پُوجاريون را پويتر گاڀا ٺاوڻ
39
جون پرميشوَر مُوسيٰ نَي حُڪم ڏينو ھتو، اُوئيج نمُونَي ڪاريگرون پويتر تنٻُو ۾ شيوادارون رَي ݾارُو آسموني، بيڱڻائي ھانَ راتَي ڏورون ݾون ڀرت ڀريوڙا گاڀا ٺاھيا ھانَ ھارُون رَي ݾارُو ڀِي پويتر گاڀا ٺاھيا۔ 2 اُوئون آسموني، بيڱڻائي ھانَ راتَي ڏورون ݾون قيمتي ليلم ھانَ ݾونَي رِي واسڪوٽِي ٺائِي۔ 3 ݾُٺَي ڪاريگرون ݾونَي رَي نِنڪَي پترَي ٺائَي، پَڇي اُوئون ݾون پتلڪَي تارون باڍي ھانَ اُوئون ݾون آسموني، بيڱڻائي ھانَ راتا ڏورا مِلائي قيمتي ليلم رَي گاڀَي تي ݾُٺَي نمُونَي ڀرت ڀريو۔ 4 پَڇي اُوئون واسڪوٽِي نَي جوڙڻ رَي ݾارُو ٻي پٽَي ٺائَي ڪہ واسڪوٽِي را ٻيئي ڪونڌا آپت ۾ ملَي۔ 5 اُوئي ݾون ٽاݪ ڪاريگرِي ݾون ڪرڪ رو پَٽو ٺاھيو۔ اُوئي تي ڀِي واسڪوٽِي آݪِي ڪار ڪوم ڪيئو ھانَ اُوئي نَي آسموني، بيڱڻائي، راتَي ڏورون، قيمتي ليلم ھانَ ݾونَي رو ٺاھيو۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔ 6 اُوئون ٻي سُليموني پٿر ليئا ھانَ او ݾونَي رَي کونون ۾ لگايا۔ پَڇي اُوئون تي بيٽِي آݪِي ڪار اِسرائيل رَي ٻارھون ڏيڪرون را نون لِکايا۔ 7 پَڇي او ٻيئي پٿر واسڪوٽِي رَي ٻيئون ڪونڌون رَي پَٽيون تي لگايا ڪہ اَي پٿر اِسرائيل رَي ڏيڪرون رِي يادگيرِي رَي ݾارُو ھووَي۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔سينو بند ٺاوڻ
8 پَڇي ھيڪَي ݾُٺَي ڪاريگر سينو بند ٺاھيو، جڪو واسڪوٽِي آݪِي ڪار آسموني، بيڱڻائي، راتَي ڏورون، قيمتي ليلم ھانَ ݾونَي رو ٺاھيوڙو ھتو۔ 9 او سينو بند چوڪُنڊو ھتو۔ اُوئون اُوئي نَي ٻِٽو ڪري ٺاھيو ھانَ او لونٻو ھانَ ويڪرو نَئو نَئو اِنچ ھتو۔ 10 پَڇي اِيئي تي چارون قطارون ۾ ھيرا موتي لگايا۔ پيلڪِي قطار ۾ نارنگِي، عقيق، پُکراج ھانَ لال۔ 11 ٻيجِي قطار ۾ زمرد، نيلم ھانَ ھيرا ھتا۔ 12 تيجِي قطار ۾ زرقُون، عقيق ھانَ ياقُوت ھتا۔ 13 چوٿِي قطار ۾ فيروزا، سُليموني پٿر ھانَ يشب۔ اَي ݾجائِي قيمتي پٿر ݾونَي رَي کونون ۾ لگايا۔ 14 اَي ھيرا موتي اِسرائيل رَي ٻارھون ڏيڪرون رَي نون تي ھتا۔ ھر ھيڪ قيمتي پٿر تي بيٽِي آݪِي ڪار ھر ھيڪ قبيلَي رو نون لِکيوڙو ھتو۔ 15 پَڇي سينَي بند تي ڏورِي جھڙَي ٺاھيوڙَي نِج ݾونَي رَي ٻي ݾوڪڙڪَي لگائَي۔ 16 پَڇي اُوئون ݾونَي را ٻي کونا ھانَ ٻي ڪڙا ٺاھيا ھانَ ٻيئي ڪڙا سينَي بند رَي ٻيئون ڇيڙون تي لگايا۔ 17 پَڇي ٻيئي زنجيرون ݾونَي رَي اُوئون ڪڙون ۾ گھاتئَي، جڪو سينَي بند رَي ڇيڙَي تي ھتَي۔ 18 پَڇي ٻيئي زنجيرون، ٻيئون ئِي ڇيڙون رَي ٻيئي کونون ۾ مِلائي واسڪوٽِي را ٻيئي ڪونڌا ڇيڙا تي آپت ۾ مِلايا۔ 19 پَڇي اُوئون ݾونَي را ٻي ٻيجا ڪڙا ٺائي اُوئون نَي سينَي بند رَي ٻيئون ڇيڙون رَي ڪِنارَي تي لگايا، جڪو واسڪوٽِي مئين ھتا۔ 20 اُوئون ݾونَي را ٻي ٻيجا ڪڙا ٺائي اُوئون نَي واسڪوٽِي رَي ٻيئون ڪونڌون رَي ݾوملَي پاݾَي مئين لگايا، جيٿ ݾون واسڪوٽِي گڍيوڙِي ھتِي ڪہ او واسڪوٽِي ڪاريگرِي ݾون ٺاھيوڙَي پٽَي رَي ماٿَي ھووَي۔ 21 پَڇي اُوئون سينو بند لي اُوئي رَي ڪڙون نَي واسڪوٽِي رَي ڪڙون ڀيڙو ھيڪ آسموني رنگ رِي ڏورِي ݾون اھڙَي نمُونَي ٻونڌيو ڪہ او سينو بند ڍيلو ھوئي واسڪوٽِي ݾون ڌار نِي ھووَي۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔
