11
Ngom kaːyírsulang, kapé ngo Kiristomé kaːyírsuladuːji.Kumdom Tukku Uːrumsunam
2 Ngom nolu appíːloi méːpaːnam légaːpélaː ngo nolum okkom luyírbikaːji édémbulum méːpagmaːpé ibomnam légaːpé ngo nolum luyitsudo.a 3 Émpigeːla ngo nolum kintoka émna méːnamdé milbong tani appí:lok tupkudé Kiristobí, odokké néːlok tupkudé milboːdé, odokké Kiristoké tukkudé Ruːnébí. 4 Oko milboːtaniːdé bík tupkom uːrumsugeːla kumnammanggom lungorém ludoji, bí bík tupkudém anyisumonam agerém-gerdag. 5 Odokké oko néːdé bík tupkudém uːrumsumaːpé kumnamanggom lungorém ludoji, bí bík tupkudém anyisunam agerém-gerdag, édé bí bík tupkudém gidlatsunam kísapé idag. 6 Néːngkoné bík tupkudém u:rumsumaːmílo, bí bík dumídém seppaksutok; odokké néːngkolokképé dumíd seppagnamdéːla gitkutsunamdé anyisunam agermílo, bí bík tupkudém u:rumsupé lagidag. 7 Mílbong taniːkoné bík tupkudém u:rumsupé lagimang, kapilaːné bí Ruːnéké moimaːdéːlaː unjígdé; émpigeːla néːdé milboːtaniːlok unjígdé.b 8 Kapéné milbongé néːlokké lenmang, émpigeːla néːngé milboːlokké lenka;c 9 éddomang milbongém néː légaːpé ruːmangai, émpigeːla néːngém milboː légaːpé ruːtagai.d 10 Édémpila odok légaːpé, odokké tayéng-yaːmekídíːdok légaːpé néːngkídíːdé buluk tupkudo ilang-gílangkané kanggotko léːpé idag. 11 Kappéidaggom, Ruːtumkolo, néːngé milboːlokké aísuampé duːlaːmang, odokké édémíːpé milbongésin néːlokké aísuampé duːlaːmang. 12 Kapé néːbí milboːlokké lenkan, édémíːpé milboːbíːsin néːlok onamé. Émpigeːla appíngéi Ruːnékolokké lendung.
13 Aíém ankaːsula kaːsutokː Néːngé tupkudém uːrumsumaːpé Ruːnémé kumnamdé kumjubdagyé? 14 Moːpíséi aíé nolum luyírmaːnei milboːtaniːlokké dumíddé araimílo, édé bím anyisumodag émna, 15 émpigeːla néːngkolok dumíddé araimílo, édé bík unjígdé. Kapéné arainé dumíddém bím takkomsunam légaːpé bitag. 16 Émpigeːla séːkai sidok tayéːlo lukérkaːmínsulímílo, ngo sémpéna luduboné, sidok ruːyipé ngolukké akon ilot-gíloddé kamang, odokké Ruːnémé méngkésunné édémbulumpé imang.
Ruːtumké Dobonam
(Moti 26.26-29; Mark 14.22-25; Luk 22.14-20)
17 Odokké bélé kéíkké luyírnamkídíːbo, nolum luyitsupénam ngokké okkosin kamang, kapéné noluk gíkumsunamdé ainampé imapé aimanampé idung. 18 Lugépoːdanna, ngo tatpaːsudung édílo nolu kumkapé gíkumsudoji, odo noluk araːlo angukaːmínsunammé kadung, édé agomdé arodung émna ngo méːdag. 19 Édésin arro, noluk araːlo angu angukaːmínsupaːyé odopag nolukkolok séːkobulu Ruːnéké tolígnamméji édém kinyé. 20 Édílo nolu gíkumsudoji, nolu Ruːtumké Dobonamdém domang, 21 kapilaːné édílo nolu dodon, nolu séːkosin séːkomésin toyamaːpé dodag. Séːkai kénola duːpagdag séːkai tíngursula duːdag. 22 Nolukké aíké doko-tíngko okumé kamanei? Émmamílo nolu Ruːnéké kumgomna opannékídíːdém anyisumodunei? Ngo nolum okko émna luyyan? Sidok légaːpé ngo nolum luyitsupéi? Édíloːsin luyitsumaːyéǃ
23 Ngo okkom nolum bikonsutagji édé appíːdém ngo Ruːtumkolok paːtagː Ruːtum Jisubí, bím yadla-kopagdo yumédo, bí pitangko laːsato, 24 odokké édílo bí aipai bitoji, bí édém pentunggeːla luto, "Séː ngok adiné, okodé noluk légangéipé, ngom méːpaːnam légaːpé sém iyartílang." 25 Odokké dodag lédupé édémíːpé bí batiːdém tísanggeːla luto, "Séː batisé ngok íːilo anupé pesubinamdé; odokké édíloi nolu sém tíːdoji, ngom méːpaːnam légaːpé sém tíːlang."
26 Kapéné édíloi nolu séː pitaːsém doyéji odokké batiːso tíːyéji, bík gílatkumaːdopé nolu Ruːtumké sinamdém lugoːbidag. 27 Odok-légaːpé, séːkobí Ruːtumké pitaːsémna batiːsok tíːnamdém arré kamapé doyé-tíːyéji, bím Ruːtumké adindogla íːdok kekonpé imurém imang émna sabmapé mémaːyé. 28 Pitaːdém domangoːdapélaː batiːdok tíːmangoːdapé taniːkoné bí bík aíém ankaːsupoːpé lagidag. 29 Kapéné séːkaibí Ruːtumké adindém kangkinmaːpé domítíːmílo bí bík aíké tayéːlo kébaːbaːpénamko dolíktíːlíksudag. 30 Édémpé ilayém noluk araːdok bojéko sipere-taperéla kiladun, odokké nolukkolok asutkopé singapkan. 31 Ngolu aíém ankaːsumílo, ngoluk tayéːlo Ruːnébí kébangém baːmaːyé. 32 Édílo ngolum Ruːtumbí kébangém baːdoji, odo ngolum agom-tadné taniːpé imodag, édémpila séː moːpísok lédílo ngolum lupagmaːyé.