پويتر تنٻُو لگاوڻ
40
پَڇي پرميشوَر مُوسيٰ نَي ڪھيو ڪہ، 2 ”پيلڪَي مھيڻَي رِي پيلڪِي تاريخ رو تُو پويتر تنٻُو لگائي۔ 3 پَڇي ݾجون ݾون پويتر جگھا ۾ وچن رِي ݾنڏُوڪ راکي ھانَ اُوئي آگھي بِچ آݪو پڙدو ٽونگي ڇوڙي۔ 4 پَڇي ٽيبل نَي پويتر جگھا ۾ لي جائي ھانَ اُوئي تي راکڻ آݪو ݾجو سيمون ترتيب ݾون راکي ھانَ ڏِيئا راکڻ آݪِي شئي ڀِي اُوئي ۾ لي جائي ھانَ اُوئي رو ڏِيئو ٻاݪي ڇوڙي۔ 5 ݾونَي رِي ٺاھيوڙِي ڌُوپ رِي جگھا نَي وچن رِي ݾنڏُوڪ رَي ݾومھو راکي ھانَ تنٻُو رَي در رو پڙدو لگائي۔ 6 پَڇي ٻاݪڻ آݪَي ٻَليدون رِي جگھا نَي پويتر تنٻُو رَي در ݾومھو راکي۔ 7 پَڇي ھودِي نَي پويتر تنٻُو ھانَ ٻَليدون رِي جگھا رَي بِچ ۾ راکي ھانَ اُوئي ۾ پوڻي ڀري۔ 8 پَڇي اوڱڻَي رَي چوڌاري ڪناتون لگائي ھانَ اوڱڻَي رَي در تي پڙدو لگائي۔9 پَڇي تُو پويتر ڪرڻ رو تيل لي پويتر تنٻُو ھانَ اُوئي رَي مئيلَي ݾجَي سيمون تي ڇَٽي ھانَ اِيئي نمُونَي تنٻُو ھانَ اُوئي رو ݾجو سيمون پويتر تيل ݾون پويتر ڪري، پَڇي او پويتر ھوئي جاشَي۔ 10 پَڇي تُو ٻاݪڻ آݪَي ٻَليدون رِي جگھا ھانَ اُوئي رو ݾجو سيمون پويتر تيل ݾون پويتر ڪري، تو او پويتر ھوئي جاشَي۔ 11 پَڇي تُو ھودِي ھانَ اُوئي رِي ڪُرسِي ڀِي پويتر تيل ݾون پويتر ڪري۔
12 پَڇي ھارُون ھانَ اُوئي رَي ڏيڪرون نَي پويتر تنٻُو رَي در تي لائي اُوئون نَي پوڻي ݾون جھيلاڙي۔ 13 پَڇي ھارُون نَي پويتر گاڀا پيرائي ھانَ اُوئي رَي ماٿَي تي پويتر تيل ڍوڙي اُوئي نَي پويتر ڪري ڪہ او مھارِي شيوا رو ڪوم ڪرڻ آݪو پُوجاري ھووَي۔ 14 پَڇي اُوئي رَي ڏيڪرون نَي جُبا پيرائي۔ 15 پَڇي جون اُوئون رَي ٻاپ نَي پويتر ڪيئو ھتو، اِيئوج اُوئون نَي ڀِي پويتر ڪري ڪہ او مھارا شيواداري ھووَي۔ اُوئون را ݾجائِي اولاد ڀِي پويتر تيل ݾون پويتر ڪري ڪہ او ھميشا مھارِي شيوا ڪرڻ آݪا پُوجاري ھووَي۔“ 16 مُوسيٰ ݾجو ڪئين اِيئوج ڪيئو، جون پرميشوَر حُڪم ڏينو ھتو۔
17 پَڇي ٻيجَي ݾال رَي پيلڪَي مھيڻَي رِي پيلڪِي تاريخ رو پويتر تنٻُو لگايو گيو۔ 18 مُوسيٰ پويتر تنٻُو نَي اُڀو ڪرڻ رَي ݾارُو پاگا لگايا ھانَ اُوئون ۾ فريم راکيا۔ پَڇي اُوئون ۾ ڏنڊا لگايا ھانَ ٿونڀا اُڀا ڪيئا۔ 19 پَڇي مُوسيٰ پرميشوَر رَي حُڪم تي پويتر تنٻُو رَي ماٿَي پڙدا لگائي اُوئي ماٿَي ترپال ڍاڙيو۔
