݾونٽي ٻيوَڙو ڪري۔ 10 تُو پنجاھ گُڙکا اُوئي پڙدَي رَي ڪِنارَي تي ٺائي، جڪو ٻاھر ݾون مِلايو جاشَي ھانَ پنجاھ گُڙکا پڙدَي رَي ڪِنارَي تي ٺائي، جڪو ٻاھر ݾون مِلايو جاشَي۔ 11 پَڇي پيتل را پنجاھ ڪُنڊا ٺائي اُوئون گُڙکون ۾ لگائي ھانَ تنٻُو مِلائي ڇوڙي ڪہ او ھيڪ ھوئي جاوَي۔ 12 تنٻُو رَي پڙدَي رو لٽڪيوڙو حِصو يعني آڌو پڙدو جڪو بچشَي، او پويتر تنٻُو رَي لارلَي پاݾَي لٽڪيوڙو رَي۔ 13 تنٻُو رَي پڙدون رِي لونٻائي رَي باقي حِصَي ۾ اَڌ ميٽر پڙدو اِيئا ݾون ھانَ اَڌ ميٽر پڙدو اُوئا ݾون پويتر تنٻُو رَي ٻيئي پاݾَي لٽڪيوڙو رَي ڪہ اُوئي تي ڍڪ آوَي۔ 14 تُو اِيئي پويتر تنٻُو نَي ڍڪڻ رَي ݾارُو گھيٽون رَي رنگيوڙَي راتَي کالون ݾون ھيڪ ترپال ٺائي ھانَ ݾاگي نمُونَي لُڌڙون رَي کالون ݾون ھيڪ ٻيجو ترپال ٺائي، پَڇي لُڌڙون رَي کالون رَي ٺاھيوڙَي ترپال ماٿَي گھيٽون رَي کالون ݾون ٺاھيوڙو ترپال راکي تنٻُو ڍڪي ڇوڙي۔“
پويتر تنٻُو را فريم ٺاوڻ رو حُڪم
15 پَڇي پرميشوَر مُوسيٰ نَي ڪھيو ڪہ، ”تُو پويتر تنٻُو رَي ݾارُو ٻَٻڙ رِي لڪڙِي رو فريم ٺائي، جڪو پويتر تنٻُو نَي اُڀو ڪرڻ ۾ مدد ڏَي ھانَ ڀيت رو ڪوم ڪرَي۔ 16 ھر ھيڪ فريم پنڌرَي ڦُٽ لونٻو ھانَ ݾَوا ٻي ڦُٽ ويڪرو ھووَي۔ 17 ھر ھيڪ فريم ۾ ٻي ٻي چُوڙون ھووَي، جڪَي رِي مدد ݾون فريم آپت ۾ مِلايا جاوَي۔ پويتر تنٻُو را ݾجائِي فريم اِيئي نمُونَي ٺائي۔ 18 پويتر تنٻُو رَي ݾارُو جڪو فريم تُو ٺائِي اُوئون ۾ بيݾ فريم تنٻُو رَي ڏکڻ ڏيݾا ھووَي۔ 19 اِيئي بيݾ فريمون ھيٺا چوندِي را چاليھ پاگا ٺائي، يعني ھر ھيڪ فريم ھيٺا اُوئي رَي ٻيئون چُوڙون ھيٺا ٻي ٻي پاگا ھووَي۔ 20 پويتر تنٻُو رَي ٻيجَي پاݾَي يعني اُتر ڏيݾا بيݾ فريم ھووَي۔ 21 اُوئون رَي ݾارُو ڀِي چوندِي را چاليھ پاگا ھووَي، يعني ھر ھيڪ فريم ھيٺا ٻي ٻي پاگا ھووَي۔ 22 پويتر تنٻُو لاري يعني آٿوڻَي پاݾَي ڇَي فريم ٺائي۔ 23 ݾاگي اُتر ڏيݾا پويتر تنٻُو رَي کُوڻون رَي ݾارُو ٻي فريم ٺائي۔ 24 اَي ھيٺا ݾون ماٿَي توڻي مِليوڙا ھووَي ھانَ ماٿلو ڇيڙو ھيڪَي ڪڙَي ۾ مِلائي، اَي ٻيئي فريم ھيڪ جھڙا ھووَي ھانَ اَي ٻيئون کُوڻون رَي ݾارُو ھوشَي۔ 