ٻاݪڻ آݪَي ٻَليدون رِي جگھا ٺاوڻ
38
پَڇي بضلي ايل ٻَٻڙ رِي لڪڙِي ݾون ٻاݪڻ آݪَي ٻَليدون رِي جگھا ٺائِي۔ او ݾاڍِي ݾات ڦُٽ لونٻِي ھانَ ݾاڍِي ݾات ڦُٽ ويڪرِي ھتِي۔ او چوڪُنڊِي ھتِي ھانَ او ݾاڍِي چار ڦُٽ اُونچِي ھتِي۔ 2 بضلي ايل اُوئي رَي چارون کُوڻون تي ݾِينگ ٺاھيا۔ ݾِينگ ھانَ ٻَليدون رِي جگھا اَي ٻيئي ھيڪَي ٽُڪڙَي را ٺاھيا۔ پَڇي اُوئي تي پيتل چاڙھيو۔ 3 پَڇي اُوئي ٻَليدون رِي جگھا رو ݾجو سيمون، يعني راک رَي ݾارُو تگارَي، بيلچا، ٿاݪ، موݾ ٽونگڻ آݪَي ݾيکون ھانَ ٽونڊون رَي ݾارُو ٺيڪر ٺاھيا۔ او ݾجو سيمون پيتل رو ھتو۔ 4 اُوئي ٻَليدون رِي جگھا رَي چوڌاري ڪِنارون ھيٺا پيتل رِي جاݪِي اھڙَي نمُونَي لگائِي ڪہ او بِچ توڻي پُگتِي۔ 5 اُوئي پيتل رِي جاݪِي رَي چارون کُوڻون ۾ لگاوڻ رَي ݾارُو چار ڪڙا گھڙيا ڪہ ڏنڊا لگاوڻ رِي جگھا ھووَي۔ 6 پَڇي اُوئي ٻَٻڙ رِي لڪڙِي را ڏنڊا ٺاھيا ھانَ اُوئون تي پيتل چاڙھيو۔ 7 اُوئي او ڏنڊا ٻَليدون رِي جگھا رَي ٻيئون پاݾون رَي ڪڙون ۾ گھاتيا ڪہ او کڻيجَي۔ او ٻَليدون رِي جگھا لڪڙِي رَي تڪتون رِي ٺائِي ھانَ مئين ݾون کالِي ھتِي۔8 جڪو شيوادار لُگائَي پويتر تنٻُو رَي در تي شيوا رو ڪوم ڪرتَي، اُوئون ڪڍي پيتل رَي آريݾَي ھتَي۔ اُوئون آريݾيون ݾون بضلي ايل پيتل رِي ھودِي ھانَ ڪُرسِي ٺائِي۔
پويتر تنٻُو رو اوڱڻو ٺاوڻ
9 پَڇي بضلي ايل پويتر تنٻُو رو اوڱڻو ٺاھيو ھانَ اُوئي رَي ڏکڻ ڏيݾا قيمتي ليلم رَي گاڀَي رِي ڪنات ٺائِي ھانَ ݾجَي ڪناتون مِلائي ڇئيتالي ميٽر لونٻَي ھتَي۔ 10 اُوئون رَي ݾارُو بيݾ ٿونڀا ھانَ پيتل را بيݾ پاگا ٺاھيا ھانَ ٿونڀون را ڪُنڊا ھانَ پٽَي چوندِي رَي ٺائَي۔ 11 اُتر ڏيݾا ڪناتون رِي لونٻائي ڇئيتالي ميٽر ھتِي ھانَ اُوئون رَي ݾارُو بيݾ ٿونڀا ھانَ بيݾ پيتل را پاگا ٺاھيا ھانَ ٿونڀون را ڪُنڊا ھانَ پٽَي چوندِي رَي ٺائَي۔ 12 اُوگوڻَي پاݾَي ݾجَي ڪناتون مِلائي ٻاوِي ميٽر لونٻَي ھتَي ھانَ اُوئون رَي ݾارُو ڏَݾ پاگا ٺاھيا ھانَ ٿونڀون را ڪُنڊا ھانَ پٽَي چوندِي رَي ٺائَي۔ 13 آٿوڻَي پاݾَي ڪناتون اندازن ٽيوِي ميٽر لونٻَي ٺائَي۔ 14 پويتر تنٻُو رَي در رَي ھيڪَي پاݾَي اندازن ݾات ميٽر رو پڙدو ھانَ اُوئي رَي ݾارُو تين ٿونڀا ھانَ تين پاگا ٺاھيا۔ 15 ٻيجَي پاݾَي ڀِي اِيئوج ھتو۔ اوڱڻَي رَي در رَي ٻيئي پاݾَي اندازن ݾات ݾات ميٽر را پڙدا ٺاھيا ھانَ اُوئون رَي ݾارُو تين تين ٿونڀا ھانَ تين تين پاگا ٺاھيا۔ 16 اوڱڻَي رَي چوڌاري ݾجائِي پڙدا قيمتي ليلم را ٺاھيا۔ 