Yalok Binam Amankídíng
12
Ajonkídínga, yalok binam amankídíːdok tayéːdok agomdém ngo nolum kinmomaːpé duːmolíːmang.2 Nolu édílo Ruːnémé kinmangaji, odo kapéikapéi séːkaibí nolum gommaːné moimangkídíːdoːpé gíboruːdaggai édém nolu kindag.a 3 Odok-légaːpé ngo nolum lubidung, Ruːnéké yaloki agom lunné séːkosin sémpé lumaːyé, "Jisubí pelígnam paːnéko," odokké Angunné Yalokimaːmílo, séːkosin "Jisubí Ruːtumbí" émna lulamang.
4 Bangkí bangkíné amané dung, émpigeːla Yalodé akkongko. 5 Bangkí bangkípé ageré kadung, émpigeːla Ruːtumdé akkongko. 6 Bangkí bangkíné gernamé kadung, émpigeːla Ruːnébí akkongko séːko ager appíːdém taniːappíːloi gerdag. 7 Suːpag appíngké ainamém léngkanam légaːpé amaném bitag. 8 Séːkaimé Yaloki méːjoːnam doːyíng, odokké édé Yalludokki akoném doːyíng kinnan amaném bitag. 9 Édé Yalludokki akoném mé:tinsunamém, odokké édé Yalludokki ésaːmolangkunan amaném bitag. 10 Odokké séːkaimé méːpílaːmaːnam ager-gerradopé, akoném lungor-ludopé, akoném yallom kangkinnaném, akoném bangkí-bangkín gomugém lulaːdopé, odokké akoném édé gomukkídíːdém lusonsubilanan amaném bitag. 11 Édé ager appíːdém Yalo atéroːdé gertag odokké bí séːkoméi okkom bilídagji bulum appíngém aték atékpé bitag.
Adin-amírdé Akkongko Légílaggídé Bojérungko
12 Légílaggíngé bojéko kadaggom adin-amírdé akkongko; odokké adin-amírdok légílaggídé bojéruːdaggom, bulu adin-amír akkongko. Édémíːpé Kiristokoloːsin akkongko.b 13 Kapéné ngolu appíngé adin-amír akkongkoloːpé Yalo akkongki baptisém laːtag- ngolu Jiudigom, Giriggom, pagbogom pagbomanggom- ngolum appíngém Yalo akkodém tíːdopé Ruːnébí bitag.
14 Adin-amírsém légílaggíng akkongki momang émpigeːla bojérungkokki motag. 15 Alédé lumílo, "Ngo alakpé imanam légaːpé, ngo amírdo katémang," émgom odok légaːpé bí amírdo katémapé imang. 16 Odokké yeruːdé lumílo, "Ngo amikpé imanam légaːpé, ngo amírdo katémang," émgom odok légaːpé bí amírdo katémapé imang. 17 Adin-amír appíːdé amik apiroːnamkaːmílo, kapé amírdé tadbeglaːyen? Adin-amír appíːdé yerungoːpé inamkaːmílo,kapé amírdé nampaːnalayen? 18 Émpigeːla Ruːnébí aropé bík aíké méngkamdémpé adin-amírsok légílaggíkídíːdém buluk duːpékodo duːmotag. 19 Légílaggí appíːdé akkongkonamkaːmílo, okolo amírdé duːyan? 20 Édémpimap, légílaggíngé bojérungko, émpigeːla adin-amírdé akkongko.
21 "Ngo nom lagimang," émna amigdé alagdém lulamangǃ Odokké "Ngo nom lagimang," émna tupkudé alédém lulamangǃ 22 Odok kekonpé, adin-amírdok oko légílaggíkídíːdém lagigammang émna méːdoji, édébulumaːmílo ageréi kamang. 23 Odokké oko légílaggíkídíːdém ngolu arrékayamang émna méːdoji, bulumíng kínggíyaːpé ménggésuyaːdag, odokké ngoluk léngkannamaːnam légílaggíkídíːdém kínggíːpé mosíːdo. 24 Ngoluk léngkannaːnam légílaggíkídíːdém aipé mosíːnammém lagimang. Émpigeːla Ruːnébí adin-amírdok sappagnam légílaggíkídíːdém ménggésunam bila édémpéi ruːtag. 25 Édémpila adin-amírdo angu-angusupé lagima, émpigeːla akoné akoném kaːsímosíːngkaːmínsupé lagidag. 26 Légílaggí aːko kimílo, odok lédílo appíngéi kimíndag; légílaggíkoné ménggésunamko paːmílo; odok lédílo appíːdéi méːpomíndag.
27 Suːpag nolu Kiristoké adin-amírdé, odokké nolu appíngéi odok légílaggíko. 28 Ruːnébí tolígdanpoːla mélígnamkídíːdém kumgodo tolíkpoːtag, odok lédupé lungor-lunékídíːdém, odokké luyírnékídíːdém, odok lédupé méːpílaːmaːnam ager-gernékídíːdém, odokké ésaːmokulaːnan amankanékídíːdém, odokké ammem idumsunékídíːdém, ilang-gílangkanékídíːdém, odokké bangkí-bangkín gomukpé lunékídíːdém.c 29 Bulu appíːdé mélígnamméi? Bulu appíːdé lungor-lunnéi? Bulu appíːdé luyírnéi? Bulu appíːdé méːpílaːmaːnam ager-gerdagnei? 30 Appíngké ésaːmolangkunan amané duːnei? Appíngé angun gomukpé ludangnei? Appíngé lusonsubidagnei? 31 Émpigeːla aiyaːné amankídíːdém paːpé émna méːla duːlang.
Odokké ngo nolum suːpag aiyapagyaːné lambédém léngkanbiyé.