20 پَڇي مُوسيٰ پرميشوَر رَي حُڪمون آݪَي ٻيئي پٿر آݪَي تڪتَي لي وچن رِي ݾنڏُوڪ ۾ راکئَي۔ پَڇي ڏنڊا ݾنڏُوڪ رَي ڪڙون ۾ لگايا ھانَ ڍڪ ݾنڏُوڪ ماٿَي راکيو۔ 21 پَڇي اُوئي وچن رِي ݾنڏُوڪ نَي پويتر تنٻُو ۾ ݾجون ݾون پويتر جگھا ۾ راکِي ھانَ بِچ آݪا پڙدا لگايا۔ مُوسيٰ اِيئوج ڪيئو، جون پرميشوَر حُڪم ڏينو ھتو۔
22 پَڇي اُوئي پويتر تنٻُو ۾ ٽيبل نَي بِچ آݪَي پڙدَي رَي ٻيجَي پاݾَي اُتر ڏيݾا راکيو 23 ھانَ اُوئي ماٿَي ٻاٽَي پرميشوَر آگھي ترتيب ݾون راکئَي۔ مُوسيٰ اِيئوج ڪيئو، جون پرميشوَر اُوئي نَي حُڪم ڏينو ھتو۔
24 پَڇي اُوئي پويتر تنٻُو ۾ ٽيبل رَي ݾومھو ڏکڻ ۾ ڏِيئا راکڻ آݪِي شئي راکِي 25 ھانَ پرميشوَر آگھي ڏِيئا ٻاݪيا۔ مُوسيٰ اِيئوج ڪيئو، جون پرميشوَر حُڪم ڏينو ھتو۔
26 پَڇي اُوئي ݾونَي رِي ٺاھيوڙِي ڌُوپ ڪرڻ آݪِي جگھا نَي پويتر تنٻُو ۾ پڙدَي رَي ݾومھو راکِي۔ 27 پَڇي اُوئي تي ڌُوپ رَي ݾارُو ݾُرا مسالا ٻاݪيا۔ مُوسيٰ اِيئوج ڪيئو، جون پرميشوَر حُڪم ڏينو ھتو۔
28 پَڇي اُوئي پويتر تنٻُو رَي در تي پڙدو لگايو۔ 29 پَڇي اُوئي پويتر تنٻُو رَي در رَي ݾومھو ٻاݪڻ آݪَي ٻَليدون رِي جگھا راکِي ھانَ اُوئي تي ٻاݪڻ آݪو ٻَليدون ڪيئو ھانَ ڏوڻون رو دون ڏينو۔ مُوسيٰ اِيئوج ڪيئو، جون پرميشوَر حُڪم ڏينو ھتو۔
30 پَڇي اُوئي ھودِي نَي پويتر تنٻُو ھانَ ٻَليدون رِي جگھا رَي بِچ ۾ راکِي ھانَ اُوئي ۾ پوڻي ڀريو۔ 31 پَڇي ھودِي ۾ مُوسيٰ، ھارُون ھانَ اُوئي رَي ڏيڪرون آپرا ھاٿ پگ ڌويا۔ 32 جڏي ڀِي او پويتر تنٻُو ۾ جاوتا جون ٻَليدون رِي جگھا رَي نيڙا جاوتا، تو او آپرا ھاٿ پگ ڌوئي جاوتا۔ اُوئون اِيئوج ڪيئو، جون پرميشوَر مُوسيٰ نَي حُڪم ڏينو ھتو۔
33 پَڇي اُوئي پويتر تنٻُو ھانَ ٻَليدون رِي جگھا رَي چوڌاري اوڱڻَي رَي ݾارُو ڪنات لگائِي ھانَ اوڱڻَي ۾ آوڻ جاوڻ رَي ݾارُو در تي پڙدو لگايو۔ اِيئي نمُونَي مُوسيٰ اَي ڪوم پُورو ڪيئو۔
پويتر تنٻُو ماٿَي پرميشوَر رو اُجاݪو
34 پَڇي اِيئون ھويو ڪہ باڏݪ پويتر تنٻُو نَي ڍڪي ڇوڙيو ھانَ پويتر تنٻُو پرميشوَر رَي اُجاݪَي ݾون ڀريجي گيو۔ 35 مُوسيٰ پويتر تنٻُو ۾ جائي ڪونھي ݾگھيو، ڪيونڪہ باڏݪ اُوئي نَي ڍڪيو ھتو ھانَ پويتر تنٻُو پرميشوَر رَي اُجاݪَي ݾون ڀريجوڙو ھتو۔ 36 اِسرائيلي قوم رَي ݾجَي سفر ۾ اِيئوج ھوتو رھيو ڪہ جڏي او باڏݪ پويتر تنٻُو ݾون اݪگو ھوتو، تو او آگھي جاوتا۔ 37 پڻ جي او باڏݪ پرھو ڪونھي ھوتو، تو اُوئي ڏِن سفر ڪونھي ڪرتا، جترِي توڻي او باڏݪ پرھو نِي ھوتو۔ 38 پرميشوَر رو اَي باڏݪ ݾجِي اِسرائيلي قوم آگھي ھانَ اُوئون رَي ݾجَي سفر ۾ ڏِن رو پويتر تنٻُو رَي ماٿَي ريتو ھانَ رات رو اُوئي ۾ باݾڏي ٻَݪتو۔