25 اِيئي نمُونَي اَي آٺ فريم ھانَ چوندِي را ݾوڙَي پاگا ھووَي، يعني ھر ھيڪ فريم رَي ݾارُو ٻي پاگا ھووَي۔ 26 پَڇي تُو پويتر تنٻُو رَي ڏکڻ ھانَ اُتر آݪَي فريمون رَي ݾارُو ٻَٻڙ رِي لڪڙِي را پونچ پونچ موٽا ڏنڊا ٺائي۔ 27 ݾاگي نمُونَي پونچ موٽا ڏنڊا پويتر تنٻُو رَي لارلَي پاݾَي، يعني آٿوڻَي پاݾَي فريمون رَي ݾارُو ٺائي۔ 28 تينون پاݾون آݪا بِچ آݪا ڏنڊا پويتر تنٻُو رَي فريمون رَي ݾارُو ھيڪَي ڇيڙَي ݾون ٻيجَي ڇيڙَي توڻي ھووَي۔ 29 پَڇي تُو فريمون ماٿَي ݾونو چاڙھي ھانَ ڏنڊا لگاوڻ رَي ݾارُو ݾونَي را ڪڙا ٺائي اُوئون فريمون ۾ لگائي ھانَ ڏنڊون ماٿَي ڀِي ݾونو چاڙھي۔ 30 تُو پويتر تنٻُو ھُوبھُو اھڙو ٺائي جھڙو مھَي ٿنَي جبل تي بتايو ھتو۔“
پويتر تنٻُو رو پڙدو ٺاوڻ رو حُڪم
31 پَڇي پرميشوَر مُوسيٰ نَي ڪھيو ڪہ،”تُو قيمتي ليلم رو ھيڪ پڙدو ٺائي جڪَي را ڏورا آسموني، بيڱڻائي ھانَ راتا ھووَي۔ اُوئي تي ڪَي ݾُٺَي ڪاريگر ݾون ڪروبيون را ڦوٽُو ڀرت ڀرائي۔ 32 اُوئي پڙدَي نَي ݾونَ لاگوڙَي ٻَٻڙ رِي لڪڙِي رَي چار ٿونڀون تي ٽونگي ڇوڙي۔ اُوئي را ڪُنڊا ݾونَي را ھووَي ھانَ اُوئي رَي ݾارُو چوندِي را چار پاگا گھڙي ٺائي۔ 33 پڙدا ڪُنڊون ۾ لٽڪائي ھانَ وچن رِي ݾنڏُوڪ اوٿج پڙدَي ھيٺا لي جائي ھانَ اَي پڙدو ٿونرَي ݾارُو پويتر جگھا نَي ݾجون ݾون پويتر جگھا ݾون ڌار ڪرشَي۔ 34 پَڇي تُو ݾجون ݾون پويتر جگھا ۾ وچن رِي ݾنڏُوڪ تي اُوئي رو ڍڪ راکي۔ 35 ݾجون ݾون پويتر جگھا رَي پڙدَي رَي ٻاھر پويتر جگھا ۾ اُتر ڏيݾا دون رَي ٻاٽيون رو ٽيبل راکي ھانَ اُوئي رَي ݾومھو ڏکڻ ڏيݾا ڏِيئو راکڻ آݪِي شئي راکي۔
36 تُو پويتر تنٻُو رَي در رَي ݾارُو قيمتي ليلم رو ھيڪ پڙدو ٺائي، جڪَي را ڏورا آسموني، بيڱڻائي ھانَ راتا ھووَي ھانَ جڪَي ماٿَي ڀرت ڀريوڙو ھووَي۔ 37 اُوئي پڙدَي رَي ݾارُو ٻَٻڙ رِي لڪڙِي را پونچ ٿونڀا ٺائي ھانَ اُوئون رَي ڇيڙَي تي ݾونو چاڙھي ھانَ اُوئون را ڪُنڊا ݾونَي را ھووَي۔ تُو اُوئون رَي ݾارُو پيتل را پونچ پاگا گھڙي ٺائي۔“