پرميشوَر رَي پُوجاريون را ٻيجا گاڀا ٺاوڻ
22 پَڇي اُوئون واسڪوٽِي ھيٺا پيرڻ رَي ݾارُو ݾجوئي آسموني رنگ رو جُبو ٺاھيو۔ 23 اُوئي رو گݪو بِچ ۾ ھتو ھانَ اُوئي رَي چوڌاري ڀرت ڀريو ڪہ او ڦاٽَي نِي۔ 24 پَڇي اُوئون اُوئي رِي چاݪ رِي گھير رَي چوڌاري آسموني، بيڱڻائي ھانَ راتَي ڏورون ݾون ڏاڙھُون ٺاھيا۔ 25 پَڇي اُوئون نِج ݾونَي رَي ٽوڪرڪَي ٺائَي ھانَ اُوئون نَي جُبَي رِي گھير تي چوڌاري ڏاڙھُون رَي بِچ ۾ لگائَي۔ 26 اِيئي نمُونَي جُبَي رِي ݾجِي گھير ۾ ڏاڙھُون ھانَ ݾونَي رَي ٽوڪرڪَي ھيڪَي ٻيجَي لاري لگائَي۔ اَي جُبو ھارُون نَي پرميشوَر رِي شيوا ڪرڻ رَي ٽيم پيرڻو ھتو۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔
27 پَڇي اُوئون ھارُون ھانَ اُوئي رَي ڏيڪرون رَي ݾارُو قيمتي ليلم را جُبا ٺاھيا۔ 28 اِيئي نمُونَي اُوئون پوتيا ھانَ ݾُٿڻون قيمتي ليلم ݾون ٺائَي۔ 29 پَڇي قيمتي ليلم، آسموني، بيڱڻائي ھانَ راتَي ڏورون ݾون ڀرت ڀريوڙو ڪرڪ رو پَٽو ڀِي ٺاھيو۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔
30 پَڇي اُوئون نِج ݾونَي ݾون خاص پٽِي ٺائِي ھانَ اُوئي تي بيٽِي آݪِي ڪار اَي لِکايو ڪہ، ”پرميشوَر رَي ݾارُو چُونڊيوڙو۔“ 31 اُوئي نَي پوتئي ڀيڙو ماٿَي ٻونڌڻ رَي ݾارُو اُوئي ۾ ھيڪ آسموني رنگ رِي ڏورِي لگائِي۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔
پويتر تنٻُو رَي ݾارُو سيمون ڏيوَڻ
32 اِيئي نمُونَي پويتر تنٻُو رو ݾجو ڪوم پُورو ھويو ھانَ اِسرائيلي قوم ݾجو ڪئين اِيئوج ڪيئو، جون پرميشوَر مُوسيٰ نَي حُڪم ڏينو ھتو۔ 33 پَڇي او مِنک پويتر تنٻُو رو ݾجو سيمون مُوسيٰ ڪڍي لي آيا، يعني پويتر تنٻُو ھانَ اُوئي رو ݾجو سيمون جڪَي ۾ ڪڙا، فريم، ڏنڊا، ٿونڀا، پاگا، 34 گھيٽون رَي راتَي رنگيوڙَي کالون رو ترپال ھانَ لُڌڙون رَي کالون رو ترپال ھانَ بِچ آݪو پڙدو، 35 وچن رِي ݾنڏُوڪ، ڏنڊا، ڍڪ، 36 ٽيبل ھانَ اُوئي را ݾجائِي ٺيڪر ھانَ ايشوَر رَي نون ڪيئوڙَي ٻاٽَي۔ 37 نِج ݾونَي رِي ڏِيئا راکڻ آݪِي شئي ھانَ اُوئي تي راکڻ آݪو ڏِيئو، اُوئي را ݾجائِي ٺيڪر ھانَ ڏِيئا ٻاݪڻ آݪو تيل، 38 ݾونَي رِي ڌُوپ ڪرڻ آݪِي جگھا، پويتر ڪرڻ رو تيل، ݾُرو مسالو ھانَ پويتر تنٻُو رَي در رو پڙدو، 39 پيتل چاڙھيوڙو ٻاݪڻ آݪَي ٻَليدون رِي جگھا، پيتل رِي جاݪِي، اُوئي را ڏنڊا ھانَ اُوئي را ݾجائِي ٺيڪر، ھودِي ھانَ اُوئي رِي ڪُرسِي، 40 اوڱڻَي را پڙدا، اُوئون را ٿونڀا، پاگا، اوڱڻَي رَي در را پڙدا ھانَ اُوئي رَي ڏورَي، کُونٽَي ھانَ پويتر تنٻُو رَي شيوادارون را ݾجائِي سيمون 41 ھانَ پويتر جگھا رِي شيوا رَي ݾارُو ڀرت ڀريوڙا گاڀا، يعني ھارُون پُوجاري را پويتر گاڀا ھانَ اُوئي رَي ڏيڪرون را گاڀا، جڪون نَي پيري اُوئون نَي پرميشوَر رِي شيوا رو ڪوم ڪرڻو ھتو۔ 42 اِسرائيلي قوم ݾجو ڪئين اِيئوج ڪيئو، جون پرميشوَر مُوسيٰ نَي حُڪم ڏينو ھتو۔ 43 مُوسيٰ ڏيٺو ڪہ اُوئون او ݾجو ڪوم اِيئوج ڪيئو ھَي، جون پرميشوَر اُوئون نَي حُڪم ڏينو ھتو۔ پَڇي مُوسيٰ اُوئون نَي برڪت ڏينِي۔