17 ٿونڀون را پاگا پيتل را ھانَ اُوئون را ڪُنڊا ھانَ پٽَي چوندِي رَي ٺائَي ھانَ ٿونڀون رَي اُونچلَي ڇيڙَي تي چوندِي چاڙھِي۔ اوڱڻَي را ݾجائِي ٿونڀا چوندِي رَي پَٽيون ݾون مِلايا۔ 18 پَڇي اُوئي اوڱڻَي رَي در را پڙدا قيمتي ليلم ݾون ٺاھيا، اُوئون تي ݾُٺَي ڪاريگر ݾون آسموني، راتَي ڏورون ݾون ڀرت ڀرايو۔ اُوئي رِي ويڪر نَئو ميٽر ھانَ لونٻائي اوڱڻَي رَي پڙدَي رَي حِساب ݾون ٻي ميٽر ھتِي۔ 19 اُوئون رَي ݾارُو چار ٿونڀا ھانَ چار پيتل را پاگا ٺاھيا۔ اُوئون را ڪُنڊا چوندِي را ٺاھيا ھانَ ٿونڀون رَي اُونچلَي ڇيڙَي تي چوندِي لگائِي ھانَ اُوئون رَي پٽَي ڀِي چوندِي رَي ٺائَي۔ 20 پويتر تنٻُو رَي اوڱڻَي رَي چوڌاري ݾجَي کُونٽَي پيتل رَي ٺائَي۔
پويتر تنٻُو ٺاوڻ آݪو سيمون
21 پويتر تنٻُو ۾ اِستعمال ھوئڻ آݪو سيمون گِڻڻ رَي ݾارُو، مُوسيٰ، لاوِي قبيلَي رَي مِنکون نَي حُڪم ڏينو ڪہ اَي ڪوم ھارُون پُوجاري رَي ڏيڪرَي اِتمر رَي ڪيوَڻ تي ڪيئو جاوَي۔ 22 يھُودا قبيلَي ݾون حُور رَي پوترَي ھانَ اُورِي رَي ڏيڪرَي بضلي ايل او ݾجو ڪئين ٺاھيو، جڪَي نَي ٺاوڻ رو حُڪم پرميشوَر مُوسيٰ نَي ڏينو ھتو۔ 23 دان قبيلَي ݾون اخيسمڪ رو ڏيڪرو اھلياب ڀِي اُوئي ڪوم ۾ ڀيڙو ھتو، او واڍو ھانَ چِتر رَي ڪوم رو ڪاريگر ھتو۔ او قيمتي ليلم رَي گاڀَي تي آسموني، بيڱڻائي ھانَ راتَي ڏورون ݾون ڀرت ڀرڻ رو ڪاريگر ھتو۔
24 او ݾجو ݾونو جڪو پويتر تنٻُو رَي ݾارُو مِنکون دون ۾ ڏينو ھتو، اُوئي رو وزن پويتر تنٻُو رَي ماپ رَي حِساب ݾون اندازن پنجويھ مَڻ ھتو۔ 25 اِسرائيلي قوم رَي گِڻيوڙَي دون رِي چوندِي پويتر تنٻُو رَي ماپ رَي حِساب ݾون اندازن پنجاسِي مَڻ ھتِي۔ 26 بيݾ ݾال جون اُوئي ݾون وڌيڪ عُمر آݪا جڪو گِڻيجا، او ݾجائِي مِنک ڇَي لَک تين ھزار پونچ ݾئو پنجاھ ھتا۔ اِيئي حِساب ݾون ھر ھيڪ مِنک پويتر تنٻُو رِي ماپ رَي حِساب ݾون ھيڪ ھيڪ تولو چوندِي دون ۾ لي آيو۔ 27 اِيئي پنجاسِي مَڻ چوندِي ݾون پويتر تنٻُو رَي بِچ آݪَي پڙدَي را ٿونڀا پاگا ٺاھيا۔ اُوئون ۾ ݾئو پاگا ٺاھيا، يعني ھر ھيڪ پاگو چوٽِي ݾير رو ٺھيو۔ 28 بچوڙِي ٽيھ ݾير چوندِي ݾون ٿونڀون را ڪُنڊا ھانَ پٽَي ٺئَي ھانَ ٿونڀون ماٿَي ڇيڙَي تي ڀِي چوندِي لگائِي۔ 29 دون ڏينوڙو پيتل اندازن ݾاڍِي سٺ مَڻ ھتو۔ 30 اِيئي ݾون پويتر تنٻُو رَي در را پاگا ھانَ ٻَليدون رِي جگھا ھانَ اُوئي رَي ݾارُو جاݪِي ھانَ ݾجو سيمون ݾاگي پيتل ݾون ٺاھيجو۔ 31 اوڱڻَي رَي چوڌاري ٿونڀون را پاگا ھانَ اوڱڻَي رَي در رَي ٿونڀون را پاگا ھانَ پويتر تنٻُو رَي کُونٽَي ھانَ اوڱڻَي رَي چوڌاري کُونٽَي ڀِي ݾاگي پيتل ݾون ٺاھيجَي۔